1 ባብሎነነ ባብሎነ አሳባ ናብያ ኤርምያሳ ባጋራ ጎዳይ ኦድዳ ቃላይ ሀይሳ፦ 2 “ካዎተꬃታ ግዶን ኦድተነ አዋጅተ። ባንድራ ꬎቁ ኦꬅ ኦይክድ፥ አይኮካ ቆሶና፥ ሀይሳዳ ያግድ ኦድተ። ‘ባብሎነይ ኩንድስ! ቤል ጌተትያ ኤቃይ ዬላትስ፤ ማርዱካ ጌተትያ ኤቃይ ካዉይስ። እያ ምስለት ዬላትዶሶና፤ እያ ኤቃት ካዉይዶሶና። 3 ፑደሀ ባጋፈ እስ ካዎተꬅ ይድ፥ ባብሎነ ቢታ ꬋይሳና። አሳይነ መሄይ ባቃታና፤ ኦንካ ያን ዴና’ ” ያግስ።

4 “ሄ ዎደነ ሄ ጋላስ እስራኤለይነ ይሁድ እስፈ ዬክሸ ይድ ጎዳ ባንታ ፆሳ ኮያና። 5 ኤንቲ ፅዮነ ኤፍያ ኦግያ ኦይቻና፤ ባንታ ሶምኡዋ ያ ዛራና። ኤንቲ፥ ፖሎ ዶገቶና መርና ጫቁዋን ጎዳራ” ኦይከታና።

6 “ታ አሳይ ꬋይዳ ዶርሳ መላ፤ ኤንታ ሄንꬃንቾት ኤንታ ባለꬅድ፥ ዙማ ቦላ ጉየ የድዶሶና። እስ ዙማፐ ሀራ ዙማ ቦላ ቶይላትድ ባንታ ግርብያ ዶግዶሶና። 7 ደምዳ ኡባይ ኤንታ ሻንካትስ። ኤንታ ሞርከት፥ ‘ኑ አይኮካ ባልቦኮ፤ ሀ መቶይ ኤንታ ጋክዳይ፥ ኤንቲ ጎዳ፥ ባንታ ሸምፖ በሳ፥ ባንታ ማይዛታ ኡፋይሳ ቦላ ናጋራ ኦꬅዳ ግሾሳ።’

8 “እስራኤለ አሳዉ፥ ባብሎነፐ ባቃትተ፤ ባብሎነ ቢታፈ ከይተ፤ ዉደ ካለꬅያ ኮለ ዴሻ መላ ግድተ። 9 ታኒ ፑደሀ ባጋፈ ግታ ካዎተꬃታ ጩጋ ደንꬃዳ፥ ባብሎነ ቦላ ኤሀና ሀናይስ። ኤንቲ እያ ኦልድ ኦይካና፤ ኤንታ ዶንገይ ዱክድ፥ ባሎና ኦላንቾ መላ። 10 ባብሎነይ ቦንቀታና፤ እያ ቦንቅያ ኡባይ ካላና” ያጌስ ጎዳይ።

11 ባብሎነ አሳዉ፥ ታ አሳ ቦንቀይሳቶ፥ ህንተ ኡፋይትድ ሀሹ ግደታ። ቆሮን ካልዳ ኡሳዳ ፔኑቅደታ፤ ኮርማ ፓራዳ ጫግደታ። 12 ሽን ሀእ ህንተ ግታ ካታማይ ዬላታናነ ካዉያና። ካዎተꬃታ ግዶን ባብሎነይ ኡባፈ ላፋ ግዳና፤ ሃꬅ ባይና መላ ቢታ ግዳና። 13 ጎዳ ሀንቁዋ ጋሶን፥ ባብሎነይ ꬋያና፤ ላለታና። እያ ማታራ አꬍያ ኡባይ እያ ቦላ ጋክዳ ቦሻ በእድ፥ ዳጋማናነ ማላለታና።

14 “ዶንገ ዱከይሳቶ፥ ባብሎነ ኦላናዉ እያ ዩሹዋን ሳልፕተ፤ እ ጎዳ ቦላ ናጋራ ኦꬅዳ ግሾ ህንተ ዶንግያን እያ ዱክተ። 15 ኡባ ባጋራ ባብሎነ ቦላ ኦላ ዋሶ ዋስተ፤ ባብሎነይ ኩሸ እሚስ፤ እያ ግምበት ኩንድዶሶና፤ እያ ግምበ ድርሳይ ላለትስ። ጎዳይ እያ ቦላ ሀሎ ከይሸ ደእያ ግሾ፥ ህንተ እያ ቦላ ሀሎ ከይተ። እ ሀራታ ቦላ ኦꬅዳባ ህንተካ እያ ቦላ ኦꬅተ። 16 ዘረꬅ ዘረይሳነ ጫካ ዎደ ባጫራ ከየይሳ ባብሎነፐ ꬋይስተ። ꬋይሰይሳታ ማሻ ያይዳ ግሾ፥ ሄ ቢታን ደእያ አሳ ኡባይ ባ ያራኮ ያራኮ ስሚድ ባ ቢታ ቢታ ባቃታና።

