1 ይሁዳ ካዎይ ሰደቅያስ ካዎትዳ ታማንꬆ ላይꬃን፥ ባብሎነ ካዎይ ናቡካዳናፆር ካዎትዳ ታማነ ሆስፑንꬆ ላይꬃን ጎዳፐ ሀ ቃላይ ኤርምያሳኮ ይስ። 2 ሄ ዎደ ባብሎነ ካዋ ኦላንቾት የሩሳላመ ተቅዶሶና፤ ናበይ ኤርምያስ ይሁዳ ካዎ ጋꬎን ደእያ፥ ናገይሳታ ዳባባን እያ ቦላ ጎርደትን ደኤስ።

3 ይሁዳ ካዎይ ሰደቅያስ እያ ሀይሳዳ ያግድ ቃችድ ዎꬅስ፦ “ነ አይስ ሀይሳዳ ያጋዳ ትንብተ ኦዳይ? ‘ጎዳይ ሀ ካታማ ባብሎነ ካዋ ኩሸን አꬅድ እማና፤ እ እያ ኦይካና’ ያጋዳ አይስ ኦዳይ። 4 ይሁዳ ካዎይ ሰደቅያስ ባብሎነ አꬍድ እመታና፤ እ ባብሎነ ካዋ ኩሸን ገላና። እያ ስንꬃን ኤቅድ፥ እያራ ኦደታና፤ እ ባ አይፈን እያ በአና። 5 ናቡካዳናፆር ሰደቅያሳ ባብሎነ ኤፋና፤ ታ እያባ በአና ጋካናዉ እ ያን ዳና። ኔኒ ባብሎነታራ ኦለታናዉ ቆፕኮ፥ ሄስ ነዉ ሀነና” ያጌስ ጎዳይ።

6 ኤርምያስ፥ “ጎዳ ቃላይ ሄ ዎደ ታኮ ሀይሳዳ ያግድ ይስ” ያግስ።

7 “ነ አዋ እሻ ሳሉማ ናአይ፥ ሀናምኤል ኔኮ ይድ፥ ‘ዎዛናዉ ማት ደእያ ማታ ዳቦይ ነና ግድያ ግሾ አናቶታ ካታማን ደእያ ታ ጋድያ ሻማ’ ያጋና። 8 ጎዳይ ግዳይሳዳ፥ ታ አዋ እሻ ናአይ ሀናምኤል ታኮ ናገይሳታ ዳባባ ይድ፥ ‘ዎዛናዉ ማት ደእያ ማታ ዳቦይ ነና ግድያ ግሾ፥ ብንያመ ቢታን አናቶታን ደእያ ታ ጋድያ ሻማ’ ያግን፥ ታኒ ሄሳ ኦድዳይ ጎዳ ግደይሳ ኤራስ።

9 “አናቶታ ካታማን ደእያ ጋድያ ታ አዋ እሻ ናኣ ሀናምኤላፐ ሻማስ። እያ ጋትያ ምዛነን ልክን፥ ታማነ ላፑን ብራ ሳንትመ ግድስ። 10 ሻማ ፕርማ ማርካት ደእያ በሳን ፓራማስ፤ ጎርዳስ፤ ማታመ እያ ቦላ ዎꬃስ፤ ሚሽያ ምዛነን ልካዳ እያዉ እማስ። 11 ሄሳፈ ጉየ፥ ታኒ ዛልእያ ሀኖታ ቆንጭስያ አሻገትድ አታመትዳ ሻማ ፕርማነ አታመትቦና ሻማ ፕርማ ኤካስ። 12 ታ አዋ እሻ ናአይ ሀናምኤል፥ ሻማ ፕርማ ፓራምዳ ማርካትነ ናገይሳታ ዳባባን ኡትዳ አይሁደት ኡባይ በእሽን፥ ሄ ሻማ ፕርማ ማህሰያ ናኣ፥ ኔራ ናኣ ባሮካስ እማስ። 13 ኤንታ ስንꬃን ታ ባሮካ ሀይሳዳ ያጋዳ ኪታስ፦ 14 ‘ኡባፈ ዎልቃማ ጎዳይ፥ እስራኤለ ፆሳይ፥ ሀይሳዳ ያጌስ፦ ዳሮ ዎደ ጋምአና መላ ሀ አሻገትድ አታመትዳ ፕርማነ አታመትቦና ፕርማ ኤፋዳ ኦቶን ዎꬃ።’ 15 ኡባፈ ዎልቃማ ጎዳይ፥ እስራኤለ ፆሳይ፥ ሀይሳዳ ያጌስ፦ ሀ ቢታን አሳይ ዛሪድ ኬ፥ ጋደነ ዎይነ ቶክያ በሲ ሻማና” ያጌስ ጎዳይ።

