1 ናብያ ኤርምያስ ድኤትዳ አሳ ግዶን ደእያ አትዳ ጭማታስ፥ ካህነታስ፥ ናበታስነ ናቡካዳናፆር የሩሳላመፐ ድእድ፥ ባብሎነ ኤፍዳ ኡባስ የሩሳላመፐ የድዳ ዳብዳበይ ሀይሳፈ ካልድ ፃፈትዳይሳ። 2 ሀይስ ሀንዳይ፥ ካዎይ እኮንያን፥ እያ አይያ ካውያ፥ እያ ሞርናት፥ ይሁዳነ የሩሳላመ ሀላቃት፥ ኩሸ ሂላንቾትነ ብራታ ቆፀይሳት የሩሳላመፐ ድኤትድ ብድ ስምና። 3 ኤርምያስ ይሁዳ ካዎይ ሰደቅያስ ባብሎነ ካዋ ናቡካዳናፆራኮ ኪተትዳ ሳፋና ናኣ ኤልኣሳነ ካልቄ ናኣ ጋማራ ቦላ ሄ ዳብዳብያ የድስ።

ዳብዳበይ ሀይሳዳ ያጌስ፦ 4 “ኡባፈ ዎልቃማ ጎዳይ፥ እስራኤለ ፆሳይ፥ የሩሳላመፐ ባብሎነ ድኤትዳ አሳ ኡባስ ሀይሳዳ ያጌስ፦ 5 ኬ ኬፅድ ያን ደእተ። ካꬅ ዘርድ አይፍያ ሚተ። 6 ማቾ ኤክድ ማጫ ናአነ አደ ናአ የልተ። ህንተ አደ ናይታስ ማቾ ኦይችድ እምተ፤ ህንተ ማጫ ናይታ አዝናስ እምተ። ኤንቲ ማጫ አደ የሎ፤ ያን ታይቦን ዳርተ፤ ጉፆፍተ። 7 ህንተ ድኤትድ ብዳ ካታማስ ሳሮይ ዳና መላ ኮይተ። ሄ ካታማስ ጎዳ ዎስተ። እያዉ ሳሮይ ደእኮ፥ ህንተዉካ ሳሮይ ዳና። 8 ህንተ ግዶን ደእያ ህንተ ናበትነ ማሮት ኦድያባን ጭመቶፍተ፤ ኤንቲ አሙህያ አሙሁዋ ስኦፕተ። 9 ኤንቲ ታ ሱንꬃን ዎርዶ ትንብተ ኦዶሶና፤ ታ ኤንታ ኪታብከ” ያጌስ ኡባፈ ዎልቃማ ጎዳይ፥ እስራኤለ ፆሳይ።

10 “ህንተ ባብሎነን ጋምእያ ላፑን ታሙ ላይꬃይ ፖለትያ ዎደ ታ ህንተ ግሾ ያዳ፥ ህንተና፥ ህንተ ቢታ ዛራዳ ኤሀና ጋዳ ገልዳ ቃላ ፖላና። 11 ታኒ ህንተዉ ቆፕያ ቆፋ ኤራይስ። ሄ ቆፋይ፥ ዉርሰꬃይ ሎኦነ ኡፋይስ ደእያ፥ ህንተና ጎእያ ቆፋፐ አትሽን፥ ቆህያ ቆፋ ግደና። 12 ሄሳፈ ጉየ፥ ህንተ ታና ፄጋና፤ ታኮ ያናነ ታና ዎሳና፤ ታካ ህንተና ስአና። 13 ህንተ ታና ኮያና፤ ህንተ ታና ህንተ ኩመꬃ ዎዛናን ኮይዳ ዎደ ደማና። 14 ታ ህንተዉ በንታና፤ ታ ህንተና ድኤተꬃፈ ዛራና። ታኒ ህንተና ላልዳ ካዎተꬃታፐነ ዱማ ዱማ በሳፈ ሺሻና። ታ ህንተና ድኦን ደንꬅዳ ህንተ ቢታ ጉየ ዛራዳ ኤሀና” ያጌስ ጎዳይ።

