1 ማታና ናአይ ሳፋፅ፥ ጳስኮራ ናአይ ጎዶልያ፥ ሰለማ ናአይ ዮካልነ ማልካያ ናአይ ጳስኮር ኤርምያስ አሳ ኡባስ ኦድዳ ቃላ ስእዶሶና። 2 ኤርምያስ፥ “ሀ ካታማን አትያ ኦንካ ኦላን፥ ኮሻንነ ቦሻን ሀይቃና። ሽን ባብሎነታስ ባ ኩሸ እምያ ኦንካ ሀይቀና፤ አታና፤ ደኦን ዳና። 3 የሩሳላመ ካታማይ ባብሎነ ካዋ ኦላንቾታ ኩሸን አꬍድ እመታና፤ ኤንትካ እያ ፖሎ ድአና” ያጌስ ጎዳይ።

4 ሄሳፈ ጉየ፥ ሀላቃት ካዋኮ ብድ፥ “ሀ አደይ ሀይቃናዉ ኮሼስ፤ ሀይሳ መላ ኦዳ ኦድድ፥ ሀ ካታማን ደእያ ኦላንቾትነ አሳ ኡባይ ሹጋና መላ ኦꬅስ። እ አሰ ቆህያባ አሞቴስፐ አትሽን፥ ሳሮባ አሞተና” ያግዶሶና።

5 ካዎይ ሰደቅያስ ዛሪድ፥ “ህንተ እያ ቦላ ኦꬃና ግዳባ ታ ህንተና ድጋናዉ ዳንዳእከ” ያግስ። 6 ኤንቲ ኤርምያሳ ካዎ ጋꬎ ዳባባን ደእያ፥ ካዋ ናኣ ማልካያ ሃꬃ ኦላን፥ ዎዶሮን ዱገ የግዶሶና። ሄ ዎደ ሄ ኦላን ስልሞፐ አትሽን፥ ሃꬅ ባዋ፤ ኤርምያስ ሄ ስልሙዋ ግዶ ገልስ።

7 ሽን ቶጰ አሰ ግድዳ፥ ካዎ ሞርናይ፥ አበመለከ ጌተትያ አደይ ኤርምያስ ኦላን የገትዳይሳ ስእስ። ሄ ዎደ ካዎይ ብንያመ ፐንገ ፕርዳ ኦይደን ኡትስ። 8 ኤበድ-መለክ ካዋኮ ብድ፥ ሀይሳዳ ያግስ፤ 9 “ታ ጎዳዉ ካዋዉ፥ ሀ አሳት ግታ ኢታባ ኦꬅዶሶና፤ ኤንቲ ናብያ ኤርምያሳ ሃꬃ ኦላን የግዶሶና። ቃስ ካታማን ቁም ባይና ግሾ እ ያን ኮሻን ሀይቃና” ያግስ።

10 ካዎይ ዛሪድ፥ ቶጰ አደይ ኤበድ-መለካኮ፥ “ሀስታሙ አስ ኔራ ኤካ ባዳ፥ ኤርምያስ ሀይቆና ደእሽን ሃꬃ ኦላፈ ከስተ” ያግስ።

11 ኤበድ-መለክ አሰ ኤክድ፥ ብድ ካዎ ጋꬎን ሻሎ ምንጅያ ኬꬃፈ ጋርሳ ባጋራ ደእያ ክፍልያ ገልድ፥ ጋልአ ማኦነ ጩርቃ ኤክስ። ሄ ጩርቃ ዎዶሩዋ ፄራን ቃችድ፥ ኤርምያሳስ ዱገ ኦላ ግዶ የድስ። 12 ቶጰ አደይ ኤበድ-መለክ ኤርምያሳ ፄግድ፥ “ሀ ጩርቃ ማኡዋ ዎዶሩዋፐ ጋርሳራ ነ ሾጵያን ዎꬃ” ያግስ። ኤርምያስ እ ግዳይሳዳ ኦꬅስ። 13 ኤንቲ ዎዶሩዋራ ጎችድ፥ ኤርምያሳ ኦላፈ ከስድ፥ ናገይሳታ ኬꬅ ገልስድ ጎርድዶሶና።

14 ሄሳፈ ጉየ፥ ካዎይ ሰደቅያስ ኤርምያሳ ኪትድ ኤህስድ፥ ፆሳ ኬꬅ ገልያ ሄꬓንꬆ ፐንግያ ማታን፥ “ታ ነና እስባ ኦይቻና፤ ነ ታፐ ቆሶፓ” ያግስ።

