1 ጎዳፐ ኤርምያሳኮ ይዳ ቃላይ ሀይሳ፦ 2 “ደንዳዳ ኡርቃ መꬍያ አድያ ሶ ባ። ያን ታ ነና ታ ቃላ ስሳና” ያግስ። 3 ታኒ ዱገ ኡርቃ መꬍያ አድያ ሶ ባዳ፥ እ ባ ገርቱዋ ቦላ ኡርቃ መꬍሽን በአስ። 4 እ መꬍሽን፥ ሄ ሚሸይ እያ ኩሸን ኢትስ። እ ሄ ኡርቃ ዛሪድ ሙኑቅድ፥ ባና ሎእያ ሀራ ሚሸ ከስድ መꬍስ።

5 ሄ ዎደ ጎዳ ቃላይ፥ ሀይሳዳ ያግሸ ታኮ ይስ፦ 6 “እስራኤለ አሳዉ፥ ኡርቃ መꬍያ አደይ ኦይሳዳ ታ ህንተና ኦꬃናዉ ዳንዳእክና? እስራኤለ አሳዉ፥ ኡርቃይ ባና መይሳ ኩሸን ደኤይሳዳ፥ ህንተካ ታ ኩሸን ደኤታ። 7 እስ ካዎተꬅ ዎይኮ እስ ደረይ ሾደታና መላ፥ ላለታና መላነ ꬋያና መላ ታ ኦድዳ ዎደ፥ 8 ሄ ካዎተꬃይ ባ ኢታተꬃፈ ስምኮ፥ ታ ኤንታ ቦላ ኤሀና ግዳ ኢታባ ኤሆና አጋጋና። 9 ቃስ ሀራ ዎደ እስ ደርያ ዎይኮ ካዎተꬃ፥ ‘ታ ህንተና ኬፃናነ ቶካና’ ጋዳ ኦድዳ ዎደ፥ 10 ሄ ካዎተꬃይ ታ ኦደይሳ ስኦና እፅድ፥ ታ ስንꬃን ኢታባ ኦꬅኮ፥ ታ ኦꬃና ግዳ ሎኦባ ኦꬆና አጋጋና።

11 “ሄሳ ግሾ፥ ይሁዳ አሳስነ የሩሳላመን ደእያ አሳስ ሀይሳዳ ያጋ። ታኒ ህንተዉ ꬋዮ ጊግሳይስነ ኢታባ ሀልቻይስ። ህንተ ኡባይ ህንተ ኢታ ኦግያፐ ስምተ፤ ህንተ ኦግያነ ህንተ ኦሱዋ ላምተ። 12 ሽን ኤንቲ፥ ‘ሀይስ አይኮካ ማደና! ኑኒ ኑ ቆፋዳ ሀናና፤ ኑ እሶይ እሶይ ኑ ኢታ ዎዛና ካላና’ ያጋና” ያግስ።

13 ሄሳ ግሾ፥ “ጎዳይ፥ ‘ሀይሳ መላባ ስእ ኤሬቲ?’ ያግድ ካዎተꬃታ ኦይችተ። ጌላኦ ግድዳ እስራኤለይ ዳሮ ሻትያባ ኦꬃሱ። 14 ልባኖሰ ዙማ ቦላ ደእያ ሻቻይ፥ ዛላ ቦላፈ ꬋይድ ኤሪ? ሄ ዙማፐ ጎግያ እርፃ ሃꬅ መል ኤሪ? 15 ሽን ታ አሳይ ታና ዶግዶሶና፤ ፓꬆና ፆሳታስ እፃነ ጩይስዶሶና። ባንታ ኦግያፐ፥ ባንታ በን ኦግያፐ፥ ጋፃ ከይድ ꬉበትዶሶና። 16 ኤንቲ ባንታ ቢታ ባይሳነ ካትዳባ ከስዶሶና። ያራ አꬍያ ኦንካ ማላለትድ ባ ሁጵያ ቃꬄስ። 17 ባን ዶሎሀ ባጋ ጫርኩዋን ላለተይሳ መላ፥ ታኒ ታ አሳ ሞርከታ ስንꬃን ላላና። ኤንታ መቱዋ ጋላስ ታ ኤንታዉ ዞኮ ዛራናፐ አትሽን፥ ታ ሶምኡዋ ኤንታ በስከ” ያጌስ ጎዳይ።

18 አሳይ፥ “ካህነታ ማታን ህገይ፥ ጭንጫታ ማታን ዞረይ፥ ናበታ ማታን ቃል ꬋዮና ግሾ አነ ኤርምያሳ ቦላ ማቀቶስ። ኑ እንፃርሳን ኦይኮስ፤ እ ኦድያ ቃላ ስኦና እፃና” ያግዶሶና።

19 አቤት ጎዳዉ፥ ታና ስአ፤ ታ ሞርከት ታ ቦላ ግያባ ሀይዛ። 20 ሎኦ ኦꬅዳ አሳስ ዛሮይ ኢተዬ? ሽን ኤንቲ ታዉ ኦላ ቦኮሶና። ነ ሀንቆይ ኤንታፈ ስማና መላ ታ ኤንታ ግሾ ጋናተይሳ በአ። 21 ሄሳ ግሾ፥ ኤንታ ናይታ ኮሻስ አꬃዳ እማ፤ ኤንታ ማሻስ አꬃዳ እማ። ኤንታ ማቸት ናእ ባይናይሳታነ አምኦ ግዶ። ኤንታ አደት ዎꬍያ ሀርገን ጋሄቶና፤ ኤንታ ናአተꬃት ኦላን ዉሮ። 22 ኤንቲ ታና ኦይካናዉ ኦላ ቦክዳ ግሾነ ታ ቶሁዋስ ፅሄ ዎꬅዳ ግሾ፥ ቆፖና ቦንቀይሳታ ኤንታ ቦላ የዳ፤ ኤንታ ኬꬃን ዋሶይ ከዮ። 23 ሽን አቤት ጎዳዉ፥ ኤንቲ ታና ዎꬋናዉ ማቀተይሳ ነ ኤራሳ። ነ ኤንታ ኢታተꬃ አቶ ጎፓ ዎይኮ ኤንታ ናጋራ ነ ስንꬃፈ ቁቾፋ። ኤንቲ ነ ስንꬃን ፆነትድ ኩንዶ፤ ነ ሸነትያ ዎደ ኤንታ ሀይሳዳ ኦꬃ።