1 ካዎይ ሰደቅያስ ማልክያ ናኣ ጳስኮራነ ማእሰያ ናኣ ካህንያ ሶፎንያሳ ኪትዳ ዎደ፥ ጎዳ ቃላይ ኤርምያሳኮ ሀይሳዳ ያግድ ይስ፦ 2 ኤንቲ፥ “ባብሎነ ካዎይ ናቡካዳናፆር ባ ኦላንቾታራ ሀ ካታማ ተቅዳ ግሾ ኑስ ጎዳ ኦይቻ። ኦን ኤር፥ ጎዳይ በንይሳዳ ማላልስያ ኦሱዋ ኑ ግሾ ኦꬅድ፥ እያ ጉየ ዛሮና አገና” ያግዶሶና። 3 ኤርምያስ ኤንታዉ ዛሪድ፥ “ብድ ሰደቅያሳኮ ያግተ፦ 4 ‘ኔኒ ባብሎነ ካዉዋራነ ግምብያፈ ካረራ ነ ካታማ ተቅዳ እያ ኦላንቾታራ ኦለትያነ ነ ኩሸን ደእያ ኦላ ሚሽያ ታ ነ ቦላ ዛራና፤ ኤንታ ኡባ ሀ ካታማ ግዶ ገልሳና። 5 ታኒ፥ ታ ሁጰን ሴራስ ምጨትዳ ኩሸን፥ ዎልቃማ ቀስያን፥ ይሎን፥ ሀንቆንነ ዎልቃማ ጋዶን ነና ኦላና። 6 ታ ሀ ካታማን ደእያ አሳነ መህያ ሾጫና፤ ኤንቲ ኢታ ጋዶን ዉራና። 7 ሄሳፈ ጉየ፥ ይሁዳ ካዋ ሰደቅያሳ፥ እያ ሞርናታ፥ ጋዶፐ፥ ማሻፈነ ኮሻፐ አትዳ፥ ሀ ካታማ አሳ ኡባ፥ ባብሎነ ካዋ ናቡካዳናፆራስነ ኤንታ ዎꬋናዉ ኮይያ ሞርከታስ አꬃዳ እማና። እ ኤንታ ቃራ ማሻን ጎይራና። እ ኤንታዉ ቃተና፤ ሳለትድ አገና፤ ማረና’ ” ያጌስ ጎዳይ እስራኤለ ፆሳይ።

8 ጎዳይ ኤርምያሳኮ፥ “ጉጃዳ አሳኮ ሀይሳዳ ያጋ፦ ታ ህንተ ስንꬃን ደኦ ኦግያነ ሀይቆ ኦግያ ዎꬃስ። 9 ሀ ካታማን ጋምእያ ኦንካ ማሻን ዎይኮ ኮሻን ዎይኮ ጋዶን ሀይቃና። ሽን ካታማፐ ከይድ ካታማ ተቅድ ኦይክዳ ባብሎነታስ ባ ኩሽያ እምያ ኦንካ ፓፃ አታና፤ ሄ ኡራይ ባ ሸምፑዋ አሻና። 10 ታኒ ሀ ካታማ ቦላ ሎኦባ ግዶናሽን ኢታባ ኦꬃናዉ ደንዳስ። ታ እያ ባብሎነ ካዋስ አꬃዳ እማና፤ እ ሀ ካታማ ታማን ፁጋና” ያጌስ ጎዳይ።

11 ይሁዳ ካዋ ኬꬃ አሳስ ሀይሳዳ ያጋ፦ ጎዳ ቃላ ስእተ! 12 ህንተኖ፥ ዳዊታ ኮቻቶ፥ ጎዳይ ህንተኮ ሀይሳዳ ያጌስ፤ “ዎንታ ዎንታ ሱረ ፕርድተ፤ ቦንቀትዳይሳታ ኡንኤꬅያ አሳ ኩሸፐ አሽተ። ሄሳ ህንተ ኦꬆና እፅኮ፥ ህንተ ኢታ ኦሱዋ ጋሶን ታ ሀንቆይ ታማዳ ኤፃና፤ ኦንካ እያ ቶይሰና” ያጌስ ጎዳይ።

13 ነኖ፥ የሩሳላመ፥ ደንባን ደእያ ዛላዳ፥ ዛንጋራፐ ꬎቁ ጋዳ በንታሳ፤ ሽን ታ ነና ኦላና። ኔኒ፥ “ኦንካ ታ ቦላ ፃለና ዎይኮ ታ ደእያ በሳ ገለና” ያጋሳ።

14 ሽን፥ “ታኒ ጎዳይ ነና ነ ኦሱዋዳ ሴራና። ታኒ ነ ካዎ ኬꬃን ታማ ኦይꬃና፤ ነ ዩሹዋን ደእያ ኡባ ምድ ꬋይሳና” ያጌስ ጎዳይ።