1 “ታ ሄንꬃ በሳን ደእያ ዶርሳታ ꬋይስያነ ላልያ ሄንꬃንቾታ አየ!” ያጌስ ጎዳይ።

2 ጎዳይ፥ እስራኤለ ፆሳይ፥ ባ አሳ ሄምያ ሄንꬃንቾታ ሀይሳዳ ያጌስ፦ “ህንተ ታ ዶርሳታ ላልዳ ግሾ፥ ጎድዳ ግሾ፥ ናግቦና ግሾነ ህንተ ኦꬅዳ ህንተ ኢታ ኦሱዋ ግሾ ታ ህንተና ሴራና። 3 ታ ዉድያፐ አትዳይሳታ ታ ካሰ ላልዳ ቢታ ኡባፈ ታ ሁጰን ሺሻና። ኤንታ ጉየ ኤንታ ሄንꬃ በሳ ዛራና፤ ኤንቲ ያን የለትድ ዳራና። 4 ኤንታ ሎይꬅድ ሄምያ ሄንꬃንቾታ ኤንታዉ ሹማና። ኤንቲ ዛሪድ ያዮኮና፤ ዳጋሞኮና፤ ኤንታፈ እሶይካ ꬋየና” ያጌስ ጎዳይ።

5 “ዳዊታ ኮቻፈ ፅሎ አጫ ደንꬃና ዎደይ ያና። እ ካዎተꬃ ጭንጫተꬃን አይሳና፤ ቢታ ቦላ ሱረነ ፅሎ ኦꬃና። 6 እያ ካዎተꬃ ዎድያን ይሁድ አታና፤ እስራኤለይ ሳሮ ዳና። እያ ሱንꬃይ፥ ‘ፆሳይ ኑ ፅሎተꬃ’ ጌተታና” ያጌስ ጎዳይ።

7 ሄሳ ግሾ፥ “አሳይ፥ ‘እስራኤላ አሳ ግብፀ ቢታፈ ከስዳ ጎዳይ ኤርያ መላ’ ያግድ ጫቃናይሳ አግድ፥ 8 ‘እስራኤላ ኮቻ ፑደሀ ባጋ ቢታፈነ ኤንታ ላልዳ ቢታ ኡባፈ ኤህዳ ጎዳይ ኤርያ መላ’ ያግድ ጫቃና ዎደይ ያና። ሄሳፈ ጉየ፥ ኤንቲ ባንታ ቡዞ ቢታን ዳና” ያጌስ ጎዳይ።

9 ናበታባ ታ ቆፕያ ዎደ ታ ዎዛናይ ዳቡሬስ፤ ታ መቀꬃት ኮኮሮሶና። ጎዳ ግሾነ እያ ጌሻ ቃላ ግሾ ዎይነይ ፆንን ማꬆትዳ አስ ግዳስ። 10 ቢታይ ላይማተꬃን ኩምስ። ቃንገꬃ ግሾ፥ ቢታይ ዬኬስ፤ ባዞ ሄንꬃ በሳት መልዶሶና። ናበት ኢታ ኦገን ሄመቶሶና፤ ባንታ ማታ ልከ ግዶና ኦገን ጎኤቶሶና።

11 “ናበትነ ካህነት ቱንዶሶና፤ ሀር አቶሽን ታ ኬꬃን ኤንቲ ኦꬅያ ኢታ ታ በአስ” ያጌስ ጎዳይ።

12 “ሄሳ ግሾ፥ ኤንታ ኦገይ ሀልፃና፤ ኤንቲ ꬉማን የገታና፥ ꬉበትድ ኩንዳና። ኤንቲ ሴረትያ ዎደ ኤንታ ቦላ ጋዶ ኤሀና” ያጌስ ጎዳይ።

