2
የሱሲ ያጋኖ በሳን
1 ሄꬓንꬆ ጋላስ ጋልላ ቢታን ቃና ካታማን ያጋኖይ ያጋነትስ። የሱሳ አይያ ሄ ያጋኑዋን ደአዉሱ። 2 የሱሲካ ባ ታማረታራ እስፈ ሄ ያጋኑዋ ፄገትስ። 3 ዎይነ ኡሻይ ዉርን፥ የሱሳ አይያ የሱሳኮ፥ “ኤንታዉ ዎይነ ኡሻይ ዉርስ” ያጋሱ።
4 የሱሲ ዛሪድ፥ “ታ አየ፥ ነ ሀይሳን ገሎፓ? ታ ዎደይ ቡሮ ጋክቤና” ያግስ።
5 የሱሳ አይያ ኦሳንቾታኮ፥ “እ ህንተዉ ኦድያባ አይብባ ግድኮካ ኦꬅተ” ያጋሱ።
6 አይሁደት ባንታ ጌሾ ዎጋስ ጎኤትያ ኡሱፑን ሹቻ ባꬃት ሄ በሳን ደኦሶና። እስ እስ ባꬃይ ናምኡ ዎይኮ ሄꬑ ፁጋ ኦይኬስ። 7 የሱሲ ኦሳንቾታኮ፥ “ባꬃታን ሃ ኩንꬅተ” ያግስ። ኤንቲ ባꬃታስ ዶና ጋካናዉ ሃ ኩንꬅዶሶና። 8 የሱሲ ኤንታኮ፥ “ሀእ ዱቅድ ያጋኑዋ አዋተꬃን ፖልሰይሳስ እምተ” ያግስ። ኤንቲ እያዉ ኤፍድ እምዶሶና።
9 ያጋኑዋ አዋተꬃን ፖልሰይስ ዎይነ ኡሽ ላመትዳ ሃꬃ ጋንፅ ኤክድ አዉፐ ይዳኮ ኤርቤና፥ ሽን ሃꬃ ኩንꬅዳ ኦሳንቾት ኤሮሶና። ያጋኑዋ አዋተꬃን ፖልሰይስ ማችዉ ኤከይሳ ፄግድ፥ 10 “ኦንካ ሎኦ ዎይነ ኡሻ አሳ ኮይሮትድ ኡሼስ። ያትድ አሳይ ኡይ ካልዳፐ ጉየ፥ ቅራርያ እሜስ። ሽን ኔኒ ሎኦ ዎይነ ኡሻ ሀኖ ጋካናዉ ዎꬃ አጋዳሳ” ያግስ።
11 የሱሲ ሀ ኮይሮ ማላታ ጋልላ ቢታን ቃና ካታማን ኦꬅስ፤ ሄሳን ባ ግታተꬃ በስስ። እያ ታማረት እያ አማንዶሶና።
12 ሄሳፈ ጉየ፥ የሱሲ ባ አየራ፥ ባ እሻታራነ ባ ታማረታራ እስፈ ቅፍርናሆማ ካታማ ብድ ጉꬃ ጋላስ ጋምእስ። ማቶ 4:13.
ፆሳ ኬꬃፈ ዛልኤይሳታ ከስስ
(ማቶ 21:12-13፤ ማር 11:15-17፤ ሉቃ 19:45-46)
13 አይሁደት ቦንችያ ፓስካ ባኣለ ጋላሳይ ማታትን የሱሲ የሩሳላመ ብስ። ከሳ 12:1-27. 14 ብድ ፆሳ ኬꬃን ቦራታ፥ ሚዛታ፥ ዶርሳታነ ሆለታ ባይዘይሳታነ ባንታ ኦይድያን ኡትድ ሚሸ ላመይሳታ ደምስ። 15 እ ፁርቃፈ ዶቅድ አሳ ኡባ ኤንታ መሄታራ ፆሳ ኬꬃፈ ጎድድ ካረ ከስስ። ሚሸ ላመይሳታ ፃርጴዛታካ አꬅ የግድ ኤንታ ሚሽያ ላልስ። 16 ሆለ ባይዘይሳታ፥ “ሀ ሆለታ ሀይሳፈ ከስተ፤ ታ አዋ ኬꬃ ግያ ኦꬆፍተ” ያግስ።
17 እያ ታማረት ጌሻ ማፃፋን፥ “ታኒ ነ ኬꬃስ ምሸትያ ምሻይ ታና ታማዳ ፁጌስ” ጌተትድ ፃፈትዳይሳ አኬክዶሶና። ማዝ 69:9.
18 ሄሳፈ ጉየ፥ አይሁደት ዛሪድ፥ “ነ ሀይሳ ኦꬃናዉ ነዉ ማት ደኤይሳስ ኑና አይ ማላታ ኦꬃዳ በሳኔ?” ያግዶሶና።
19 የሱሲ፥ “ሀ ፆሳ ኬꬃ ላልተ፤ ታኒ ሄꬑ ጋላሳን ዛራዳ ኬፃና” ያግስ። ማቶ 26:61፤ 27:40፤ ማር 14:58፤ 15:29.
20 ቃስካ አይሁደት፥ “ሀ ፆሳ ኬꬃ ኬፃናዉ ኦይታማነ ኡሱፑን ላይꬅ ኤክስ፥ ሽን ኔኒ ሄꬑ ጋላሳን ኬፃኔ?” ያግዶሶና።
21 ሽን የሱሲ ኦድያ ፆሳ ኬꬃይ ባ አሳተꬃባ። 22 ሄሳ ግሾ፥ የሱሲ ሀይቆፐ ደንድዳፐ ጉየ እያ ታማረት እ ሄሳ ግዳይሳ አኬክዶሶና። ቃስ ኤንቲ ጌሻ ማፃፋን ፃፈትዳይሳነ የሱሲ ኦድዳይሳ አማንዶሶና።
23 የሱሲ ፓስካ ቦንችያ በሳን የሩሳላመን ደእሽን፥ እ ኦꬅዳ ማላታታ በእድ ዳሮ አሳይ እያ አማንዶሶና። 24 ሽን የሱሲ አሳ ኡባ ኤርያ ግሾ ኤንታ አማንበና። 25 አሳ ዎዛናን ደእያባ እ ባ ሁጰን ኤርያ ግሾ አሳባ ኦንካ እያዉ ኦዳና መላ ኮሽቤና።