ጌሻ ማፃፋ ኤርምያሳ ማፃፋ 46

ግብፀስ ኦደትዳ ትንብተ

1 ካዎተꬃታባ ጎዳይ ኤርምያሳስ ኦድዳ ቃላይ ሀይሳ። 2 እዮኣሳ ናአይ እዮአቄም ይሁዳን ካዎትዳ ኦይዳንꬆ ላይꬃን፥ ኤፍራፂሳ ሻፋ ማታን፥ ካርካምሻ ጌተትያ በሳን፥ ባብሎነ ካዎይ ናቡካዳናፆር ፆንዳ ግብፀ ካዋ ናኮ ኦላንቾታባ ጎዳይ ሀይሳዳ ያጌስ።

3 ህንተ ቶራነ ጎንዳለ ጊግስተ፤

ኦላስ ከይተ።

4 ህንተ ፓራታ ብፃልድ ቶግተ፤

ህንተ ሁጵያን ብራታ ባርኔፃ ዎꬅተ።

ህንተ በሳ በሳ ኦይክተ፤

ህንተ ቶራ ሌፍተ፤

ህንተ ኦላ ማኡዋ ማእተ።

5 “ሽን ሀይስ ታ በኤይ አይቤ?

ኤንቲ ያይድ ጉየ ስምዶሶና።

ዎልቃማት ፆነትዶሶና፤

ጉየ ፄሎና ባቃትዶሶና፤

ኤንታ ዩሾ ኡባን ዳጋም ደኤስ”

ያጌስ ጎዳይ።

6 ኤሶተይስ ከስ ኤከና፤

ምኖይካ አታናዉ ዳንዳኤና።

ፑደሀ ባጋን ኤፍራፂሳ ሻፋ ማታን፥

ኡባይ ꬉበትድ ኩንድዶሶና።

7 ሀይስ ናይለ ሻፋ ክፃዳ ደንደይ፥

ድኦ ሃꬃዳ ጎገይ ኦኔ?

8 ግብፀይ ናይለ ሻፋዳ ደንዴስ፤

ድኦ ሃꬃዳ ጉፔስ።

ግብፀይ፥ “ታኒ ክፃዳ፥ ቢታን ኤላና፤

ካታማታነ እያን ደእያ አሳ ኡባ ꬋይሳና” ያጌስ።

9 ፓራቶ፥ ጉፕድ ከይተ፤

ፓራ ጋረቶ ዎፅተ።

ጎንዳለ ኦይክዳ ቶጰነ ፑፃ አሳዉ፥

ዶንገን ዱክያ ሉዳ አሳዉ፥

ምኖ ኦላንቾቶ፥ ደንድድ ኦለትተ።

10 ሄ ጋላሳይ ጎዳ ኡባፈ ዎልቃማ ጎዳ ጋላስ፥

ጎዳይ ባ ሞርከታ ቦላ ሀሎ ከይያ ጋላስ።

እያ ማሻይ ካላና ጋካናዉ ኤንታ ማና፤

አላና ጋካናዉ ኤንታ ሱꬃ ኡያና።

ጎዳይ፥ ኡባፈ ዎልቃማ ፆሳይ፥

ፑደሀ ባጋን ኤፍራፂሳ ሻፋ ማታን፥

ኤንታ ያርሾ ኦꬅድ ኤካና።

11 ጌላኤ፥ ግብፀ ማጫ ናተ፥

ጋላዳ ቢታ ባዳ ትየትያ ꬋለ ኤሀ።

ግዶሽን፥ ነ ጮ ꬋለ ዳርሳሳፐ አትሽን፥

ነዉ ፓፆይ ባዋ።

12 ካዎተꬃት ነ ዬላ ስእዶሶና፤

ነ ዬሆይ ቢታ ኡባ ኩማና።

ነ ኦላንቾት እሶይ እሱዋን ꬉበትድ፥

ኡባይ እስፈ ኩንድዶሶና።

13 ባብሎነ ካዎይ ናቡካዳናፆር ግብፀ ኦላናዉ ያናይሳ፥ ጎዳይ ናብያ ኤርምያሳስ ኦድዳ ቃላይ ሀይሳ፦

14 ሀይሳ ግብፀን ኦዳ፤

ምግዶላን፥ መምፕሳንነ ፃፍናሳን አዋጃ።

ህንተ በሳን በሳን ኤቅተ፤ ጊገትተ፤

ህንተ ዩሹዋን ደእያ ኡባ ማሽ ማና።

15 ህንተ ምኖ ኦላንቾት አይስ ኩንድዴ?

