1 አቤት ጎዳዉ፥ ታ ኔራ ሞተትያ ዎደ ኡባንካ ነ ፅሎ። ግዶሽን፥ ነ ፅሎ ፕርዳባ ኔራ ኦደታናዉ ኮያይስ። ኢታ አሳት ኦꬅያባይ ኤንታዉ አይስ እንጀቲ? ገነ አሳት አይስ ዱረትድ ደኦና? 2 ኔኒ ኤንታ ቶካዳሳ፤ ኤንቲ ፃጶ የድዶሶና፤ ድጭድ አይፈ አይፍዶሶና። ኤንቲ ነና ዶናፐ የጎኮና፤ ሽን ኤንታ ዎዛናፐ ነ ሃሆን ደኣሳ። 3 ሽን አቤት ጎዳዉ፥ ነ ታና ኤራሳ፤ ታና በኣሳ፤ ታ ነባ አይ ቆፕያኮ ፓጫሳ። ሹካ ዶርሳዳ፥ ሄ ኢታ አሳታ ጎቻዳ ከሳ፤ ሹካ ጋላሳስ ኤንታ ዱማያዳ ዎꬃ። 4 ቢታይ እራ ꬋይድ ቆሄታናይ፥ ደንባን ደእያ ማታይ መላናይ አዉደ ጋካናሴ? አሳ ኢታተꬃ ጋሶን፥ ዶእነ ካፎይ ዉርስ። አሳይ ቃስ፥ “ጎዳይ ኑ ኦꬅያባ ደመና” ያጎሶና።

5 ጎዳይ ኤርምያሳኮ፥ “ኔኒ ቶሆን ዎፅያ አሳታራ ጋደታዳ ዳቡርኮ፥ ፓራራ ዋናዳ ጋደታኔ? ነ ሳሮ ቢታን ꬉበትኮ፥ ዮርዳኖሰ ዎራ ግዶራ ዋናዳ ሄመታኔ? 6 ነ እሻት፥ ህንተ ሶ አሳት ነና አꬅድ እምዶሶና፤ ነ ቦላ ደንድዶሶና። ሄሳ ግሾ፥ ሎኦባ ኦድኮካ ኤንታ አማኖፓ።

7 “ታ እስራኤለ አጋስ፤ ታ ዶረትዳ ካዎተꬃ የጋስ፤ ታ ሲቅያ አሳ እያ ሞርከታ ኩሸን አꬃዳ እማስ። 8 ታ ዶርዳ አሳይ ታዉ ዎራን ደእያ ጋሞ መላ ግድስ። እ ታ ቦላ ጉድስ፤ ሄሳ ግሾ ታ እያ እፃስ። 9 ታ ዶርዳ አሳይ ኡባ ባጋራ ጵርጮይ ተቅዳ ካፎ መላ ግድዶሶና። ብድ ዶአታ ኡባ ሺሽድ እያ ማና መላ ኤህተ።

10 “ዳሮ አላጋ ካዎት ታ ዎይነ ጋድያ ኢስዶሶና፤ ታ ጋድያ የꬍዶሶና፤ ታ ሎኦ ጎሻ ባይሳ ከስዶሶና። 11 ሄ ቢታይ ኢትድ ኦፅስ፤ ታ ስንꬃን መላነ ባይሳ ግድስ። ቃተይ ባይና ግሾ ቢታይ ኩመꬅ ኢትስ። 12 መላ ቢታን ደእያ አይኮካ ባይና ደረ ካንꬅድ፥ ቦንቀይሳት ይዶሶና። ጎዳ ማሻይ ቢታ ሀ ጋፃፐ ያ ጋፃ ጋካናዉ ምስ። ሄሳ ግሾ፥ ኦንካ ሳሮ አታናዉ ዳንዳኤና። 13 ኤንቲ ግስተ ዘርድ፥ አጉንꬁ ጫክዶሶና፤ ኤንቲ ዳሮ ዳቡርዶሶና፤ ሽን አይኮካ ደምቦኮና። ጎዳ ዎልቃማ ሸንያ ጋሶን ኤንታ ካꬃይ ꬋይስ” ያግስ።

14 “ታኒ ታ አሳ፥ እስራኤለስ፥ እምዳ ቢታ ኦይክዳ፥ ኢታ ሾሮ ካዎተꬃታ ኤንታ ቢታፈ ሾዳና። ቃስ ይሁዳ አሳ ኤንታ ግዶፈ ከሳና። 15 ሽን ኤንታ ቢታፈ ሾድዳፐ ጉየ፥ ዛራዳ ኤንታዉ ቃታና። ኤንታ እሱዋ ኤንታ ላታ ቢታነ ኤንታ ካዎተꬃ ዛራዳ ኤሀና። 16 ካሰ ታ አሳ ባኣለ ሱንꬃን ጫቃና መላ ታማርስዳይሳዳ ኤንቲ ታ አሳ ኦግያ ታማርኮነ ታ ሱንꬃን ጫቅኮ ኤንቲ ታ አሳ ግዶን ምንድ ዳና። 17 ሽን ኪተቶና እፅዳ ካዎተꬃታ ታኒ ፖሎ ሾዳዳ ꬋይ-ሳና” ያጌስ ጎዳይ።