1 ጎዳፐ ኤርምያሳኮ ይዳ ቃላይ ሀይሳ፦ 2 “ፆሳ ኬꬃ ፐንግያን ኤቃዳ፥ ሀይሳዳ ያጋዳ አዋጃ። ህንተኖ፥ ጎዳ ጎይናናዉ ሀ ፐንገታራ ገልያ ይሁዳ አሳዉ፥ ኡባይ ጎዳ ቃላ ስእተ! 3 ኡባፈ ዎልቃማ ጎዳይ፥ እስራኤለ ፆሳይ ሀይሳዳ ያጌስ፦ ህንተ ኦግያነ ህንተ ኦሱዋ ላምተ፤ ታ ህንተና ሀ በሳን ዎꬃና። 4 ‘ሀይስ ፆሳ ኬꬅ! ሀይስ ፆሳ ኬꬅ! ሀይስ ፆሳ ኬꬅ’ ያግድ ጭሞ ቃላን አማነቶፍተ። 5 ህንተ፥ ህንተ ኦግያነ ኦሱዋ ቱማ ላምኮ፥ እሶይ እሱዋስ ፅሎ ፕርድኮ፥ 6 በተ አሳ፥ ይኦ ናይታነ አምኤታ ናቆና አግኮ፥ ሀ በሳን ፅሎ አሳ ሱꬁ ጉሶና አግኮነ፥ ህንተ ቆሄቶናዳ ሀራ ፆሳታ ጎይኖና አግኮ፥ 7 ታ ህንተ ማይዛታስ መርናዉ እምዳ ቢታን ህንተና ዎꬃና። 8 ሽን ህንተ ማዶና ጭሞ ቃላን አማነተታ” ያጌስ።

9 “ህንተ ካይሶቴታ፥ ዎꬌታ፥ ላይማተታ፥ ዎርዶ ጫቅድ ማርካቴታ፥ ባኣለ ኤቃስ ያርሾ ያርሼታ፥ ሀይሳፈ ካሰ ህንተ ኤሮና ሀራ ፆሳታ ጎይነታ። 10 ያትድ፥ ታ ሱንꬃን ፄገትዳ ፆሳ ኬꬃ ይድ፥ ታ ስንꬃን ኤቅድ፥ ‘ኑኒ ሳሮ’ ያጌታ። ሽን ሀ ሻትያ ኦሱዋ ኡባ ኦꬄታ 11 ታ ሱንꬃን ፄገትዳ ሀ ፆሳ ኬꬃይ ህንተዉ ፓንጋት ቆሰትያ ጎንጎሎ ግደትዬ? ህንተ ኦꬅያባ ኡባ ታኒ ታ አይፈን በአስ” ያጌስ።

12 “ታኒ ታ ሱንꬃይ ደእያ በሲ ኦꬃዳ ኮይሮ ዶርዳ፥ ሴሎ ቢተ። ታ አሳ እስራኤለ ኢታተꬃ ግሾ፥ ታኒ ሄ በሳ ዋትዳኮ በእተ። 13 ህንተ ሀ ኡባ ኦꬅያ ዎደ ታ ህንተዉ ዛራ ዛራ ኦዳስ፤ ሽን ስኦና እፅደታ። ታ ህንተና ፄጋስ፤ ሽን ታዉ ኮይበከታ። 14 ሄሳ ግሾ፥ ታ ሴሎ ቦላ ኦꬅዳይሳዳ ሀይሳን ህንተ አማነትያ፥ ታ ሱንꬃን ፄገትዳ ሀ ፆሳ ኬꬃ ቦላ፥ ህንተዉነ ህንተ ማይዛታስ እምዳ ሀ በሳ ቦላ ሄሳዳ ኦꬃና። 15 ህንተ ዳቦታ፥ ኤፍሬማ ኮቻ ታ ድግዳይሳዳ ታ ስንꬃፈ ህንተናካ ድጋና” ያጌስ።

16 “ኤርምያሳ፥ ታ ስኦና ግሾ፥ ሀ አሳስ ዎሶፋ፤ ኤንታ ግሾ ታና ኦይቾፋ ዎይኮ ዋሶፋ፤ ኤንታዉ ጋናቶፓ። 17 ኤንቲ ይሁዳ ካታማታንነ የሩሳላመ ኦገታን ኦꬅያባይ አይበኮ በእክዬ? 18 ናይት ምꬅ ምፆሶና፤ አዋት ታማ ኤꬆሶና፤ ማጫሳት፥ ‘ሳሎ ካዊዉ’ ጌተትያ ኤቄስ ኡይꬅ ኡካናዉ ꬊለ ሙኑቆሶና። ኤንቲ ታና ይሎያናዉ ኡሻ ያርሾ ሀራ ፆሳታስ ጉሶሶና። 19 ኤንቲ ሀይሳ ኦይ ቱማ ታና ቆሀናሰዬ? ሀይሳን ቆሄትድ ዬላታናይ ኤንታ ግዶኮናዬ?” ያጌስ ጎዳይ።

