1 አሞነባ ጎዳይ ሀይሳዳ ያጌስ፤ “እስራኤለስ አደ ናእ ባዌ? እያ ላተይ ባዌ? ያትን፥ ሞሎካ ጌተትያ ኤቃ ፆሳ ጎይንያ አሳት ጋደ ቢታ አይስ ኦይክዶና? ኤንታ ካታማን አይስ ኡትዶና? 2 አሞነ ቢታን ራባ ካታማ ቦላ ኦላ ዋሶይ ስኤታና መላ ታ ኦꬃና ዎደይ ያና። ሄ ካታማይ ላለትድ ባይሳ ግዳና። እያ ዩሹዋን ደእያ ጉታት ታማን ፁገታና። እስራኤለይ ባና ባ ቢታፈ ጎድዳይሳታ ጎዳና” ያጌስ ጎዳይ።

3 “ሀሰቦና አሳዉ፥ ጋየ ካታማይ ላለትዳ ግሾ ዘሌልተ። ራባ አሳዉ፥ ዬክተ፤ ካዮ ማኦ ማእድ ካዮትተ፤ ካታማ ግምብያ ግዶን ዎፀረትተ። ህንተ ፆሳይ ሞሎክ ባ ካህነታራነ ባ ሀላቃታራ ድኤትስ። 4 አማኖይ ባይና አሳዉ፥ ‘ኑና ኦላናይ ኦኔ?’ ያግድ ህንተ ዱረተꬃንነ ህንተ አራዳ ዛንጋራታን አይስ ጬቀተቲ? 5 ታ ነ ዩሹዋን ደኤይሳት ነና ዳጋንꬃና መላ ኦꬃና” ያጌስ ጎዳይ፥ ኡባፈ ዎልቃማ ፆሳይ። ህንተ ኡባይ ከይድ ባቃታና ግሾ ባቃትድ ብዳይሳታ ሺሽያ አስ ꬋያና።

6 “ግዶሽን፥ ዉርሰꬃን ታ አሞነ አሳ ዛራዳ ኦራꬃና” ያጌስ ጎዳይ።

7 ኤዶመባ ኡባፈ ዎልቃማ ጎዳይ ሀይሳዳ ያጌስ፤ “ተማና አሳስ ደእያ ጭንጫተꬃይ አዉ ብዴ? ዞረይሳታፐ ዞረይ ꬋይዴ? ኤንታ ጭንጫተꬃይ ኤንታፈ ኤከትዴ? 8 ታኒ ኤሳዌ ኮቻ ሴርያ ዎደ እያ ቦላ ꬋዮ ኤሀና ግሾ፥ ዳዳነን ደኤይሳቶ፥ ባቃትድ አፎን ቆሰትተ። 9 ዎይነ ማፀይሳት ፖሽለ አሾኮና? ካይሶት ቃማ ገልኮ፥ ባንታዉ ኮያባ ፃላላ ኤኮኮና? 10 ሽን ታ ኤሳዋ ኮቻ ቃራዳ ካሎ አሻና፤ ኤንቲ ቆሰታናዉ ዳንዳኦና መላ፥ ኤንቲ ቆሰትያ በሳ ቃራዳ ቆንጨ በሲ ኦꬃና። ኤሳዌ ሼሻይ፥ እያ ዳቦትነ እያ ሾሮት ኡባይ ꬋያና፤ ኤንታፈ እሶይካ አተና። 11 ህንተ ግዶን ደእያ ይኦ ናይታ አጋግተ፤ ኤንታ ታ ድቻና። ህንተ አምኤትካ ታናን አማነቶ” ያጌስ።

