1 እስ ጋላስ ሳምሶን ፍልስፄመ ካታማ ግድዳ ጋዛ ካታማ ብስ፤ ያን እስ ላይማ ማጫስ በእድ ኢራ አቃናዉ እ ሶ ገልስ። 2 ጋዛ ካታማ አሳይ ሳምሶን ኤንታ ካታማ ይዳይሳ ስእድ ኬꬃ ተቅድ ቃማ ኩመꬅ ናግሸ ካታማ ፐንግያን አቅዶሶና። ሳእ ዎንትኮ ዎꬋና ግድ ናግሸ ዶና ጱቆና አቅዶሶና። 3 ሽን ሳምሶን ያን ግድ ብላሄ ጋካናዉ ጋምእስ። ብላሄ ደንድድ ካታማ ድርሳ ፐንግያ፥ ፐንግያ ኦይክያ ናምኡ ቱሳታነ ኮበ ብራታታ እስፈ ሾድስ። ሄ ኡባ ሀሸን ቶክድ ከብሮናፐ ስንꬃ ባጋራ ደእያ ዙማ ሁጰ ከስስ።

4 ጉꬃ ዎደፐ ጉየ ሳምሶን ሶረቃ ዛንጋራን ደእያ እስ ዳልሎ ጌተትያ ማጫስዉ ዶስስ። 5 ፍልስፄመ ሀላቃት ኢኮ ብድ፥ “ኔኒ እያ ጭማዳ፥ ሄ ዎልቃ ኡባ እ አዉፐ ደምያኮነ ኑኒ እያ ዋት ፆንድ ቃቻናዉ ዳንዳእያኮ ኦይቻ። ኑኒ እሶይ እሶይ ነዉ ታማነ እስ ክሎ ግራመ ብራ ሳንትመ እማና” ያግዶሶና።

6 ሄሳ ግሾ ዳልላ ሳምሶናኮ፥ “ሀይሳ መላ ምኖተꬅ ነ አዉፐ ደምዳኮ፥ ሀያና ታዉ ኦዳርኪ። አስ ነና ቃችድ ዋትድ ነ ዎልቃ ዳቡርሳናዉ ዳንዳኢ?” ያጋሱ።

7 ሳምሶን፥ “ታና ላፑን እርፃ ዳፎራ አስ ቃችኮ ዳቡራዳ ሀራ አሳዳ ሀናና” ያግድ ዛርስ።

8 ፍልስፄመ ሀላቃት ዳልላስ ላፑን እርፃ ዳፎታ ኤህን እያ ሳምሶና ቃቻሱ። 9 ቆልአን አሰ ቆታ ዎꬃዳ፥ “ሳምሶና፥ ፍልስፄመት ይዶሶና” ጋዳ ፄጋሱ። ሽን ሻሎይ ታም ኦይክን ዱፀረተይሳዳ ዳፎታ ዱሰረꬅ የግስ። ሀእካ እያ ምኖተꬃ ፁራይ ኤረትቤና።

10 ዳልላ ሳምሶናኮ፥ “ኔኒ ታና ኤያ ኦꬃሳ፤ ነ ታዉ ዎርዶ ኦዳዳሳ። ሀእካ ነና ዋት ቃቻናዉ ዳንዳኤትያኮ ሀያና ታዉ ኦዳ” ያጋሱ።

11 እ ዛሪድ፥ “አስ ጎኤትቦና ኦራꬃ ዎዶሮን ታና ቃችኮ ዳቡራዳ ሀራ አሳዳ ሀናና” ያግስ።

12 ዳልላ ኦራꬃ ዎዶሮ ኤካዳ ሳምሶና ቃቻሱ። ቆልአን አሰ ቆታ ዎꬃዳ፥ “ሳምሶና፥ ፍልስፄመት ይዶሶና” ያጋሱ። ሽን እ ዎዶሩዋ ባ ቀስያፐ ሻሎዳ ዱሰረꬅ የግስ።

13 ዳልላ ሳምሶናኮ፥ “ሀእ ጋካናዉ ነ ታና ጭማሳ፤ ኔኒ ታዉ ዎርዶ ኦዳዳሳ። ሀእካ ነና ዋትድ ቃቻናዉ ዳንዳኤትያኮ ሀያና ታዉ ኦዳ” ያጋሱ።

እ ዛሪድ፥ “ታ ሁጵያ ላፑን ብናና ዳꬃታ ቃጭናራ ጋꬃዳ፥ ቁፃራዳ ዳድኮ፥ ታኒ ዳቡራዳ ሀራ አሳዳ ሀናና” ያግስ።

14 ሄሳፈ ጉየ፥ ሳምሶን ꬍስክዳሽን፥ ዳልላ እያ ሁጵያ ላፑን ብናና ዳꬃታ ቃጭናራ ጋꬃዳ ዶቃሱ። ሄሳፈ ጉየ፥ “ሳምሶና፥ ፍልስፄመት ይዶሶና” ያጋሱ። እ ꬍስኮፈ ባርክድ፥ ባ ብናናይ ዶቀትድ ቶለትዳ በሳፈ ሾድ ኤክስ።

15 ያትን እያ፥ “ነ ዎዛናይ ታራ ዴና፥ ‘ዎይጋዳ ታ ነና ዶሳይስ’ ጋይ? ሄꬑ ቶሆ ታና ጭማዳሳ። ኔኒ ሀ ምኖተꬃ አዉፐ ደምያኮ ታዉ ኦዳ” ያጋሱ። 16 ጋላስ ጋላስ ኦይቻዳ እ ሀይቆ አሞታና ጋካናዉ እያ ዋይሳሱ።

