1 ላፑንꬃ አጌናን ካዎ ኮቸ ግድድ፥ ካዋ ሞርናታፐ እሶይ፥ ኤልሳማ ናአይ፥ ናታና ናአይ እስማኤል ታሙ አሳራ እስፈ አክቃማ ናኣ ጎዶልያራ ጋሄታናዉ ምፅጳ ብስ። ኡባይ ኡትድ ካꬅ ምሽን፥ 2 ናታና ናአይ እስማኤልነ እያራ ደእያ ታሙ አሳት ባንታ ማሻ ማሻ ከስድ፥ ባብሎነ ካዎይ ይሁዳ ቦላ ሹምዳ አክቃማ ናኣ ጎዶልያ ዎꬍዶሶና። 3 እስማኤል ቃስ ምፅጳን ጎዶልያራ ደእያ አይሁደታነ ባብሎነ ኦላንቾታ ኡባ ዎꬍስ።

4 ጎዶልያ ሀይቅዳ ዎንተꬃ ጋላስ፥ ኦንካ እያ ሀይቁዋ ኤሮና ደእሽን፥ 5 ሴከማፐ፥ ሴሎፐነ ሳማረፐ ሆስፑን ታሙ አሳት አዛንድ፥ ባንታ ቡቻ ሜድድ፥ ባንታ ማኡዋ ዳክድ፥ ባንታ ሶምኡዋ ጋርሸ ይዶሶና። ኤንቲ ፆሳ ኬꬃስ እምያ ካꬅነ እፃነ ኤህዶሶና። 6 እስማኤል ዬክሸ ምፅጳፈ ከይድ፥ ኤንታራ ጋሄታናዉ ብስ። ኤንታ ጋሄትዳ ዎደ፥ “አክቃማ ናኣ ጎዶልያኮ ሃ ይድ እያ በእተ” ያግስ። 7 ኤንቲ ካታማ ገልዳ ዎደ እስማኤልነ እያራ ደእያ አሳት ኤንታ ዎꬍድ ሃꬃ ኦላን የግዶሶና።

8 ሽን ሄ ሆስፑን ታሙ አሳታፐ ታማት እስማኤላ ሀይሳዳ ያግድ ዎስዶሶና፦ “ኑና ዎꬎፓ! ኑ ጎሻን ኑ ቆስዳ ዳሮ ግስተይ፥ ባንግ፥ ሻማሆ ዛይተይነ ኤስ ደኤስ” ያግዶሶና። እ ኤንታ ዎꬎና የድ አግስ። 9 እስማኤል አሳ ዎꬍድ የግዳ ኦላይ፥ እስራኤለ ኦላናዉ ባኦስ ይዳ ዎደ ካዎይ አስ ቦክስዳ ግታ ግምበትዳ ሃꬃ ኦላ። ናታንያ ናአይ እስማኤል ሄ ኦላ አሀን ኩንꬅስ። 10 እስማኤል ካዋ ማጫ ናይታነ ምፅጳን አትዳ አሳ ኡባ ድእስ። ሄሳት ካዋ ናገይሳታ ሀላቃይ ናቡዛርዳን አክቃማ ናኣ ጎዶልያ አዋተꬃ ጋርሳን ምፅጳን ዎꬅዳይሳታ። እ ኤንታ ድእድ፥ ባራ ኤክድ፥ አሞነ ቢታ ባናዉ ደንድስ።

11 ቃራያ ናአይ ዮሃንነ እያራ ደእያ ቶራ ሞጮናት እስማኤል ኦꬅዳ ኢታባ ኡባ ስእዶሶና። 12 ባንታ አሳ ኤክድ፥ እያራ ኦለታናዉ ብዶሶና፤ እስማኤላ ጋባኦናን ደእያ ግታ ኤለ ሃꬃ ማታን ኦይክዶሶና። 13 እስማኤል ድእድ ኤፍያ አሳ ኡባይ ቃራያ ናኣ ዮሃናናነ እያራ ደእያ ቶራ ሞጮናታ በእዳ ዎደ ዳሮ ኡፋይትዶሶና። 14 ሄ ድኤትዳይሳት ኡባይ ጉየ ስሚድ፥ ቃራያ ናኣ ዮሃናናን ጋሄትዶሶና። 15 ሽን እስማኤልነ ሀራ ሆስፑን አሳት ዮሃናናፐ ከስ ኤክድ፥ አሞነ ቢታ ባቃትዶሶና።

16 እስማኤል አክቃማ ናኣ ጎዶልያ ዎꬍድ፥ ምፅጳፈ ድእድ ኤህዳ ኦላንቾት፥ ማጫሳት፥ ናይትነ ሹፋት ኡባይ ቃራያ ናኣ ዮሃናራነ ሀራ ቶራ ሞጮናታራ ደንድድ ብዶሶና። 17 ኤንቲ ያፐ ደንድድ፥ ግብፀ ባናዉ፥ ቤተለመ ማታን ደእያ ገሮት-ካማሀማ ጌተትያ በሳን ሸምፕዶሶና። 18 ኤንቲ ግብፀ ብዳይ ባብሎነ ካዎይ ሹምዳ አክቃማ ናኣ ጎዶልያ እስማኤል ዎꬍዳ ግሾ፥ ባብሎነታስ ያይድ፥ ባብሎነፐ ባቃትድ፥ ግብፀ ባናዉ ደንድዶሶና።