1 ጎዳፐ ኤርምያሳኮ ይዳ ቃላይ ሀይሳ። 2 “ኤርምያሳ፥ ታ ነዉ ኦድዳ ቃላ ኡባ ፃꬃ ማፃፋን ፃፋ። 3 ታኒ ታ አሳ እስራኤለነ ይሁዳ ድኦፐ ጉየ ዛርያ ዎደይ ማታትስ። ኤንታ ማይዛታስ እምዳ ቢታ ኤንታ ዛራና፤ ኤንቲ እያ ላታና” ያጌስ ጎዳይ እስራኤለ ፆሳይ።

4 ጎዳይ እስራኤለባነ ይሁዳባ ኦድዳ ቃላይ ሀይሳ። 5 “ታ ያሻነ ዳጋማ ዋሶ ስአስ፤ ዳጋማ ዋሶፐ አትሽን፥ ሳሮ ዋሶ ግደና። 6 አነ ኦይችተ፤ በእተ፤ አደይ ናአ የላናዉ ዳንዳኢ? ያትን፥ አደ ኡባይ እቀꬅ ኦይክዳ ማጫሳዳ፥ ባ ኩሸን ባ ኡሉዋ ኦይክዳሽን ታ በኤይስ አይቤ? አሳ ኡባ ሶምኦይ አይስ ካሬፅዴ? 7 ሄ ጋላሳይ አይ መላ ኡንኤꬅያ ጋላሴ? ሄሳ መላ ጋላስ ባዋ። ሄ ጋላሳይ ያይቆባ ዘረꬃስ ኡንአ ዎደ ግዳና። ግዶሽን ኤንቲ ሄ ኡባፈ አታና” ያጌስ ጎዳይ።

8 ኡባፈ ዎልቃማ ጎዳይ ሀይሳዳ ያጌስ፦ “ሄ ጋላሳን ታ ኤንታ ጋናፈ ቃምባራ መንꬃና፤ ኤንቲ ቃሸትዳ ሳንꬃላታ ዱꬃና። ሄሳፈ ጉየ፥ አላጋ ቢታ አሳይ ኤንታ አይለየና። 9 ሽን ኤንቲ ጎዳስ፥ ባንታ ፆሳስ፥ ኦꬃና፤ ታ ኤንታዉ ደንꬅያ ካዋ ዳዊታስ ሃረታና።

10 “ሄሳ ግሾ፥ ታ አይለቶ፥ ያይቆባ ኮቻቶ፥ ያዮፍተ። ህንተኖ፥ እስራኤለቶ፥ ዳጋሞፕተ። ህንተ ሃሆ በሳን ደእሽን፥ ታ ህንተና አሻና፤ ህንተ ኮቻታ ኤንቲ ድኤትዳ ቢታፈ ዛራና። ያይቆባ ዛረት ስሚድ፥ ሳሮ ዳና፤ ኤንታ ኦንካ ያሽሰና። 11 ታ ህንተና አሻናዉ ህንተራ ደአይስ። ህንተና ላልዳ ካዎተꬃታ ኡባ ꬋይሳና፤ ሽን ህንተና ꬋይስከ። ታ ህንተና ፅሎ ፕርዳን ሴራና፤ ሽን ሴሮና ህንተና ጮ የድከ” ያጌስ ጎዳይ።

12 “ህንተ መቆይ ኮለተና፤ ህንተ ማዱንꬃይ ፓፀና። 13 ህንተዉ ሞተተይ ባዋ፤ ህንተ ማዱንꬃስ ꬋለይ ዴና፤ ህንተዉ ፓፆይ ባዋ። 14 ህንተ ዶሰይሳት ህንተና ዶግዶሶና፤ ኤንቲ ህንተባ ዉዳ ጎኮና። ህንተ ባላይነ ህንተ ናጋራይ ዳሮ ግድያ ግሾ፥ ታ ህንተና ሞርከዳ ሾጫስ፤ ቃይ ባይና ሴራስ። 15 ፓፆይ በንቶና ህንተ ሀርግያስነ ህንተ ማዱንꬃስ አይስ ዋሰቲ? ህንተ ባላይነ ህንተ ናጋራይ ዳርዳ ግሾ ታ ሀይሳ ህንተ ቦላ ኦꬃስ።

16 “ሽን ህንተና ጋሽድ ምዳ ኡባይ ሜተታና፤ ህንተ ሞርከት ኡባይ ድኤታና። ህንተና ቦንቅዳይሳት ቦንቀታና፤ ህንተባ ኤክዳይሳት ኤከታና። 17 ኤንቲ፥ ‘ኦንካ ኮዮናነ ቦረትዳ ፅዮነ’ ግዶሶና፤ ሽን ታ ህንተዉ ኬሀና፤ ህንተ ማዱንꬃ ፓꬃና” ያጌስ ጎዳይ።

18 “ያይቆባ ኮቻታ ድኤትዳ በሳፈ ጉየ ዛራዳ፥ ኬፃና፤ ኤንቲ ደእያ በሳስካ ቃታና። የሩሳላመ ካታማይ ካሰ ባ ላለትዳ በሳን፥ ካዎ ጋꬎይ ካሰ ባ በሳን ስሚድ ኬፀታና። 19 ያን ደእያ አሳ ኡባይ ጋላታ ማዝሙረነ ኡፋይሳ የꬅ የፃና። ታ ኤንታ ታይቡዋ ዳርሳናፐ አትሽን፥ ጉፀና። ታኒ ኤንታ ቦንቸትዳ ደረ ኦꬃና፤ ኤንቲ ካዉዮኮና። 20 ኤንታ ናይት በን ዱሳዳ ዳና፤ ኤንታ ማባራይ ታ ስንꬃን ምንድ ዳና። ኤንታ ኡንኤꬅያ ኡባ ታ ሴራና። 21 ኤንታ ካለꬃናይ ኤንታ ግዶፈ ከያና፤ ኤንታ ሃራናይ ኤንታ ግዶፈ ደንዳና። ታኒ እያ ታዉ ማታ ኤሀና፤ እ ታኮ ሺቃና። ታኒ እያ ሺሾና ደእሽን፥ ምንድ ታኮ ሺቃናዉ ዳንዳኤይ ኦኔ?” ያጌስ ጎዳይ። 22 ሄሳ ግሾ፥ ህንተ ታ አሰ ግዳና፤ ታካ ህንተ ፆሰ ግዳና።

23 ሄኮ፥ ጎዳ ሀንቆይ ጎተዳ ደንዴስ፤ ሽረት ሽረት ዎꬍሸ ኢታታ ሁጰን ዎꬋና። 24 ጎዳይ ባ ዎዛና ቆፋ ዉርስድ ፖላና ጋካናዉ ኤፅያ እያ ሀንቆይ ጉየ ስመና። ሄሳ ስንꬃፈ ያና ዎደታን ህንተ አኬካና።