1 እዮስያሳ ናኣ ይሁዳ ካዋ እዮአቄማ ላይꬃን፥ ጎዳ ቃላይ ኤርምያሳኮ ሀይሳዳ ያግድ ይስ። 2 “ራካባ ያራ ግድዳ አሳኮ ባዳ፥ ኤንታራ ኦደታዳ፥ ፆሳ ኬꬃ ክፍለታፐ እሱዋ ግዶ ገልሳዳ ዎይነ ኡሻ ኤንታዉ እማ” ያግስ። 3 ታኒ ባዳ፥ ካባሳ ናኣ ናኣ፥ ኤርምያሳ ናኣ ያእዛና፥ እያ እሻታነ እያ አደ ናይታ ኡባ፥ ራካባ ያራ ኡባ ኤካዳ፥ 4 ፆሳ ኬꬅ ኤሀስ። ኤንታ፥ ይግዳላ ናኣ፥ ፆሳ አስ ግድዳ ሀናና ናይታ ክፍለ ገልሳስ። ሄ ክፍለይ፥ ፐንግያ ናግያ ሳሉማ ናኣ ማእሰያ ክፍልያፐ ቦላ ባጋራ፥ ሀላቃታ ክፍልያ ማታን ደኤስ። 5 ሄሳፈ ጉየ፥ ታኒ ራካባ ያራታ ስንꬃን ዎይነ ኡሻይ ኩምዳ ፁጋታነ ፁአታ ዎꬃዳ፥ “ዎይነ ኡሻ ኡይተ” ያጋስ።

6 ሽን ኤንቲ ዛሪድ፥ “ኑ ዎይነ ኡሹ ኡዮኮ፤ ኑ ማይዛይ ራካባ ናአይ ዮናዳብ ኑኮ፥ ‘ህንተነ ህንተ ናይት ዎይነ ኡሹ መርናዉ ኡዮፕተ። 7 ኬ ኬፆፍተ፤ ጎሸ ጎዮፕተ፤ ዎይነ ቶኮፍተ። ዱንካነ ግዶን ደእተ፤ ህንተ አዱሳ ላይꬅ ሀ ቢታን ዳና’ ያግስ። 8 ኑ ማይዛይ ራካባ ናአይ ዮናዳብ ኑና ኪትዳ ኡባ ኪተትዳ። ኑኒ ዎይኮ ኑ ማቸት ዎይኮ ኑ አደ ናይት ዎይኮ ኑ ማጫ ናይት ኑ ደኦ ላይꬃ ኡባን ዎይነ ኡሹ ኡይቦኮ። 9 ዱሳ ኬꬅ ኬፅቦኮ፤ ዎይነ ጋደ ዎይኮ ጎሽ ኑስ ባዋ። 10 ኑ ዱንካነን ደእዳ፤ ኑ ማይዛይ ዮናዳብ ኪትዳ ኡባ ኪተትዳ። 11 ሽን ባብሎነ ካዎይ ናቡካዳናፆር ኑ ቢታ ቦላ ደንድዳ ዎደ፥ ‘ባብሎነነ ሶረ ኦላንቾታፐ አታናዉ፥ የሩሳላመ ቦስ’ ያግዳ። ሀእ ኑ የሩሳላመን ደኤይ ሄሳሳ” ያግዶሶና።

12 ሄሳፈ ጉየ፥ ጎዳይ ኤርምያሳኮ ያግስ። 13 ኡባፈ ዎልቃማ ጎዳይ፥ እስራኤለ ፆሳይ ሀይሳዳ ያጌስ። “ይሁዳ አሳኮነ የሩሳላመ አሳኮ ባዳ ሀይሳዳ ያጋ፤ ‘ታ ቃላ ናጋናዉ ሀይሳፈ ታማረከት።’ 14 ራካባ ናአይ ዮናዳብ ባ አደ ናይታ ዎይነ ኡሹ ኡዮናዳ ኪትዳ ኪታ ናግዶሶና። ኤንቲ ባንታ ማይዛ ኪታ ናግድ ሀች ጋካናዉ ዎይነ ኡሹ ኡዮኮና። ታኒ ህንተዉ ኡባ ዎደ ኦዳይስ፤ ሽን ህንተ ታና ስእቤከታ። 15 ታኒ ዛራዳ ዛራዳ ናበታ፥ ታ አይለታ ህንተኮ የዳስ፤ ኤንቲ፥ ‘ህንተ ኡባይ ህንተ ኢታ ኦግያፐ ስምተ፤ ህንተ ኦሱዋ ሎይꬅተ፤ ሀራ ፆሳታ ጎይኖፍተ፤ ኤንታዉ ኦꬆፕተ። ሄ ዎደ፥ ታ ህንተዉነ ህንተ ማይዛታስ እምዳ ቢታን ህንተ ዳና’ ያግዶሶና። ሽን ህንተ ታና ስአናዉ ህንተ ሀይꬃ ታኮ ዛርቤከታ። 16 ራካባ ናኣ ዮናዳበ ኮቻት ኤንታ ማይዛይ ኤንታ ኪትዳ ኪታ ኦꬅዶሶና፤ ሽን ሀ አሳይ ታዉ ኪተትቤና ያጋ” ያጌስ ጎዳይ።

17 “ሄሳ ግሾ፥ ጎዳይ፥ ኡባፈ ዎልቃማ ጎዳይ፥ እስራኤለ ፆሳይ ሀይሳዳ ያጌስ። ‘ስእተ፥ ታ ይሁዳ አሳ ቦላነ የሩሳላመን ደኤይሳታ ቦላ ኤሀና ግዳ ኢታባ ኤሀና። ታ ኤንታዉ ኦድን፥ ስኦና እፅዶሶና፤ ታ ኤንታ ፄግን ኮዮና እፅዶሶና’ ” ያጌስ።

18 ሄሳፈ ጉየ፥ ኤርምያስ ራካባ ያራታኮ፥ “ኡባፈ ዎልቃማ ጎዳይ፥ እስራኤለ ፆሳይ ህንተና ሀይሳዳ ያጌስ፦ ‘ህንተ፥ ህንተ ማይዛ ዮናዳባስ ኪተትዳ ግሾ፥ እያ ዎጋ ካልዳ ግሾነ እ ኪትዳ ኡባ ኦꬅዳ ግሾ፥ 19 ራካባ ናአይ ዮናዳብ፥ ታዉ ኦꬅያ አደ አስ አዉደካ ꬋየና’ ” ያጌስ።