1 “ሄ ዎደ ታኒ እስራኤለ ዘረꬃ ኡባስ ፆሰ ግዳና፤ ኤንትካ ታ አሰ ግዳና” ያጌስ ጎዳይ።

2 “ማሻፈ አትዳ አሳይ መላ ቢታን ታ ስንꬃን ሳባ ደማና። ታኒ እስራኤለ አሳስ ሸምፖ እማናዉ ያና። 3 ታኒ ኤንታዉ ሃሆ በሳፈ ቆንጫስ፤ ታኒ ህንተና መርና ሲቁዋን ዶሳስ፤ ታ ቃꬍያን ህንተና ታኮ ሺሻስ። 4 ጌላኦ እስራኤለ፥ ታ ህንተና ዛራዳ ኬፃና፤ ህንተካ ኬፀታና። ኔኒ ካራቡዋ ዛራ ኦይካዳ፥ ኡፋይተይሳታራ ኔኒ የፃናነ ዱራና። 5 ሳማረ ዙማ ቦላ ዎይነ ቶካና፤ ቶክዳይሳት እያ አይፍያን ኡፋይታና። 6 ኤፍሬማ ገዘ ቢታን ናገይሳት፥ ‘ሃ ዪተ፤ ጎዳኮ፥ ኑ ፆሳኮ፥ ፑደ ፅዮነ ቦስ’ ያግድ ፄግያ ዎደይ ያና” ያጌስ ጎዳይ።

7 “ያይቆባ አሳስ ኡፋይሳን የፅተ፤ ካዎተꬃታ ኡባፈ አꬍያ እስራኤለስ እልልተ። ‘እስራኤለ አሳፐ አትዳይሳታ አሻ’ ያግድ ጋላታ ማዝሙረ የፅተ። 8 ታኒ ኤንታ ፑደሀ ባጋ ቢታፈ ኤሀና፤ ሳኣ ጋፃፐ ታ ኤንታ ሺሻና። ቆቀት፥ ዎበት፥ ዎደꬃ ማጫሳትነ እቀꬅ ኦይክዳ ማጫሳት ኤንታራ እስፈ ያና፤ ዳሮ አሳይ ባንታ ቢታ ስማና። 9 ታ ኤንታ ዛራዳ ኤህያ ዎደ ኤንቲ ኡፋይሳፈ ደንዶይሳን ዬክሸነ ዎስሸ ያና። ታኒ ኤንታ ሻፋ ላንቅያራ፥ ኤንቲ ꬉበቶና ጊግዳ ኦግያራ ካለꬃና። ታኒ እስራኤለስ አዋ፤ ኤፍሬም ታዉ ባይራ ናአ።

10 “ህንተኖ፥ ካዎተꬃቶ፥ ጎዳ ቃላ ስእድ፥ ሃሆ በሳን፥ ዩሾይ አባን ተቀትዳ ቢታታን፥ ‘እስራኤለ ላልዳይስ እ ኤንታ ሺሻና፤ ሄንꬃንቾይ ባ ዉድያ ሄመይሳዳ እ ኤንታ ሄማና’ ያግድ አዋጅተ። 11 ጎዳይ ያይቆባ ኮቻታ ዎዛና፤ እ ኤንታ፥ ኤንታፈ ምነይሳታ ኩሸፐ አሽስ። 12 ኤንቲ ይድ ፅዮነ ዙማ ቦላ ኡፋይሳን የፃና፤ ኤንቲ፥ ጎዳይ እምያ ኬሀተꬃን፥ ካꬃን፥ ዎይነን፥ ዛይተን፥ ዶርሳንነ መሄን ኡፋይታና። ኤንቲ ሃ ሎይꬅድ ኡሽዳ አታክልተ በሳ መላ ግዳና፤ ኤንቲ ዛሪድ አዛኖኮና። 13 ሄ ዎደ ጌላኦት ኡፋይሳን ዱራና፤ ፓንꬃትነ ጭማት ኡፋይታና። ታ ኤንታ ዬሁዋ ኡፋይሳን ላማና፤ ታ ኤንታ ምንꬃና፤ ኤንታ አዛኑዋ ግሾ ኤንታ ኡፋይሳና። 14 ታኒ ካህነታስ ዳሮ ካꬅ እማና፤ ታ አሳይ ታ ኬሀተꬃ ካላና” ያጌስ ጎዳይ።

