1 ካዋ ናገይሳታ ሀላቃይ ናቡዛርዳን ኤርምያሳ ራማን ብርሽድ ስምን፥ ጎዳ ቃላይ ኤርምያሳኮ ይስ። ናቡዛርዳን የሩሳላመፐነ ይሁዳፐ ድእድ፥ ባብሎነ ኤፋናዉ ቃችዳ አሳ ግዶን ኤርምያስ ሳንꬃላታን ቃሸትድ ደኤስ።

2 ካዋ ናገይሳታ ሀላቃይ ኤርምያሳ ዱማ ከስድ፥ ሀይሳዳ ያግስ፦ “ጎዳይ ነ ፆሳይ፥ ꬋዮ ሀ ቢታ ቦላ ኤሀናይሳ ኦድስ። 3 እ ኤሀና ግዳይሳዳ ሀእ ኦꬅስ፤ ጎዳ ቦላ ህንተ ናጋራ ኦꬅዳ ግሾነ እያዉ ኪተቶና እፅዳ ግሾ ሀይስ ኡባይ ሀንስ። 4 ሄኮ፥ ሀእ ታ ነ ኩሸን ደእያ ሳንꬃላታ ብርሻዳ ነና የዳስ። ታራ ባብሎነ ባና ጊኮ የꬋ፤ ታ ነዉ ኮሽያባ ኡባ ኩንꬃና። ባብሎነ ባናዉ ኮዮና እፅኮ አታናዉ ዳንዳኣሳ። ቢታ ኡባይ ነ ስንꬃን ደኤስ፤ ነና ሎእዳ በሲ አዉካ ባ” ያግስ።

5 ኤርምያስ እያ ማታፐ ቦና ደእሽን፥ ናቡዛርዳን ጉጅድ ያግስ፤ “ሳፋና ናኣ፥ አክቃማ ናኣ ጎዶልያኮ ባ። ባብሎነ ካዎይ ናቡካዳናፆር እያ ይሁዳ ካታማታ ሃርያ አስ ኦꬅድ ሹምስ። ሄሳ ግሾ፥ እያራ እስፈ ያን አሳራ ደአ፤ ዎይኮ ነና ሎእዳ በሲ አዉካ ባ” ያግስ። ካዋ ናገይሳታ ሀላቃይ እያዉ ሽንቀነ ሀራ እሞታ እምድ የድስ። 6 ኤርምያስ ምፅጳን ደእያ አክቃማ ናኣ ጎዶልያኮ ብስ። እ ያን አትዳ አሳራ እስፈ ደእስ።

7 ይሁዳ ቶራ ሞጮናታፐነ ኦላንቾታፐ ጉꬃት ባብሎነ ካዋስ ኩሸ እምቦኮና። ኤንቲ ባብሎነ ካዎይ፥ አክቃማ ናአ ጎዶልያ ቢታ ሃረይሳ ኦꬅድ ሹምዳይሳነ ባብሎነ ድኤትድ ቦና ይሁዳን አትዳ ማንቆታስ ሀላቃ ኦꬅዳይሳ ስእዶሶና። 8 ናታና ናአይ እስማኤል፥ ቃረያ ናይት ዮሃንነ ዮናታን፥ ታንሁመታ ናአይ ሳራይ፥ ናፆፋ አድያ ዮፋ ናይትነ ማእካ አድያ ናአይ ያዛን ባንታ ኦላንቾታ ኡባራ ጎዶልያኮ ምፅጳ ይዶሶና። 9 ሳፋና ናአይ፥ አክቃማ ናአይ ጎዶልያ ኤንታዉ ሀይሳዳ ያግድ ጫቅስ፦ “ባብሎነታስ ኩሸ እማናዉ ያዮፍተ፤ ሄ ቢታን ደእተ። ባብሎነ ካዋስ ሃረትተ፤ ኡባባይ ህንተዉ እንጀ ግዳና። 10 ታ ምፅጳን ኡታዳ፥ ባብሎነ ቢታፈ ህንተራ ጋሄታናዉ ያ ኡባራ ህንተ ዶና ግዳዳ ኦደታና። ሽን ህንተ ደእያ በሳን ዎይነ፥ ሻማሆ ዛይተነ ሀራ ካꬃ አይፈ ኡባ ሺሽድ ዳጋይተ” ያግስ።

11 ሞአበን፥ አሞነን፥ ኤዶመንነ ሀራ ቢታታን ደእያ አይሁደ ኡባይ ባብሎነ ካዎይ፥ ጉꬃ ይሁዳ አሳት ይሁዳን አታና መላ ኦꬅዳይሳነ ሳፋና ናአ አክቃማ ናአ ጎዶልያ ኤንታ ቦላ ሹምዳይሳ ስእዶሶና። 12 ኤንቲ ላለትድ ደእያ ባንታ ቢታፈ ይሁዳ ስሚድ፥ ጎዶልያ ደእያ በሳ ምፅጳ ይዶሶና። ያን ኤንቲ ዳሮ ዎይነነ ሀራ ካꬃ አይፈ ሺሽድ ዳጋይዶሶና።

13 ሄሳፈ ጉየ፥ ቃራያ ናአይ ዮሃንነ ኩሸ እምቦና ቶራ ሞጮናት ኡባይ ጎዶልያኮ ምፅጳ ይድ፥ 14 “አሞነ ካዎይ ባአልስ ነና ዎꬋና መላ ናታና ናኣ እስማኤላ የድዳይሳ ኤራይ?” ያግዶሶና። ሽን አክቃማ ናአይ ጎዶልያ ኤንታ ኦዳ አማኖና እፅስ።

15 ቃራያ ናአይ ዮሃን ምፅጳን ደእያ ጎዶልያኮ ይድ፥ “ኦንካ ኤሮና ደእሽን ባዳ፥ ናታንያ ናኣ እስማኤላ ታ ዎꬋና። እ ነና ዎꬍኮ፥ ነ ማታን ሺቅዳ አይሁደ ኡባይ ላለታና፤ ቃስ ይሁዳን አትዳ አሳ ኡባይ ዉራና” ያግስ።

16 ሽን አክቃማ ናአይ ጎዶልያ ዛሪድ፥ “እስማኤላባ ነ ኦድያ ኡባይ ዎርዶ ግድያ ግሾ ሄሳ መላባ ኦꬆፋ” ያግስ።