1 ጎዳይ ሀይሳዳ ያጌስ፤ “ዱገ ይሁዳ ካዋ ጋꬎ ባዳ፥ ያን ሀ ቃላ ኦዳ። 2 ‘ነኖ ይሁዳ ካዋዉ፥ ዳዊታ አራታን ኡትዳይሶ፥ ኔኒ፥ ነ ሞርናትነ ሀ ፐንግያራ ገልያ ነ አሳይ ጎዳ ቃላ ስእተ! 3 ሱረ ፕርዳ ፕርድተ፤ ፅሎ ኦꬅተ። ቦንቀትዳይሳ ኡንኤꬅያ አሳ ኩሸፐ አሽተ። በተ አሳስ፥ ይኦታስነ አምኤታስ ገነ ኦꬆፕተ ዎይኮ ሱጎፕተ። ፅሎ አሳ ሱꬁ ሀ በሳን ጉሶፍተ። 4 ሀ ኪታታ ህንተ ናግኮ፥ ዳዊታ አራታን ኡትያ ካዎት ፓራነ ፓራ ጋረ ቶግድ፥ ባንታ ሞርናታራነ ባንታ አሳራ ሀ ካዎ ጋꬎ ፐንግያራ ገላና። 5 ሽን ህንተ ኪተቶና እፅኮ፥ ሀ ካዎ ጋꬎይ ባይሳ ግዳና ያጋዳ ታ ጎዳይ ታ ሁጰን ጫቃስ’ ” ያጌስ ጎዳይ።

6 ጎዳይ ይሁዳ ካዎ ጋꬉዋባ ሀይሳዳ ያጌስ፦ “ኔኒ ታዉ ጋላዳ ቢታነ ልባኖሰ ዙማ መላ ግድኮካ፥ ታ ነና መላ ቢታነ አስ ዶና ካታማ ኦꬃና። 7 ታኒ ነና ላልያ አሳ ኦላ ሚሸ ኦይꬃዳ ኪታና፤ ኤንቲ ነ ዝጋ ቱቀታ ቃንፀረꬅድ፥ ታማን የጋና።

8 “ዱማ ዱማ ካዎተꬃታፐ አሳይ ሄ ካታማ ማታራ አꬍሸ፥ ‘ጎዳይ አይስ ሀ ግታ ካታማ ሀይሳዳ ኦꬅዴ?’ ያግድ እሶይ እሱዋ ኦይቻና። 9 ኤንቲ ዛሪድ፥ ‘ጎዳ ባንታ ፆሳራ ጫቅዳ ጫቁዋ መንꬅድ፥ ሀራ ፆሳታ ጎይንዳ ግሾነ ኦꬅዳ ግሾሳ’ ” ያጋና።

10 ሀይቅዳ ካዋ እዮስያሳስ ዬኮፍተ ዎይኮ ካዮቶፍተ። ሄሳ አግድ፥ ድኤትድ ብዳ ሳሎማስ *ሳሎማስ ሀራ ሱንꬃይ እዮአካዛ። እዮአካዝ ካዎተꬃ ሱንꬁ ግድሽን፥ ሳሎም ሶ ሱንꬁ ዎይኮ ቡዞ ሱንꬁ።ሴለትድ ዬክተ። እ ጉየ ስመና፤ ባ የለትዳ ቢታ ዛሪድ በኤና።

11 ባ አዋ በሳን ይሁዳን ካዎትድ ደእሸ፥ ሀ በሳፈ ብዳ እዮስያሳ ናአ ሳሎማባ ጎዳይ ሀይሳዳ ያጌስ። “እ ጉየ ስመና። 12 እ ድኤትድ ብዳ ቢታን ሀይቃና፤ ስሚድ ሀ ቢታ በኤና” ያጌስ ጎዳይ።

13 ባ ኬꬃ ገነን ኬፀይሳ፥ ጌላ ኦገን ፖቀ ቦላ ፖቀ ጉጀይሳ፥ ባ አሳስ አይኮካ እሞናነ ጋቴ ቃንፆና ኦስሰይሳ አየ! 14 ሄ ኡራይ፥ “ታኒ ታዉ ግታ ፖቀይ ደእያ ዳልጋ ኬꬅ ኬፃና” ያግድ፥ ባ ኬꬃስ ዳልጋ ማስኮተታ ከስድ፥ ዝጋ ምꬃን አሌቅስድ፥ ዞኦ ቃላመ ትዬስ።