17 “እስራኤለይ ጋሞይ የደꬅድ ላልዳ ዶርሳ መላ። ኮይሮ አሶረ ካዎይ እያ አሹዋ ምስ፤ ዉርሰꬃን ባብሎነ ካዎይ ናቡካዳናፆር እያ መቀꬃ ꬎግስ።”

18 ሄሳ ግሾ፥ ኡባፈ ዎልቃማ ጎዳይ፥ እስራኤለ ፆሳይ፥ “አሶረ ካዋ ታ ሴርዳይሳዳ ባብሎነ ካዋነ እያ ቢታ ሴራና። 19 ሽን እስራኤለ፥ እያ ሄንꬃ በሳ ዛራና፤ ቃርመሎሳነ ባሳነ ደረታን እ ሄመታና። እ ኤፍሬማነ ጋላዳ ገዘ ቢታን ካልድ ማና። 20 ሄ ዎደ፥ ሀይቆፐ ታ አሽዳ እስራኤለ አሳ ናጋራ ታ አቶ ጋና ግሾ፥ አሳይ እስራኤለን ናጋራ ኮያና፥ ሽን ደሞኮና። ይሁዳን ናጋራ ኮያና፥ ሽን በንተና” ያጌስ ጎዳይ።

21 “ምራታይማ ቢታንነ ፕቆዳን ደእያ አሳ ቦላ ደንድድ ኤንታ ኦልተ፤ ዎꬍተ፤ ኤንታ ፖሎ ꬋይስተ። ታ ህንተና ኪትያ ኡባ ኦꬅተ” ያጌስ ጎዳይ። 22 ቢታ ቦላ ኦላ ዋሶይ ስኤቴስ፤ ግታ ꬋዮይ ጋክስ። 23 ቢታ ኡባ ሊቅስያ ናርቃይ ዋንድ መቅደ! ዋንድ ሊቅደ! ካዎተꬃታ ኡባ ግዶን ባብሎነይ ዋንድ ዳጋንꬅያባ ግድደ! 24 ነኖ፥ ባብሎነ፥ ታ ነና ኦይካናዉ ፅሄ ዎꬃስ፤ ኔኒ ኤሮናሽን ገላዳ ኦይከታዳሳ። ኔኒ ጎዳራ ኤቀትዳ ግሾ ኦይከታዳሳ። 25 ታኒ ታ ኦላ ሚሽያ ዎꬅያ ኬꬃ ዶያዳ፥ ታ ይሉዋን ኦላ ሚሽያ ያፐ ከሳስ። ሄሳ ኦꬅዳይ፥ ጎዳይ፥ ኡባፈ ዎልቃማ ጎዳይ ባብሎነ ቢታን ኦꬅያ ኦሶይ ደእያ ግሾሳ። 26 ያራ ሃራ እያ ቦላ ደንድተ፤ ካꬃይ ደእያ እያ ሻልያ ዶይተ፤ ድኡዋ ካꬃዳ ዶርተ፤ አይብባካ አሾና ዉርስድ ꬋይስተ። 27 ቦሩ ሹከይሳዳ ኤንታ ኦላንቾታ ዎꬍተ። ባብሎነ አሳይ ሴረትያ ዎደይ ጋክዳ ግሾ ኤንታ አየ!

28 “ድኤትዳ አሳይ ባብሎነፐ ከስ ኤክድ፥ የሩሳላመ ባቃታና። ባብሎነ አሳይ ፆሳ ኬꬃ ቦላ ኦꬅዳባስ ጎዳይ፥ ኤንታ ፆሳይ ሀሎ ከያናይሳ ኤንቲ ፅዮነን ኦዳና። 29 ባብሎነ ኦላናዉ ዶንገ ዱክያ ኡባ ፄግተ፤ እሶይካ ከስ ኤኮናዳ እያ ዩሹዋ ተቆ። ጎዳ ቦላ፥ እስራኤለ ጌሻ ቦላ፥ እ ኦቶርትዳ ግሾ፥ እያ ኦሱዋዳ እያዉ ዛርተ። እ ሀራታ ቦላ ኦꬅዳይሳዳ እያ ቦላ ኦꬅተ። 30 ሄሳ ግሾ፥ እያ ያላጋ አደት ካታማ ግዶ ኦግያን ሀይቃና፤ ሄ ጋላስ እያ ኦላንቾት ኡባይ ꬋያና” ያጌስ ጎዳይ።

31 ጎዳይ፥ ኡባፈ ዎልቃማ ጎዳይ፥ “ኔኒ ሴረትያ ዎደይ ጋክዳ ግሾ፥ ነኖ፥ ኦቶራንቹዋዉ፥ ታ ነ ቦላ ደንዳስ። 32 ኦቶራንቾይ ꬉበትድ ኩንዳና፤ እያ ደንꬅያ አስ ዴና። ታ እያ ካታማታ ታማን ኦይꬃና፤ ሄ ታማይ ዩሹዋን ደእያ ኡባ ꬋይሳና” ያጌስ።

