1 ሰደቅያስ ይሁዳን ካዎትዳ ኡዱፉንꬆ ላይꬃን፥ ታማንꬃ አጌናን፥ ባብሎነ ካዎይ ናቡካዳናፆርነ እያ ኦላንቾት ኡባይ ይድ፥ የሩሳላመ ተቅዶሶና። 2 ሰደቅያስ ካዎትዳ ታማነ እስንꬆ ላይꬃን፥ ኦይዳንꬆ አጌናን፥ ኡዱፉንꬆ ጋላሳን ባብሎነ ኦላንቾት ካታማ ግምብያ መንꬅዶሶና። 3 ሄ ዎደ ባብሎነ ካዋ ሀላቃት፥ ኤርጋል-ሳራስራ፥ ሳምጋር-ናቦ፥ ሳርሳክማነ ኤርጋል-ሳራስራ ጌተተይሳት ሀራ ዳሮ ሀላቃታራ እስፈ ይድ ግዶ ፐንገ ጌተትያ በሳን ኡትዶሶና።

4 ይሁዳ ካዎይ ሰደቅያስነ እያ ኦላንቾት ኡባይ ባብሎነ ኦላንቾታ በእዳ ዎደ ባቃትዶሶና። ቃማ ካታማፐ ከይድ፥ ካዋ አታክልተ በሳ ኤፍያ ኦግያራ፥ ናምኡ ድርሳ ግምበታ እስፈ ጋꬅያ ፐንግያራ ከይድ ዮርዳኖሰ ዛንጋራኮ ስሚድ ብዶሶና። 5 ግዶሽን፥ ባብሎነ ኦላንቾት ኤንታ የደꬅድ፥ እያርኮ ደምባ ጋꬅሸ፥ ሰደቅያሳ ኦይክዶሶና። ሀማታ ቢታን፥ እርብላ ካታማን ደእያ ካዋ ናቡካዳናፆራኮ ኤፍዶሶና። ካዎይ ናቡካዳናፆር ያን ሰደቅያሳ ቦላ ፕርድስ። 6 ባብሎነ ካዎይ፥ ሰደቅያሳ አደ ናይታ እያ ስንꬃን፥ እርብላ ካታማን ዎꬍስ፤ ቃስ ይሁዳ ሀላቃታ ኡባ ዎꬍስ። 7 ሰደቅያሳ አይፈታ ዎጭ ከስድ፥ እያ ባብሎነ ቢታ ኤፋናዉ ሳንꬃላታን ቃችስ።

8 ባብሎነ ኦላንቾት ካዎ ጋꬎነ አሳይ ደእያ ኬꬃ ኡባ ታማን ፁግዶሶና፤ የሩሳላመ ግምብያካ ላልዶሶና። 9 ካዋ ናገይሳታ ሀላቃይ ናቡዛርዳን ካታማን አትዳ አሳነ ካድድ እያኮ ይዳ አሳ ኡባ ድእድ ባብሎነ ቢታ ኤፍስ። 10 ካዋ ናገይሳታ ሀላቃይ ናቡዛርዳን አይኮካ ባይና ጉꬃ ማንቆታ ይሁዳን አግድ፥ ኤንታዉ ዎይነ ጋደነ ጎሻ ጋደ እሚስ።

11 ናቡካዳናፆር፥ ካዋ ናገይሳታ ሀላቃ ናቡዛርዳና ሀይሳዳ ያግድ ኪትስ፦ 12 “ባዳ ኤርምያሳ ኮያ ደማዳ፥ እያዉ ኮሽያባ ኡባ ኦꬃ፤ እያ ቦላ ሀራ ኢታባ አይኮካ ኦꬆፋ” ያግስ። 13 ሄሳ ግሾ፥ ናቡዛርዳን፥ ናቡሻዝባና፥ ኤርጋል-ሳራስራነ ባብሎነ ካዋ ሀላቃታ ኡባ ኪትድ፥ 14 ኤርምያሳ ቃሸትድ ደእያ፥ ናገይሳታ ዳባባፐ ከስዶሶና። ባ ሶ ኤፍድ ዎꬃና መላ ሳፋና ናኣ፥ አክቃማ ናኣ ጎዶልያስ ሀዳራ እምዶሶና። ሄሳ ጋሶን፥ ኤርምያስ ባ ቢታ አሳራ እስፈ ደእስ።

15 ኤርምያስ ናገይሳታ ዳባባን ቃሸትድ ደእሽን፥ ጎዳ ቃላይ እያኮ ሀይሳዳ ያግድ ይስ። 16 “ባዳ፥ ቶጰ አድያ ኤበመለካኮ ሀይሳዳ ያጋ፦ ‘ኡባፈ ዎልቃማ ጎዳይ፥ እስራኤለ ፆሳይ፥ ሀይሳዳ ያጌስ፦ ህዛፐ ጉየ ታ ኦድዳይሳዳ ሀ ካታማ ቦላ ሎኦባ ግዶናሽን፥ ꬋዮ ኤሀና። ሄስ ኡባይ ሀንያ ዎደ ነ ሀ ካታማን ኡታዳ፥ ነ አይፈን በአና። 17 ግዶሽን፥ ሄ ጋላስ ታ ነና አሻና፤ ነ ያይያ፥ ነ ሞርከታ ኩሸን አꬃዳ እምከ። 18 ታ ነና ፖሎ አሻና፤ ነ ኦላን ሀይቃካ፤ ነ ታናን አማነትዳ ግሾ፥ ሀይቆፐ አታና’ ” ያጌስ ጎዳይ።