12 ጎዳይ ሀይሳዳ ያጌስ፤ “ህዛ ሴራ ኤካናዉ በሶና አሳስ ሴረተꬅ አቶናባ ግድኮ፥ ህንተ ዋንድ ሴረቶና አታኔ? ቱማ ህንተካ ሴራ ፁአፐ ኡዬታፐ አትሽን፥ ጮ አተከታ። 13 ባሶራ ካታማይ ባይሳ ግድድ አታና፤ እያ በእዳ አሳ ኡባስ ዳጋማስ፥ ቀልቅሰꬃስነ ባደꬃስ አታና። እያ ዩሹዋን ደእያ ጉታ ኡባይ መርናዉ ላለትድ አታና። ሀይሳ ታኒ ታ ሱንꬃን ጫቃይስ” ያጌስ ጎዳይ።

14 ታኒ ጎዳፐ ይዳ እስ ኪታ ስአስ። ካዎተꬃታ ግዶ ኪተትዳይስ፥ “ኤዶመ ተቃናዉ ሺቅተ፤ እያራ ኦለታናዉ ደንድተ” ያግስ።

15 “ህዛ፥ ታ ነና ካዎተꬃታ ግዶን ጉꬃና፤ አሳ ግዶን ካትዳ አስ ኦꬃና። 16 ሹቻ ቆጶንነ ደረ ቦላ ደኤይሶ፥ ነ ዳጋንꬆይነ ነ ኦቶሮይ ነና ጭምስ። ነ ኬꬃ አርጋንꬃዳ ꬎቃን ኬፅኮካ፥ ታ ነና ያፐ ዱገ ዎꬍሳና” ያጌስ ጎዳይ።

17 “ኤዶመይ አሰ ዳጋንꬅያ ቢታ ግዳና። ያራ አꬍያ አሳ ኡባይ እያ ꬋዩዋ በእድ፥ ዳጋማና፤ ማላለታና። 18 ሶዶመይነ ጋሞር ባንታ ዩሹዋን ደእያ ካታማታራ ꬋይያ ዎደ ሀንዳይሳዳ ኦንካ ያን ዴና፤ አስ ያን ኡተና” ያጌስ ጎዳይ።

19 “ዮርዳኖሰ ሻፋ ላንቀን ደእያ ዎራፐ ዶርሳት ሄመትያ ሎኦ ቆሮይ ደእያ በሳ፥ ቆፖና ከይያ ጋሞዳ፥ ታ ኤዶመ አሳታ ቆፖና ኤንታ ቢታፈ የደꬃና። ታ ዶርዳ አስ እያ ቦላ ሹማና። ታ መል ኦኔ? ታ ኦꬃና ግዳባ ተቃናዉ ዳንዳኤይ ኦኔ? ታራ ኤቀታናዉ ዳንዳእያ ሄንꬃንቾይ ኦኔ?

20 “ታ ኤዶመ ቦላነ ተማና ካታማ ቦላ ኦꬃናዉ ሀልችዳባነ ቆፕዳባ ስእተ። ኤንታ ናይታ ዎልቃን ጎችድ ኤፋና፤ ሄሳ ጋሶን ኤንታ ሶ አሳይ ዳጋማና። 21 ኤዶመ ኩንደꬃ ግርሳይ ቢታ ቃꬃና፤ ኤዶመታ ዋሶይ ዞኦ አባ ጋካናዉ ስኤታና። 22 አርጋንꬅ ባ ቀፍያ ምጭድ ዱገ ፓልድ የይሳዳ፥ ሞርከይ ባሶራ ቦላ ያና። ሄ ዎደ ኤዶመ ኦላንቾት እቀꬅ ኦይክዳ ማጫሳዳ ህርጋና” ያጌስ።

23 ዳማስቆባ ጎዳይ ሀይሳዳ ያጌስ፤ “ኢታ ኦዳ ስእዳ ግሾ፥ ሀማታነ አርፋዳ ካታማታን ደእያ አሳይ ዬላትስ፤ ያይስ። ዙለይ ሾጭዳ አባዳ ኤንታ ዎዛናይ ሸምፖ ደማናዉ ዳንዳእቤና። 24 ዳማስቆይ ዳቡርስ፤ ኤንቲ ዳጋማን ኮኮርድ ባቃትዶሶና፤ ማጫስ እቀꬅ ኦይከይሳዳ መቶይነ ኡንእ ኤንታ ኦይክስ። 25 ኡፋይስ ኩምዳ ኤረትዳ ካታማይ ዋንድ ባይሳ ግድዴ? 26 ሄ ዎደ ሄ ካታማን ደእያ ያላጋ አደት ካታማ ግዶ ኦገታን ሀይቃና፤ ኦላንቾት ኡባይ ዉራና። 27 ታኒ ዳማስቆ ካታማ ድርሳ ግምብያን ታማ የዳና፤ ሄ ታማይ ዎልደ-አዳራ ሚፃ ማና” ያጌስ ኡባፈ ዎልቃማ ጎዳይ።

