1 ጎዳይ ታኮ፥ “ባዳ ሊኖ ቃጭናፐ ዳደትዳ ዳንጮ ሻማዳ፥ ነ ፄሳን ዳንጫ፤ ሽን ሃꬃን ቦሽሶፓ” ያግስ። 2 ሄሳ ግሾ፥ ታኒ ጎዳይ ኪትዳይሳዳ ዳንጩዋ ሻማዳ ታ ፄሳን ዳንጫስ።

3 ጎዳይ ናምአንꬆ ታኮ ሀይሳዳ ያግስ፦ 4 “ነ ሻማዳ ዳንጭዳ ዳንጩዋ ኤካዳ፥ ኤፍራፂሳ ሻፋ ባዳ ሹቻ ቆጶን ቆሳ” ያግስ። 5 ጎዳይ ታዉ ኦድዳይሳዳ ኤፋዳ፥ ኤፍራፂሳ ሻፋ ላንቀን ቆሳስ።

6 ዳሮ ጋላሳፐ ጉየ ጎዳይ፥ “ኤፍራፂሳ ሻፋ ባዳ፥ ታ ነና፥ ‘ያን ቆሳ’ ግዳ ዳንጩዋ ኤካ” ያግስ። 7 ታኒ ኤፍራፂሳ ሻፋ ባዳ፥ ዳንጩዋ ሞግዳ በሳፈ ኤካስ። ሽን ሄ ዳንጮይ ኢትድ አይኮካ ማዶናባ ግድስ።

8 ሄሳፈ ጉየ፥ ጎዳ ቃላይ ታኮ፥ 9 “ታኒ ይሁዳ ጬቀተꬃነ የሩሳላመ ኦቶሩዋ ሀይሳዳ ኦꬃዳ ꬋይሳና። 10 ታ ቃላ ስኦና እፅድ፥ ባንታ ዎዛና ሙምስድ፥ ሀራ ፆሳታ ጎይናናዉነ ኤንታዉ ኦꬃናዉ ብያ ሀ ኢታ አሳት፥ ሀ ዳንጩዋዳ ማዶናባ ግዳና። 11 ዳንጮይ አሳ ፄስ ባቅድ ኦይከይሳዳ ይሁድነ እስራኤለይ ታራ ኦይከትድ፥ ታ ሱንꬃስ ጋላታነ ቦንቾ ግዳና መላነ ታ አሰ ግዳና መላ ኦꬃስ፤ ሽን ኤንቲ ስኦና እፅዶሶና” ያጌስ ጎዳይ።

12 ጎዳይ ታኮ፥ “ጎዳይ እስራኤለ ፆሳይ፥ ሀይሳዳ ያጌስ ጋዳ ኦዳ ያግስ፦ ‘እስ እስ ፁጋይ ዎይነ ኡሻን ኩማና’ ያጋ። ኤንቲ ኔኮ፥ ‘ኑኒ እስ እስ ፁጋይ ዎይነን ኩማናይሳ ኤሮኮዬ?’ ያግኮ፥ 13 ነ ኤንታኮ፥ ‘ታኒ ሀ ቢታን ደእያ አሳ ኡባ፥ ሀር አቶሽን፥ ዳዊታ አራታን ኡትያ ካዎታ፥ ካህነታ፥ ናበታነ የሩሳላመን ደእያ አሳ ኡባ፥ ኤንቲ ማꬆታና ጋካናዉ ዎይነ ኡሻን ኩንꬃና። 14 ታኒ ኤንታ፥ እሱዋ እሱዋራ፥ አዋ ናኣራ ዶምኤꬃና። ታ ኤንታ ꬋይሳና፤ ታ ኤንታዉ ኬህከ፥ ቃትከ፤ ኤንታ ማርከ’ ” ያጌስ ጎዳይ።

15 ሀይሳ ኦደይ ጎዳ ግድያ ግሾ ህንተ ኦቶሩዋ አግድ ስእተ፤ አኬክተ።

16 እ ꬉማ ኤሀናፐ ስን፥ ህንተ ቶሆይ ꬉምያ ደርያን ꬉበታናፐ ስን፥ ጎዳ ህንተ ፆሳ ቦንችተ። ህንተ፥ “ፖኦይ ያና” ግድ ናገታ፤ ሽን እ ሳካና ꬉማን ላማና።

17 ሽን ህንተ ስኦና እፅኮ፥ ህንተ ኦቶሩዋ ግሾ ታ ጌማን ዬካይስ። ጎዳ ዉደይ ድኤትድ ብዳ ግሾ፥ ታ ዬካይስ፤ ታ አይፈይ አፉꬁ ጉሴስ።

18 ጎዳይ ታኮ፥ “ካዋስነ ካዋ አየስ፥ ሀይሳዳ ያጋዳ ኦዳ፦ ህንተ ቦንቾ ካላቻይ ህንተ ሁጵያፐ ኩንድዳ ግሾ፥ ህንተ ካዎተꬃ አራታፐ ዱገ ዎꬍተ። 19 ነገበ ቢታን ደእያ ካታማት ኡባይ ጎርደትዶሶና። ኤንታ ዶያናዉ እስ አስካ ያን ባዋ። ይሁዳ አሳይ ኩመꬅ ድኤትድ ብዶሶና” ያግስ።

20 ጎዳይ፥ “አነ ꬎቁ ጋዳ፥ ፑደሀ ባጋፈ የይሳታ ፄላ። ነዉ እመትዳ ዉደይ፥ ነ ጬቀትዳ ዶርሳት አዉን ደኦና? 21 ኔኒ፥ ነዉ ላገ ግዳና መላ ኮይዳይሳት ነና ፆንድ ሃርያ ዎደ ዎይጋይ? የሎስ ከይዳ ማጫሳዳ እቀꬅ ነና ኦይከኔ? 22 የሩሳላመ፥ ኔኒ ነ ዎዛናን፥ ‘ሀ ኡባይ ታና አይስ ጋክዴ?’ ጊኮ፥ ነ ማኦይ ቃረትዳይነ ነ ቦንቀትዳይ ነ ናጋራይ ዳርዳ ግሾሳ። 23 ቶጰይ ባ ማላ ዎይኮ ማሄይ ባ ጋዛተꬃ ላማናዉ ዳንዳኢ? ሄሳዳካ፥ ኢታ ኦሶን ሜዘትዳ ህንተ፥ ሎኦ ኦሶ ኦꬃናዉ ዳንዳኤከታ” ያግስ።

24 “ታ ህንተና ባዞ ጫርኮይ ኤፍያ ሱላዳ ላላና። 25 ህንተ ታና ዶግዳ ግሾነ ዎርዶ ፆሳታን አማነትዳ ግሾ ህንተ ሳማይነ ታ ህንተዉ እምያ ግሾይ ሀይሳ። 26 ህንተ ካሎይ በንታና መላ ታ ህንተ ማኡዋ ቃራ የጋና። 27 ነ ቦርሶ ኦሱዋ፥ ኮርማ ፓራዳ ዚታስ ጫገይሳ፥ ዬል ባይና ላይማተꬅ፥ ዙማ ቦላነ ደንባን ነ ኦꬅያ እፀትዳ ኦሱዋ ታ በአስ። የሩሳላመ፥ ነና አየ! ነ አዉደ ጋካናዉ ጌዮና ዳኔ?” ያጌስ ጎዳይ።