1 ጎዳ ቃላይ፥ ሀይሳዳ ያግሸ ታኮ ይስ፦ 2 “ኔኒ ማቾ ኤኮፋ፤ ማጫ ናአነ አደ ናአ ሀ በሳን የሎፓ። 3 ሀ በሳን የለትያ ማጫ ናይታባነ አደ ናይታባ፥ ኤንታ የልያ አየታነ አዋታባ ጎዳይ ሀይሳዳ ያጌስ። 4 ኤንቲ ኢታ ሀርገን ሀይቃና፤ ኤንታዉ ዬክያ ዎይኮ ኤንታ ሞግያ አስ በንተና። ኤንታ አሀይ ቢታ ቦላ ፕቶ መላ የገታና፤ ኤንቲ ማሻንነ ኮሻን ዉራና፤ ኤንታ አሾይ ሳሎ ካፎታስነ ሳአ ዶአታስ ካꬅ ግዳና” ያግስ።

5 “ዬሆ ኬꬅ ገሎፓ፤ ዬካናዉ ዎይኮ ቃታናዉ ቦፓ። ታኒ ሀ አሳ ቦላፈ ታ ሳሮተꬃ፥ ታ ሲቁዋነ ታ ማሮተꬃ ድጋስ። 6 ግትነ ጉꬅ ሀ ቢታን ሀይቃና፤ ኤንቲ ሞገቶኮና። ኦንካ ኤንታዉ ዬከና፤ ኦንካ ባና ጋረና ዎይኮ ሁጰ ሜደትድ ካዮተና። 7 ዬክያ አሳስ ሾቹ ኤፍድ፥ ኤንታራ እስፈ ምድ ኡይድ፥ ካዩዋ ባለꬅያ አስ እሶይካ ዴና። ሀር አቶሽን፥ አይያ ዎይኮ አው ሀይቅዳ አሳካ ምንꬅያ አስ ባዋ።”

8 “ኤንታራ ማናዉነ ኡያናዉ ግብር ደእያ ኬꬅ ገሎፓ። 9 ኡባፈ ዎልቃማ ጎዳይ፥ እስራኤለ ፆሳይ ሀይሳዳ ያጌስ፦ ‘ታኒ ኡፋይስነ እልልስ፥ ያጋኖ የꬅ ሀ በሳፈ ድጋና። ሄሳ አሳይ ባንታ ላይꬃንነ ባንታ አይፍያን በአና።’ ”

10 “ነ ሀ ቃላ ኡባ አሳስ ኦድያ ዎደ፥ ኤንቲ፥ ‘ጎዳይ አይስ ሀይሳ መላ ኢታባ ኑ ቦላ አዋጅዴ? ኑ አይ ባልዶ? ጎዳ፥ ኑ ፆሳ ቦላ ኑ አይ ናጋራ ኦꬅዶ?’ ” ያጋና። 11 ሄ ዎደ ነ ኤንታኮ፤ “ህንተ አዋት ታና አግዳ ግሾሳ፥ ኤንቲ ሀራ ፆሳታ ካልዳ ግሾሳ፥ ኤንታዉ ኦꬅዳነ ጎይንዳ ግሾሳ፥ ታና አግድ ታ ህግያ ናጎና እፅዳ ግሾሳ። 12 ህንተ፥ ህንተ አዋታፐ አꬍድ ኢታ ኦꬅዳ ግሾሳ። ህንተ እሶይ እሶይ ኤሮ ጎና ህንተ ኢታ ዎዛና ካልደታ፤ ታዉ ኪተቶና እፅደታ። 13 ሄሳ ግሾ፥ ታ ህንተና ሀ ቢታፈ ደንꬃዳ፥ ህንተ ዎይኮ ህንተ አዋት ኤሮና ቢታ ሆላና። ያን ህንተ ሀራ ፆሳታ ጋላስነ ቃማ ሀጋዛና፤ ታኒ ህንተዉ ቃትከ” ያጌስ ጎዳይ።

14 አሳይ፥ “እስራኤለ አሳ ግብፀ ቢታፈ ከስዳ ጎዳይ ኤርያ መላ” ያግድ ጫቆና ዎደይ ያና። 15 ሄሳ አግድ፥ “ ‘እስራኤለ አሳ ፑደሀ ባጋ ቢታፈነ ኤንታ ላልዳ ቢታ ኡባፈ ዛሪድ ኤህዳ ጎዳይ ኤርያ መላ’ ያግድ ጫቃና። ታኒ ኤንታ ካሰ ኤንታ አዋታስ እምዳ ቢታ ዛራዳ ኤሀና” ያጌስ ጎዳይ።

16 “ታ ሞሎ ኦይክያ ዳሮ አሳ ኪታና፤ ኤንቲ ኤንታ ኦይካና። ሄሳፈ ጉየ፥ ዳሮ ሻንካትያ አሳ ኪታና፤ ደረፐ፥ ዙማፐነ ሹቻ ቆጶፐ ኤንታ ሻንካትድ ከሳና። 17 ታ አይፈይ ኤንታ ኦግያ ቦላ ደኤስ፤ ኤንቲ ታፐ ቆሰትቦኮና፤ ኤንታ ናጋራይ ታ ስንꬃፈ ጌምቤና። 18 ታ ኤንታ ኢታተꬃነ ኤንታ ናጋራ ግሾ ኤንታዉ ናምኡ ኩሸ ዛራና። ኤንቲ አሀ ዳንያ ባንታ እፀትዳ ኤቃታን ታ ቢታ ቱንስዶሶና፤ ሻትያ ባንታ ምስለታን ታ ላታ ኩንꬅዶሶና” ያጌስ ጎዳይ።

19 አቤት ጎዳዉ፥ ታ ዎልቃዉ፥ ታ ሚፃዉ፥ መቶ ጋላስ ታ ባቃታዳ አትያ በሳዉ፥ ካዎተꬃት ሳኣ ጋፃፐ ኔኮ ይድ፥ “ኑ አዋት ፓꬆናነ ማዶና ዎርዶ ፆሳታ ፃላላ ላትዶሶና። 20 አሳይ ባንታዉ ፆሳታ መꬋናዉ ዳንዳኦና? ኤ፥ ኤንቲ መꬍያኮካ ቱማ ፆሳታ ግዶኮና!” ያጋና።

21 “ሄሳ ግሾ፥ ታ ኤንታ ታማርሳና፤ ታ ዎልቃነ ታ ግታተꬃ ኤንታ ኤርሳና። ሄ ዎደ ኤንቲ ታ ሱንꬃይ ጎዳ ግደይሳ ኤራና” ያጌስ ጎዳይ።