1 ሰደቅያስ ካዎትያ ዎደ፥ እያዉ ላይꬅ ላታማነ እስኖ፤ እ የሩሳላመን ታማነ እስ ላይꬅ ካዎትስ። እያ አየ ሱንꬃይ አምፃሎ፤ እያ ልብና ካታማን ደእያ ኤርምያሳ ናአ። 2 እዮአቄም ኦꬅዳይሳዳ ሰደቅያስ ጎዳ ስንꬃን ኢታባ ኦꬅስ። 3 ጎዳይ የሩሳላመ ቦላነ ይሁዳ ቦላ ሀንቀትዳ ግሾ ኤንታ ባ ስንꬃፈ ድግስ።

ሰደቅያስ ባብሎነ ካዋ ቦላ ማካልስ። 4 ሰደቅያስ ካዎትዳ ኡዱፉንꬆ ላይꬃን፥ ታማንꬆ አጌናን፥ ታማንꬆ ጋላሳን ባብሎነ ካዎይ ናቡካዳናፆር ባ ኦላንቾታ ኡባ ኤክድ፥ የሩሳላመ ተቅስ። ኤንቲ እያ ዩሹዋን ቢታ ዶርዶሶና። 5 ሰደቅያስ ካዎትዳ ታማነ እስንꬆ ላይꬅ ጋካናዉ፥ የሩሳላመይ ተቀትድ ጋምእስ።

6 ሄ ላይꬅ ኦይዳንꬆ አጌናን፥ ኡዱፉንꬆ ጋላሳን፥ ኮሽ ሱልን፥ አሳይ ምያባ ꬋይስ። 7 ካታማ ግምበይ እስ ባጋራ መቅስ። ባብሎነ አሳይ ካታማ ዩሹዋ ናግኮካ፥ ይሁዳ ካዋ ኦላንቾት ኡባይ ቃማ ካዎ አታክልተ በሳ ኤፍያ ኦግያ ኦይክድ፥ ናምኡ ድርሳ ግምበታ እስፈ ጋꬅያ ፐንግያራ ከይድ ባቃትዶሶና። ኤንቲ ዮርዳኖሰ ዛንጋራኮ ስሚድ ብዶሶና። 8 ሽን ባብሎነ ኦላንቾት ካዋ ሰደቅያሳ የደꬅድ፥ እያርኮ ደምባ ጋꬅሸ ኦይክዶሶና። እያ ኦላንቾት ኡባይ እያ ካድድ ላለትዶሶና። 9 ሄሳፈ ጉየ፥ እያ ሀማታ ቢታን፥ እርብላ ካታማን ደእያ ባብሎነ ካዋኮ ኤፍዶሶና። ያን ናቡካዳናፆር ሰደቅያሳ ቦላ ፕርድስ። 10 ሰደቅያሳ አደ ናይታ ሰደቅያስ ፄልሽን፥ ባብሎነ ካዎይ ዎꬍስ። ይሁዳ ሀላቃታ ኡባ ያን እርብላ ካታማን ዎꬍዶሶና። 11 ሰደቅያሳ አይፈታ ዎጭድ፥ ሳንꬃላታን ቃችድ፥ ባብሎነ ኤፍዶሶና። እ ሀይቃና ጋካናዉ፥ ያን ቃሾ ኬꬃን እያ ዎꬅዶሶና።

12 ናቡካዳናፆር ባብሎነን ካዎትዳ ታማነ ኡዱፉንꬆ ላይꬃን፥ እቻሻንꬆ አጌናን፥ ታማንꬆ ጋላሳን፥ ካዋ ሞርናይ፥ ካዋ ናገይሳታ ሀላቃይ ናቡዛርዳን የሩሳላመ ገልስ። 13 ፆሳ ኬꬃ፥ ካዎ ጋꬎነ የሩሳላመን ደእያ ኬꬃታ ኡባ ታማን ፁግስ፤ ቃስ ግታ ኬꬃታ ኡባ ፁግስ። 14 ባብሎነ ኦላንቾት ኡባይ ካዋ ናገይሳታ ሀላቃ ኪታን፥ የሩሳላመ ካታማ ዩሹዋን ደእያ ድርሳ ግምብያ ኡባ ላልዶሶና። 15 ናቡዛርዳን ጉꬃ ማንቆታ፥ ካታማን አትዳ አሳታ፥ ካድድ ባብሎነ ኦላንቾታን ገልዳ አሳታነ ኩሸ ሂላንቾታ ድእድ ባብሎነ ኤፍስ። 16 ሽን ናቡዛርዳን ማንቆታፐ ጉꬃ አሳ ዎይነ ቶካናዳነ ጋደ ጎያናዳ ይሁዳን አግስ።

