11 “ሞአበይ ያላጋተꬃፈ ዶምድ፥ እንጀን ደእዳ አሳ መላ፤ እ ሀራ ቢታ ድኤትቤና። ሞአበይ ኦቶፐ ኦቶን ትገቶናነ ቃፆና፥ ማልኦይ ላመቶናነ ሳዎይ አጎና፥ ኡትድ ደእዳ ዎይነ ኡሻ መላ። 12 ታኒ ኦቱዋ ጉፓንይሳታ ኪትያ ዎደይ ያና። ኤንቲ እያ ጉሳና፤ ኦቱዋፐ ፂዞ ꬋይሳና፤ ኦቱዋ መንረꬃና። 13 እስራኤለ አሳይ ባ አማነትዳ፥ ቤተለን ደእያ ኤቃን ካዉይዳይሳዳ ሞአበይ ባ ፆሳ ካሞሻን ካዉያና።

14 “ህንተ፥ ‘ኑ ዎልቃማ አስነ ምኖ ኦላንቾ’ ግድ አይስ ጬቀተቲ? 15 ሄኮ፥ ሞአበይነ ያን ደእያ ካታማት ꬋይዶሶና። እያ ያላጋ አደ ናይት ሹከታናዉ ዱገ ብዶሶና” ያጌስ፥ ካዎይ፥ ኡባፈ ዎልቃማ ጎዳይ። 16 ሞአበ ꬋዮይ ማታትስ፤ እያ ላለተꬃ ዎደይ ኤለስድ ጋክስ።

17 እያ ዩሹዋን ደእያ አሳይ፥ እያ ግታተꬃ ኤርያ ኡባይ፥ “ምኖ ግድዳ ካዎተꬃ ፃምአይ ዋንድ መቅዴ?” ቦንቸትዳ ፃምአይ ዋንድ ትንቸትዴ? ያግድ ዘሌልተ።

18 “ህንተኖ፥ ድቦና ካታማን ደኤይሳቶ፥ ህንተ ቦንቾ በሳፈ ዎꬍድ፥ መላ ቢታን ኡትተ። ሞአበ ꬋይሰይስ ህንተ ቦላ ያና፤ ህንተ ሚፃ ኡባ ላላና። 19 አሮኤራ ካታማን ደኤይሳቶ፥ ኦገ ዶናን ኤቅድ ፄልተ፤ ከስ ኤክድ ባቃትያ አደታነ ማጫሳ፥ ‘አይበ ከይዳይ?’ ያግድ ኦይችተ። 20 ኤንቲ፥ ‘ሞአበይ ኩንድዳ ግሾ ካዉይስ፤ እያዉ ዬክተነ ዘሌልተ። ሞአበ ꬋይዳይሳ ግሾ አርኖና ሻፋ ማታን አዋጅተ’ ” ያግድ ዛራና።

21 “ገዘን ደእያ ሆሎና፥ ያሳ፥ መፋታ፥ 22 ድቦና፥ ናቦ፥ ቤት-ድብላታይማ፥ 23 ቅራታይማ፥ ቤት-ጋሙላ፥ ቤት-ማኦና፥ 24 ቅርዮታነ፥ ባሶራ ካታማታ ቦላነ ማታንነ ሃሆን ደእያ ሞአበ ካታማታ ቦላ ፕርድ ይስ። 25 ሞአበ ካጨይ ቃንፀትስ፤ እያ ቀሰይ መቅስ።”

26 ጎዳ ቦላ ኦቶርትዳ ግሾ፥ ሞአበ ኡሽድ ማꬆይተ። ባ ጮሻ ቦላ ጎንዶረቶ፤ አሳ ኡባይ እያ ቦላ ቀልቅሶ። 27 ካሰ ነ እስራኤለ ቦላ ቀልቅሳብኪ? እያባ ሃሳያ ዎደ ካꬋዳ ሁጰ ቃꬅዳይ እስራኤለይ ካይሶታራ ኦይከትዳ ግሾዬ? 28 ህንተኖ፥ ሞአበን ደኤይሳቶ፥ ካታማፐ ከይድ፥ ሹቻ ሆምኦን ደእተ። አፎ ዶናን ባዉ ኬ ኬፅያ ሆለ መላ ግድተ። 29 ሞአበይ ዳሮ ኦቶርትስ፤ ሞአበይ አይ መላ ባ ጋና ጋቢስዳኮ፥ ጬቀትያኮ፥ ኦቶርትያኮ፥ አይ መላ ባና ꬎቁ ኦꬅያኮ፥ ታ ስአስ። 30 ታ ኤንታ ጬቁዋ ኤራይስ፤ ሽን አይኮካ ማደና፤ ኤንታ ኦቶሮይ አይኮካ ኦና። 31 ሄሳ ግሾ፥ ታ ሞአበስ ዋሳስ፤ ቅር-ሄሬሳ አሳስ ካዮታዳ ዬካይስ።