15 “ዬሆይነ ዘለልስ ራማ ካታማን ስኤትስ፤ ራሄላ ባ ናይታስ ዬካሱ፤ ኤንቲ ባይና ግሾ ዬሆ ምንꬆ እፃሱ” ያጌስ ጎዳይ።

16 “ዬሁዋ አግድ፥ ህንተ አፉꬃ ቁችተ። ህንተ ኦꬅዳ ኦሱዋስ ዎይቶ ህንተ ኤካና፤ ሞርከ ቢታፈ ህንተ ናይት ስማና። 17 ህንተ ናይት ባንታ ቢታ ስማናዉ ደእያ ግሾ፥ ህንተዉ ኡፋይስ ደኤስ” ያጌስ ጎዳይ።

18 “ኤፍሬማ ኮቻታ ዙዙንꬃ ታ ስአስ። ኤንቲ፥ ‘ኔኒ ኑና ዋትቦና ዎፋኖዳ ዋꬋዳሳ፤ ኑካ ኬድዳ። ኔኒ ጎዳ፥ ኑ ፆሳ ግድያ ግሾ ኑና ዛራ፤ ኑኒ ኔኮ ስማና። 19 ኑ ካሰ ኔፐ ሃክድ ብዳ፤ ሽን ሀእ ኑ ናጋራ ፓፅዳ። ነ ኑና ሴርን፥ ዬላትድ ኑ ትራ ባቅዳ። ኑኒ ኑ ናአተꬃ ላይꬃ ናጋራ ግሾ፥ ካዉይዳነ ዬላትዳ’ ያግዶሶና።

20 “ኤፍሬም ታዉ ቱማ አልኦነ ታ ዶስያ ናአ ግደኔ? ታኒ እያ ሱንꬃ ደንꬅያ ዎደ ኡባን እያ ሀሳያይስ። ሄሳ ግሾ፥ ታ ዎዛናይ እያ ላሞቴስ፤ ታ እያዉ ዳሮ ቃታይስ” ያጌስ ጎዳይ።

21 “ህንተ ኦግያን ማላታ ዎꬅተ፤ ማላታ ምꬅ ኤስተ፤ ህንተ ብዳ ኦግያ አኬክተ። ጌላኦ እስራኤለ፥ ስማ፤ ነ ካታማታ ገላ። 22 ህንተኖ፥ አማኖይ ባይና እስራኤለቶ፥ አዉደ ጋካናዉ ቶይላተቲ? ጎዳይ ሳአ ቦላ ኦራꬃባ ኦꬃና፤ ሄስካ ማጫስ አደ ዩሾን ኤቃና” ያጌስ ጎዳይ።

23 ኡባፈ ዎልቃማ ጎዳይ፥ እስራኤለ ፆሳይ፥ ሀይሳዳ ያጌስ፦ “ታኒ እስራኤለ አሳ ድኤተꬃፈ ዛራዳ ኤህያ ዎደ ይሁዳ ቢታንነ እያ ካታማታን ኤንቲ፥ ‘ነኖ ፅሎተꬅ አቅያ በሳዉ፥ ጌሻ ደርያዉ፥ ጎዳይ ነና አንጆ’ ያግድ ዛሪድ ኦደታና። 24 ይሁዳንነ ይሁዳን ደእያ ካታማታን አሳይ ዳና፤ ጎሻንቾትነ ሄንꬃንቾት ባንታ ዉድያራ ያን ዳና። 25 ታኒ ዳቡራንቾታ ጋሽትሳና፤ ቃስ ኮሻትድ ግልቅዳይሳታ ካልሳና” ያጌስ ጎዳይ።

26 ሄ ዎደ ባርካዳ ታ ዩሹዋ ፄላስ፤ ታ ꬍስኮይ ታዉ ማልኦ ꬍስኮ ግድስ።

27 “ታኒ እስራኤለንነ ይሁዳን አሰነ መሄ ኩንꬅያ ዎደይ ያና። 28 ኤንታ ሾዳናዉ፥ ላላናዉ፥ ሽራ የጋናዉ፥ ꬋይሳናዉነ ጋዶ ኤሀናዉ ደንድዳይሳዳ ኤንታ ዛራዳ ግምባናዉነ ቶካናዉ ደንዳና” ያጌስ ጎዳይ።