17 ባብሎነት ፆሳ ኬꬃ ካረን ኤቅዳ ናሰ ብራታ ቱቀታ፥ ጫና ጋረታነ ግታ ከረታ መንረꬅድ፥ ናሰ ብራታ ኡባ ባብሎነ ኤፍዶሶና። 18 ከረታ፥ አካፋታ፥ ፆምፐ ሻሉዋ ፄራ ፕትያባታ፥ ፃሮታ፥ እፃነ ሳነታነ ያርሾ ዎደ ጎኤትያ ናሰ ብራታ ሚሸታ ኡባ ኤፍዶሶና። 19 ካዋ ናገይሳታ ሀላቃይ ናቡዛርዳን ዎርቃፈነ ብራፐ ኦሰትዳ ድስተታ፥ ታማ ኤክያ ሚሸታ፥ ፃሮታ፥ ላፋ ከረታ፥ ፆምፐ ዎꬅያ ኮጫታ፥ እፃነ ሳነታነ ኡሻ ያርሾስ ጎኤትያ ኦቶታ ኤፍስ። 20 ካዎይ ሶሎሞነይ ፆሳ ኬꬃን ኦሰትያባስ መꬍዳ ናምኡ ቱሳት፥ ግታ ከረታ፥ ታማነ ናምኡ ኮርማታ ምስለትነ ጫና ጋረት መትዳ ናሰ ብራታት ምዛነን ልካናዉ ዳንዳኤተና። 21 ናምኡ ቱሳት እስ መላ ግድድ፥ እሶይ እሶይ ታማነ ሆስፑን ዋꬋ አዱሰ። ኤንታ ኡባይ ታማነ ናምኡ ዋꬋ። ኤንታዉ ግዶይ ካይስ ግድድ፥ ብራታይ ኦይዱ ብራ ኬና ኦርደ። 22 ናምኡ ቱሳታ ሁጵያን ናሰፐ ኦሰትዳ ጉምቦት ደኦሶና። እስ ጉምቡዋ ጌሳይ እቻሹ ዋꬋ ግድድ፥ ዩሾይ ግተ ምስለንነ ኦሮማነ ምስለን አሌቀትድ ኡትስ። ናምአንꬆ ጉምቦይካ እያ መላ። 23 ጉምቦታስ ምየን ምየን ደእያ ኦሮማነታ ምስለት ኡዱፉን ታማነ ኡሱፑና፤ ዩሹዋን ደእያ ግተ ምስለታፐ ቦላ ባጋራ ደእያ ኦሮማነ ምስለት እስ ፄታ።

24 ካዋ ናገይሳታ ሀላቃይ ናቡዛርዳን ካህነ ሀላቃ ሳራያ፥ እያ ካልያ ካህንያ ሶፎንያሳነ ፐንገ ናግያ ሄꬑ አሳታ ኦይክስ። 25 ካታማን ደእያ አሳፐ ቶራ ሞጮና፥ ካዋ ዞረይሳታፐ ላፑን አሳታ ኤፍስ። ቶራ ሞጮና፥ ፃፍያ፥ አሳ ኦላንቾታ ዶርያ ሀላቃነ ሀራ ኡሱፑን ታሙ አሳታ ኤፍስ። 26 ናቡዛርዳን ኤንታ ኡባ ኤክድ፥ ባብሎነ ካዋኮ፥ እርብላ ካታማ ኤፍስ። 27 ሀማታ ቢታን፥ እርብላ ካታማን፥ ባብሎነ ካዎይ ኤንታ ኡባ ዎꬍስስ። ሄሳዳ ሀንድ፥ ይሁዳ አሳይ ባንታ ቢታፈ ድኤትድ ብዶሶና።

28 ናቡካዳናፆር ካዎትዳ ላፑንꬆ ላይꬃን፥ ሄꬑ ሙኩሉነ ላታማነ ሄꬑ አሳይ ይሁዳፐ ድኤትስ። 29 ታማነ ሆስፑንꬆ ላይꬃን ሆስፑን ፄታነ ሀስታማነ ናምኡ አሳይ የሩሳላመፐ ድኤትስ። 30 ናቡካዳናፆር ካዎትዳ ላታማነ ሄꬓንꬆ ላይꬃን ካዋ ናገይሳታ ሀላቃይ ናቡዛርዳን ላፑን ፄታነ ኦይታማነ እቻሹ አሳ ድእስ። ድኤትዳ አሳ ታይቦይ ኦይዱ ሙኩሉነ ኡሱፑን ፄታ።

31 ዮአክን ድኤትዳ ሀስታማነ ላፑንꬃ ላይꬃን፥ ታማነ ናምአንꬆ አጌናን፥ ላታማነ እቻሻንꬆ ጋላሳን፥ ዮር-ማሮዳክ ካዎትዳ ላይꬅ ይሁዳ ካዋ ዮአክና ቦንችድ፥ ቃሾፐ ብርሽስ። 32 ዮር-ማሮዳክ ዮአክናራ ማልኦ ቃላ ኦደትድ፥ ባብሎነን ድኦን ደእያ ሀራ ካዎታ ኡባፈ አꬅድ እያ ቦንችስ። 33 ሄሳ ግሾ፥ ዮአክን ቃሾ ኬꬃን ማእያ ማኡዋ ላምድ፥ ባ ደኦ ላይꬃ ኡባን ካዎ ጋይታፐ ምሸ ደእስ። 34 ዮአክን ሀይቃና ጋካናዉ፥ ጋላስ ጋላስ እያዉ ኮሽያባ ኡባ ባብሎነ ካዎይ እሚስ።