ዮሃንስ ፃፍዳ
የሱስ ክርስቶሳ ዎንገላ
ጋꬃ ቆፋ
ዮሃንስ የሱሳ፥ “አሰ ግድድ አሳ ግዶን በንትዳ ፆሳ ቃላ” ያግድ ቆንጭሴስ። ሀ ዎንገላይ ፃፈትዳይ፥ ማፃፋ ናባብያ ኦንካ የሱሲ አሰ አሻናዉ ያና ጌተትዳ ፆሳ ናአ ግደይሳ አማናና መላነ እያ አማነይሳታስ መርና ደኦይ ደኤይሳ ኤንቲ ኤራና መላሳ (20:31)።
ዎንገላስ ኮይሮ ክፍለይ መርናዉ ደእያ ፆሳ ቃላይነ የሱሲ እስኖ ግደይሳ ኦዴስ። ዮሃንሳ ዎንገላይ፥ የሱሲ አሸይሳ ግድድ ያና ግዳ ፆሳ ናአ ግደይሳ በሲያ ዱማ ዱማ ማላታታ ቆንጭሴስ። ሀ ዎንገላ ፃፈይ፥ የሱስ ክርስቶሲ ባ ሁጰን ቱማ ፆሳ ናአነ ፆሳ አዋራ እስኖ ግደይሳ (1:1) ቆንጭስስ። የሱሲ ባ ሁጰን፥ “ታኒ አብራሃመፐ ካሰ ደአይስ” (8:58) ያግስ። ዉርሰꬃን ቶማስ፥ “ታ ጎዳዉ፥ ታ ፆሳዉ” ያግድ ፄግስ (20:28)። ሄሳፈ ካልድ፥ ሀ ማላታታፐ በንትዳ አይፍያ ኦድያ ታርከት ካሎሶና። ሀ ክፍለይ እስ እስ አስ የሱሳ አማንድ እያ ካልያ አስ ግድዳይሳ ኦዴስ፤ ቃስ ሀራት እያራ ዋንድ ኤቀትዳኮነ ዋንድ አማኖና እፅዳኮ ኦዶሶና። ሸምፖ 13-17 ጋካናዉ የሱሲ ኦይከትዳ ኦማርስ፥ ባ ታማረታራ እያዉ አይ መላ ምኖ ጋሄተꬅ ደእያኮ፥ ቃስ ዎንተꬃ ጋላስ ካቀታናፐ ስን ጊገተꬅነ ምንꬆ ቃላ ኤንታዉ ኦድዳይሳ ቆንጭሴስ። ዉርሰꬃ ሸምፖት የሱሲ ኦይከትዳባነ ፕርዳስ ሺቅዳባ፥ እያ ካቀተꬃ፥ እያ ደንዱዋነ ባ ታማረታስ ቆንጭዳ ቆንጨꬃ ኦዶሶና።
ማፃፋ አይፈ ቆፋታ
ገሎ ቆፋ (1:1-18)
ፃማቅያ ዮሃንሳነ ኮይሮ የሱሳ ታማረታ (1:19-51)
የሱሲ ቆንጨን ኦሶ ኦይክስ (2:1—12:50)
የሩሳላመ ሄራን አꬅዳ ዉርሰꬃ ሳምንታ (13:1—19:42)
ሀይቆፐ ደንዶነ አሳስ በንቱዋ (20:1-31)
ጋልላን ዛሪድ ባ ታማረታስ በንቱዋ (21:1-25)
1
ደኦ ቃላ
1 ቃላይ ኮይሮ ደኤስ። ቃላይካ ፆሳራ ደኤስ፤ ሄ ቃላይ ፆሳ። 2 ኮይሮፐ ቃላይ ፆሳራ ደኤስ። 3 ፆሳይ ኡባባ ቃላ ባጋራ መꬍስ። መትዳባፐ እሶይካ እያ ባጋራ መቶናባይ ባዋ። 4 እያን ደኦይ ደኤስ፤ ሄ ደኦይ አሳስ ፖኦ። 5 ፖኦይ ꬉማን ፖኤስ፤ ꬉማይ ፖኡዋ ፆንቤና።
6 ፆሳይ ኪትዳ፥ እስ ዮሃንሳ ጌተትያ አስ ደኤስ። ማቶ 3:1፤ ማር 1:4፤ ሉቃ 3:1-2. 7 አሳ ኡባይ ፖኡዋን አማናና መላ እ ፖኦስ ማርካ ግድድ ይስ። 8 እ ፖኡዋባ ማርካታናዉ ይስፐ አትሽን፥ ባ ሁጰን ፖኦ ግደና። 9 አሳ ኡባስ ፖእስያ ቱማ ፖኦይ አላምያ ዬስ።
