1 እዮስያሳ ናአይ ይሁዳ ካዎይ እዮአቄም ካዎትዳ ኦይዳንꬆ ላይꬃን፥ ጎዳይ ኤርምያሳኮ ሀይሳዳ ያግስ፦ 2 “እስ ፃꬃ ማፃፋ ኤካዳ፥ እዮስያሳ ዎደ ታኒ ነዉ ኦዶ ዶምዳ ኮይሮ ጋላሳፐ ዶማዳ፥ ሀች ጋካናዉ እስራኤለ ቦላ፥ ይሁዳ ቦላነ ሀራ ካዎተꬃታ ቦላ ታኒ ኦድዳ ቃላ ኡባ ፃፋ። 3 ታ ይሁዳ አሳ ቦላ ኤሀና ጋዳ ሀልችዳ ቦሻ ኡባ ስእድ፥ ኦን ኤር፥ ኤንቲ ባንታ ኢታ ኦሱዋፐ ስማና፤ ታ ኤንታ ናቁዋነ ኤንታ ናጋራ አቶ ጋና” ያግስ።

4 ሄሳ ግሾ፥ ኤርምያስ ኔራ ናኣ ባሮካ ፄግድ፥ ጎዳይ እያዉ ኦድዳባ ኡባ ባሮካስ ኦድን፥ እ ፃꬃ ማፃፋን ፃፍስ። 5 ሄሳፈ ጉየ፥ ኤርምያስ ባሮካኮ፥ “ታኒ ቃሾ ኬꬃን ደእያ ግሾ፥ ፆሳ ኬꬅ ገላናዉ ዳንዳእከ። 6 ሄሳ ግሾ፥ ነ ፆማ ጋላስ ፆሳ ኬꬅ ባዳ፥ ታ ኦድን፥ ነ ፃꬃ ማፃፋን ፃፍዳ ጎዳ ቃላ ኤንታዉ ናባባ፤ ባንታ ካታማታፐ ይዳ ይሁዳ አሳ ኡባስ ናባባ። 7 ሀ አሳ ቦላ ጎዳይ አዋጅዳ ሀንቆይ ግታ ግድያ ግሾ፥ ኦን ኤር፥ ኤንቲ ባንታ ኢታ ኦሱዋፐ ስሚድ፥ ጎዳ ዎሳና” ያግስ። 8 ኔራ ናአይ ባሮክ ናበይ ኤርምያስ ኪትዳይሳዳ ፆሳ ኬꬃን ጎዳ ቃላ ኡባ ናባብስ።

9 እዮስያሳ ናአይ ይሁዳ ካዎይ እዮአቄም ካዎትዳ እቻሻንꬆ ላይꬃን፥ ኡዱፉንꬆ አጌናን፥ የሩሳላመን ደእያ አሳስነ ይሁዳ ካታማታፐ ይዳ አሳ ኡባይ ጎዳ ስንꬃን ፆማና መላ አዋጅዶሶና። 10 ባሮክ ፆሳ ኬꬃን፥ ቆሞ ባጋ ዳባባን፥ ኦራꬃ ፐንገ ጌተትያ በሳን፥ ፃፍያ ሳፋና ናኣ፥ ጋማራ ክፍልያን ኤቅድ፥ ኤርምያሳ ቃላይ ፃፈትዳ ፃꬃ ማፃፋ አሳ ኡባስ ናባብስ።

11 ሳፋና ናኣ ናአይ፥ ጋማራ ናአይ ምካይ ማፃፋፐ ጎዳ ቃላ ባሮክ ናባብሽን ስእዳ ዎደ፥ 12 ካዎ ጋꬎን ፃፈይ ኡትያ ክፍልያ ብስ። እ ብያ ዎደ፥ ፃፈይ ኤልሻም፥ ሻማያ ናአይ ዳል፥ አክቦራ ናአይ ኤልናታን፥ ሳፋና ናአይ ጋማራ፥ ሀናንያ ናአይ ፅድቀነ ሀራ ሀላቃት ያን ኡትዶሶና። 13 ባሮክ አሳስ ማፃፋፐ ናባብሽን ስእዳ ቃላ ኡባ ምካይ ኤንታኮ ኦድስ። 14 ሀላቃት ናታና ናኣ ይሁዳ ባሮካኮ ኪትድ፥ “አሳስ ኔኒ ናባብዳ ማፃፋ ኤካዳ ሃ ያ” ያግዶሶና። (ናታን ሳላማ ናአ፤ ሳላም ኩሳ ናአ።) ባሮክ ማፃፋ ኤክድ፥ ኤንታኮ ይስ። 15 ኤንትካ እያ፥ “አነ ኡታዳ፥ ኑስ ማፃፋ ናባባ” ያግዶሶና።

ያግን ባሮክ ማፃፋ ናባብስ። 16 እ ናባብዳ ቃላ ኡባ ስእድ ያይዶሶና፥ እሶይ እሱዋ ፄልድ፥ ባሮካ፥ “ሀ ቃላ ኡባ ኑኒ ካዋስ ኦዳናዉ ኮሼስ” ያግዶሶና። 17 ቃስካ ዛሪድ፥ “ኔኒ ሀ ቃላ ኡባ ዋታዳ ፃፍዳኮ ኑስ ኦዳ። ሀይሳ ነዉ ኤርምያስ ኦድን ፃፋዲ?” ያግዶሶና።