20 ሄሳ ግሾ፥ ኡባ ሃርያ ጎዳይ ሀይሳዳ ያጌስ፦ “ታ ሀንቆይ ሀ በሳ ቦላ፥ አሳ ቦላነ መህያ ቦላ፥ ጋደን ደእያ ምꬃ ቦላነ ቢታን ደእያ ካꬃ ቦላ ጉካና፤ እ ኤፃና፥ ቶአናዉ ዳንዳኤና።”

21 ኡባፈ ዎልቃማ ጎዳይ፥ እስራኤለ ፆሳይ ሀይሳዳ ያጌስ፦ “ህንተ ፁሳ ያርሹዋ ሀራ ያርሾታ ቦላ ጉጅድ፥ አሹዋ ህንተዉ ሚተ። 22 ታ ህንተ ማይዛታ ግብፀ ቢታፈ ከስያ ዎደ፥ ፁሳ ያርሾባነ ሀራ ያርሾታባ ኦዳብከ ዎይኮ ኪታብከ። 23 ሽን ታ ኤንታኮ፥ ታዉ ኪተትተ፤ ታ ህንተ ፆሳ ግዳና፤ ህንተካ ታ አሰ ግዳና። ህንተዉ እንጀታና መላ ታ ህንተና ኪትያ ኦገ ኡባን ሄመትተ። 24 ሽን ኤንቲ ታና ስኦና ዎይኮ ታዉ በሰ እሞና እፅዶሶና። ኤንቲ ባንታ ኢታ ዎዛና ቆፋ ካልድ ብዶሶና፤ ስን ባናይሳ አግድ ጉየ ብዶሶና። 25 ህንተ ማይዛት ግብፀፈ ከይዳ ዎደፐ ዶምድ ሀች ጋካናዉ ታ አይለታ፥ ናበታ ዎንታ ዎንታ ህንተዉ ኪታስ። 26 ሽን ህንተ ታና ስኦና ዎይኮ ታዉ በሰ እሞና እፅደታ። ህንተ ሞርግያ ምንꬅደታ፤ ህንተ አዋታፐ አꬍድ ኢታባ ኦꬅደታ።

27 “ሀ ኡባ ነ ኤንታዉ ኦዳ፤ ሽን ኤንቲ ነ ግያባ ስኦኮና። ነ ኤንታ ፄጋና፤ ሽን ኤንቲ ኮዮኮና። 28 ሄሳ ግሾ፥ ኤርምያሳ፥ ነ ኤንታኮ ሀይሳዳ ያጋ፦ ሀ ካዎተꬃይ ባ ጎዳ ፆሳ ኪተቶና ዎይኮ እያ ዞርያ ስኦና ካዎተꬅ። ቱም ꬋይስ፤ ቱም ኤንታ እንፃርሳን ዴና። 29 ህንተ ሁጵያ ሜድድ ዎራ ሆልተ። ጎዳይ ባና ይሎይዳ የለታ እፅዳ ግሾነ የግድ አግዳ ግሾ አይብካ ባይና ꬎቃ ዙማ ቦላ ከይድ ዘሌልተ” ያግስ።

30 “ይሁዳ አሳይ ታ ስንꬃን ኢታባ ኦꬅዶሶና። ኤንቲ ታ ሱንꬃን ፄገትዳ ፆሳ ኬꬃ ቱንሳናዉ ታኒ እፅያ ኤቃታ ኤህድ እያ ግዶን ዎꬅዶሶና። 31 ኤንቲ ባንታ አደ ናይታነ ማጫ ናይታ ታማን ፁግድ ያርሻናዉ፥ ህኖማ ዛንጋራን ቶፈታ ጌተትያ ያርሾ በሳ ግምብዶሶና። ሽን ሄስ ታ ኤንታ ኪታቦናባነ ታ ቆፋን ባይናባ። 32 ሄሳ ግሾ፥ ሄ በሳይ ህኖማ ዛንጋራ ዎይኮ ቶፈታ ጌተትድ ፄገተይስ አትድ፥ ሹካ ዛንጋራ ያገትድ ፄገታና ዎደይ ያና። ሞግያ በሲ ባይና ግሾ፥ ቶፈት ኤንቲ ባንታ አሀ ሞግያ በሲ ግዳና። 33 ሄ ዎደ ሄ አሳ አሀይ ሳሎ ካፎታስነ ሳአ ዶአታስ ካꬅ ግዳና፤ ኤንታ ጎዳና አስካ ባዋ። 34 ታኒ የꬅ፥ ኡፋይስነ ያጋኖ ግርስ ይሁዳ ካታማታንነ የሩሳላመ ኦገታን ስኤቶናዳ ኦꬃና፤ ቢታይ ባይሳ ግዳና” ያጌስ ጎዳይ።