15 ኤርምያስ ዛሪድ፥ “ታ ኦድኮ፥ ነ ታና ዎꬍኪ? ታ ዞርን ነ ስአካ” ያግስ።

16 ካዎይ ሰደቅያስ፥ “ደኦ ፆሳይ ኤርያ መላ፥ ታ ነና ዎꬍከ፤ ነና ዎꬋናዉ ኮየይሳታስ አꬃዳ እምከ” ያግድ ቆሳን ኤርምያሳስ ጫቅስ።

17 ኤርምያስ ዛሪድ፥ “ጎዳይ፥ ኡባፈ ዎልቃማ ፆሳይ፥ እስራኤለ ፆሳይ ሀይሳዳ ያጌስ፦ ‘ባብሎነ ካዋ ሀላቃታስ ነ ኩሸ እምኮ፥ ነ ፓፃ አታና፤ ሀ ካታማይ ታማን ፁገተና፤ ነነ ነ ኬꬃ አሳይ ደኦን ዳና። 18 ሽን ነ ኤንታዉ ኩሸ እሞና እፅኮ፥ ሀ ካታማይ ባብሎነታስ አꬍድ እመታና፤ ኤንቲ እያ ፁጋና፤ ነ ኤንታፈ ከሳ ኤካካ’ ” ያግስ።

19 ካዎይ ሰደቅያስ፥ “ታ ያየይ ሀ ቢታ ካድድ፥ ባብሎነ ብዳ አይሁደታሳ። ባብሎነት ታና ኤንታ ኩሸን አꬅድ እምን፥ አይሁደት ታና ካአና” ያግድ ዛርስ።

20 ኤርምያስ፥ “አይኮይ ባዋ! ኤንቲ ነና ኤንታዉ አꬅድ እሞኮና። ታ ኦድያ ጎዳ ቃላስ ሀያና ኪተታ። ሄስ ነዉ ሎኦ ግዳና፤ ነ ፓፃ አታና። 21 ሽን ነ ኩሸ እሞና እፅኮ፥ ጎዳይ ታና በስዳ ቆንጨꬅ ደኤስ። 22 ሄስካ፥ ይሁዳ ካዎ ጋꬎን አትዳ ማጫሳት ኡባይ ድኤትድ፥ ባብሎነ ሀላቃታኮ ባና። ኤንቲ ኔኮ፥ ‘ነ ማታ ላገት ነና ባለꬅዶሶና፤ ኤንቲ ነና ፆንዶሶና። ሽን ሀእ ነ ቶሆይ ስልሞ ግዶ ገልን፥ ሄ ላገት ነና የግድ ብዶሶና’ ያጋና። 23 ነ ማቸትነ ነ ናይት ኡባይ ባብሎነ ድኤትድ ባና። ነ ኤንታ ኩሸፐ ከሳ ኤካካ። ባብሎነ ካዎይ ነና ኦይካና። ሀ ካታማይ ታማን ፁገታና” ያግስ።

24 ሰደቅያስ ዛሪድ፥ “ሀይሳ ነ ታዉ ኦድዳይሳ አሳስ ኦዶና እፅኮ ነ ሀይቃካ። 25 ሀላቃት ታ ኔራ ኦደትዳይሳ ስእድ፥ ‘ኔራ ካዋራ አይ ኦደትዳኮ ኑስ ኦዳ። ነ ኑስ ቆቶና እፅኮ፥ ኑ ነና ዎꬎኮ’ ያግድ ኦይቻና። 26 ኔኒ፥ ‘ታ ያን ሀይቆና መላ ታና ዛራዳ ቃሾ ኬꬅ ግድዳ ዮናታና ሶ የዶና መላ ካዋ ዎሳስ’ ” ጋዳ ዛራ ያጋ።

27 ሄሳፈ ጉየ፥ ሀላቃት ኡባይ ኤርምያሳኮ ይድ፥ ሄ ኦይሻ ኦይችዶሶና። ካዎይ እያ ኪትዳይሳዳ ኤንታዉ ኦድስ፤ ኤርምያሳራ ካዋራ ሃሳይሽን ስእዳ አስ ባይና ግሾ ኤንቲ ስእ ግዶሶና። 28 የሩሳላመይ ኦይከታና ዎደይ ጋካናዉ፥ ኤርምያስ ናገይሳታ ዳባባን ጎርደትድ ጋምእስ።