9
1 ሀይቅዳ ታ አሳስ ቃማነ ጋላስ ዬካና መላ ታ ሁጰይ ሃꬃ ኦላ፥ ታ አይፈይ ፑልቶ ሃꬅ ግዴረነ። 2 ኤንቲ ኡባይ ማካላነ ላይማትያ አስ ግድያ ግሾ፥ ታኒ ታ አሳፐ ሻከታዳ ባና መላ፥ ኦገ አስ አቅያ በሲ፥ ታዉ መላ ቢታን ደኤረነሽን።
3 “ኤንቲ ባንታ እንፃርሳን ዎርዶ ኦደታናዉ ኡባ ዎደ ጊግድ ደኦሶና። ኤንታ ቢታን ቱማ ግዶናሽን ዎርዶይ ካዎትስ። ኤንቲ እስ ናጋራፐ ሀራ ናጋራን ፕንዶሶና፤ ታና ኤሮኮና” ያጌስ ጎዳይ።
4 “እሽ ጭመይሳ፥ ሾሮይ ዝግረይሳ ግድያ ግሾ ሾሩዋፐ ናገቶ፤ እሻይ እሻ አማነቶፎ። 5 ሾሮይ ሾሩዋ ጭሜስ፤ ቱማ ኦደተይ ዴና። ዎርዶ ኦደታና መላ ባንታ እንፃርሳ ታማርስዶሶና፤ ናጋራ ኦሶን ባንታና ዳቡርስዶሶና። 6 ነ ጭሞ ግዶን ደኣሳ፤ ኤንቲ ባንታ ጭሙዋን ታና ኤሮና እፅዶሶና” ያጌስ ጎዳይ።
7 “ሄሳ ግሾ፥ ታ ኤንታ ብራታዳ ሴርሳና፤ ኤንታ ፓጫና። ታ አሳ ግሾ፥ ታ ሀራባ አይ ኦꬃናዉ ዳንዳእያና? 8 ኤንታ እንፃርሳይ ዎꬍያ ዶንገ ቶራ መላ፤ ኤንቲ ጭሞን ሃሳዮሶና። ባንታ ዶናን እሶይ እሱዋራ ሳሮ ቃላ ሃሳዮሶና፤ ሽን ባንታ ዎዛናን ፅሄ ዎꬆሶና። 9 ያትን፥ ታ ሀ ሀኖታስ ኤንታ ሴራናዉ በሰኔ? ታኒ ሀይሳ መላ ካዎተꬃ ቦላ ሀሎ ከያናዉ በሰኔ?” ያጌስ ኡባፈ ዎልቃማ ጎዳይ።
10 ታኒ ꬎቃ ደረታስ ዬካና፤ ኤንታ ግሾ ዋሳና፤ ባዞን ደእያ ሄንꬃ ጋደታስ ዘሌላና። ኤንቲ ꬋይዶሶና፤ ያራ እስ አስካ አና። መሄ ዋሶይ ስኤተና፤ ሳሎ ካፎትነ ዶአት ባቃትዶሶና።
11 “የሩሳላመ ካታማ ላለትዳ ኬላነ ዎርካናት ጉፕያ በሲ ኦꬃና። ይሁዳ ካታማታ ኦንካ ዶና ባይሳ ከሳና” ያጌስ ጎዳይ።
12 ሀይሳ አኬካናዉ ዳንዳእያ ጭንጫ አስ ኦኔ? ሀራ አሳስ ኦዳና መላ ጎዳይ ኦደስ ቆንጭስዴ? እስ አስካ እያ ግዶራ አꬎና መላ ቢታይ ኢትድ ባዞዳ ኦንዳይ አይብሴ?
