1 ባብሎነ ካዎይ ናቡካዳናፆር እዮአቄማ ናኣ እኮንያና በሳን እዮስያሳ ናኣ ሰደቅያሳ ይሁዳ ቢታን ካዎꬅስ። 2 ሰደቅያስ፥ እያራ ኦꬅያ ሀላቃትነ ቢታን ደእያ አሳ ኡባይ፥ ጎዳይ ናብያ ኤርምያሳ ባጋራ ኦድዳ ቃላስ ኪተትቦኮና። 3 ሽን ካዎይ ሰደቅያስ ሰለማ ናኣ ዮካላነ ማእሰያ ናኣ ካህንያ ሶፎንያሳ፥ “ሀያና፥ ኑ ግሾ ጎዳ ኑ ፆሳ ዎሳ” ያግድ ኤርምያሳኮ ኪትስ።

4 ሄ ዎደ ኤርምያስ ቃሾ ኬꬅ ገልቦና ግሾ፥ አሳ ግዶን ስመረቴስ። 5 ግብፀ ካዋ ኦላንቾት፥ ግብፀፈ ከይዳይሳ የሩሳላመ ተቅዳ ባብሎነ ኦላንቾት ስእዳ ዎደ የሩሳላመ የድድ ከይዶሶና።

6 ሄሳፈ ጉየ፥ ጎዳ ቃላይ ናብያ ኤርምያሳኮ ይስ። 7 “ጎዳይ እስራኤለ ፆሳይ ሀይሳዳ ያጌስ፦ ታና ኦይቻና መላ ህንተና ታኮ ኪትዳ ይሁዳ ካዋስ ሀይሳዳ ያግተ፤ ‘ህንተና ማዳናዉ ይዳ ግብፀ ካዋ ኦላንቾት ባንታ ቢታ ስሚድ ባና። 8 ቃስ ባብሎነ ኦላንቾት ስሚድ ያና፤ ሀ ካታማ ኦልድ ኦይካና፤ ታማን እያ ፁጋና’ ያግተ።

9 “ባብሎነ ኦላንቾት ስሚድ ዩሳይ አቶና ግሾ ‘ባብሎነ ኦላንቾት ዮኮና’ ግድ ህንተና ህንተዉ ጭሞፍተ። 10 ህንተ ባብሎነ ኦላንቾታ ኩመꬅ ፆንያኮካ፥ ማዱንፅድ፥ ዱንካነን ዝንእዳይሳት ደንድድ፥ ሀ ካታማ ታማን ፁጋና” ያጌስ ጎዳይ።

11 ግብፀ ካዋ ኦላንቾት ማትዳ ግሾ፥ ባብሎነ ኦላንቾት የሩሳላመ አግድ ባንታ ደእያ በሳ ጉየ ስምዶሶና። 12 ሄ ዎደ ኤርምያስ ባ ግሾ ቢታ ኤካናዉ ብንያመ ቢታ ባናዉ የሩሳላመፐ ደንድስ። 13 ግዶሽን፥ እ ብድ፥ ብንያመ ፐንገ ጋክያ ዎደ ፐንግያ ናገይሳታፐ እሶይ፥ ሀናንያ ናአይ፥ ሳሌማ ናአ ዬራ፥ “ነ ኑና ካዳዳ ባብሎነ ባሳ ግድኪ?” ያግድ ኦይክስ።

14 ኤርምያስ ዛሪድ፥ “ነ ገይሳ መላ ታ ባብሎነ ብያ አስ ግድከ” ያግስ። ሽን ዬረይ እ ገይሳ ስኦና እፅድ ኤርምያሳ ኦይክድ ሀላቃታኮ ኤፍስ። 15 ሀላቃት ዳሮ ሀንቀትድ፥ ኤርምያሳ ዋꬍ፥ ኤንቲ ቃሾ ኬꬅ ኦꬅዳ፥ ፃፍያ ዮናታና ኬꬃን እያ ቃችዶሶና። 16 ኤርምያስ ያን ቢታ ጋርሳን ደእያ ክፍልያን ዳሮ ዎደ ጋምእስ።

17 ሄሳፈ ጉየ፥ ካዎይ ሰደቅያስ አሰ ኪትድ፥ ኤርምያሳ ባ ካዎ ጋꬎ ፄግስድ፥ ዱማ ቆሳን እያ፥ “ጎዳይ ነዉ ኦድዳባይ ደኢ?” ያግድ ኦይችስ።

ኤርምያስ ዛሪድ፥ “ኤ ደኤስ፤ ኔኒ ባብሎነ ካዋ ኩሸን አꬋዳ እመታና” ያግስ 18 ቃስካ ኤርምያስ ካዋ ሰደቅያሳ ሀይሳዳ ያግድ ኦይችስ፦ “ታና ህንተ ቃሾ ኬꬃን የጋናዉ ታ ነ ቦላ፥ ነዉ ኦꬅያ ሀላቃታ ቦላ ዎይኮ ሀ አሳ ቦላ አይ ባላ ኦꬃድና? 19 ያትን፥ ‘ባብሎነ ካዎይ ይድ ህንተናነ ህንተ ቢታ ኦለና’ ያግድ ነዉ ትንብተ ኦድዳ ነ ናበት ሀእ አዉን ደኦና? 20 ታ ጎዳዉ፥ ካዋዉ፥ ስአ፤ ታ ኦይችያ እስባ ነ ፖላና መላ ነና ዎሳይስ። ታ ሄ በሳን ሀይቆና መላ እያ ኬꬃይ ቃሾ ኬꬅ ግድዳ ፃፍያ ዮናታና ሶ ታና ጉየ ዛሮፓ” ያግስ።

21 ካዎይ ሰደቅያስ ናገይሳታ ዳባባን ኤርምያሳ ዳና መላ ኪትስ። ያን እ ደእሽን ካታማፐ ዳቦይ ꬋያና ጋካናዉ ጋላስ ጋላስ እስ እስ ዳቦ ኡክያ በሳፈ ኤህድ እያዉ እሞሶና። ሄሳ ግሾ፥ ኤርምያሳ ካዋ ዛባን ጋምእስ።