16 ታኒ ኔራ ናኣ ባሮካስ ሻማ ፕርማ ዋርቃትያ እምዳፐ ጉየ፥ ሀይሳዳ ያጋዳ ዎሳስ። 17 “አቤት ኡባ ሃርያ ጎዳዉ፥ ነ ሳሎታነ ሳኣ ነ ግታ ዎልቃንነ ነ ምጨትዳ ኩሸን መꬋዳሳ። ነዉ ዳንዳኤቶናባይ ባዋ። 18 ኔኒ ነ ሲቁዋ ሙኩሉ አሳስ በሳሳ፤ ሽን አዋታ ናጋራ ኤንታ ናይታ ቦላ ዛራሳ። አቤት ግታነ ዎልቃማ ፆሳዉ፥ ነ ሱንꬃይ ኡባፈ ዎልቃማ ጎዳ ጌተቴስ። 19 ነ ሀልቾይ ግታ፤ ነ ኦꬅያ ኦሶይ ዎልቃማ። አሳ ኦገ ኡባ ነ በኣሳ፤ አሳ ኡባስ እያ ኦግያዳነ እያ ኦሱዋዳ ዛራሳ።

20 “ነ ግብፀን ማላታነ ማላታ ኦꬃዳሳ፤ ሀች ጋካናዉ ሀ ማላታ እስራኤለ አሳ ግዶንነ ሀራ ካዎተꬃታ ኡባ ግዶን ኦሶ አጋባካ። ሄሳፈ ደንዶይሳን ነ ሱንꬃይ ኡባ በሳን ኤረትስ። 21 ኔኒ ነ አሳ እስራኤለ ግብፀፈ ማላታንነ ማላታን፥ ነ ምኖ ቀስያን፥ ነ ምጨትዳ ኩሽያንነ ግታ ዳጋማን ከሳዳሳ። 22 ኤንታ ማይዛታስ ነ እማናዉ ጫቅዳ ቢታ፥ ማꬅነ ኤስ ጎግያ ቢታ ኤንታዉ እማዳሳ። 23 ኤንቲ ሄ ቢታ ገልድ ላትዶሶና። ሽን ኤንቲ ነዉ ኪተትቦኮና፤ ነ ህግያ ናግቦኮና፤ ኤንቲ ኦꬃና መላ ነ ኪትዳ ኡባ ኦꬅቦኮና። ሄሳ ግሾ፥ ነ ኤንታ ቦላ ሀ ጋዱዋ ኡባ ኤሀዳሳ።

24 “ባብሎነ አሳይ ካታማ ኦይካናዉ ግምብያ ዩሹዋን ቢታ ዶርድ ተቅዶሶና። ኦላፐ፥ ኮሻፐነ ቦሻፐ ደንዶይሳን ካታማይ ኤንታ ኦልያ ባብሎነ ኩሸን አꬍድ እመትስ። ነ ሀእ በኤይሳዳ ነ ግዳባ ኡባይ ፖለትስ። 25 አቤት ኡባ ሃርያ ጎዳዉ፥ ካታማይ ባብሎነ አሳስ እመታናዉ ሀንያ ዎደካ ነ ታና፥ ‘ማርካ ፄጋዳ፥ ሚሸን ጋድያ ሻማ’ ጋዳሳ” ያጋዳ ዎሳስ።

