1 “ይሁዳ ናጋራይ ብራታ ቢረን ፃፈትስ፤ ኤንታ ዎዛና ቦላነ ያርሾ በሳን ደእያ ካጭያ ቦላ አልማዘ ጌተትያ ሹቻ ፄራን ፃፈትስ። 2 ኤንታ ናይት እርፃ ምꬃ ጋርሳን፥ ዙማታ ቦላነ ደረታ ቦላ ጊግስዳ ያርሾ በሳን አሼራ ጌተትያ ፆሴስ ኤስዳ ምስልያ ጎይኖሶና። 3 ህንተ ቢታ ቦላ ኦꬅዳ ናጋራ አጩዋ ቃንፅሳናዉ ህንተ ሻሉዋነ ህንተ ሚሽያ ህንተ ሞርከታስ እማና። 4 ህንተ መርናዉ ኤፅያ ታ ሸንያ ደንꬅዳ ግሾ፥ ህንተና ላትስዳ ቢታፈ ሾዳና፤ ህንተ ኤሮና ቢታን ህንተ ሞርከታስ አይለ ኦꬃና” ያጌስ ጎዳይ።

5 ጎዳይ ሀይሳዳ ያጌስ፦ “አሳን አማነተይ፥ አሾ ማእዳ አሳን ጬቀተይነ ባ ዎዛና ፆሳፈ ሃሰይ ባደትዳይሳ ግዶ። 6 ሄሳ መላ አስ ባዞን ደእያ ቱሸ መላ፤ ሎኦባይ ያ ዎደ እ በኤና። እ ባዞን፥ መላ በሳን፥ አስ ዶና ማፅነ ቢታን ዳና።

7 “ጎዳን አማነትያ አስ፥ እያ ጬቆይ ጎዳ ግድዳ አስ አንጀትዳይሳ። 8 እ ሃꬃ ማታን ቶከትድ፥ ባ ፃጱዋ ጎግያ ሃꬃን የድዳ ምꬃ መላ። እ አዋ ሱላስ ያየና። ሄ ምꬃ ሀይꬃይ ጭልኦሽን ደኤስ። እር ቡኮና ላይꬃን ህርገና፤ ኡባ ዎደ አይፈ አገና።

9 “አሳ ዎዛን ኡባፈ አꬍድ ጭሜስነ ኢታ፤ እያ ጋꬃ ቆፋ ኦን ኤራናዉ ዳንዳኢ? 10 ታኒ ጎዳይ፥ አሳ ኡባስ እያ ኦግያዳነ እያ ኦሱዋዳ እማናዉ፥ አሳ ዎዛና ፕልጋይስ፤ እያ ካሃ ፓጫይስ” ያጌስ ጎዳይ።

11 በሶና ኦገን ሻሎ ሺሽያ አስ ባባ ግዶና ጱጱለ ቆፅያ ኩራቾ መላ። ባ ላይꬃ ባጋ ዛዋን አግድ ባና፤ ዉርሰꬃን እያ ኤያተꬃይ ቆንጫና።

12 ኑ ፆሳ ኬꬃይ ኮይሮፐ ዶምድ፥ ቦንቾ ካዎተꬃ አራታዳ ꬎቃ ደርያ ቦላ ደኤስ። 13 አቤት ጎዳዉ፥ እስራኤለ ኡፋይሳዉ፥ ነና አግዳ ኡባይ ዬላታና። ደኦ ፑልቶ ሃꬃ፥ ነና ጎዳ ኤንቲ አግዳ ግሾ ባናን ፃፈትዳ ሱንꬃዳ ꬋያና።

