ጌሻ ማፃፋ ኤርምያሳ ማፃፋ 47

ፍልስፄመስ ኦደትዳ ትንብተ

1 ግብፀ ካዎይ ጋዛ ኦልድ ኦይካናፐ ካሰ፥ ፍልስፄመባ ጎዳፐ ናብያ ኤርምያሳኮ ይዳ ቃላይ ሀይሳ፦ 2 ጎዳይ ሀይሳዳ ያጌስ፤

“ሄኮ፥ ፑደሀ ባጋፈ ሃꬅ ꬉቃና፤

ድኦይ ገልዳ ክፃ ሃꬃዳ ጎጋና።

ቢታነ ቢታን ደእያባ ኡባ፥

ካታማታነ ኤንታ ግዶን ደእያ አሳ ኡባ ሙካና።

አሳይ ዋሳና፤

ቢታን ደእያ ኡባይ ዬካና።

3 ፓራታ ግርሳ፥

ፓራ ጋረታ ኮሽንቻ፥

ጋረታ ጎንዶርሳ ግርሳ ስአና።

አዋታ ኩሸይ አርጋጭዳ ግሾ፥

ባንታ ናይታ ማዳናዉ ጉየ ስሞኮና።

4 ፍልስፄመ አሳ ꬋይሳናዉ፥

ፅሮሳነ ስዶና ማዳናዉ አትያ

አሳ ꬋይሳናዉ ዎደይ ጋክስ።

ጎዳይ ፍልስፄመፐ አትዳይሳታ፥

ሃꬃን ተቀትዳ ደእያ ካፍቶራፐ ይዳ ኮቻታ ꬋይሳና።

5 ጋዝ ካዮታዳ ባ ሁጵያ ሜዳሱ፤

አስቃሎን ባ ኩሽያ ዶና ቦላ ዎꬃሱ።

ህንተኖ፥ አባ ጋፃን አትዳይሳቶ፥

አዉደ ጋካናዉ ህንተ አሳተꬃ ጋረቲ?

6 ህንተ፥ ‘ጎዳ ማሻዉ፥ ኔኒ ስእ ጎና እፀይ አዉደሴ?

ነ በሳ ስማዳ ገላ፤

ስእ ጋዳ ኡታ’ ያጌታ።

7 ሽን ጎዳይ እያ ኪትን፥ እ ዋንድ ስእ ጋኔ?

አስቃሎናነ አባ ጋፃን ደእያ ቢታ

ኦላና መላ ኪታስ” ያግስ።