1 “ሄ ዎደ ይሁዳ ካዎታ መቀꬃይ፥ ሀላቃታ መቀꬃይ፥ ካህነታ መቀꬃይ፥ ናበታ መቀꬃይነ የሩሳላመን ደእያ አሳ መቀꬃ ኡባይ ዱፎፐ ማፀትድ ከያና። 2 ኤንቲ ሲቅዳ፥ ኪተትዳ፥ ካልዳ፥ ዞረ ኦይችዳነ ጎይንዳ አዋ፥ አጌናነ ሳሎ ፆልንቶታ ኡባ ስንꬃን ምጨታና። ኤንታ መቀꬃይ ሺቀና ዎይኮ ሞገተና፤ ሽን ቢታ ቦላ ፕቶ መላ የገታና። 3 ታ ላልዳ በሳታን ደእያ፥ ሀ ኢታ ካዎተꬃፈ አትዳ አሳ ኡባይ ደኦፐ ሀይቆ አሞታና” ያጌስ ኡባፈ ዎልቃማ ጎዳይ።

4 ጎዳይ ሀይሳዳ ያጌስ ጋዳ ኦዳ፦ “እስ አስ ኩንድኮ፥ ስሚድ ደንደነዬ? ዎይኮ እስ አስ ኦገ ባለትኮ ጉየ ስመነዬ? 5 ያትን፥ ሀ አሳይ አይስ ጉየ ስምዴ? የሩሳላመይ አይስ ኡባ ዎደ ኦገ ባሌቲ? ኤንቲ ጭሞ ባቅድ ኦይክዶሶና፤ ስሞና እፅዶሶና። 6 ታ ምንꬃዳ ሀይዛስ፤ ሽን ኤንቲ ቱማ ሃሳዮኮና። ‘ታ አይ ኦꬃድና?’ ግድ ባ ኢታ ናጋራ ፓፀይ እሶይካ ባዋ። ኡባይ ኦላስ ጋላብያ ፓራዳ ባዉ ባዉ ዎፄስ። 7 ሀር አቶሽን፥ ሃꬃ ካፎት ባንታ ዎድያ ኤሮሶና፤ ሆለት፥ ካሮትነ ማስቃላ ካፎት ባንታ ስምያ ዎድያ ናጎሶና፤ ሽን ታ አሳይ ጎዳ ዎጋ ኤሮኮና።

8 “ያትን ዋንድ፥ ‘ጎዳ ህገይ ኑራ ደእያ ግሾ ኑ ጭንጫ’ ጋናዉ ዳንዳኤቲ? ዎርዳንቾ ፃፈት ታ ህግያ ዎርዶ ከስዳይሳ በኤከቲ? 9 ጭንጫት ዬላታና፤ ኤንቲ ካዉያናነ ኦይከታና። ኤንቲ ጎዳ ቃላ እፅን፥ ኤንታዉ አይ ጭንጫተꬅ ደኢ? 10 ሄሳ ግሾ፥ ታ ኤንታ ማቸታ ሀራታስ፥ ኤንታ ጎሻ አላጋ አሳስ እማና። ጉꬃፈ ግታ ጋካናዉ በሶና ጎአስ ዪቀቶሶና። ናበትነ ካህነት ኡባይ አሳ ጭሞሶና። 11 ኤንቲ ታ አሳ ማዱንꬃ ላፋ ግድ፥ ጉꬃ ꬋለ ዎꬆሶና። ሳሮይ ባይናሽን ‘ሳሮ፥ ሳሮ!’ ያጎሶና። 12 ሀ ሻትያ ኦሱዋ ኦꬅሸ፥ ኤንቲ ዬላትዶና? አካይ፥ ኤንቲ አይኮካ ዬላትቦኮና። ኤንቲ ዬል አይበኮ ኤሮኮና። ሄሳ ግሾ፥ ኤንቲ ኩንድዳይሳታ ግዶን ኩንዳና፤ ኤንቲ ሴረትያ ዎደ ካዉያና። 13 ኤንታ ጎሻ አይፍያ ታ ኤንታፈ ኤካና። ኤንታ ዎይነ አይፈይ ꬋያና፤ ባላሰ ምꬃ አይፈይ በንተና። እያ ቦንጮይ ሹላና፤ ታ ኤንታዉ እምዳባ ኤንታፈ ኤካና” ያጌስ ጎዳይ።

14 አሳይ ዛሪድ ሀይሳዳ ያጎሶና፦ “ኑ ስእ ግድ አይስ ኡታኔ? አነ ሺቅተ፤ ግምበትዳ ካታማታ ገልድ ያን ሀይቃና። ጎዳይ ኑ ፆሳይ ኑና ሀይቆስ አꬅድ እሚስ። ኑ እያ ቦላ ናጋራ ኦꬅዳ ግሾ፥ ኑ ዎꬍያ ሃꬅ ኡያና መላ ኦꬅስ። 15 ሳሮተꬅ ኡፋይሳን ናግዳ፤ ሽን ሎኦባይ ይቤና። ኑ ፓፆ አሞትዳ፤ ሽን ዳጋማ ግድስ። 16 ሞርከ ፓራ ጋርማሞይ ዳነ ካታማን ስኤቴስ፤ ኤንታ ኮርማ ፓራታ ጫገꬃን ቢት ቃፄስ። ኤንቲ ቢታነ ቢታን ደእያባ ኡባ፥ ካታማነ ካታማን ደእያ አሰ ኡባ ምድ ꬋይሳናዉ ይዶሶና። 17 ታኒ ሾሻታ ህንተ ግዶ የዳና። ብት ተቃናዉ ዳንዳኦና ሀሶ ሾሻታ ህንተ ግዶ የዳና፤ ኤንቲ ህንተና ዱካና” ያጌስ ጎዳይ።

18 ታ አዛኑዋስ ምንꬆይ ባዋ፤ ታ ዎዛናይ ትልእስ። 19 ታ አሳይ ሃሆ ቢታን ዋስያ ዋሱዋ ስእተ። ኤንቲ፥ “ጎዳይ ፅዮነን ባዌ? ሀ ፅዮነ ካዎይ ዛሪድ ያን ዴኔ?” ያግድ ዋሶሶና።

ጎዳይ ኤንታ ካዎይ፥ “ኤንቲ ባንታ መꬍዳ ምስለታን፥ ባንታ ፓꬆና አላጋ ኤቃታን ታና አይስ ይሎይዶና?” ያግስ።

20 አሳይ ዛሪድ፥ “ሄኮ ጫካ ዎደይ አꬍስ፤ ቦነይ ዉርስ፤ ኑኒ አትቦኮ” ያግድ ዋሶሶና።

21 ታ አሳይ ማዱንፅዳ ግሾ፥ ታ ዎዛናይካ ማዱንፅስ። ታ ካዮታስ፤ ያሽ ታና ኦይክስ። 22 ጋላዳን ትየትያ ꬋለይ ባዌ? ያን አክመይ ዴኔ? ያትን፥ ታ አሳ መቆይ አይስ ፓፀኔ?