1 ባብሎነ አሳነ ባብሎነ ቢታ ꬋይስያ ጫርኮ ኪታና። 2 ታኒ ባብሎነ ቦላ ጫርኮዳ ፑንያ አላጋታ ኪታና። እያ ꬋዩዋ ጋላስ ኤንቲ ኡባ በሳራ እያ ኡንኤꬃና። 3 እያ ኦላንቾት ዶንግያ ዱካና ጋካናዉ ዎይኮ ባንታ ኦላ ሚሽያ ዳንጫና ጋካናዉ ናጎፕተ። እያ ያላጋ አደታስ ምሸቶፕተ፤ እያ ኦላንቾታ ፖሎ ꬋይስተ። 4 ኤንቲ ባብሎነ ቢታን ሹከታና፤ እ ዳባባን ጫደትድ ኩንዳና። 5 ኤንቲ ቢታ ናጋራን ኩንꬅኮካ፥ ፆሳይ፥ ኡባፈ ዎልቃማ ጎዳይ፥ እስራኤለ ጌሻይ፥ እስራኤለነ ይሁዳ አምእዳ የግድ አግቤና። 6 ባብሎነፐ ባቃትተ፤ እሶይ እሶይ ባ ሸምፑዋ አሾ። እ ኦꬅዳ ናጋራ ጋሶን ህንተ ዉሮፕተ። ሀ ዎደይ ታኒ ጎዳይ ሀሎ ከይያ ዎደ። 7 ባብሎነይ ሳአን ደእያ አሳ ኡባይ ኡይድ ማꬆትያ፥ ዎይነ ኡሽ ትገትያ፥ ታ ኩሸን ደእያ ዎርቃ ዋንጫ መላ። ካዎተꬃት ኡባይ ሄ ዎይነ ኡሻ ኡይድ ጎይዶሶና። 8 ባብሎነይ ቆፖና ኩንድድ መቅስ። ሄሳ ግሾ፥ እያዉ ዬክተ፤ እ ፓፃነኮ ኦን ኤር እያ ማዱንꬃስ ꬋለ እምተ። 9 ባብሎነን ደእያ አላጋ አሳይ፥ “ኑ ባብሎነ ፓꬃናዉ ኮይዳ፤ ሽን ፓፃናዉ ዳንዳእቤና። እያ ፕርዳይ ሃክድ ሳሎ ጋክዳ ግሾነ ሻራ ጋካናዉ ꬎቁ ግዳ ግሾ እያ አግድ ኑ ቢታ ስሞስ” ያግዶሶና።

10 እስራኤለ አሳይ፥ “ጎዳይ ኑስ ፕርድዳ ግሾ፥ ፅዮነ ብድ፥ ጎዳይ ኑ ፆሳይ ኦꬅዳባ ኦዳና” ያጋና።

11 “ጎዳይ ባብሎነ ꬋይሳናዉ ቆፋ ቃችዳ ግሾ፥ ሜዶና ካዎታ ደንꬅስ። እ ባ ኬꬃ ግሾ ሀሎ ከያናዉ ቆፕስ። ሜዶና ሀላቃት፥ ‘ዶንገ ቶራ ሌፍተ፤ ጎንዳለ ኦይክተ። 12 ባብሎነ ቦላ ኦላ ባንድራ ደንꬅተ፤ ምንꬅድ ናግተ። ዎቸይሳታ ኤንታ በሳን በሳን ዎꬅተ፤ ዙግድ ጫድያ ኦላንቾታ ጊግስተ’ ” ያግዶሶና። ጎዳይ ባብሎነ አሳ ቦላ ቆፕዳባነ ባ ግዳባ ኦꬃና።

13 ባብሎነ፥ ኔኒ ዳሮ ሻፋትነ ዱረተꬅ ኩምዳ ቢታ፥ ሽን ነ ዉርሰꬃይ ጋክስ፤ ኔኒ በሶና ኦገን ሺሽያ ጎአይ አትስ። 14 ኡባፈ ዎልቃማ ጎዳይ፥ “ቦለይ ቢታ ኩመይሳዳ ታኒ አሳ ነ ቢታን ኩንꬃና፤ ኤንቲ ነና ፆንዳ ኡፋይሳን ባንታ ቃላ ꬎቁ ኦꬅድ ነ ቦላ ጋይራና” ያግድ ባ ሱንꬃን ጫቅስ።

24 “ባብሎነይነ ባብሎነ አሳይ ፅዮነ ቦላ ኦꬅዳ ኢታ ኦሱዋ ግሾ ህንተ ፄልሽን ታ ሀሎ ከያና” ያጌስ ጎዳይ።

25 “ነኖ፥ ባብሎነ፥ ነ ቢታ ꬋይስያ ዙማ መላ፤ ሽን ታ ጎዳይ ነና እፃስ። ታኒ ታ ኩሽያ የዳዳ፥ ነና ዙማ ቦላፈ ዱገ ጎንዶርሳና፤ ኔኒ ፁገትዳ ዙማ ግዳዳ አታና። 26 ኔፐ ባሶን የግያ ዎይኮ ግምቤስ ኤከትያ ሹች ዴና፤ ነ መርናዉ ባይሳ ግዳና” ያጌስ ጎዳይ።