29 “ሄ ዎደ አሳይ፥ ‘አዋት ቃዉኤ ዎይነ አይፈ ምን፥ ናይታ አቻይ ዶጭስ’ ያግድ ሃሳያ ሌምሶይ አታና። 30 ሽን እሶይ እሶይ ባ ናጋራን ሀይቃና፤ ቃዉኤ ዎይነ አይፈ ምያ ኦደስካ እያ አቻይ ዶጫና” ያጌስ ጎዳይ።

31 “ታኒ እስራኤለራነ ይሁዳራ ኦራꬃ ጫቆ ጫቃና ዎደይ ያና። 32 ሄ ጫቆይ ታ ኤንታ ግብፀፈ ከሳናዉ ኤንታ ኩሽያ ኦይክዳ ዎደ ኤንታ ማይዛታራ ጫቅዳ ጫቁዋ መላ ግደና። ታ ኤንታዉ አዝና መላ ግዳ ኡትንካ ኤንቲ ታ ጫቁዋ መንꬅዶሶና” ያጌስ ጎዳይ።

33 “ሽን ታኒ ሄ ዎድያፐ ጉየ እስራኤለራ ጫቃና ጫቆይ ሀይሳ፦ ታኒ ታ ህግያ ኤንታ ጉግያን ዎꬃና፤ ኤንታ ዎዛናን ፃፋና። ታኒ ኤንታ ፆሰ ግዳና፤ ኤንትካ ታ አሰ ግዳና። 34 ህዛፐ ጉየ፥ አስ ባ ላግያ ዎይኮ ባ እሻ፥ ‘ጎዳ ኤራ’ ያግድ ታማርሰና። ጉꬃፈ ግታ ጋካናዉ ኡባይ ታና ኤራና። ታኒ ኤንታ ናቁዋ አቶ ጋና፤ ኤንታ ናጋራ ዛራዳ ቆፕከ” ያጌስ ጎዳይ።

35 ጋላስ ፖአና መላ አዋ ዎꬅዳይ፥ ቃማ ፖአና መላ አጌናነ ፆልንቶ ኪትዳይ፥ አባ ቃꬅድ፥ ቤታይ ጉማናዳ ኦይ፥ እያ ሱንꬃይ ኡባፈ ዎልቃማ ጎዳ ጌተተይስ ሀይሳዳ ያጌስ። 36 “ሀ ኤቅድ ደእያ መተꬃ ህገይ ታ ስንꬃፈ ሻረትኮ፥ ሄ ዎደ እስራኤለ ኮቻይ ታ ደረ ግደይስ መርናዉ አታና” ያጌስ ጎዳይ።

37 “ቦላ ሳሎታ ዋꬋናዉ ዎይኮ ጋርሳ ሳኣ ባሶይ ኤረታናዉ ዳንዳእኮ፥ ሄ ዎደ ታ እስራኤለ ዘረꬃ ኡባ፥ ኤንቲ ኦꬅዳ ናጋራ ግሾ ታ ስንꬃፈ ድጋና” ያጌስ ጎዳይ።

38 “ሀናንኤላ ሻኮ ግምብያፈ ዶምድ፥ ማዛነ ፐንግያ ጋካናዉ የሩሳላመ ካታማይ ታ ካታማ ግድድ፥ ኬፀትያ ዎደይ ያና። 39 ሄ ካታማ ዛዋይ ዉሎሀ ባጋፈ ብድ ጋረባ ዙማነ ጎአ ዩሹዋ ጋካናዉ ዳልጋና። 40 አሀ ሞግያነ ብዶ የግያ ዛንጋራይነ ቀድሮና ዛንጋራፐ ቆሞራ ዶሎሀ ባጋራ ብድ፥ ፓራ ፐንገ ማዛንያ ጋካናዉ ደእያ ቢታ ኡባይ ጎዳስ ዱማትድ፥ ጌሽ ግዳና። ህዛፐ ጉየ፥ ካታማይ መርናዉ ሾደተና፤ ላለተና” ያጌስ ጎዳይ።