10 ቃላይ አላመን ደእስ። ፆሳይ ቃላን አላምያ መꬍስ፥ ሽን አላመይ እያ ኤርቤና። 11 እ ባ አሳኮ ይስ፥ ሽን እያ አሳይ እያ ኤክቦኮና። 12 ሽን እ ባና ኤክዳይሳታስነ እያ ሱንꬃን አማንዳይሳታስ ፆሳ ናይታ ግዳና መላ ማታ እሚስ። 13 ኤንቲ ፆሳፈ የለትዶሶናፐ አትሽን፥ አስ የለትያ ዎጋን ዎይኮ አደ ሸነን ዎይኮ አሳ አሞን የለትቦኮና። ፆሳይ እ ኤንታ አዋ።
14 ቃላይ አሰ ግድስ፤ አꬎ ኬሀተꬃነ ቱማ ኩምድ ኑ ግዶን ደእስ። እ አዋስ እስ ናኣ ግድድ ኤክዳ እያ ቦንቹዋ ኑኒ በእዳ።
15 ዮሃንስ እያባ ማርካትስ። ባ ቃላ ꬎቁ ኦꬅድ፥ “ታኒ፥ ‘ታፐ ጉየራ የይስ ታፐ ካሰ ደእያ ግሾ ታፐ አꬌስ’ ጋዳ ማርካትዳይስ ሀይሳ” ያግስ።
16 ኑኒ ኡባይ እያ አꬎ ኬሀተꬃ ኩመꬃፈ አንጆ ቦላ አንጆ ኤክዳ። 17 ፆሳይ ህግያ ሙሰ ባጋራ እሚስ፥ ሽን አꬎ ኬሀተꬃይነ ቱማተꬃይ የሱስ ክርስቶሳ ባጋራ ይስ። 18 ፆሳ በእዳ አስ ኦንካ ባዋ፤ ባ አዋ ማታን ደእያ እስ ናኣ ፃላል ባዉ ፆሰ ግድዳይስ እያ ቆንጭስስ።
ፃማቅያ ዮሃንሳ ማርካተꬅ
(ማቶ 3:1-12፤ ማር 1:1-8፤ ሉቃ 3:1-8)
19 የሩሳላመን ደእያ አይሁደ ሀላቃት፥ ካህነታነ ሌወታ፥ “ኔኒ ኦኔ?” ግድ፥ ዮሃንሳ ኦይቻና መላ እያኮ ኪትን፥ ዮሃንስ ኤንታዉ ማርካትዳ ማርካተꬃይ ሀይሳ።
20 ዮሃንስ፥ “ታኒ ክርስቶሳ ግድከ” ያግድ፥ ጌሽድ ማርካትስፐ አትሽን፥ ካድቤና።
21 ኤንቲ፥ “ያትን፥ ኔኒ ኦኔ? ኔኒ ኤልያሰዬ?” ያግድ ኦይችዶሶና። ምልክ 4:5፤ ዛረ 18:15-18.
ዮሃንስ፥ “አካይ፥ ግድከ” ያግስ።
ቃስ ኤንቲ፥ “ኔኒ ያና ጌተትዳ ናብያዬ?” ያግድ ኦይችዶሶና።
ዮሃንስ፥ “አካይ” ግድ ዛርስ።
22 ያትን፥ “ኔኒ ኦኔ? ኑኒ ኑና ኪትዳይሳታስ ኦዳና መላ ኔኒ ነና ኦና ጋይ?” ያግዶሶና።
23 ዮሃንስ ዛሪድ፥ “ናብያ እሳያስ ግዳይሳዳ፥
“ ‘ጎዳ ኦግያ ሱርስተ!’
ግድ መላ ቢታን ዋስያ ኡራ ቃላይ ታና”
ያግስ።እሳ 40:3.
24 ቃስ ፋርሳወት ኪትዳ አሳት 25 ዮሃንሳኮ፥ “ኔኒ ክርስቶሳ ዎይኮ ኤልያሳ ዎይኮ ናበ ግዶና እፅኮ፥ ያትን አይስ ፃማቃይ?” ግድ ኦይችዶሶና።
26 ዮሃንስ ዛሪድ፥ “ታኒ ሃꬃን ፃማቃይስ፥ ሽን ህንተ ኤሮና አስ ህንተ ግዶን ኤቅስ። 27 እ ታፐ ጉየራ ዬስ። ታኒ ሀር አቶሽን እያ ጫማ ዎዶሩዋ ብላናዉ በስከ” ያግስ።
28 ሄስ ኡባይ ዮርዳኖሰ ሻፋፐ ሄፍንꬃን፥ ብታነ ካታማን፥ ዮሃንስ ፃማቅያ በሳን ሀንስ።
የሱሲ ፆሳ ዶርሰ
29 ዮሃንስ ዎንተꬃ ጋላስ የሱሲ ባኮ ይሽን በእድ፥ “አላምያ ናጋራ ቁችያ ፆሳ ዶርሳይ ሀይሳ! 30 ታኒ፥ ‘ታፐ ጉየራ እስ አስ ያና። እ ታፐ ካሰ ደእያ ግሾ ታፐ አꬌስ’ ጋዳ ኦድዳይስ ሀይሳ። 31 እ ኦነኮ ታኒ ኤርከ። ሽን እስራኤለ አሳስ እያ ቆንጭሳናዉ ሃꬃን ፃማቃሸ ያስ” ያግስ።