18 ባሮክ፥ “ኤ፥ ሀ ቃላ ኡባ ኤርምያስ ባ ዶናፐ ታዉ ኦድስ፤ ታኒ ቃላመን ሀ ፃꬃ ማፃፋን ፃፋስ” ያግስ።

19 ኤንቲ ባሮካ፥ “ኔንነ ኤርምያስ ብድ ቆሰትተ፤ ህንተ ደእያ በሳ ኦንካ ኤሮፖ” ያግዶሶና።

20 ሀላቃት ማፃፋ ፃፍያ ኤልሻማ ክፍለን ዎꬅዳፐ ጉየ፥ ካዎይ ደእያ ዳባባ ብድ፥ ሀንዳባ ኡባ ካዋስ ኦድዶሶና። 21 ሄ ማፃፋ ኤሀና መላ፥ ካዎይ ይሁዳ ኪትስ፤ ፃꬃ ማፃፋ ኤልሻማ ክፍለፐ ኤህድ፥ ካዋስነ እያ ዩሹዋን ኤቅዳ ሀላቃታስ ናባብስ። 22 ኡዱፉንꬆ አጌናን ሳእ ባልጎ ግድያ ግሾ፥ ካዎይ ባልጉዋ አꬅያ ኬꬃን ኡትስ። ሄ ዎደ ካዋ ስንꬃን ደእያ ጮጭያን ታም ኤፄስ። 23 ይሁድ ሄꬑ ዎይኮ ኦይዱ በሳታ ናባብዳፐ ጉየ፥ ካዎይ ሄ በሳታ ፃꬃ ማፃፋፐ ማሻን ቃንፅ ቃንፅድ፥ ታማን የግስ፤ ሄሳዳ ኦꬅድ፥ ማፃፋ ኩመꬅ ፁግስ። 24 ሀ ቃላ ስእድ ካዎይነ እያራ ኦꬅያ ሞርናት ኡባይ አይነ ባብቦኮና፤ ዎይኮ ካዮትድ፥ ባንታ ማኡዋ ፔꬍቦኮና። 25 ሀር አቶሽን ኤልናታን፥ ዳላይነ ጋማር ካዎይ ሄ ማፃፋ ፁጎና መላ ዎስንካ፥ ኤንታ ዎሳ ስኦና እፅስ። 26 ካዋ ናአ ይራህማኤላ፥ አዝርኤላ ናኣ ሳራያነ አብድኤላ ናኣ ሰለማ፥ ፃፍያ ባሮካነ ናብያ ኤርምያሳ ኦይካና መላ ካዎይ ኪትስ። ሽን ጎዳይ ኤንታ ቆትስ።

27 ኤርምያስ ኦድን፥ ባሮክ ፃፍዳ ማፃፋ ካዎይ ፁግድ ስምን፥ ጎዳ ቃላይ ኤርምያሳኮ ሀይሳዳ ያግሸ ይስ፦ 28 “ሀራ ፃꬃ ማፃፋ ኤካዳ፥ ይሁዳ ካዎይ እዮአቄም ፁግዳ ፃꬃ ማፃፋን ደእያ ቃላ ኡባ ዛራዳ ፃፋ። 29 ቃስ ይሁዳ ካዋ እዮአቄማ ሀይሳዳ ያጋ፦ ጎዳይ ሀይሳዳ ያጌስ፤ ኔኒ፥ ‘ባብሎነ ካዎይ ይድ፥ ሀ ቢታ ꬋይሳና፤ ቃስ ያን ደእያ አሳነ መህያ ዉርሳና’ ጋዳ አይስ ፃፋዲ?” ያጋዳ ማፃፋ ፁጋዳሳ።

30 “ሄሳ ግሾ፥ ጎዳይ ይሁዳ ካዋ እዮአቄማ ሀይሳዳ ያጌስ፦ ዳዊታ አራታን ኡትያ ኮቻይ ነዉ ኩምꬅ ዴና። ነ አሀይ ጮ ሆለትድ፥ ጋላስ አዋ ሱሎስ፥ ቃማ ሜጎን ሾጨታና። 31 ህንተ ናጋራ ግሾ ነና፥ ነ፥ ኮቻነ ኔራ ኦꬅያ ሞርናታ ኡባ ሴራና። ኤንቲ ታኒ ኦድዳባ ስኦና እፅዳ ግሾ፥ ታ ግዳ ኢታባ ኡባይ ህንተ ቦላ፥ ይሁዳንነ የሩሳላመን ደእያ አሳ ኡባ ቦላ ኤሀና” ያጌስ።

32 ሄሳፈ ጉየ፥ ኤርምያስ ሀራ ፃꬃ ማፃፋ ኤክድ፥ ኔራ ናኣ ፃፍያ ባሮካስ እሚስ። ባሮክ ይሁዳ ካዎይ እዮአቄም ታማን ፁግዳ ፃꬃ ማፃፋ ቃላ ኡባ ኤርምያስ እያዉ ዶናን ኦድን ፃፍስ። ቃስ ኤርምያስ ሄሳ ዳንያ ሀራ ቃላካ ጉጅን፥ ኡባካ ባሮክ ፃፍስ።