1 ኤርምያስ ቡሮ ናገይሳታ ዳባባን ቃሸትድ ደእሽን፥ ጎዳ ቃላይ ዛሪድ እያኮ ይስ። 2 ሳኣ መꬍዳ ጎዳይ፥ ጊግስድ እያ በሳን ዎꬅዳ ጎዳይ፥ እያ ሱንꬃይ ጎዳ ጌተተይስ ሀይሳዳ ያጌስ፦ 3 “ታና ፄጋ፤ ታ ነዉ ኮያና፤ ነ ኤሮና ግታባነ ዎልቃማባ ታ ነዉ ቆንጭሳና።” 4 ጎዳይ፥ እስራኤለ ፆሳይ፥ ባብሎነ ኦላ፥ ቢታ ዶረꬃነ፥ ድኤተꬃ ተቃና መላ ድርሳ ግምብያ ምንꬃናዉ ላልዳ ሀ ካታማ ኬꬃታባነ ይሁዳ ካዎታ ጋꬎታባ ሀይሳዳ ያጌስ። 5 ኤንታ ኢታተꬃ ጋሶን፥ ታ ሀ ካታማ ቦላፈ ታ ሶምኡዋ ደንꬅዳ ግሾ፥ ህንተራ ኦለታናዉ ታኒ ታ ሀንቁዋን ሾጫና አሳ አሀን ሀ በሳን ኩንꬃናዉ ባብሎነት ገላና።

6 ግዶሽን፥ “ታ ሀ ካታማነ እያን ደእያ አሳ ዛራዳ ፓꬃና፤ ኤንታ ፓያተꬃ ዛራና፤ ሳሮነ ዎፓ ዱሱ ኤንታዉ እማና። 7 ታኒ ይሁዳ አሳነ እስራኤለ አሳ ድኦፐ ዛራና፤ ኤንቲ ካሰ ደእዳይሳዳ ኦꬃዳ ኤንታ ግምባና። 8 ኤንቲ ታና ኦꬅዳ ናጋራ ኡባፈ ታ ኤንታ ጌሻና፤ ኤንቲ ናቁዋነ ኤንታ ማካላ ኡባ አቶ ጋና። 9 የሩሳላመ ካታማይ ታዉ ኡፋይስ፥ ቦንቾነ ጋላታ ሳአን ደእያ ካዎተꬃታ ኡባ ስንꬃን ኤሀና። ታኒ የሩሳላመ አሳስ ኦꬅያ ሎኦባነ ካታማስ ኤህያ ዱረተꬃነ ሳሮተꬃ ስእድ፥ ካዎተꬃት ኡባይ ያሻን ኮኮራና” ያጌስ ጎዳይ።

10 “ህንተ፥ ‘አስነ መሄይ ባይና ባይሳ’ ግዳ ሀ በሳን፥ አስነ መሄይ ባይና ይሁዳ ካታማታንነ የሩሳላመ ኦገታን ኡፋይስነ እልልሳ ግርስ ስኤታና። 11 የꬅነ ያጋኖ ግርስ፥ ኡፋይሳ ግርስ፥ ሄሳዳካ፥ ፆሳ ኬꬅ ጋላታ ያርሾ ኤህድ፥

12 “ሀ አሳይነ መሄይ ባይና ባይሳ ቢታንነ እያን ደእያ ካታማታን ሄንꬃንቾት ባንታ ዶርሳ ዉድያ ሄምያ ጋደይ ዳና። 13 ገዘ ካታማታን፥ ጋꬋ ካታማታን፥ ነገበ መላ ቢታን ደእያ ካታማታን፥ ብንያመ ቢታን፥ የሩሳላመ ዩሹዋን ደእያ በሳታንነ ይሁዳ ካታማታን ሄንꬃንቾት ባንታ ዶርሳታ ዛሪድ ታይባና” ያጌስ ኡባፈ ዎልቃማ ጎዳይ።

14 “ታኒ እስራኤለ አሳስነ ይሁዳ አሳስ ገልዳ ቃላ ፖልያ ዎደይ ያና። 15 ሄ ዎደ ታኒ ዳዊታ ኮቻፈ እስ ፅሎ አጫ ደንꬃና፤ እ ሱረ ፕርዳ ፕርዳና፤ ፅሎ ኦꬃና። 16 ሄ ዎደ ይሁዳ አሳይ አታና፤ የሩሳላመ አሳይ ዎፑ ግድ ደአና። ሀ ካታማይ፥ ‘ጎዳይ ኑ ፅሎተꬃ’ ጌተትድ ፄገታና። 17 ዳዊታ ኮቻፈ እስራኤለ አራታን ኡትያ አስ ꬋየና። 18 ሄሳዳካ፥ ፁሳ ያርሾ፥ ካꬃ ያርሾነ ሀራ ያርሾ ያርሻናዉ ሌወ ኮቻፈ ካህነ ግድያ አስ መርናዉ ታ ስንꬃፈ ꬋየና” ያጌስ ጎዳይ።

19 “ጎዳ ቃላይ ኤርምያሳኮ ሀይሳዳ ያግድ ይስ። 20 ጋላሳስነ ቃማስ ታ ዎꬅዳ ዎጋ መንꬅድ፥ ጋላስነ ቃም ባንታ ዎድያን ስመረቶና መላ ኦꬅድ ታ ጫቁዋ ላማናዉ ህንተ ዳንዳእኮ፥ 21 እያ ኮቻፈ አራታን ኡትያ አስ ꬋዮናዳ፥ ታ አይልያ ዳዊታራ ጫቅዳ ጫቁዋ ላማና፤ ታዉ ኦꬅያ፥ ሌወ ኮቸ ግድዳ ካህነታራ ጫቅዳ ጫቁዋ ላማና። 22 ታኒ ታ አይልያ ዳዊታ ኮቻነ ታ ስንꬃን ኦꬅያ ሌወ ኮቻ ታይባናዉ ዳንዳኤቶና ሳሎ ፆልንቶታዳነ ማካናዉ ዳንዳኤቶና አባ ሻፍያዳ ዳርሳና” ያጌስ ጎዳይ።

23 ጎዳ ቃላይ ቃስካ ኤርምያሳኮ ሀይሳዳ ያግድ ይስ። 24 “ሀ አሳይ፥ ‘ጎዳይ ባ ዶርዳ ናምኡ ካዎተꬃታ፥ እስራኤለነ ይሁዳ አጋግስ’ ያግድ ኦደተይሳ ነ አኬካብኪ? ኤንቲ ታ አሳ ካꬍድ፥ ባና ዳንዳእዳ ካዎተꬅ ግዶኮና ግድ ቆፖሶና። 25 ታኒ ጋላሳራነ ቃማራ ጫቅዳ ጫቁዋነ ሳሎነ ሳአ ህግያ ምንꬃቦናባ ግድኮ፥ 26 ያይቆባ ዘረꬃነ ታ አይልያ ዳዊታ ኮቻ አጋጋና። እያ ናይታፐ አብራሃመ፥ ይሳቃነ ያይቆባ ኮቻታ ቦላ ካዎꬃናዉ ዳዊታ ኮቻ ዶርከ። ታኒ ታ አሳ ማራና፤ ኤንታ ሻሉዋ ዛራና” ያጌስ ጎዳይ።