14 አቤት ጎዳዉ፥ ነ ታ ጋላታ ግድያ ግሾ፥ ታና ፓꬃ፤ ታ ፓፃና፤ ታና አሻ፤ ታ አታና።

15 አሳይ ታኮ፥ “ ‘ጎዳይ ታዉ ኦድስ’ ያጋዳ ነ ኦድዳ ቃላይ አዉን ደኢ? እ አይስ ፖለተኔ?” ያጎሶና።

16 ታኒ ሄንꬃንቾ ግዳዳ ነና ሀጋዞ አጋብከ፤ ኤንቲ መቶታና ጋላሳ ታ አሞታብከ። ታ ዶናፐ ከይዳ ቃላ ነ ኤራሳ። 17 ታና ዳጋንꬆፋ፤ መቶ ጋላስ ታኒ ባቃታዳ አትያ በሳይ ነና። 18 ታና የደይሳት ዬላቶ፤ ሽን ታና ዬላዮፓ። ኤንታ ዳጋንꬃ፤ ሽን ታና ዳጋንꬆፋ። ኤንታ ቦላ መቶ ኤሀ፤ ኤንታ ናምኡ ኩሸ ሴራ።

19 ጎዳይ ታኮ፥ “ኮይሮ ባዳ ይሁዳ ካዎት ካታማ ገልያነ ከይያ፥ አሳይ ገልያ ፐንግያንነ ሀራ የሩሳላመ ፐንገታ ኡባን ኤቃ። 20 አሳኮ ሀይሳዳ ያጋ፦ ‘ህንተኖ ይሁዳ ካዎቶ፥ ህንተኖ ይሁዳ አሳዉ፥ ህንተኖ የሩሳላመ አሳዉ፥ ሀ ፐንገታራ ገልያ አሳዉ፥ ኡባይ ጎዳ ቃላ ስእተ። 21 ሳምባታ ጋላስ ቶሆ ቶክድ የሩሳላመ ፐንግያራ ገሎና መላ ናገትተ። 22 ሳምባታ ጋላስ ህንተ ኬꬃፈ ቶሆ ቶክድ ከሶፍተ፥ ዎይኮ አይብ ኦሶካ ኦꬆፕተ። ካሰ ህንተ አዋታ ታ ኪትዳይሳዳ ሳምባታ ጋላስ ቦንችተ። 23 ግዶሽን፥ ኤንቲ ስእቦኮና፤ ባንታ ሀይꬃ ታኮ ዛርቦኮና። ኤንቲ ታና ስኦናነ ታፐ ታማሮና እፅዶሶና። 24 ሽን ህንተ ታዉ ኪተትኮ፥ ሳምባታ ጋላሳን ቶሆ ቶክድ፥ ሀ ካታማ ፐንገታራ ገሎና አግኮ፥ ሳምባታ ጋላስ አይኮካ ኦꬆና ዱማይድ ቦንችኮ፥ 25 ዳዊታ አራታን ኡትያ ካዎት ባንታ ሞርናታራ ፓራታነ ፓራ ጋረታ ቶግድ፥ ሀ ፐንገታራ ገላና። ኤንቲ ይሁዳ አሳራነ የሩሳላመ ካታማን ደእያ አሳራ ገላና፤ ሀ ካታማይ መርናዉ አስ ደእያ ካታማ ግዳና። 26 አሳይ ፁሳ ያርሾ፥ ሀራ ያርሾ፥ ካꬃ ያርሾ፥ እፃነነ ጋላታ ያርሾ ኤክድ፥ ይሁዳ ካታማታፐ፥ የሩሳላመ ዩሹዋን ደእያ ጉታታፐ፥ ብንያመ ቢታፈ፥ ጋꬋፐ፥ ደረይ ዳርያ ቢታፈነ፥ ነገባፐ ጎዳ ፆሳ ኬꬃ ያና። 27 ሽን ህንተ ሳምባታ ጋላሳ ዱማይድ ቦንቾና አግድ፥ ሳምባታ ጋላሳን ቶሆ ቶክድ፥ የሩሳላመ ፐንገታራ ገልድ፥ ታ ህግያ መንꬅኮ፥ ታ ሄ ፐንገታን ታማ ኦይꬃና። የሩሳላመ ካዎ ኬꬃታ ማና፤ ሄ ታማይ ቶኤና’ ” ያጌስ ጎዳ-ይ።