17 ዉርሰꬃን ሳምሶን፥ “ታ አየ ኡሎፐ ዶምን ታኒ ፆሳስ ዱማትዳ ናዝራወ ግድዳ ግሾ፥ ታ ሁጰ ብናናይ ሜደትድ ኤረና። ታ ብናናይ ሜደትኮ፥ ታ ዎልቃይ ታፐ ኤከትን፥ ታኒ ዳቡራዳ ሀራ አሳዳ ሀናና” ያግድ፥ ባ ፁራ ኡባ እዉ ኦድስ።

18 ባ ዎዛናን ደእያባ ኡባ እ ኦድዳይሳ ዳልላ በእዳ ዎደ፥ “ባ ዎዛናን ደእያባ ኡባ ታዉ ኦድዳ ግሾ፥ አነ እስ ቶሆ ስሚድ ዪተ” ያጋዳ ፍልስፄመ ሀላቃታስ ኪታ የድን ኤንቲ ብራ ኤክድ ኢኮ ይዶሶና። 19 ዳልላ ሳምሶና ባ ዎድረ ቦላ ꬍስክሳዳ እስ አስ ፄግን ይድ፥ እያ ሁጵያ ላፑን ዳꬃ ብናና ሜድን እያ ዎልቃይ እያፐ ꬋይስ። ሄሳፈ ጉየ፥ እያ ዋይሶ ዶማሱ። 20 እያ፥ “ሳምሶና፥ ፍልስፄመት ይዶሶና” ያጋሱ።

እ ꬍስኮፈ ባርክድ፥ ካሰይሳዳ ዱሰረꬃዳ ባና ያግድ ቆፕስ፤ ሽን ጎዳይ እያፐ ሻከትዳይሳ ኤርቤና።

21 ፍልስፄመት እያ ኦይክዳፐ ጉየ፥ እያ ናምኡ አይፈታ ዎጭ ከስዶሶና። ጋዛ ካታማ ኤፍድ ናሰ ብራታ ሳንꬃላታን ቃችድ ቃሾ ኬꬃን ካꬅ ጋጭስዶሶና። 22 ኤንቲ እያ ሁጵያ ብናና ሜድዳፐ ጉየ፥ ብናናይ ስሚድ ዶሎ ዶምስ።

23 ፍልስፄመ ሀላቃት፥ “ኑ ፆሳይ ኑ ሞርክያ ሳምሶና ኑ ኩሸን አꬅድ እሚስ” ያግድ ባንታ ፆሳ ዳጎናስ ያርሾ ያርሻናዉነ ኡፋይታናዉ እስፈ ሺቅዶሶና።

24 አስ ኡባይ እያ በእዳ ዎደ፥ “ኑ ቢታ ꬋይስዳነ ኑፐ ዳሮታ ዎꬍዳ ኑ ሞርክያ፥ ኑ ፆሳይ ኑ ኩሸን አꬅድ እሚስ” ያግድ ባንታ ፆሳ ጋላትዶሶና። 25 ኤንቲ ዳሮ ኡፋይትዳ ግሾ፥ “ዱርድ ኑና ኡፋይሳና መላ ሳምሶና ፄግተ” ያግዶሶና። ሳምሶና ቃሾ ኬꬃፈ ፄግድ ኤህን፥ እ ኤንታ ስንꬃን ዱርዳፐ ጉየ ቱሳታፐ ግዶን ኤስዶሶና።

26 ሳምሶን ባ ኩሽያ ኦይክድ ካለꬅያ ናኣኮ፥ “ታኒ ኤንታን ዘምፓዳ ኤቃና መላ ኬꬃ ቶክዳ ቱሳታ ታና ኦይꬃ” ያግስ። 27 ኬꬃ ግዶን አደይነ ማጫስ፥ ሄሳዳካ ፍልስፄመ ሀላቃት ኡባይ ኩምድ ደኦሶና። ሳምሶን ዱርሽን፥ ፖቅያ ቦላ ኡትድ በእያ ሄꬑ ሙኩሉ ግድያ አደይነ ማጫስ በኦሶና።

28 ሄ ዎደ ሳምሶን፥ “አቤት ኡባ ሃርያ ጎዳዉ፥ ታና ቆፓርክ። አቤት ፆሳዉ፥ ፍልስፄመት ታ ናምኡ አይፈታ ከስዳ ግሾ፥ ሀሎ ከያና መላ ታና እስ ቶሆ ምንꬃርክ!” ያግድ ጎዳ ዎስስ። 29 ሳምሶን ኬꬃ ቶክዳ ግዶ ቱሳታ ናምኣካ ኦይክስ። እሱዋ ኡሻቻ ኩሸን፥ እሱዋ፥ ሀድርሳ ኩሸን ኦይክዳፐ ጉየ፥ 30 “ታኒ ፍልስፄመታራ እስፈ ሀይቃና” ያግድ ዋስስ። ባዉ ደእያ ዎልቃ ኡባን ሱግን፥ ኬꬃይ ሀላቃታ ቦላነ ጋርሳን ደእያ አሳ ኡባ ቦላ ኩንድስ። ሳምሶን ፓፃ ደእሸ ዎꬍዳ አሳፐ ሀይቅሸ ዎꬍዳ አሳይ ዳሮ።

31 እያ እሻትነ እያ ዳቦት ኡባይ ይድ፥ እያ አሀ ኤክዶሶና። ፆርአፈነ ኤሽታኦላፐ ግዶን እያ አዋ ማኑሄ ዱፉዋን ሞግዶሶና። ሳምሶን እስራኤለ ላታሙ ላይꬅ አይስስ።