27 “ባብሎነ ቦላ ኦላ ባንድራ ደንꬅተ፤ አሳ ግዶን ሞይዘ ፑንተ። እያ ኦላናዉ አሳ ኡባ ጊግስተ፤ አራራተ፥ ምናነ አስካናዛ ካዎተꬃታ ፄግተ። ኦላ ሀላቃታ ሹምተ፤ ቦለ መላ ዳሮ ፓራታ ኤህተ። 28 ባብሎነ ኦላናዉ ካዎተꬃታ ኡባ ጊግስተ፤ ሜዶና ካዎታ፥ ኤንታ ሀላቃታ፥ ደርያ ሃረይሳታነ ኤንቲ ሃርያ ቢታ አሳ ኡባ ደንꬅተ።

29 “ባብሎነይ ኦንካ ዶና ባይሳ ኦꬃናዉ ጎዳይ ሀልችዳ ሀልቹዋ ፖልያ ግሾ፥ ቢታ ኡባይ ኮኮረስነ ፖርቃቴስ። 30 ባብሎነ ኦላንቾት ኦላ አግድ፥ ባንታ ሚፃን ኡትዶሶና። ኤንታ ዎልቃይ ላፍን፥ ማጫሳ መላ ግድዶሶና። ኤንታ ኬꬃት ፁገትዶሶና፤ ካታማ ፐንግያ ኮበ ምꬃት መቅዶሶና። 31 ሀ ጋፃፐ ህን ጋፃ ጋካናዉ፥ ካታማይ ሞርከን ኦይከትዳይሳ ባብሎነ ካዋስ ኦዳናዉ፥ ዎፀይስ ዎፀይሳ ካልድ፥ ኪተትዳይስ ኪተትዳይሳ ካልድ ቦሶና። 32 ሻፋራ ፕንያ በሳት ኦይከትዳይሳ፥ ሃꬃ ጋፃን ደእያ ዎራይ ፁገትዳይሳነ ኦላንቾት ዳጋምዳይሳ ኤንቲ ካዋስ ኦዳናዉ ዎፆሶና” ያጌስ ጎዳይ።

33 “ባብሎነ ቢታይ ካꬅ ቡክያ ዉዱማ ግዳና፤ ጉꬃ ዎደፐ ጉየ እ ጫከትያ ዎደይ ያና” ያጌስ ኡባፈ ዎልቃማ ጎዳይ፥ እስራኤለ ፆሳይ።

34 ባብሎነ ካዎይ ናቡካዳናፆር ኑና ዉርስድ ምስ፤ ኑ ካታማ ካይሳ ኦቶ ከስስ። ዳወይ ምተይሳዳ እያ ምትስ፤ ማልኦባ ምድ ኩንይሳዳ እ ኑ ሻሉዋን ባ ጋንጅያ ኩንꬅስ፤ አትዳይሳ ሙጭድ ጩትስ። 35 ፅዮነይ፥ “ባብሎነይ ኑ ቦላ ኦꬅዳ ኢታባ ኡባይ እያ ቦላ ስሞ” ያጎሶና። የሩሳላመይ፥ “ኑ ሱꬃ አጮይ ባብሎነ አሳ ኦይኮ” ያጎሶና።

36 ሄሳ ግሾ፥ ጎዳይ የሩሳላመ አሳ ሀይሳዳ ያጌስ፦ “ታ ነ ግሾ ሞተታና፤ ነ ሃሉዋ ታ ከያና። ታኒ ባብሎነ ሃꬃነ ፑልቶታ መልሳና። 37 ባብሎነይ ላለꬃ ዶረነ ዎርካናት ጉፕያ በሲ ግዳና። እያ በእያ ኡባይ ዳጋማናነ ቀልቅሳና፤ ያን እስ አስካ ዴና። 38 ባብሎነ አሳ ኡባይ ጋሞዳ ጉዶሶና፤ ጋሞ ማራዳ ዳሮሶና። 39 ኤንታ አሳተꬃይ ሆእያ ዎደ፥ ታ ኤንታዉ ኡሻ ግብራ ጊግሳና። ኤንቲ ማꬆታና ጋካናዉ ታ ኤንታ ኡሻና፤ ኤንቲ ዛሪድ ደንዶና መላ መርናዉ ꬍስካና” ያጌስ ጎዳይ። 40 ሹካናዉ ኤፍያ ኡርገዳ፥ ማራዘዳነ ኮለዳ ታኒ ኤንታ ሹካ በሲ ኤፋና።