13 “ሳማረ ናበታ ግዶን ኢታባ በአስ። ኤንቲ ባኣለ ሱንꬃን ትንብተ ኦዶሶና፤ ታ አሳ እስራኤለ ባለꬆሶና። 14 ቃስ የሩሳላመ ናበታ ግዶንካ ሀይꬃስ ዴፅያባ በአስ። ኤንቲ ላይማቶሶና፤ ዎርዶትድ ደኦሶና። ኦንካ ባ ኢታ ኦሱዋፐ ስሞና መላ ኤንቲ ኢታ ኦይሳታ ምንꬆሶና። ኤንቲ ኡባይ ታዉ ሶዶማ መላ፤ የሩሳላመ አሳይ ጋሞራ መላ” ያጌስ ጎዳይ።

15 ሄሳ ግሾ፥ ኡባፈ ዎልቃማ ጎዳይ ናበታባ ሀይሳዳ ያጌስ፦ “የሩሳላመ ናበታ ዶናፐ ቱናባይ ከይድ፥ ቢታ ኡባን ላለትዳ ግሾ፥ ታ ኤንታ ጫምያ ካꬅ ሙዛና፤ ኤንታ ዎꬍያ ሃꬅ ኡሻና” ያጌስ።

16 “ናበት ኦድያባ ስኦፕተ፤ ኤንቲ ሀኖና ኡፋይሳን ኩንꬆሶና። ጎዳይ ኦዶናሽን ኤንቲ ባንታፈ መꬍ ከስድ ቆንጨꬅ ኦዶሶና። 17 ታና ካይሳታኮ፥ ‘ህንተ ሳሮ ዳና’ ያጎሶና፤ ቃስ ባንታ ዎዛና ኢታተꬃ ካለይሳታኮ፥ ‘ህንተና ኢታባይ ጋከና’ ያጎሶና” ያጌስ ኡባፈ ዎልቃማ ጎዳይ።

18 “ሽን በአናዉ ዎይኮ እያ ቃላ ስአናዉ ጎዳይ ዞርያ በሳን ኤንታፈ ኦነ ኤቅዳይ? እያ ቃላ ስእዳይ ኦኔ? 19 ጎዳ ጎተይ ሀንቆን ደንዳና፤ ዎልቃማ ሆበይ ኢታታ ሁጵያ ሾጫና። 20 ባ ዎዛና ቆፋ ፖሎና ደእሸ፥ ጎዳ ሀንቆይ ስመና። ዉርሰꬃ ዎድያን ሀይሳ ህንተ አኬካና። 21 ታ ሀ ናበታ ኪታብከ፤ ሽን ኤንቲ ባንታ ኪታ ኤክድ ዎፆሶና። ታ ኤንታዉ ኦዳብከ፤ ሽን ኤንቲ ትንብተ ኦዶሶና። 22 ኤንቲ ታ ዞርያ በሳን ኤቅዳባ ግድያኮ፥ ታ ቃላ፥ ታ አሳስ ኦዳናሽን። ኤንቲ ኢታ ኦግያፐነ ኤንታ ኢታ ኦሱዋፐ ዛራናሽን” ያጌስ ጎዳይ።

23 “ታ ማታ ፃላላ ፆሴ? ሃሆ ፆሲ ግድክና? 24 ታ በኦናዳ፥ አስ ጌማ በሳን ባና ቆሳናዉ ዳንዳኢ? ሳሎንነ ሳአን ኩምዳይ ታና ግድክና?” ያጌስ ጎዳይ።

25 “ታ ሱንꬃን ዎርዶ ትንብተ ኦደይሳት ግያባ ስአስ። ኤንቲ፥ ‘ታ አሙሆ በአስ፤ ታ አሙሆ በአስ’ ያጎሶና። 26 ሀ ናበት ባንታዉ መꬍድ ከስድ ኦድያ ዎርዶ ትንብተይ ኤንታ ዎዛናን አዉደ ጋካናዉ ጋምአኔ? 27 ኤንታ አዋት ባኣለ ኤቃ ጎይንድ ታ ሱንꬃ ዶግዳይሳዳ፥ ኤንቲ እሶይ እሱዋስ ኦድያ አሙሁዋን፥ ታ አሳይ ታ ሱንꬃ ዶጋና መላ ኦꬃናዉ ቆፖሶና። 28 አሙሆ አሙህያ ናበይ ባ አሙሁዋ ኦዶ፤ ሽን ታ ቃላ ስእያ ናበይ ታ ቃላ አማነትድ ኦዶ። ዳልነ ግስተይ አዉን ጋሄቲ? 29 ታ ቃላይ ታማ መላ ግደኔ? ዛላ መንረꬅያ ናርቃ መላ ግደኔ?” ያጌስ ጎዳይ።

