1 ሄሳፈ ጉየ፥ ጎዳይ ታኮ ሀይሳዳ ያግስ፦ “ሀር አቶሽን ሙሰይነ ሳሜል ታ ስንꬃን ኤቅድ ዎስያኮካ ታ ዎዛናይ ሀ አሳኮ ስመና። ኤንታ ታ ስንꬃፈ ድጋ፤ ኤንቲ ቦ። 2 ኤንቲ ነና፥ ‘ኑ አዉ ባኔ?’ ግድ ኦይችኮ፥ ጎዳይ ሀይሳዳ ያጌስ ጋዳ ኤንታዉ ኦዳ፦ ‘ሀይቆስ ፕርደትዳይሳት ሀይቆስ፤ ማሻስ ፕርደትዳይሳት ማሻስ፤ ኮሻስ ፕርደትዳይሳት ኮሻስ፤ ድኤታናዉ ፕርደትዳይሳት ድኤታናዉ ቦ’ ያግስ።

3 “ታኒ ኦይዱ ቆሞ ጋዶታ ኤንታ ቦላ ኤሀና ያጌስ ጎዳይ። ሄስካ፥ ኤንታ ዎꬋናዉ ማሻ፥ ኤንታ አሀ ጎቻናዉ ካናታ፥ ኤንታ አሾ ምድ ꬋይሳናዉ ሳሎ ካፎታነ ሳአ ዶአታ ኤሀና። 4 ህዝቅያሳ ናአይ፥ ይሁዳ ካዎይ ምናሰይ የሩሳላመን ኦꬅዳ ኢታ ኦሱዋ ግሾ፥ ታ ኤንታ ሳኣ ካዎተꬃ ኡባስ ዳጋማ ኦꬃና።

5 “የሩሳላመ አሳዉ፥ ህንተዉ ኦነ ቃታናይ? ህንተዉ አዛናናይ ኦኔ? ህንተ ዋንደቲ? ግድ ህንተና ኦይቻናይ ኦኔ?” ያጌስ ጎዳይ።

6 “ህንተ ታና አግደታ፤ ህንተ ጉየ ስምደታ። ሄሳ ግሾ፥ ታኒ ህንተ ቦላ ታ ኩሽያ ደንꬃዳ ህንተና ꬋይሳስ፤ ህዛፐ ታ ህንተዉ ቃትከ። 7 ኤንቲ ባንታ ኢታ ኦግያፐ ስሞና እፅዳ ግሾ ኤንታ ካታማታ ፐንግያን ፕ ኤካዳ ሀርቃስ። ታ ኤንታ ናይታ ዎꬋ ዉርሳስ፤ ታ አሳ ꬋይሳስ። 8 ኤንታ አምኤታ ታይቦይ አባ ጋፃን ደእያ ሻፍያፐ ዳርስ። ታኒ ሴታ ጋላስ ናአተꬃታ አየታ ቦላ ꬋዮ ኤሀና። ቆፖና ደእሽን፥ ኤንታ ቦላ ዳጋማነ ኮኮርስ ኤሀና። 9 ላፑን ናይት ሀይቅዳ አይያ ሸምፓናዉ ፆነታዳ ዳቡራሱ። እዉ ጋላስ ቃምስ፤ እያ ካዉያሱነ ዬላታሱ። ፓፃ አትዳይሳታ ኤንታ ሞርከታ ስንꬃን ማሻን ዉርሳና” ያጌስ ጎዳይ።

10 ታ አየ፥ ታና አይስ የላዲ? ታና አየ! ታ ቢታ ኡባን ደእያ አሳራ ካጭያነ ባፀትያ አስ ግዳስ። ታ ኦደስካ ታልአብከ፤ ኦደፈካ ታልአዳ ኤካብከ፤ ሽን አሳ ኡባይ ታና ባዴስ።

11 ጎዳይ ታኮ፥ “ቱማ ታ ነና ሎኦ ኦሶስ አሻዳ ኤካና። ቱማ ነ ሞርከት መቱዋ ዎደነ ዋየ ዎደ ነና ዎሳና መላ ኦꬃና። 12 አስ ብራታ፥ ፑደሀ ባጋፈ ያ ብራታ ዎይኮ ናሰ ብራታ መንꬃናዉ ዳንዳኢ? 13 ቢታ ኡባን ህንተ ኦꬅዳ ናጋራ ግሾ፥ ህንተ ሻሉዋነ ዱረተꬃ ህንተ ሞርከታስ አꬃዳ እማና። 14 ህንተና ኤሮና ቢታን ህንተ ሞርከት ህንተና አይለ ኦꬃና። ታ ሀንቆይ ምያ ታማ ግድድ መርናዉ ኤፃና” ያግስ።

15 አቤት ጎዳዉ፥ ነ ኤራሳ። ታና ሀሳያ፤ ታና ማዳ፤ ታና የደይሳታ ቦላ ታ ሃሉዋ ከያ። ነ ዳንዳአን ታና ዎራ የጎፋ። ታ ነ ግሾ ጫየተይሳ ቆፓ። 16 አቤት ጎዳዉ፥ ኡባፈ ዎልቃማ ፆሳዉ፥ ታ ነ ሱንꬃን ፄገትዳ ግሾ፥ ነ ቃላይ ታኮ ይን ማስ። ማ ስምን ታና ፓሽክስስ፤ ታ ዎዛና ኡፋይስስ። 17 ቀልቅሰይሳታ ጩጋን ኡታብከ፤ ኤንታራ ኡፋይታብከ። ኔኒ ነ ኩሽያ ታ ቦላ ዎꬅዳ ግሾነ ታ ቦላ ይሎትዳ ግሾ ታ ታርካ ዱማ ኡታስ። 18 ታ ሀርገይ ፓፆናይ፥ ታ ማዱንꬃይ መሎናይ አይብሴ? ነ ታዉ ኤቅያ ሻፋዳ፥ መልያ ፑልቶዳ ሀናዬ?

19 ሄሳ ግሾ፥ ጎዳይ ሀይሳዳ ያጌስ፦ “ነ ታኮ ስምኮ፥ ታ ዛራዳ ነና ኤካና፤ ነ ታዉ ኦꬃና። ሀዳ ኦዳ አጋዳ፥ ቦንቾ ቃላ ፃላላ ኦደትኮ፥ ነ ታ ዶና ግዳና። ኤንቲ ኔኮ ስማና፤ ሽን ነ ኤንታኮ ስማካ። 20 ታ ነና ሀ አሳስ ናሰ ብራታን ግምበትዳ ግምበ ኦꬃና። ኤንቲ ኔራ ኦለታና፤ ሽን ነና ፆኖኮና፤ ታ ነና አሻና። 21 ኢታታ ኩሸፐ ታ ነና አሻና፤ ቃይ ባይና ዎዛና ምኖ አሳፐ ታ ነና ዎዛና” ያጌስ ጎዳይ።