15 ነ ዳሮ ዝጋን ኬፅዳይስ ነና ሎኦ ካዎ ከሴስ ጋዳ ቆፓይ? ነ አዋ እዮስያሳስ ምያባይነ ኡያባይ ꬋይዴ? እ ሱረ ፕርዳ ፕርድስ፤ ፅሎ ኦꬅስ። ሄሳ ግሾ፥ እያዉ ኡባባይ እንጀትስ። 16 እ ማንቆታስነ መቶታንቾታስ ሱረ ፕርድያ ግሾ፥ ኡባባይ እያዉ እንጀትስ። ጎዳ ኤሬስ ጉሳይ ሀይሳ። 17 ሽን ነ አይፈይነ ነ ዎዛናይ ሸምፕዳይ፥ ጭሞን ጎአ ደሞ፥ ፅሎ ሱꬅ ጉሶ፥ ገነነ ኡንኤꬆ ቦላና።

18 ሄሳ ግሾ፥ ጎዳይ እዮስያሳ ናኣ፥ ይሁዳ ካዋ እዮአቄማባ ሀይሳዳ ያጌስ፦ “እ ሀይቅያ ዎደ ኤንቲ እያዉ፥ ‘ዎ፥ ታ እሻዉ፥ ዎ ታ እሻዉ’ ያግድ ዬኮኮና። ቃስ፥ ‘ዎ፥ ታ ጎዳዉ፥ ዎ፥ ታ ካዋዉ’ ያግድ ዘሌሎኮና። 19 እያ ሞጎይካ ሀረ ሞጎ መላ ግዳና። እያ አሀይ ጎሸትድ፥ የሩሳላመ ፐንገታፐ ያ ባጋን የገታና” ያጌስ ጎዳይ።

20 ጎዳይ የሩሳላመባ ሀይሳዳ ያጌስ፦ “ኦላስ ኔራ ዙፐተይሳት ኡባይ ፆነትዳ ግሾ፥ ፑደ ልባኖሰ ባዳ፥ ያን ዋሳ። ባሳነ ቢታን ዋሶ ሱልሳ፤ አባሪማ ዙማን ዋሳ። 21 ነ ሳሮ ደእያ ዎደ ታ ነዉ ኦዳስ፤ ሽን ነ ታና ስኦና እፃዳሳ። ነ ናአተꬃፈ ዶምን ነ ሀኖይ ሀይሳ፤ ነ ታዉ ኪተቶና እፃዳሳ። 22 ነ ሄንꬃንቾታ ኡባ ጫርኮይ ኤፋና፤ ኦላስ ኔራ ዙፐተይሳት ድኤትድ ባና። ሄ ዎደ ነ ኢታተꬃ ኡባ ግሾ ዬላታናነ ካዉያና። 23 ህንተኖ፥ ልባኖሰ ዝጋን ኬፀትዳ ኬꬃን ደኤይሳቶ፥ እቀꬅ ኦይክዳ ማጫሳዳ ኡንእ ህንተ ቦላ ፑቱ ጊኮ ህንተ ዋናኔ?” ያጌስ።

24 ጎዳይ ሀይሳዳ ያጌስ፦ “ታ ደኦይ ኤሮ! ኔኒ እዮአቄማ ናአይ፥ ይሁዳ ካዎይ ዮአክን፥ ታ ኡሻቻ ኩሸን ደእያ ታ ማታሜ ዎꬅያ ምግዶ ግድያኮካ ታ ነና ከሳ የጋና። 25 ነና ዎꬋናዉ ኮየይሳታስ፥ ነ ያይያ ባብሎነ ካዋ ናቡካዳናፆራስነ እያ ኦላንቾታስ ታ ነና አꬃዳ እማና። 26 ታ ነናነ ነ አይዉ ህንተ የለቶና ሀራ ቢታ ሆላና፤ ህንተ ናምአይካ ያን ሀይቃና። 27 ህንተ ስማናዉ ላሞትያ ቢታ ፖሎ ስመከታ” ያጌስ።

28 ሀ አደይ ዮአክን፥ ካትዳነ መቅዳ ፁጌ? እ፥ ኦንካ ኮዮና ሚሼ? እነ እያ ናይት አይስ ጎደትድ፥ ኤሮና ቢታን የገትድ አትዶና? 29 ቢተ፥ ቢተ፥ ቢተ፥ ጎዳ ቃላ ስአ! 30 “እያ ኮቻፈ እሱዋስካ እንጀቶና ግሾነ ዳዊታ አራታን ኡትያ ዎይኮ ይሁዳን ካዎትያ አስ እሶይካ ባይና ግሾ፥ ሀ አድያ፥ ናእ ባይና አስ፥ ባ ላይꬃ ኡባን ደኦይ እንጀቶና አስ” ጋዳ ፃፋ ያጌስ ጎዳይ።