15 ህንተ፥ “ጎዳይ ናበ ኑስ ባብሎነን ደንꬅስ” ያግደታ። 16 ግዶሽን፥ ዳዊታ አራታን ኡትያ ካዋባነ ህንተ መላ ድኤትድ ቦና አትዳ አሳባነ ህንተ ዳቦታባ ጎዳይ ሀይሳዳ ያጌስ። 17 “ታ ኤንታ ቦላ ማሸ፥ ኮሻነ ጋዶ የዳና። ታ ኤንታና ሜተታናዉ ዳንዳኤቶና ኢትዳ ባላሰ ምꬃ አይፈዳ ኦꬃና። 18 ታኒ ኤንታ ማሻን፥ ኮሻንነ ጋዶን የደꬃዳ፥ ኤንታ ሳአን ደእያ ካዎተꬃ ኡባስ ዳጋማ ኦꬃና። ቃስ ታ ኤንታ ከሳዳ የድዳ ቢታ ኡባን ባደꬃስ፥ ዳጋማስ፥ ቦረስነ ጫሻስ ኦꬃና። 19 ታ አይለታ ናበታ ባጋራ ዛራ ዛራዳ ኪትዳ ታ ቃላ ኤንቲ ስኦና እፅዶሶና። ህንተ ድኤትድ ብዳይሳትካ ስኦና እፅደታ። 20 ህንተኖ፥ የሩሳላመፐ ባብሎነ ድኤትድ ብዳ አሳዉ፥ ህንተ ኡባይ ጎዳ ቃላ ስእተ” ያጌስ ኡባፈ ዎልቃማ ጎዳይ።

21 ታ ሱንꬃን ዎርዶ ትንብተ ኦድያ፥ ቆላያ ናኣ አካባባነ ማሰያ ናኣ ሰደቅያሳባ ኡባፈ ዎልቃማ ጎዳይ፥ እስራኤለ ፆሳይ ሀይሳዳ ያጌስ። “ታ ኤንታ ባብሎነ ካዋ ናቡካዳናፆራስ አꬃዳ እማና። ህንተ ፄልሽን፥ እ ኤንታ ዎꬋና። 22 ሄሳፈ ጉየ፥ ይሁዳፐ ድኤትድ፥ ባብሎነ ብዳ አሳይ እስ አስ ባዳናዉ ኮይኮ፥ ‘ባብሎነ ካዎይ ታማን ፁግዳ ሰደቅያሳዳነ አካባዳ ጎዳይ ነና ኦꬆ’ ያጋና። 23 ኤንቲ እስራኤለን ኢታ ናጋራ ኦꬅዶሶና። ኤንቲ ባንታ ሾሮታ ማቸታራ ላይማትዶሶና፤ ታ ኤንታ ኪቶና ዎርዶ ትንብተ ታ ሱንꬃን ኦድዶሶና። ሄሳ ኤረይ ታና፤ ሄሳስ ታኒ ማርካ” ያጌስ ጎዳይ።

24 ናሄላመ አድያ ሻማያስ ሀይሳዳ ያጋዳ ኦዳ፦ 25 “ኡባፈ ዎልቃማ ጎዳይ፥ እስራኤለ ፆሳይ ሀይሳዳ ያጌስ፦ ‘ኔኒ ነ ሱንꬃን የሩሳላመን ደእያ አሳስ፥ ማእሰያ ናኣ ካህንያ ሶፎንያሳስነ ሀራ ካህነታስ ዳብዳበ የዳዳሳ።’ ነ ሶፎንያሳስ ሀይሳዳ ያጋዳሳ፦ 26 ‘ፆሳ ኬꬃን ሀላቃ ግዳና መላ ጎዳይ ነና ዮዳሄ በሳን ካህነ ኦꬅድ ሹምስ። ባና ናበ ግድ ትንብተ ኦድያ ጎያ ኦናካ እያ ቶሁዋ ዱꬃን፥ እያ ቆꬍያ ሳንꬃላታን ኔኒ ቃቻናዉ በሴስ። 27 ያትን ባና ናበ ግያ አናቶታ አድያ ኤርምያሳ አይስ ሄሳዳ ኦꬃብኪ? 28 ኤርምያስ፥ ድኤተꬃ ላይꬃይ ዳሮ ግድያ ግሾ ባብሎነን ኬ ኬፅድ ደእተ፤ ካꬅ ዘርድ አይፍያ ሚተ’ ” ያግድ ኑና ኪትስ።

29 ካህነይ ሶፎንያስ ናብያ ኤርምያሳስ ዳብዳብያ ናባብስ። 30 ጎዳ ቃላይ ኤርምያሳኮ ሀይሳዳ ያግድ ይስ፤ 31 “ሀ ኪታ ድኦን ደእያ አሳ ኡባስ ኪታ፤ ናሄላማ አድያ ሳማየባ ጎዳይ ሀይሳዳ ያጌስ፤ ታኒ ኪቶና ሻማየይ ዎርዶ ትንብተ ኦድድ ህንተ ዎርዶን አማንታና መላ ኦꬅስ። 32 ታ ናሄላማ አድያ ሻማያነ እያ ሶ አሳ ሴራና። እ ታ ቦላ ማካላባ ኦድዳ ግሾ ሀ አሳ ግዶን እያዉ እስ አስካ ደኦን አተና። ታኒ ታ አሳስ ኦꬃና ኬሀተꬃ እ በኤና” ያጌስ ጎዳይ።