ጎዳይ ኤንታ ሱግዳ ግሾ ግደኔ?

16 ኦላንቾት ꬉበትድ ኩንድዶሶና፤

እሶይ እሱዋ፥ “ደንድድ የꬍተ፤

ሞርከ ማሻፈ አታናዉ፥

ኑ አሳኮ፥ ኑ ቢታ ስሞስ” ያጎሶና።

17 ኤንቲ ያን ግብፀ ካዋኮ፥

“ባ ቃዳ ጎኤቶና ጮ ዉርስያ ኦዳንቾ” ግድ ሱንꬃና።

18 “ኡባፈ ዎልቃማ ጎዳ” ጌተትያ

ካዎይ ሀይሳዳ ያጌስ፦

“ታኒ፥ ታ ሸምፑዋን ጫቃይስ፤

ደረታ ግዶን ታቦረ ደረይ፥

አባ ማታን ደእያ ቃርመሎሳ ደረይ፥

አዱቀይሳዳ አዱቅያ ሞርከይ ህንተ ቦላ ያና።

19 ህንተኖ፥ ግብፀን ደኤይሳቶ፥

ድኤትድ ባናዉ ጊግተ።

መምፕሳ ካታማይ ላለትድ፥

ኦንካ ደኦና መላ ቢታ ግዳና።

20 ግብፀይ ሎኦ ኡሳ መላ፤

ሽን ፑደሀ ባጋ ቢታፈ ያ

ቦፅያን እያ ሳፀታና።

21 ሚሸይ ጭገትን ኦꬅያ ኦላንቾት

ሞꬍዳ ዎፋኖ መላ።

ኤንታ ꬋዮ ጋላሳይ ማትዳ ግሾ፥

ኤንቲ ሴረትያ ዎደይ ጋክዳ ግሾ፥

ኤንቲ እስፈ ጉየ ስሚድ ባቃትዶሶና፤

ኤንቲ ባንታ በሳን ኤቅቦኮና።

22 ሞርከይ ዎልቃን ሱግድ ያ ዎደ፥

ግብፀ አሳይ ባቃትያ ሾሻዳ ኮልፃና።

ሞርከት ምꬅ ቃንፅያ አሳዳ፥

ካልታ ኤክድ እያ ቦላ ያና።

23 አሳይ ስፅዳ ዎራ ቄፅድ ꬋይሰይሳዳ፥

ግብፀ አሳ ቃንፅድ ዉርሳና

ሞርከታ ታይቦይ ቦለፐ ዳሮ፤

ኤንታ ታይባናዉ ዳንዳኤተና።

24 ግብፀ ማጫ ናእያ ካዉያና፤

ፑደሀ ባጋ አሳስ አꬋዳ እመታና።”

25 ኡባፈ ዎልቃማ ጎዳይ፥ እስራኤለ ፆሳይ ሀይሳዳ ያጌስ። “ታኒ ተብሳ ፆሳ አሞነ፥ ካዋ ፓሮና፥ ግብፀ ቢታነ ግብፀ ፆሳታ፥ ግብፀ ካዎታነ ካዋ ፓሮና ቦላ ዘምፕያ ኡባ ሴራና። 26 ኤንታ ሸምፑዋ ኮይያ ባብሎነ ካዋ ናቡካዳናፆራ ኩሸንነ እያ ኦላንቾታ ኩሸን አꬃዳ እማና። ሄሳፈ ጉየ፥ ግብፀ ቢታይ ካሰይሳዳ አስ ደእያ ቢታ ግዳና” ያጌስ ጎዳይ።

27 “ታ አይልያዉ፥ ያይቆባ ያዮፋ፤

እስራኤለ፥ ዳጋሞፋ።

ነና ሃሆ በሳፈ፥

ነ ኮቻይ ድኤትድ ብዳ ቢታፈ አሻና።

ያይቆብ ስሚድ፥ ሳሮን ዎፑ ግድ ዳና፤

ኤንታ ያሽስያባይ ዴና።

28 ታ አይልያዉ፥ ያይቆባ፥

ታ ኔራ ደእያ ግሾ፥ ያዮፋ።

ታ ነና ላልዳ ካዎተꬃታ ኡባ ꬋይሳና፤

ሽን ነና ꬋይስከ።

ታ ነና ፅሎ ፕርዳን ሴራና፤

ሽን ሴር ባይና ነና ጮ አግከ” ያጌስ ጎዳይ።