1 እዮስያሳ ናአይ፥ ይሁዳ ካዎይ እዮአቄም ካዎትዳ ኦይዳንꬆ ላይꬃን፥ ባብሎነ ካዎይ ናቡካዳናፆር ካዎትዳ ኮይሮ ላይꬃን፥ ይሁዳ አሳባይ ኤርምያሳኮ ይዳ ቃላይ ሀይሳ። 2 ናበይ ኤርምያስ ይሁዳ ኡባስነ የሩሳላመን ደእያ ኡባስ ሀይሳዳ ያግስ፦ 3 አሞፀ ናአይ፥ ይሁዳ ካዎይ፥ እዮስያስ ካዎትዳ ታማነ ሄꬓንꬆ ላይꬃፈ ዶምድ፥ ሀች ጋካናዉ፥ ላታማነ ሄꬑ ላይꬅ ጎዳ ቃላይ ታኮ ይስ። ታ ህንተዉ ዛራ ዛራ ኦዳስ፤ ሽን ህንተ ስኦና እፅደታ።

4 ጎዳይ ባ አይለታ፥ ናበታ ኡባ ዛር ዛር ህንተኮ ኪትስ፤ ሽን ህንተ ስኦና እፅደታ። 5 ኤንቲ፥ “ህንተ ኡባይ ህንተ ኢታ ኦግያፐነ ህንተ ኢታ ኦሱዋፐ ስምተ። ጎዳይ ህንተዉነ ህንተ ማይዛታስ መርናዉ እምዳ ቢታን ህንተ ዳና። 6 ሀራ ፆሳታ ጎይናናዉነ ኤንታዉ ኦꬃናዉ ካሎፍተ። ቃስ ህንተ፥ ህንተ ኩሸን ኦꬅዳ ኤቃታን ጎዳ ሀንቁዋ ደንꬆፍተ። ሄስ ሀንኮ ጎዳይ ህንተና ቆሄና” ያግዶሶና።

7 “ህንተ ታ ኦድዳይሳ ስኦና እፅድ፥ ህንተ ኩሸይ ኦꬅዳባን ታና ይሎይደታ። ህንተ፥ ህንተና ቆህያባ ኦꬅደታ” ያጌስ ጎዳይ።

8 “ሄሳ ግሾ፥ ኡባፈ ዎልቃማ ጎዳይ ሀይሳዳ ያጌስ፦ ህንተ ታ ቃላስ ኪተቶና እፅዳ ግሾ፥ 9 ፑደሀ ባጋ አሳ ኡባነ ታ አይልያ ባብሎነ ካዋ ናቡካዳናፆራ ፄጋና። ኤንታ ሀ ቢታ ቦላ፥ ሀ ቢታን ደእያ አሳ ቦላነ ሄራን ደእያ ካዎተꬃታ ኡባ ቦላ ኤሀና። ታ ሀ ቢታ ኩመꬅ ꬋይሳና፤ ቃስ በእዳ ኡባይ ሻትያባነ ቀልቅስያባ ኦꬃና” ያጌስ ጎዳይ። 10 ኤንታ ግዶፈ እልልስነ ኡፋይሳ ቃላ፥ ያጋኖ ግርስ፥ ዎፃ ግርስነ ፆምፐ ፖኦ ꬋይሳና። 11 ሀ ቢታይ ኩመꬅ ላለትዳነ ባይሳ ቢታ ግዳና፤ ካዎተꬃት ባብሎነ ካዋስ ላፑን ታሙ ላይꬅ ሃረታና።

12 “ላፑን ታሙ ላይꬃይ ፖለትዳፐ ጉየ፥ ታኒ ባብሎነ ካዋነ እያ አሳ ኤንታ ናጋራ ግሾ ሴራና፤ ኤንታ ቢታ መርናዉ ባይሳ ኦꬃና። 13 ታ ሀ ቢታ ቦላ ኦድዳ ኡባ፥ ኤርምያስ ካዎተꬃታ ኡባ ቦላ ኦድዳ ትንብትያነ ሀ ማፃፋን ፃፈትዳ ኡባ ሀ ቢታ ቦላ ኤሀና። 14 ዳሮ ካዎተꬃትነ ግታ ካዎት ባብሎነ አሳ ሃራና። ታ ኤንታዉ፥ ኤንታ ሀኑዋዳነ ኤንታ ኩሸ ኦሱዋዳ ዛራና” ያጌስ ጎዳይ።

15 “ታ ሀንቁዋን ኩምዳ ዎይነ ዋንጫ ታ ኩሸፐ ኤካ። ኤፋዳ ታ ነና ኪትያ ካዎተꬃታ ኡባ ኡሻ። 16 ኤንቲ ኡይድ፥ ታኒ ኤንታ ግዶ የድያ ማሻ ጋሶን ጋንድጋራናነ ጎያና” ያጌስ ጎዳይ እስራኤለ ፆሳይ።