41 “አሳ ኡባይ ሳቢያ ባብሎነይ ዋንድ ኦይከትደ! ባብሎነይ ካዎተꬃታ ግዶን ዋንድ ዳጋንꬅያባ ግድደ! 42 ባብሎነ ሞርከት አባ ቤታይ ደንደይሳዳ ደንድድ ካታማን ኤልዶሶና። 43 እያ ካታማት ላለትድ፥ ዳጋንꬅያባ ግድዶሶና፤ ሃꬅ ባይና መላ ቢታ ዳንዶሶና፤ አስ ዶና በስነ ኦንካ ካንꬅድ አꬎና በሲ ግድዶሶና። 44 ቤላ ጌተትያ ባብሎነ ኤቃ ታ ሴራና፤ እ ምትዳባ እያ ኡሉዋፐ ከሳና። ህዛፐ ጉየ፥ ካዎተꬃት እያኮ ጎገይሳ አጋና፤ ባብሎነ ግምበይ ኩንዳና።

45 “ታ አሳዉ፥ እያ ግዶፈ ከይተ! ህንተ፥ ጎዳ ሀንቆ ሱሉዋፐ ህንተና አሽተ! 46 ቢታን ኦደትያ ኦዳ ስእያ ዎደ ኡፋይስ ቃንፆፍተነ ያዮፍተ። ላይꬃን ላይꬃን ኦድ ካልድ ካልድ ያና። ሄ ዎደ ካዎይ ካዋ ቦላ ደንድያ ማካላ ኦድ ቢታን ስኤታና።”

47 “ሄሳ ግሾ፥ ታኒ ባብሎነ ኤቃ ምስለታ ሴርያ ጋላስ ያና። ቢታ ኡባይ ዬላታና፤ ሀይቅዳይሳት ኡባይ ካታማ ግዶን ኩንዳና። 48 ፑደሀ ባጋፈ ያና ꬋይሰይሳታ ኩሸን ባብሎነይ ገልያ ዎደ ሳሎንነ ሳአን ደእያ ኡባባይ እልላና። 49 ባብሎነይ፥ እስራኤለ አሳነ ሳአን ደእያ አሳ ኡባ ዎꬍዳይሳዳ ባብሎነ አሳይ ሀይቃናዉ ኮሼስ። 50 ታ አሳዉ፥ ኦላፐ ከስ ኤክዳይሳቶ፥ ቢተ፤ ሀይሳን ኤቆፍተ። ህንተ ደእያ ሃሆ ቢታን ታና ጎዳ ሀሳይተ፤ የሩሳላመ ቆፕተ።”

51 ህንተ፥ “ኑኒ ጫየትዳ ግሾ ካዉይዳ፤ አላጋት ፆሳ ኬꬃን ደእያ ጌሻ በሳታ ገልዳ ግሾ፥ ኑ ዬላ ማእዳ” ያግደታ።

52 ሽን “ታኒ ጎዳይ ባብሎነ ኤቃታ ሴርያ ዎደይ ያና። ማዱንፅዳይሳት ቢታ ኡባን ኦላና። 53 ባብሎነይ ሳሎ ፑደ ከይድ፥ ያን ሚፃ መꬋናዉ ዳንዳእያኮካ፥ ያ ጋካናዉ ከይድ፥ እያ ያን ꬋይስያ አስ ታኒ ኪታና” ያጌስ ጎዳይ።

59 ማሰያ ናኣ፥ ኔራ ናአይ ሳራይ ካዋ ሰደቅያሳ ሹማ። ሰደቅያስ ይሁዳን ካዎትዳ ኦይዳንꬆ ላይꬃን፥ ሳራይ እያራ ባብሎነ ብያ ዎደ ኤርምያስ ሳራያ ቦላ ኪታ የድስ። 60 ባብሎነ ቦላ ጋካናዉ ደእያ ኢታባ ኡባነ ባብሎነ ፄልያ ሀራባ ኡባ ኤርምያስ ማፃፋን ፃፍስ። 61 ሳራያኮ፥ “ኔኒ ባብሎነ ጋክዳ ዎደ ነ ቃላ ꬎቁ ኦꬃዳ አሳስ ሀ ማፃፋ ናባባ። 62 ቃስ ሀይሳዳ ያጋዳ ዎሳ፦ ‘አቤት ጎዳዉ፥ ኔኒ ሀ በሳ ꬋይሳና፤ ሀ በሳን ሸምፖራ ደእያ መተꬅ፥ አስነ መሄይ ዴና፤ ሀ በሳይ መርናዉ መላ ቢታ ግዳና’ ያጋ። 63 ሀ ማፃፋ ናባባ ዉርስዳፐ ጉየ፥ ማፃፋ ሹቻራ ጋꬃ ቃቻዳ፥ ኤፍራፂሳ ሻፋን ሆላ። 64 ታኒ ጎዳይ እያ ቦላ ኤህያ ꬋዩዋ ጋሶን፥ ባብሎነይ ዛሪድ ደንዶና መላ ሀይሳዳ ሙከታና” ያጋ።

ኤርምያስ ኦድዳ ቃላይ ሀይሳን ዉርስ።