1 እዮስያሳ ናአይ ይሁዳ ካዎይ እዮአቄም ካዎትዳ ዎደ ጎዳ ቃላይ ይስ። 2 ጎዳይ፥ “ፆሳ ኬꬃ ዳባባን ኤቃ። ፆሳ ኬꬃን ጎይናናዉ ይሁዳ ካታማታፐ ያ ኡባስ፥ ታ ነና ኪትዳ ቃላፐ እሱዋካ አሾና ኦዳ። 3 ኤንቲ ስእድ፥ ባንታ ኢታ ኦግያፐ ስማነኮ ኦን ኤር። ሄሳ ግድኮ፥ ታኒ ኤንታ ኢታተꬃ ግሾ ꬋይሳናዉ ቆፕዳይሳ አጋጋና።”

4 ኤንታኮ ሀይሳዳ ያጋ፦ “ህንተ ታና ስኦና እፅኮነ ታ ህንተዉ እምዳ ህግያ ኪተቶና እፅኮ፥ 5 ህንተ ስኦና እፅኮካ ታ ዛራ ዛራዳ ህንተኮ ኪትዳ፥ ታ አይለታ ናበታ ቃላ ስኦናን እፅኮ፥ 6 ታ ሀ ፆሳ ኬꬃ ሴሎዳ ኦꬃና። ሀ ካታማ ሳአን ደእያ ካዎተꬃታ ኡባስ ባደꬅ ኦꬃና” ያግስ።

7 ኤርምያስ ፆሳ ኬꬃን ሀ ቃላ ኦድሽን፥ ካህነት፥ ናበትነ አሳ ኡባይ ስእዶሶና። 8 ኤርምያስ፥ ጎዳይ፥ ኦዳ ግድ እምዳ ኪታ ኦድድ ኦንግዳ ዎደ ካህነት፥ ናበትነ አሳ ኡባይ እያ ኦይክድ፥ “ነ ሀይቃናዉ በሳሳ” ያግዶሶና። 9 ኔኒ፥ “ ‘ሀ ፆሳ ኬꬃይ ሴሎዳ ሀናና፤ ቃስ ሀ ካታማይ ꬋያና፤ ባይሳ ግዳና’ ያጋዳ፥ ጎዳ ሱንꬃን አይስ ትንብተ ኦዳዲ?” ያግድ፥ ፆሳ ኬꬃን ሺቅዳ አሳ ኡባይ ኤርምያሳ ተቅዶሶና።

10 ይሁዳ ሀላቃት ሄሳ ስእዳ ዎደ፥ ካዎ ጋꬎፐ ከይድ፥ ፆሳ ኬꬅ ይዶሶና። ፆሳ ኬꬃን ኦራꬃ ፐንገ ጌተትያ ፐንግያን ኡትዶሶና። 11 ካህነትነ ናበት ሀላቃታኮነ አሳ ኡባኮ ሀይሳዳ ያግዶሶና፦ “ህንተ፥ ህንተ ሀይꬃን ስእዳይሳዳ፥ ሀ አደይ ሀ ካታማ ቦላ ትንብተ ኦድዳ ግሾ፥ እ ሀይቃናዉ በሴስ!” ያግዶሶና።

12 ኤርምያስ ሀላቃታኮነ አሳ ኡባኮ ሀይሳዳ ያግስ፦ “ሀ ህንተ ስእዳ ቃላ ኡባይ ሀ ፆሳ ኬꬃ ቦላነ ሀ ካታማ ቦላ ሀናና ጋዳ ታ ኦዳና መላ ጎዳይ ታና ኪትስ። 13 ህዛ ህንተ ኦግያነ ህንተ ኦሱዋ ላምተ፤ ጎዳ ህንተ ፆሳ ቃላስ ኪተትተ። ሄሳ ህንተ ኦꬅኮ፥ ጎዳይ ህንተ ቦላ ኤሀና ግዳ ኢታባ አጋጋና። 14 ታና ግድኮ፥ ታ ህንተ ኩሸን ደአይስ። ህንተዉ ሎኦነ ሱረ ዳንዳባ ታ ቦላ ኦꬅተ። 15 ታኒ ሀ ቃላ ኡባ ህንተዉ ኦዳና መላ ጎዳይ ቱማ ታና ኪትዳ ግሾ፥ ህንተ ታና ዎꬍኮ፥ ህንተ ህንተ ቦላ፥ ሀ ካታማ ቦላነ እያን ደእያ አሳ ቦላ ፅሎ ሱꬃ አጮ ኤሀናይሳ ኤርተ” ያግስ።

16 ሀላቃትነ አሳ ኡባይ፥ ካህነትነ ናበት፥ “እ፥ ጎዳ፥ ኑ ፆሳ ሱንꬃን ኑስ ኦድዳ ግሾ፥ ሀ አደይ ሀይቃናዉ በሰና” ያግዶሶና።

17 ቢታ ጭማታፐ እሶት እሶት ደንድ ኤቅድ፥ ሺቅዳ አሳኮ ሀይሳዳ ያግዶሶና፦ 18 “ህዝቅያስ ይሁዳን ካዎትዳ ላይꬃን ሞረሴታ አደይ ምክያስ ካሰ ይሁዳ አሳስ ሀይሳዳ ያግድ፥ ትንብተ ኦድስ፦ ‘ፅዮነይ ሾቃዳ ጎየታና። የሩሳላመ ካታማይ ላለትድ፥ ላለꬃ ዶረ ግዳና። ፆሳ ኬꬃይ ኬፀትዳ ደረይ ዎራ ግዳና’ ያጌስ ኡባፈ ዎልቃማ ጎዳይ” ያግስ። 19 ያትን፥ “ይሁዳ ካዎይ ህዝቅያስነ ይሁዳ አሳ ኡባይ እያ ዎꬍዶና? አካይ፥ ህዝቅያስ ጎዳስ ያይድ፥ ጎዳ ማሮተꬅ ኦይችቤኔ? ጎዳይ ኤንታ ቦላ ኤሀና ግዳ ኢታባ አግቤኔ? ሽን ኑኒ ኑ ቦላ ኢታባ ኤሀና ሀኖስ” ያግዶሶና።

20 ቅርያት-ይኣርማ ጌተትያ በሳን፥ ሻማያ ናኣ፥ ኦርዮና ጌተትያ እስ አደይ ደኤስ። እካ ኤርምያስ ኦድዳይሳዳ፥ ሀ ካታማ ቦላነ ሀ ቢታ ቦላ ጎዳ ሱንꬃን ካሰ ትንብተ ኦድስ። 21 ካዎይ እዮአቄም፥ እያ ኦላንቾት፥ እያ ሞርናት፥ ኦርዮን ኦድዳይሳ ስእዳ ዎደ ካዎይ እያ ዎꬋናዉ ኮይስ። ኦርዮን ሄሳ ስእዳ ዎደ ያይድ፥ ግብፀ ባቃትስ። 22 ግዶሽን፥ ካዎይ እዮአቄም አክቦራ ናኣ ኤልናታናነ ሀራ አሳታ ግብፀ ኪትስ። 23 ኤንቲ ኦርዮና ግብፀፈ ከስድ፥ ካዋ እዮአቄመኮ ኤፍን፥ እያ ማሻን ዎꬍስድ ደረይ ሞገትያ ዱፎን ሞግዶሶና።

24 ሽን ሳፋና ናአይ፥ አክቃም ኤርምያሳ ማድዳ ግሾ አሳይ እያ ዎꬋናዉ አꬅድ እምቦኮና።