33 ኡባፈ ዎልቃማ ጎዳይ ሀይሳዳ ያጌስ፦ “እስራኤለ አሳይነ ይሁዳ አሳይ ኡንኤትዶሶና። ኤንታ ድእድ ኤፍዳይሳት ኤንታ ምንꬅድ ኦይክዶሶና፤ ኤንታ የደናዉ ኮይቦኮና። 34 ሽን ኤንታ ዎዘይስ ምኖ፤ እያ ሱንꬃይ ኡባፈ ዎልቃማ ጎዳ። እ፥ ኤንታ ቢታስ ሸምፖ እማናዉ ኤንታ ግሾ ሞተቴስ። ሽን ባብሎነ ቢታን ደኤይሳታ ቦላ ዳጋማ የዳና። 35 ባብሎነይ፥ ባብሎነን ደኤይሳት፥ እያ ሀላቃትነ እያ ጭንጫት ማሻን ሀይቃና” ያጌስ ጎዳይ።

36 “እያ ኤያ ዎርዶ ናበት ማሻን ሀይቆና። ዳጋምያ እያ ዎልቃማ ኦላንቾት ማሻን ሀይቃና። 37 እያ ፓራታ ቦላ፥ እያ ፓራ ጋረታ ቦላነ ማጫሳ መላ ግድዳ እያ አላጋ ኦላንቾታ ቦላ ማሽ ዮ። እያ ሻሉዋ ምንጅያ ኬꬃ ቦላ ማሽ ዮ፤ እያ ቡቁራ ኡባይ ቦንቀታና። 38 ባብሎነን ኤቅ ኩምዳ ግሾነ ዳጋማን ኮኮርያ ኤቃት ደእያ ግሾ፥ እያ ሃꬃይ መሎ፤ እያ ቦላ ኮሽ ዮ።

39 “ሄሳ ግሾ፥ ባብሎነይ ባዞ ዶአትነ ዎርካናት ደእያ በሲ ግዳና፤ ቃስ ያንቾት ያን ዳና። ያን መርናዉ አስ ዴና፤ የለታፐ የለታ ጋካናዉ አስ ደእያ በሲ ግደና። 40 ፆሳይ በን ሶዶመነ ጋሞራ ኤንታ ዩሹዋን ደእያ ካታማታራ ꬋይስዳይሳዳ ባብሎነን ኦንካ ዴና፤ አስ ያን ኡተና” ያጌስ ጎዳይ።

41 “ሄኮ፥ አሳይ ፑደሀ ባጋፈ ያና፤ ምኖ ካዎተꬃትነ ዳሮ ካዎት ሳኣ ጋፃፐ ያናዉ ደንድዶሶና። 42 ኤንቲ ባንታ ዶንግያነ ቶራ ኦይክዶሶና፤ ኤንቲ ዎዛና ምኖነ የድ ማሮና አስ። ኤንቲ ባንታ ፓራ ቶግድ ብያ ዎደ፥ ቤታይ ሾጭያ አባ ጉንꬃዳ ሀኔስ። ነኖ፥ ባብሎነ፥ ኤንቲ ኡባይ ኦላስ ጊግዳ አስ ግድድ ነ ቦላ ሳልፕዶሶና።

43 “ባብሎነ ካዎይ ሄሳ ስእያ ዎደ እያ ኩሸይ ዳቡርድ ስልስ፤ እቀꬅ ኦይክዳ ማጫሳዳ ኡንኤትስ።

44 “ዮርዳኖሰ ሻፋ ላንቀን ደእያ ዎራፐ፥ ሎኦ ቆሮይ ደእያ በሳፈ ቆፖና ከይያ ጋሞዳ፥ ታ ያዳ፥ ባብሎነ አሳ ኤንታ ቢታፈ የደꬃና። ሄሳፈ ጉየ፥ ታ ዶርዳ አስ እያ ቦላ ሹማና፤ ያትን ታ መል ኦኔ? ታ ኦꬃና ግዳባ ተቃናይ ኦኔ? አይ ሄንꬃንቾይ ታራ ኤቀታናዉ ዳንዳኢ? 45 ሄሳ ግሾ፥ ጎዳይ ባብሎነ ቦላነ ባብሎነ ቢታ ቦላ ሀልችዳባነ ቆፕዳባ ስእተ። ኤንታ ናይታ ዎልቃን ጎችድ ኤፋና፤ ሄሳ ጋሶን ኤንታ ሶ አሳ ኡባይ ዳጋማና። 46 ባብሎነ ኩንደꬃ ግርሳይ ቢታ ቃꬃና፤ ባብሎነ ዋሶይ ካዎተꬃታ ኡባን ስኤታና” ያጌስ።