17 ታኒ ጎዳ ኩሸፐ ዋንጫ ኤካዳ፥ እ ታና ኪትዳ ካዎተꬃታ ኡባ ኡሻስ። 18 ሀች ሀንዳይሳዳ ኤንታ ኡባ ꬋዮነ ዳጋማ፥ ጫሸነ ባደꬅ ኦꬃና መላ የሩሳላመነ ይሁዳ ካታማታ፥ እያ ካዎታነ እያ ሞርናታ ኡባ ኡሻስ። 19 ግብፀ ካዋ፥ እያ አይለታ፥ እያ ሞርናታ፥ እያ ቢታ አሳ ኡባነ 20 ያን ደእያ አላጋ አሳ ኡባ ኡሻስ። ኦፃ ካዎታ ኡባ ኡሻስ። ፍልስፄመን ደእያ አስቃሎና፥ ጋዛ፥ ኤቅሮናነ አሽዶዳፐ አትዳ ካዎታ ኡባ ኡሻስ። 21 ኤዶመ፥ ሞአበነ አሞነ ኡሻስ። 22 ፅሮሳ ካዎታ ኡባ፥ ስዶና ካዎታ ኡባነ መደትራነ አባፈ ሄፍንꬃን፥ ሃሆን ደእያ ካዎታ ኡሻስ። 23 ደዳና፥ ተማና፥ ቡዛነ ባንታ ሁጵያ ጋፃ ሜድያ አሳ ኡባ ኡሻስ። 24 አራበ ካዎታ ኡባነ መላ ቢታን ደእያ ዋላካ አሳ ካዎታ ኡባ ኡሻስ። 25 ዝምራ፥ ኤላማነ ሜዶና ካዎታ ኡባ ኡሻስ። 26 ፑደሀ ቢታ ካዎታ ኡባ፥ ሃሆንነ ማታን ደእያ ካዎታ ኡባ ካላዳ ካላዳ ሳኣ ቦላ ደእያ ካዎተꬃታ ኡባ ኡሻስ። ኤንታፈ ጉየ ባብሎነ ካዎይ ኡያና።

27 ጎዳይ ታኮ፥ “ሄሳ ግሾ፥ ‘ኡባፈ ዎልቃማ ጎዳይ፥ እስራኤለ ፆሳይ ህንተኮ ሀይሳዳ ያጌስ’ ያጋ። ‘ኡይተነ ማꬆትተ፤ ጮይተነ ኩንድተ። ታኒ ህንተ ግዶ የድያ ማሻ ጋሶን ዛሪድ ደንዶፍተ’ ያግስ። 28 ሽን ኤንቲ ነ ኩሸፐ ዋንጫ ኤኮናነ ኡዮና እፅኮ፥ ኤንታኮ ሀይሳዳ ያጋ። ‘ኡባፈ ዎልቃማ ጎዳይ ህንተኮ ሀይሳዳ ያጌስ፦ ህንተ ኡያናዉ በሴስ። 29 ታ ሱንꬃን ፄገትዳ ካታማ ቦላ ኢታባ ኦꬃናዉ ዶማይስ። ያትን ህንተ ሴረቶና አታናዉ ዳንዳኤቲ? ታ ሳአን ደእያ ኡባ ቦላ ማሻ ፄግዳ ግሾ ህንተ ሴረቶና አተከታ’ ” ያጌስ ኡባፈ ዎልቃማ ጎዳይ።

30 “ሄሳ ግሾ፥ ኤርምያሳ፥ ሀ ቃላ ኡባይ ኤንታ ቦላ ፖለታናይሳ ኤንታዉ ኦዳ። ጎዳይ ꬎቃን ጉማና፤ ጎዳይ ባ ጌሻ በሳፈ ባ ጉንꬃ ስሳና። እ ባ ቢታ ቦላ ፃጋና፤ ዎይነ ጉምኤይሳት ዋሰይሳዳ ሳአን ደእያ ኡባ ቦላ ዋሳና። 31 ጎዳስ ካዎተꬃታራ ሞቶይ ደእያ ግሾ እያ ዋሶይ ሳአ ጋፃ ጋክድ ስኤቴስ። ጎዳይ አሳ ኡባራ ፕርደታና፤ እ ኢታታ ማሻስ አꬅድ እማና” ያጌስ ጎዳይ።

32 “ኢታባይ ካዎተꬃፈ ካዎተꬃ ላለትስ፤ ሳኣ ጋፃፐ ጎተይ ደንድስ” ያጌስ ኡባፈ ዎልቃማ ጎዳይ።

33 ሄ ዎደ ጎዳይ ዎꬍዳይሳታ አሀይ፥ ቢታ ቦላ ሀ ጋፃፐ ያ ጋፃ ጋካናዉ ላለታና። ኤንታዉ ዬከተና፥ ኤንታ አሀይ ሺቀና ዎይኮ ሞገተና፤ ኤንቲ ቢታን ፕቶ መላ ግዳና።

34 ህንተኖ፥ ሄንꬃንቾቶ፥ ዬክተነ ዋስተ። ህንተኖ፥ ዉድያ ካለይሳቶ፥ ብዶን ጎንዶረትተ። ህንተ ሹከትያ ዎደይ ጋክስ፤ ህንተ ኩንዳናነ ሎኦ ኡርቃ ሚሻዳ መቀረታና። 35 ሄንꬃንቾት ባቃትድ አትያ በሲ ባዋ፤ ዉድያ ካለይሳት ከስ ኤክያ በሲ ባዋ። 36 ጎዳይ ኤንታ ሄንꬃ ጋድያ ꬋይስያ ግሾ፥ ሄንꬃንቾት ዋስያ ዋሱዋነ ዉድያ ካለይሳት ዬክያ ዬሁዋ ስእተ። 37 ጎዳ ሱልያ ሸንያ ጋሶን ሳሮ ቢታይ ባይሳታና። 38 ጋሞይ ባ ደእያ ዎራፐ ከየይሳዳ ጎዳይ ባ ደእያ በሳፈ ከያና። ኤንታ ቢታይ ኡንኤይሳታ ማሻንነ ጎዳ ሱልያ ሀንቁዋን ባይሳ ግዳና።