32 ዮሃንስ ሀይሳዳ ያግድ ማርካትስ፦ “ጌሻ አያናይ ሳሎፐ ሆለዳ ዎꬍሽንነ እያራ ደእሽን በአስ። 33 ሄስ ሀናናፐ ካሰ ታኒ እያ ኤርከ። ሽን ሃꬃን ፃማቃናዉ ታና ኪትዳ ፆሳይ፥ ‘ጌሻ አያናይ ዎꬍድ እያራ ደእሽን ኔኒ በአናይስነ ጌሻ አያናን ፃማቃናይስ እያ’ ያግድ ታዉ ኦድስ። 34 ታኒ ሄስ ሀንሽን በአዳ፥ እ ፆሳ ናኣ ግድዳይሳ ማርካታይስ” ያግስ።
ኮይሮ የሱሳ ታማረታ
35 ቃስ ዎንተꬃ ጋላስ ዮሃንስ ባ ታማረታፐ ናምአታራ እስፈ ኤቅስ። 36 የሱሲ አꬍሽን፥ ዮሃንስ በእድ፥ “ፆሳ ዶርሳይ ሀይስሽ!” ያግስ።
37 ዮሃንሳ ናምኡ ታማረት ዮሃንስ ገይሳ ስእድ የሱሳ ካልዶሶና። 38 የሱሲ ባና ካለይሳታ ጉየ ስም በእድ፥ “አይ ኮዬቲ?” ያግድ ኦይችስ።
ኤንቲ ዛሪድ፥ “አስታማርያዉ፥ ኔኒ አዉን ደአይ?” ያግዶሶና።
39 የሱሲ ኤንታኮ፥ “ሃ ይድ በእተ” ያግስ። ኤንቲ ብድ እ ደእያሱዋ በእዶሶና። ሄ ጋላስ ሳእ ታሙ ሳተ ሄራ ግድያ ግሾ እያ ማታን ፔእዶሶና።
40 ዮሃንስ ግዳይሳ ስእድ፥ የሱሳ ካልዳ ናምኡ ታማረታፐ እሶይ፥ ስሞን ጰፅሮሳ እሻ እንድርያሳ። 41 እንድርያስ ኮይሮ ባ እሻ ስሞናራ ጋሄትድ፥ “ኑኒ ክርስቶሳ ደምዳ” ያግስ። 42 እንድርያስ ስሞና የሱሳኮ ኤህስ።
የሱሲ ስሞና በእድ፥ “ኔኒ ዮና ናኣ ስሞና፤ ነ ሱንꬃይ ኬፋ *ኬፋ፦ ግያ ቃላይ አራምከ ዶና ግድሽን፥ ግርከ ዶናን ብርሸꬃይ ጰፅሮሳ ዎይኮ ዛላ ጉሱ። ግድ ፄገታና” ያግስ።
ፍልጶሳነ ናትናኤላ ፄገተꬃ
43 ዎንተꬃ ጋላስ የሱሲ ጋልላ ቢታ ባናዉ ቆፋ ቃችስ። እ ፍልጶሳራ ጋሄትድ፥ “ታና ካላ!” ያግስ። 44 ፍልጶስ፥ እንድርያስነ ጰፅሮስ ደእዳ ቤተሳይዳ ካታማፐ ይዳ አሰ።
45 ፍልጶስ ናትናኤላራ ጋሄትድ፥ “ሙሰይ ህገ ማፃፋን፥ ቃስ ናበትካ እያባ ፃፍዳ ዮሰፋ ናኣ ናዝረተ የሱሳ ኑኒ ደምዳ” ያግስ።
46 ናትናኤል ዛሪድ፥ “ናዝረተ ካታማፐ ሎኦባይ ከያናዉ ዳንዳኢ?” ያግስ።
ፍልጶስ፥ “ያዳ በአ” ያግስ።
47 ናትናኤል ባኮ የይሳ የሱሲ በእድ፥ “ገነይ ባይና ቱማ እስራኤለ አስ ሀይሳ!” ያግስ።
48 ናትናኤል የሱሳኮ፥ “ኔኒ ታና አዉን ኤራይ?” ያግስ።
የሱሲ ዛሪድ፥ “ፍልጶስ ነና ፄጋናፐ ስን፥ ኔኒ ባላሰ ምꬃ ጋርሳን ደእሽን ታኒ ነና በአስ” ያግስ።
49 ናትናኤል ዛሪድ፥ “አስታማርያዉ፥ ኔኒ ፆሳ ናኣ! ኔኒ እስራኤለ ካዎ!” ያግስ።
50 የሱሲ እያኮ፥ “ታኒ ነና ባላሰ ምꬄ ጋርሳን በአስ ግዳ ግሾ አማናይ? ኔኒ ሀይሳፈ አꬍያባ በአና!” ያግስ። 51 ቃስ የሱሲ፥ “ታኒ ህንተዉ ቱማ ኦዳይስ፤ ሳሎይ ዶየትን፥ ፆሳ ኪታንቾት አሳ ናኣ ቦላ ከይሽንነ ዎꬍሽን ህንተ በአና” ያግስ። መ 28:12.