1 እዮስያሳ ናአይ ሰደቅያስ፥ ይሁዳን ካዎቶ ዶምዳ ዎደ ሀ ቃላይ ጎዳፐ ኤርምያሳኮ ይስ። 2 “ዳፎ ጎነ ዎዶሮራ ደእያ ቃምባራ መꬋዳ ነ ጋናን ዎꬃ። 3 ይሁዳ ካዋ ሰደቅያሳኮ የሩሳላመ ኪተትዳ አሳ ባጋራ፥ ኤዶመ፥ ሞአበ፥ አሞነ፥ ፅሮሳነ ስዶና ኪታ። 4 ኤንቲ ባንታ ጎዳታስ ኦዳና መላ ኤንታ ኪታ። ኡባፈ ዎልቃማ ጎዳይ፥ እስራኤለ ፆሳይ ሀይሳዳ ያጌስ፦ 5 ‘ታ ግታ ዎልቃንነ ታ ምጨትዳ ኩሸን ሳኣ፥ ሳአን ደእያ አሳ፥ መሄነ ዶአታ መꬋስ፤ ታኒ እያ፥ ታ ኮይያ ኦደስካ እማይስ። 6 ሀእ ታ ቢታ ኡባ ታ አይልያስ፥ ባብሎነ ካዋ ናቡካዳናፆራስ እማስ። ቃስ ታ ባዞ ዶአትካ እያዉ ሃረታና መላ ኦꬃስ። 7 እያ ቢታይ ሀራታስ ሃረትያ ዎደይ ጋካናዉ ካዎተꬃት ኡባይ እያዉ፥ እያ ናኣስነ እያ ናኣ ናኣስ ሃረታና። ሄሳፈ ጉየ፥ ዳሮ ካዎተꬃትነ ግታ ካዎት እያ ሃራና።’

8 “ሽን አይ ቢት ዎይኮ አይ ካዎተꬅ ባብሎነ ካዋ ናቡካዳናፆራስ ኪተቶና እፅኮነ እያ ቃምባራን ገሎና እፅኮ፥ ሄ ካዎተꬃይ እያ ኩሸን ꬋያና ጋካናዉ ማሻን፥ ኮሻንነ ቦሻን ሴራና። 9 ሄሳ ግሾ፥ ‘ባብሎነ ካዋስ ሃረተከታ’ ግያ ህንተ ናበታ፥ ህንተዉ ካየይሳታ፥ ህንተ አሙሆ ብለይሳታ፥ ህንተ ማሮታነ ሞይትለ ፄገይሳታ ስኦፕተ። 10 ኤንቲ ህንተዉ ዎርዶ ኦዶሶና፤ ህንተና ህንተ ቢታፈ ሾዳና፤ ህንተና ጎዳዳ ከሳና፤ ህንተካ ꬋያና። 11 ሽን አይ ካዎተꬅካ ባብሎነ ካዋ ቃምባራን ገልድ፥ እያዉ ሃረትኮ፥ ታ ሄ ካዎተꬃ እያ ቢታን አሻና፤ ኤንቲ ሄ ቢታ ጎያና፤ ያን ዳና” ያጌስ ጎዳይ።

12 ታኒ፥ ይሁዳ ካዋ ሰደቅያሳስካ ሀ ቃላ ኦዳስ፤ “ባብሎነ ካዋ ቃምባራን ገላዳ እያዉነ እያ አሳስ ሃረትኮ፥ ነ ደኦን ዳና። 13 ጎዳይ ባብሎነ ካዋስ ሃረቶና እፅያ ካዎተꬃስ ኦድዳይሳዳ ማሻን፥ ኮሻንነ ቦሻን ነነ ነ አሳይ አይስ ሀይቄቲ? 14 ኤንቲ ኦደይ ዎርዶ ግድያ ግሾ፥ ‘ህንተ ባብሎነ ካዋስ ሃረተከታ’ ያግድ ኦድያ ናበታ ስኦፕተ። 15 ታ ኤንታ ኪታብከ፤ ሽን ኤንቲ ታ ሱንꬃን ዎርዶ ትንብተ ኦዶሶና። ሄሳ ግሾ፥ ታ ህንተና ጎዳዳ ከሳና፤ ህንተነ ህንተ ናበት ꬋያና” ያጌስ ጎዳይ።

16 ሄሳፈ ጉየ፥ ታ ካህነታስነ አሳ ኡባስ ሀይሳዳ ያጋዳ ኦዳስ፦ “ፆሳ ኬꬃ ሚሸይ ባብሎነፐ ማታራ ስሚድ ያና” ያግድ ዎርዶ ኦድያ ናበታ ስኦፕተ። 17 ኤንቲ ግያባ ስኦና አግድ፥ ባብሎነ ካዋስ ሃረትተ፤ ህንተ ደኦን ዳና። ሀ ካታማይ አይስ ላለትዳ በሲ ግዳኔ? 18 ኤንቲ ቱማ ናበ ግድኮነ ጎዳ ቃላይ ኤንታን ደእኮ፥ ፆሳ ኬꬃን፥ ይሁዳ ካዎ ጋꬎንነ የሩሳላመን አትዳ ሚሸይ ባብሎነ ቦናዳ ኡባፈ ዎልቃማ ጎዳ ፆሳ ዎሶ።

19 “ኡባፈ ዎልቃማ ጎዳይ፥ ፆሳ ኬꬃ ካረን ኤቅዳ ናምኡ ናሰ ብራታ ቱሳታባ፥ ግታ ከረታባ፥ ጫና ጋረታባነ ሀራ ሚሸታባ ሀይሳዳ ያጌስ፦ 20 ባብሎነ ካዎይ ናቡካዳናፆር እዮአቄማ ናኣ፥ ይሁዳ ካዋ እኮንያናነ ይሁዳንነ የሩሳላመን ደእያ ግታ አሳ ኡባ ድእድ ኤፍዳ ዎደ፥ 21 ኡባፈ ዎልቃማ ጎዳይ፥ እስራኤለ ፆሳይ፥ ፆሳ ኬꬃን፥ ይሁዳ ካዎ ጋꬎንነ የሩሳላመን አትዳ ሚሸታባ ሀይሳዳ ያጌስ፤ 22 ኤንቲ ባብሎነ ቢታ ጋዘታና፤ ታ ኤንታ ግሾ ያና ዎደይ ጋካናዉ፥ ኤንቲ ያን ዳና። ሄ ዎደ ታ ኤንታ ጉየ ዛራዳ ኤንታ በሳን ዎꬃና” ያጌስ ጎዳይ።