26 ሄሳፈ ጉየ፥ ጎዳ ቃላይ ኤርምያሳኮ ሀይሳዳ ያግድ ይስ፦ 27 “ታኒ ጎዳ፥ አሳ ኡባ ፆሳ። ታዉ ዳንዳኤቶናባይ ደኢ?” ያግስ። 28 ታኒ ሀ ካታማ ባብሎነ አሳስነ ባብሎነ ካዋ ናቡካዳናፆራስ አꬃዳ እማና፤ ኤንቲ እያ ኦይካና። 29 ሀ ካታማ ተቅዳ ባብሎነ አሳይ ይድ፥ ካታማ ታማን ፁጋና፤ ፖቅያ ቦላ ባኣለ ኤቃስ እፃነ ጩይስሸነ ሀራ ፆሳታስ ኡሻ ያርሾ ጉስሸ ታና ሀንቀꬅዳ አሳይ ደእያ ኬꬃትካ ፁገታና። 30 “እስራኤለይነ ይሁድ ባንታ ናአተꬃፈ ዶምድ፥ ታ ስንꬃን ኢታባፐ አትሽን፥ ሎኦባ፥ ኦꬅቦኮና፤ ኤንቲ ባንታ ኩሸን ኦꬅዳ ኦሱዋን ታና ሀንቀꬅዶሶና። 31 ሀ ካታማይ ኬፀትዳ ዎደፐ ሀች ጋካናዉ፥ ሀ ካታማ አሳይ ታና ዳሮ ሀንቀꬅዳ ግሾ ሀ ካታማ ታ ስንꬃፈ ꬋይሳና። 32 እስራኤለይነ ይሁድ፥ ኤንታ ካዎትነ ሀላቃት፥ ኤንታ ካህነትነ ናበት ኦꬅዳ ኢታ ኦሶ ኡባን ታና ይሎይዶሶና። 33 ኤንቲ ባንታ ሶምኡዋ ግዶናሽን፥ ባንታ ዞኩዋ ታዉ ዛርዶሶና። ታ ኤንታ ዛራ ዛራዳ ታማርስንካ፥ ኤንቲ ስእቦኮና ዎይኮ ሴራ ኤክቦኮና። 34 ኤንቲ እፀትዳ ባንታ ኤቃታ ታ ሱንꬃይ ፄገትዳ ኬꬃን ኤስድ ቱንስዶሶና። 35 ኤንቲ ባንታ አደ ናይታነ ማጫ ናይታ ሞሎካ ኤቃስ ያርሻናዉ ህኖማ ዛንጋራን ባኣለ ኤቃስ ያርሾ ꬎቃ በሳታ ጊግስዶሶና። ኤንቲ ሄሳ ኦꬃና መላ ታ ኪታብከ፤ ይሁዳ አሳይ ናጋራ ኦꬃና መላ ሄሳ ኤንቲ ኦꬃና ጋዳ ታ ናጋብከ” ያግስ።

36 “ኔኒ፥ ‘ሀ ካታማይ ኦላን፥ ኮሻንነ ቦሻን ባብሎነ ካዋ ኩሸን አꬍድ እመታና’ ያግዳ ሀ ካታማባ ጎዳይ እስራኤለ ፆሳይ ሀይሳዳ ያጌስ። 37 ታ ሱልያ ሀንቁዋንነ ግታ ሸንያን ኤንታ ላልዳ ቢታ ኡባፈ ሺሻዳ ሀ በሳ ዛራ ኤሀዳ፥ ኤንቲ ሳሮተꬃን ዳና መላ ኦꬃና። 38 ኤንቲ ታ አሰ ግዳና፤ ታ ኤንታ ፆሰ ግዳና። 39 ኤንቲ ታዉ መርናዉ ያያና መላ፥ ታ ኤንታዉ እስ ዎዛናነ እስ ኦገ እማና፤ ሄስ ኤንታዉነ ኤንታፈ ጉየ ኤንታ ናይታስ ሎኦ ግዳና። 40 ታኒ ኤንታራ መርናዉ ጫቃና፤ ሄ ጫቁዋን ታ ኤንታዉ ሎኦባ ኦሶ አግከ። ኤንቲ ታና አግድ ጉየ ስሞና መላ ኤንቲ ታዉ ያያና መላ ኦꬃና። 41 ታ ኤንታዉ ሎኦባ ኦይስ ታና ኡፋይሴስ፤ ታ ኩመꬃ ዎዛናፐነ ታ ኩመꬃ ሸምፑዋፈ ቱማ ሀ ቢታን ኤንታ ቶካና” ያጌስ ጎዳይ።

42 “ታ ሀ አሳ ቦላ ኢታ ቦሻ ኡባ ኤህዳይሳዳ ታ ኤንታዉ እማና ግዳ ሎኦባ ኡባ እማና። 43 ህንተ፥ ‘ሀ ቢታይ አሳይነ መሄይ ባይና ባይሳ ቢታ ግዳና፤ እ ባብሎነታስ እመትስ’ ያግዳ ቢታን አሳይ ዛሪድ ጋደ ሻማና። 44 ታ ኤንታ ዛራዳ ኤህያ ግሾ፥ አሳይ ጋደ ሻማና፤ ማርካ ስንꬃን ዛልእያ ሀኖታ ቆንጭስያ ፕርማ ፓራምድ፥ ማታመ ዎꬃና። ሀይስ ኡባይ ብንያመ ቢታን፥ የሩሳላመ ዩሹዋን ደእያ ሄራታን፥ ይሁዳ ካታማታን፥ ደረይ ዳርያ ካታማታን፥ ጋꬋ ካታማታንነ ነገበ መላ ቢታን ደእያ ካታማታ ኡባን ሀናና” ያጌስ ጎዳይ።