1 ኮሻባ ጎዳይ ኤርምያሳስ ኦድዳ ቃላይ ሀይሳ፦ 2 “ይሁዳ ቢታይ ካዮቴስ፤ እያ ካታማት ላባንዶሶና። ያን ደእያ አሳት ቢታን ኡትድ ዬኮሶና፤ የሩሳላመፐ ግታ ዋሶይ ስኤትስ። 3 ዱረ አሳት ሃ ትካናዉ ባንታ አይለታ ኪቶሶና። ኤንቲ ሃꬃ ኦላኮ ቦሶና፤ ሽን ሃ ደሞኮና፤ ባንታ ኦቱዋ መላ ቶክ ኤክድ ስሞሶና። ሀንያባ ꬋይድ ዬላትሸ፥ ባንታ ሁጵያ ጉሉንቶሶና። 4 እር ቡኮና ግሾ ቢታይ መልድ ዛእስ። ጎሻንቾት ዬላትድ፥ ባንታ ሁጵያ ጉሉንትዶሶና። 5 ማት ባይና ግሾ ዎሽኤይ ባ የልዳ ጋሎ ማርዉ ደንባን የጋዳ ባዉሱ። 6 ባዞ ሀረት አይብካ ባይና ꬎቃ ዙማታ ቦላ ኤቅድ፥ ዎርካናዳ ላፈቶሶና። ኤንታዉ ምያባይ ꬋይን፥ ኤንታ አይፈይ ፄላናዉ ዳቡርስ” ያግስ።

7 አሳይ ሀይሳዳ ያግድ ዎስስ፦ “አቤት ጎዳዉ፥ ኑ ናጋራይ ኑ ቦላ ማርካትኮካ፥ ነ ሱንꬃ ግሾ፥ ኑስ እስባ ኦꬃ። ኑ ነና አግድ ዳሮ ዎደ ጉየ ስምዳ፤ ነ ቦላ ናጋራ ኦꬅዳ። 8 አቤት እስራኤለ ኡፋይሳዉ፥ መቶ ዎደ አሸይሶ፥ ነ እማꬃዳ፥ እስ ቃማ አቃናዉ ገልዳ ኦገ አሳዳ አይስ ሀናይ? 9 ነ ዳጋምዳ አሳዳ፥ አሻናዉ ዳንዳኦና አሳዳ አይስ ሀናይ? አቤት ጎዳዉ፥ ነ ኑ ግዶን ደኣሳ! ኑኒ ነ ሱንꬃን ፄገትዳ፤ ኑና አጎፋ!” ያግስ።

10 ሀ አሳታባ ጎዳይ ሀይሳዳ ያጌስ፦ “ኤንቲ ቶይላተꬅ ዳሮ ዶሶሶና፤ ባንታ ቶሁዋ ተቆኮና። ሄሳ ግሾ፥ ጎዳይ ኤንታን ኡፋይተና። እ ኤንታ ኢታ ኦሱዋ ሀሳይድ፥ ኤንታ ናጋራ ግሾ ኤንታ ሴራና” ያጌስ።

11 ሄሳፈ ጉየ፥ ጎዳይ ታኮ፥ “ሀ አሳ ሳሮተꬃስ ዎሶፋ። 12 ኤንቲ ፆምኮካ፥ ታ ኤንታ ዋሱዋ ስእከ። ፁሳ ያርሾነ ካꬃ ያርሹዋ ኤንቲ ያርሽኮካ፥ ታ ኤክከ። ታኒ ኤንታ ኦላን፥ ኮሻንነ ጋዶን ꬋይሳና” ያግስ።

13 ታኒ ዛራዳ፥ “አቤት ኡባ ሃርያ ጎዳዉ፥ ናበት ‘ህንተ ኦላ በኤከታ ዎይኮ ኮሽ ጋከና። ጎዳይ ሀ ቢታን ፖሎ ሳሮተꬅ እማና’ ያጎሶና” ያጋስ።

14 ጎዳይ ዛሪድ፥ “ናበት ታ ሱንꬃን ዎርዶ ኦዶሶና፤ ታ ኤንታ ኪታብከ ዎይኮ ኤንታዉ ኦዳብከ። ኤንቲ ህንተዉ ኦደይ ዎርዶ ቆንጨꬅ፥ ፓꬆና ካዮነ ባንታዉ መꬍ ከስዳ ዎርዶ ሃሳዮሶና። 15 ሄሳ ግሾ፥ ጎዳ ሱንꬃን ኦድያ ናበታ ታ ኪታብከ። ሽን ኤንቲ፥ ‘ኦል ዎይኮ ኮሽ ሀ ቢታ ቦቸና’ ያጎሶና። ሄ ናበት ባንታዉ ኦላንነ ኮሻን ꬋያና! 16 ቃስ ትንብተይ ኦደትዳ አሳይ ኮሻነ ኦላ ጋሶን ሀይቃና፤ ኤንታ አሀይ የሩሳላመ ኦግያ ቦላ ሆለታና። ኤንታ ዎይኮ ኤንታ ማቸታ፥ ኤንታ አደ ናይታነ ዎይኮ ኤንታ ማጫ ናይታ ሞግያ አስ ꬋያና። ኤንታዉ በሲያ ዋይያ ኤንታ ቦላ ትጋና” ያግስ።

17 ታ አዛኑዋባ ታ አሳስ ኦዳና መላ ጎዳይ ታና ኪትስ። “ታ አሳይ ደሸትድ፥ ዳሮ ማዱንፅዳ ግሾ፥ ታ አይፈይ ቃማነ ጋላስ ቃንፆና አፉፃና። 18 ታ ደምባ ከይኮ፥ ማሻን ሀይቅዳይሳታ በአይስ። ካታማ ገልኮ፥ ኮሻን ቆሄትዳይሳታ በአይስ። ናበትነ ካህነት ባንታ ኦሱዋ ኦꬆሶና፤ ሽን አይ ኦꬅያኮ ኤሮኮና” ያጋስ።

19 አቤት ጎዳዉ፥ ነ ይሁዳ አጋዲ? ፅዮነ አሳ እፃዲ? ኑ ፓፆናዳ ኦꬃዳ አይስ ደቻዲ? ኑ “ሳሮ ግዳና” ግድ ናግዳ፤ ሽን አይብካ ሎኦባይ በንትቤና። ኑ “ፓፃና ዎደይ ያና” ግድ ናግዳ፤ ሽን ዳጋማ ፃላል ጋክስ።

20 አቤት ጎዳዉ፥ ኑ ኢታተꬃ ኤርዳ፤ ኑ አዋታ ባላ አኬክዳ፤ ኑኒ ናጋራ ኦꬅዳ። 21 ነ ሱንꬃ ግሾ ጋዳ ኑና ካꬎፓ፤ ነ ቦንቾ አራታ ካዉሾፋ። ነ ኑራ ጫቅዳ ጫቁዋ ሀሳያ፤ ነ ጫቁዋ መንꬆፋ። 22 ካዎተꬃታ ኤቃታፐ እሶይ እራ ቡክሳናዉ ዳንዳኢ? ሳሎይ ባ ሸነን ፑሳናዉ ዳንዳኢ? ዳንዳኤና! አቤት ጎዳዉ፥ ኑ ፆሳዉ፥ ሄሳ ዳንዳኤይ ነና! ሀይሳ ኡባ ኦይ ነና ግድያ ግሾ ነናን ኡፋይስ ኦꬆስ።