1 ሄ ዎደ ጎዳ ኬꬃነ ሀላቃ ግድያ፥ እመራ ናኣ ካህንያ ጳስኮር ኤርምያስ ትንብተ ኦድሽን ስእስ። 2 ጳስኮር ናብያ ኤርምያሳ ደሽስድ፥ ቆሞ ብንያመ ፐንግያን ፆሳ ኬꬃ ገልያ ፐንገን ጎንገ ሉሆን ቃሽስስ። 3 ዎንተꬃ ጋላስ ጳስኮር ኤርምያሳ ቃሾፐ ብርሽን፥ ኤርምያስ እያዉ ሀይሳዳ ያግስ፦ “ሀችፈ ዶምን፥ ጎዳይ ነ ሱንꬃ ጳስኮር ያገና፤ እ ነ ሱንꬃ ‘ያን ሀን ዳጋማ’ ያጋና። 4 ጎዳይ ሀይሳዳ ያጌስ፦ ‘ታኒ ነና፥ ነዉነ ነ ላገታ ኡባስ ዳጋማ ኦꬃና። ኤንቲ ኔኒ ፄልሽን፥ ባንታ ሞርከታ ማሻን ዉራና። ታኒ ይሁዳ አሳ ኡባ ባብሎነ ካዋ ኩሸን አꬃዳ እማና። እ ኤንታ ድእድ፥ ባብሎነ ኤፍድ፥ ያን ማሻን ዎꬋና። 5 ሄሳዳካ፥ ሀ ካታማ ሻሉዋነ ዱረተꬃ ኡባ፥ ኦይክ የꬍዳባ ኡባ፥ ሃርዳባ ኡባነ ይሁዳ ካዎታ ሚሽያ ኡባ ታኒ ኤንታ ሞርከታስ አꬃዳ እማና፤ ኤንቲ ኤንታ ቦንቅድ ባብሎነ ኤፋና። 6 ቃስ ኔኒ ጳስኮር፥ ነ ሶን ደእያ አሳ ኡባይ ድኤትድ፥ ባብሎነ ባና። ኔኒ ዎርዶ ትንብተ ኦድዳ ነ ላገታ ኡባራካ ያን ሀይቃናነ ያን ሞገታና’ ያጌስ” ያግስ።

7 አቤት ጎዳዉ፥ ኔኒ ታና ጭማዳሳ፤ ታንካ ጭመታስ። ኔኒ ታፐ ምናዳ፥ ታና ፆናዳሳ። ጋላሳ ኩመꬃ ታኒ አሳ ሚቻስ አታስ፤ ኡባይ ታና ቀልቅስስ። 8 ታኒ ሃሳያ ዎደ ኡባን፥ “ማካላባይነ ꬋዮይ ጋክስ” ጋዳ ዋሳይስ። ጎዳ ቃላይ ታዉ ጋላስ ጋላስ ቦረነ ቀልቅሰꬅ ኤህስ። 9 ታኒ፥ “ታኒ ጎዳባ ደንꬃዳ ኦድከ” ዎይኮ፥ “እያ ሱንꬃን ናምአንꬆ ኦድከ” ጊኮ፥ ጎዳ ቃላይ ታ መቀꬃ ግዶን ቁምኤትድ፥ ኤፅያ ታማ መላ ግድድ፥ ታ ዎዛናን ምቼስ። ታኒ ግዶን ኦይካዳ አሾና ጋዳ ዳቡራስ፤ ሽን ተቃናዉ ዳንዳአብከ። 10 ታኒ ዳሮ ካልካሻ ስአስ፤ “ያን ሀን ዳጋም ደኤስ! አነ እያ ሞትተ! ኑኒካ እያ ሞቶስ” ያጎሶና። ታዉ ማታ ላገት ኡባይ ታ ኩንደꬃ ናግድ፥ “ኦን ኤር፥ ኑኒ እያ ኦይካና መላነ ኑ ሃሉዋ ከያና መላ፥ እ ጭማናዉ ዳንዳኤስ” ያጎሶና።

11 ሽን ጎዳይ ያሽስያ ቶራ ቃራዳን ታራ ደኤስ። ሄሳ ግሾ፥ ታና የደይሳት ꬉበታና፤ ኤንቲ ታና ፆኖኮና። ኤንታዉ ጊጎና ግሾ፥ ኤንቲ ግታ ዬላ ዬላታና። ኤንታ ካዉሻይ ኩምꬅ ዶገተና። 12 አቤት ኡባፈ ዎልቃማ ጎዳዉ፥ ፅሎታ ፓጨይሶ፥ ዎዛናነ ካሀ በኤይሶ፥ ኔኒ ታ ሞርከታ ቦላ ነ ሃሉዋ ከያዳ ታና በሳ። አይስ ጊኮ፥ ታኒ ታ ሞቱዋ ነዉ አꬃስ።

13 ጎዳስ የፅተ! ጎዳ ጋላትተ! አይስ ጊኮ፥ እ ማንቆታ ኢታታ ኩሸፐ አሼስ።

14 ታኒ የለትዳ ጋላሳይ ባደትዳይሳ ግዶ! ታ አይያ ታና የልዳ ጋላሳይ አንጀቶፎ! 15 ታ አዋስ፥ “ነዉ ምሽራቾ፤ ነዉ አደ ናእ የለትስ!” ያግ ኦድድ፥ ዳሮ ኡፋይስዳ ኡራይካ ባደትዳባ ግዶ! 16 ሄ አደይ ጎዳይ ቃቶና አꬅድ የግድ ꬋይስዳ ካታማታዳ ሀኖ። ሄ አደይ ዎንታ ዋሱዋ፥ ጋላስ ሴታን፥ “ኦላይ ጋክስ!” ግያ ኦዳ ስኦ። 17 አይስ ጊኮ፥ ታ አይያ ታዉ ዱፎ ግዳና መላነ እ ኡሎይካ ታና መርናዉ ኦይክ ኡታና መላ፥ ታና ኡሎን ዎꬍቤና። 18 ታኒ መቶነ አዛኖ በአናዉነ ላይꬃ ኡባ ዬላታሸ ዉርሳናዉ፥ አይስ ታ አየ ኡሎፐ ከያድና?