32 ህንተኖ፥ ሰባማ አሳዉ፥ ያእዜራ አሳስ ዬከይሳፈ አꬃዳ ህንተዉ ዬካይስ። ህንተ ታሸይ ዳይድ፥ ማፅነ አባ ፕንድ፥ ያእዜራ ጋክዳ ዎይነ መላ፤ ሽን ህንተ ዎይነ አይፍያነ ዉርጩዋ ቦንቀይሳት ይድ ꬋይስዶሶና። 33 ኡፋይስነ ሎኦባይ አይፍያ ሞአበ ቢታፈ ኤከትስ። ዎይነ ጉምእያ በሳፈ ዎይነይ ጎጎናዳ ተቃስ። ኦንካ እልልሸ ዎይነ ጉምኤና። ስኤትያ ግርስ ደእኮካ ኡፋይሳ ግርስ ግደና።

34 ኤንቲ ሀሰቦናንነ ኤልያላን ዋስያ ዋሶይ ያሃፃ ጋካናዉ ስኤቴስ። ዞኣራፐ ብድ ሆሮናይማነ ኤግላት-ሻልሻ ጋካናዉ ስኤቴስ። ሀር አቶሽን፥ ንምርማ ሃꬃይ መልስ።

35 ታኒ ሞአበፐ ꬎቃ በሳታን ጎይነሳታነ ባንታ ፆሳታስ እፃነ ጩይሰይሳታ ꬋይሳና።

36 “ኤንቲ ካሰ ደምዳ ዱረተꬃይ ሀእ ꬋይዳ ግሾ፥ ታ ዎዛናይ ሞአበስነ ቅር-ሄሬሳ አሳስ ሱሱልኤዳ ዬካስ። 37 ኤንቲ ባንታ ሁጵያነ ባንታ ቡቻ ሜድዶሶና፤ ባንታ ኩሽያ ቃንፅድ ማዱንፅስዶሶና፤ ባንታ ፄሳን ካዮ ማኦ ዳንጭዶሶና። 38 ታኒ ሞአበ ኦንካ ኮዮና ኦቶዳ መንꬅዳ ግሾ፥ ሞአበታ ኬꬃ ቦላንነ ዳባባን ዬሆፐ አትሽን፥ ሀራባይ ባዋ” ያጌስ ጎዳይ።

39 ሞአበይ አይብ መቆ መቅደ! እያ አሳይ አይብ ዋሶ ዋስ! ሞአበ ዋን ዬላትድ፥ ባ ዞኩዋ ዛርዴ? ሄሳ ግሾ፥ ሞአበይ ባ ዩሹዋን ደእያ ኡባስ ሚቻስነ ዳጋማስ አትስ።

40 አርጋንꬅ ባ ቀፍያ ምጭድ የይሳዳ ሞርከይ ሞአበ ቦላ ያና። 41 እያ ካታማት ኦይከታና፤ እያ ሚፃት ኤከታና። ሄ ጋላስ ሞአበ ምኖ ኦላንቾታ ዎዛናይ እቀꬅ ኦይክዳ ማጫሳ ዎዛና መላ ኡንኤታና። 42 ሞአበ ታ ቦላ ማካልዳ ግሾ ꬋያና፤ ህዛፐ ጉየ ካዎተꬅ ግድድ ዴና። 43 ሞአበ አሳዉ፥ ያሽ፥ ኦልነ ፅሄይ ህንተና ናጌስ። 44 ዳጋንꬅያባፐ ባቃትያ ኦንካ ኦላን ኩንዳና፤ ኦላፈ ከይያ ኦንካ ፅሄን ኦይከታና። ታኒ ሞአበ ሴርያ ዎደ ሄሳ ኦꬃና።

45 “ባቃትድ ብዳይሳት ዎልቃ ꬋይድ፥ ሀሰቦና ካታማ ኩያን ኤቅዶሶና። ሀሰቦና ካታማፐ ታም፥ ካዎይ ስሆነይ ደእዳ ኬꬃፈ ላጮይ ከይድ፥ ሞአበ ቢታነ ያን ደእያ ማካላንቾ አሳ ምስ። 46 ሞአበ አሳዉ፥ ህንተና አየ! ካሞሻ ጌተትያ ኤቃ ፆሳ ጎይነይሳት ꬋይዶሶና፤ ኤንታ አደ ናይትነ ማጫ ናይት ድኤትድ ብዶሶና። 47 ግዶሽን፥ ዉርሰꬃን ታኒ ሞአበ ዛራዳ ኦራꬃና” ያጌስ ጎዳይ።

ሞአበ ቦላ ኦደትዳ ፕርዳይ ሀይሳን ዉርስ።