13 “ሀይስ ሀንዳይ፥ ኤንታዉ ታ እምዳ ህግያ ኤንቲ አግዳ ግሾሳ። ኤንቲ ታዉ ኪተቶናነ ሀ ህግያ ካሎና እፅዳ ግሾሳ። 14 ሄሳ አግድ፥ ኤንቲ ባንታ ዎዛና ሙመተꬃ ካልዶሶና፤ ኤንታ አዋት ታማርስዳ ባኣለ ጌተትያ ኤቃ ጎይንዶሶና” ያጌስ ጎዳይ።
15 ሄሳ ግሾ፥ ኡባፈ ዎልቃማ ጎዳይ፥ እስራኤለ ፆሳይ ሀይሳዳ ያጌስ፦ “ታኒ ሀ አሳ ጫምያ ካꬅ ሙዛና፤ ዎꬍያ ሃꬅ ኡሻና። 16 ኤንቲ ዎይኮ ኤንታ አዋት ኤሮና ካዎተꬃታ ግዶን ታ ኤንታ ላላና። ኤንታ ꬋይሳና ጋካናዉ ማሻን የደꬃና” ያጌስ።
17 ኡባፈ ዎልቃማ ጎዳይ ሀይሳዳ ያጌስ፦ “አነ ቆፕተ። ዬሆ ዬክያ ማጫሳታ ፄግተ፤ ዘለልስ ኤርያ አሳታ ኤህተ። 18 ኤንቲ ኤለስድ ይድ፥ ኑ አይፈይ አፉꬁ ሆልꬁ ኦꬃና ጋካናዉነ ኑ አይፍያ ጭሮይ ሃ ፑልታና ጋካናዉ ዘለልስ ከሶ። 19 ፅዮነን ዘለልሳ ግርስ ስኤቴስ፤ ‘ኑ ꬋይዳ! ኑ ካዉይዳ! ኑ ኬꬃይ ላለትዳ ግሾ፥ ኑ ቢታ አግድ ባናዉ ኮሼስ’ ” ያጎሶና።
20 ህንተኖ፥ ማጫሳቶ፥ ጎዳ ቃላ ስእተ! ህንተ ሀይꬃይ እያ ዶናፐ ከይያ ቃላ ሀይዞ። ህንተ ማጫ ናይታ ዘለልስ ታማርስተ፤ እሶይ እሱዋ ዬሆ ታማርሶ። 21 ሀይቆይ ዮጋ ናይታ ኦገን፥ ናአተꬃታ ዳባባን ቄፅሸ ይድ፥ ኑ ማስኮተታ ጋክስ፤ ኑ ሚፃ ገልስ።
22 “አሳ አህ ቡረዳ ደንባን የገታና፤ ጫከይሳት ጫክድ ጉየ የግዳ ካꬃ መላ ኤንታ ኦንካ ሺሸና” ያጌስ ጎዳይ።
23 “ጭንጭ ባ ጭንጫተꬃን ጬቆፎ፤ ዎልቃም ባ ዎልቃን ጬቆፎ፤ ዱረይ ባ ዱረተꬃን ጬቆፎ። 24 ሽን ጬቅያ ኦንካ ታና ኤሮንነ አኬኮን ጬቆ። ማሮተꬅ፥ ሱረ ፕርዳነ ፅሎተꬅ ሳአ ቦላ ኦꬅያ ጎዳ፥ ታና ኤርድ ጬቆ፤ ሄስ ታና ኡፋይሴስ” ያጌስ ጎዳይ።
25 “ባንታ አሾ ፃላላ ቃፃረትዳ አሳ ታ ሴራና ዎደይ ያና። 26 ሄሳትካ ግብፀ፥ ይሁዳ፥ ኤዶመ፥ አሞነነ ሞአበ አሳነ ባንታ ሁጵያ ዩሹዋ ሜድድ፥ መላ ቢታን ደእያ አሳ ኡባ። ሀ ካዎተꬃት ኡባይ ቱማ ቃፃረትቦኮና፤ እስራኤለ አሳ ኡባይካ ባንታ ዎዛናን ቃፃረትቦኮና” ያጌስ ጎዳይ።