1 ጎዳይ ታኮ፥ “ባዳ ኦቶ መይሳፈ ፁጋ ሻማ። ኔራ ጉꬃ ቢታ ጭማታነ ጉꬃ ካህነ ጭማታ ኤካዳ፥ 2 ኩንአ መኦ ፐንግያ ማታራ አꬋዳ፥ ህኖማ ዛንጋራ ባ፤ ያን ታ ነዉ ኦድያ ቃላ አዋጃ። 3 ‘ህንተኖ፥ ይሁዳ ካዎቶ፥ ህንተኖ የሩሳላመ ካታማ አሳዉ፥ ጎዳ ቃላ ስእተ!’ ኡባፈ ዎልቃማ ጎዳይ፥ እስራኤለ ፆሳይ ሀይሳዳ ያጌስ፦ ‘ስእያ ኡባ ሀይꬃስ ኢትያ ፓላባ ሀ ቢታ ቦላ ታ ኤሀና።’ 4 ሀ አሳይ ታና አግድ፥ ኤንቲ ዎይኮ ኤንታ አዋት ዎይኮ ይሁዳ ካዎት ኤሮና ሀራ ፆሳታስ እፃነ ጩይስድ ሀ በሳ ቱንስዶሶና። ኤንቲ ፅሎ አሳ ሱꬃ ሀ በሳን ጉስዶሶና። 5 ታ ኤንታ ኪቶናባ ዎይኮ ኤንታዉ ኦዶናባ ዎይኮ ታ ቆፖናባ ኦꬅዶሶና፤ ባንታ አደ ናይታ ናጋራስ ታማን ፁሳ ያርሾ ኦꬅድ ያርሻናዉ፥ ꬎቃ ጎይኖ በሳታ ግምብዶሶና። 6 ሄሳ ግሾ፥ ሀ በሳይ ቶፈታ ዎይኮ ህኖማ ዛንጋራ ጌተተይስ አትድ፥ ሹሀ ዛንጋራ ያገትድ ፄገታና ጋላሳይ ያና። 7 ይሁዳነ የሩሳላመ አሳ ሀልቹዋ ታ ሀ በሳን ላላና። ኤንቲ ባንታ ሞርከታ ማሻንነ ባንታና ዎꬋናዉ ኮይያ አሳ ኩሸን ሀይቃናዳ ኦꬃና። ኤንታ አሀ ሳሎ ካፎታስነ ሳአ ዶአታስ ካꬅ ኦꬃዳ እማና። 8 ታኒ ሀ ካታማ ባይሳነ ሚቻስ ከሳና። ያራ አꬍያ ኡባይ እያ ꬋዩዋን ማላለትድ፥ ‘ፖራ’ ያጋና። 9 ኤንቲ ባንታ ማጫ ናይታነ አደ ናይታ አሹዋ ማናዳ ኦꬃና። ኤንታ ዎꬋናዉ ኮይያ ሞርከት ኤንታ ተቅድ ዋይስያ ዎደ ኡንኤትድ ኤንቲ እሶይ እሱዋ አሹዋ ማና” ያግስ።

10 “ሄሳፈ ጉየ፥ ኔራ ብዳ አሳ ስንꬃን ፁጋ መንꬃ። 11 ኤንታኮ ሀይሳዳ ያጋ፦ ፁጋይ መቅዳይሳዳነ ዛሪድ ኮላናዉ ዳንዳኤቶናይሳዳ ታ ሀ ካዎተꬃነ ሀ ካታማ መንረꬃና። አስ አሀ ሞግያ በሲ ባይና ግሾ ቶፈታን ሞገታና። 12 ሀ በሳንነ እያን ደእያ አሳ ቦላ ሀይሳ ኦꬃና። ሀ ካታማ ቶፈታዳ ኦꬃና። 13 የሩሳላመ አሳ ኬꬃትነ ይሁዳ ካዎታ ኬꬃት፥ ኬꬃ ቦላ ደምባይድ ኦꬅዳ በሳን ሳሎ ፆልንቶታስ እፃነ ጩይስዳነ ሀራ ፆሳታስ ኡሻ ያርሾ ጉስዳ ኬꬃት ኡባይ ቶፈታዳ ቱና ግዳና” ያጌስ ኡባፈ ዎልቃማ ጎዳይ።

14 “ሄሳፈ ጉየ፥ ኤርምያስ ጎዳይ ትንብተ ኦዳና መላ ኪትዳ ቶፈታፐ ስሚድ፥ ፆሳ ኬꬃ ግዶን ደእያ ዳባባን ኤቅድ አሳ ኡባኮ ሀይሳዳ ያግስ፦ 15 ኤንቲ ሞርግያ ጋቢስድ፥ ታ ኦድያባ ስኦና እፅዳ ግሾ ሀ ካታማ ቦላነ እያ ሄራን ደእያ ጉታታ ቦላ ኤሀና ግዳ ኢታባ ኡባ ኤሀና ሀናይስ” ያጌስ ኡባፈ ዎልቃማ ጎዳይ።