30 “ሄሳ ግሾ፥ ታ ቃላ እሶይ እሱዋፈ ካይሶትድ ታፐ ኤክዳ ዳንስድ ትንብተ ኦድያ ናበታ ታ እፃይስ። 31 ሄሳዳካ፥ ባንታ ዎዛና ቆፋ ኦድሸ፥ ‘ጎዳይ ያጌስ’ ግያ ናበታካ ታኒ እፃይስ። 32 ዎርዶ አሙህሸ ትንብተ ኦድያ ናበታ ቦላ ታ ደንዳና። ኤንቲ ባንታ አሙሁዋን ካትድ ትንብተ ኦድያ ናበታ ታኒ እፃይስ። ታ ኤንታ ኪቶናሽን ዎይኮ ሹሞናሽን ዎርዶ ትንብተ ኦዶሶና፤ ታ አሳ ባለꬆሶና። ኤንቲ ሀ አሳ አይኮካ ማዶኮና” ያጌስ ጎዳይ።

33 “ጎዳይ ታኮ፥ ‘ሀ አሳይ ዎይኮ ናበይ ዎይኮ ካህነይ፥ ጎዳ ኪታይ አይቤ?’ ግድ ኦይችኮ፥ ነ ኤንታኮ፥ ‘ጎዳይ፥ ታ ህንተና ሆላና’ ያጌስ” ጋዳ ኦዳ።

34 “ናበይ ዎይኮ ካህነይ ዎይኮ አሳይ፥ ‘ሀይስ ጎዳ ኪታ’ ያግድ ኦድኮ፥ ታ ሄ አድያነ እያ ሶ አሳ ሴራና። 35 ሄሳ አግድ እሶይ እሶይ፥ ‘ጎዳይ ዎይግዴ? ዎይኮ ጎዳይ አይ ኦድዴ?’ ያግድ ባ ላገታነ ባ ዳቦታ ኦይቻናዉ በሴስ። 36 ህዛፐ ኦንካ፥ ‘ጎዳ ኪታ’ ያግድ ዛሪድ ኦደታናዉ በሰና። ሄሳ ግሾ፥ እያ ዶናፐ ከይያ ቃላይ እያዉ ኪታ ግድያ ግሾ፥ ደኦ ፆሳ፥ ኡባፈ ዎልቃማ ጎዳ፥ ኑ ፆሳ ቃላ ህንተ ምርቄታ። 37 ኔኒ ናበታኮ፥ ‘ጎዳይ ህንተና ዎይግዴ?’ ዎይኮ ‘አይ ኦድዴ?’ ያጋዳ ኦይቻናዉ በሴስ። 38 ሽን ህንተ፥ ‘ሀይስ ጎዳ ኪታ’ ጊኮ፥ ጎዳይ ሀይሳዳ ያጌስ፦ ታኒ ህንተና፥ ‘ሀይስ ጎዳ ኪታ ጎፕተ’ ያግንካ ህንተ፥ ‘ሀይስ ጎዳ ኪታ’ ግደታ። 39 ሄሳ ግሾ፥ ታ ህንተና ዶጋና፤ ህንተናነ ህንተ አዋታስ እምዳ ካታማ ኩመꬅ ታ ስንꬃፈ ድጋና። 40 ታ ህንተ ቦላ መርና ካዉሻነ ዶገቶና ዬላ ኤሀና” ያጌስ ጎዳይ።