28 ባብሎነ ካዎይ ናቡካዳናፆር ኦልድ ፆንዳ ቀዳረነ ሀፆራ ካዎተꬃታባ ጎዳይ ሀይሳዳ ያጌስ፤ “ደንድድ፥ ቀዳረ አሳ ኦልተ፤ ዶሎሀ ባጋራ ደእያ አሳ ዉርስተ። 29 ኤንታ ዱንካነታነ ኤንታ ዉደታ ኤክተ። ኤንታ ገሸታ፥ ኤንታ ሻሉዋነ ኤንታ ግማለታ ኤክተ። ያትድ ኤንታዉ፥ ‘ህንተ ዩሹዋን ዳጋም ደኤስ’ ያግድ ኦድተ። 30 ሀፆራን ደኤይሳቶ፥ ባብሎነ ካዎይ ናቡካዳናፆር ህንተ ቦላ ኢታባ ኦꬃናዉ ማቀትድ ኡትዳ ግሾ፥ ባቃትተ፤ አፎን ቆሰትተ” ያጌስ ጎዳይ።

31 “ደንዳዳ፤ ህርግ ባይና ሳሮ ደእያ ካዎተꬃታ ኦላ። ኤንታ ካታማ ግምብያስ እብꬅ ዎይኮ ኮበይ ባዋ፤ ኤንቲ ባንታርካ ደኦሶና።

32 “ኤንታ ግማለት ቦንቀታና፤ ኤንታ ዉደይ ድኤታና። ባንታ ሁጵያ ጋፃ ሜደይሳታ ጫርኮን ላላና፤ ታ ኡባ በሳራ ኤንታ ቦላ ꬋዮ ኤሀና። 33 ሀፆር መርናዉ ዎርካናት ደእያ መላ ቢታ ግዳና። ኦንካ ያን ዴና፤ አስ ያን ኡተና” ያጌስ ጎዳይ።

34 ይሁዳ ካዎይ ሰደቅያስ ኮይሮ ካዎትዳ ዎደ፥ ኤላማባ ጎዳፐ ኤርምያሳኮ ይዳ ቃላይ ሀይሳ፤ 35 ኡባፈ ዎልቃማ ጎዳይ ሀይሳዳ ያጌስ፤ “ኤላማስ ዎልቃ ግድዳ ዶንገ ዱክያ አሳታ ታ ዎꬋና። 36 ኡባ በሳራ ታ ኤላማ ቦላ ጫርኮ ኤሀና፤ ኤንታ ሄ ጫርኩዋን ላላና። ሄሳ ግሾ፥ ኤላማ አሳይ ላለትድ ጋኮና ቢት ዴና። 37 ኤንታ ሞርከታ ስንꬃንነ ኤንታ ዎꬋናዉ ኮየይሳታ ስንꬃን ታ ኤላማ ዳጋንꬃና። ታ ግታ ሀንቁዋን ኤንታ ቦላ ꬋዮ ኤሀና። ታ ኤንታ ꬋይሳና ጋካናዉ ማሻን የደꬃና። 38 ታኒ ኤላማ ካዋነ ኤንታ ሀላቃታ ꬋይሳዳ ታ አራታ ያን ዎꬃና። 39 ግዶሽን፥ ዉርሰꬃ ዎደ ታኒ ኤላማ ዛራዳ ኦራꬃና” ያጌስ ጎዳይ።