24
የሱሳ ሀይቆፐ ደንዱዋ
(ማቶ 28:1-10፤ ማር 16:1-8፤ ዮሀ 20:1-10)
1 ሳምንታፈ ኮይሮ ጋላስ፥ ዎጋ ዎደ ዎንታ ዳሮ ጉራ፥ ማጫሳት ባንታ ጊግስዳ ሽቱዋ ኤክድ ዱፉዋ ብዶሶና። 2 ኤንቲ ያ ጋክያ ዎደ ዱፉዋ ዶናን ደእያ ሹቻይ ጎንደረትድ ክቾይሳ ደምዶሶና። 3 ኤንቲ ዱፉዋ ጋꬅ ገልዶሶና፥ ሽን ጎዳ የሱሳ አሀ ደምቦኮና። 4 ኤንቲ ያን ኤቅድ አይብ ሀንደ ግድ ቆፕሽን አኬኮና ዳሮ ጶልያ አፍላ ማእዳ ናምኡ አሳት ኤንታ ማታን ኤቅዶሶና። 5 ማጫሳት ያሸትድ ባንታ ሁጵያ ሳአን ዝቅ ኦꬅድ ደእሽን፥ አሳት ኤንታኮ፥ “ደኦን ደኤይሳ ሀይቆታ ግዶን አይስ ኮዬቲ? 6-7 እ ሀይሳን ዴና፤ ሀይቆፐ ደንድስ፥ ‘አሳ ናአይ ናጋራንቾታ ኩሸን አꬍድ እመታና፤ ኤንትካ እያ ካቃና። ማቶ 16:21፤ 17:22-23፤ 20:18-19፤ ማር 8:31፤ 9:31፤ 10:33-34፤ ሉቃ 9:22፤ 18:31-33. እ ሄꬓንꬆ ቃማን ሀይቆፐ ደንዳና’ ያግድ፥ እ ህንተራ ጋልላን ደእሸ ህንተዉ ኦድዳ ቃላ ቆፕተ” ያግስ።
8 ማጫሳት ሄ ዎደ እያ ቃላ ቆፕዶሶና።
9 ማጫሳት ዱፉዋፐ ስሚድ ሀንዳባ ኡባ ታማነ እሶታስነ ሀራታስካ ኦድዶሶና። 10 ሄሳ ሀዋረታስ ኦድዳይ ማግደላ ማይራሞ፥ ዮሃና፥ ያይቆባ አይዉ ማይራሞነ ኤንታራ ደእያ ሀራ ማጫሳታ። 11 ሽን ኤንታዉ ማጫሳት ኦድዳይስ ኤልሞ ዳንን አማንቦኮና። 12 ሽን ጰፅሮስ ደንድ ዎፅድ ዱፎ ብስ። ሄ በሳ ጋክድ፥ ሆክድ ጋꬅ ፄልያ ዎደ ሞጎ አፍላ ፃላላ በእስ። ሀንዳባን ማላለትሸ ባ ሶ ስምስ።
ኤማሆሰ ኦገ ቦላ
(ማር 16:12-13)
13 ሄ ጋላስ ካልያ ታማረታፐ ናምአት የሩሳላመፐ ታማነ እስ ክሎ ምትረ ሃክያ ኤማሆሰ ጉታ ቦሶና። 14 ኤንቲ ዎላ ሀንዳባ ኡባ ኦደቶሶና። 15 ኤንቲ ሄ ሀኖታባ ቆፕሸነ ኦደትሸ ብያ ዎደ የሱሲ ባ ሁጰን ሺቅድ ኤንታራ ቤስ። 16 ሀኖሽን፥ ኤንቲ እያ ኤሮና መላ ኤንታ አይፈይ ኦይከትስ።
17 እ፥ “ህንተ ዎላ ኦገ ቦላ ደእሸ ኦደተይስ አይቤ?” ያግስ።
ኤንቲ አዛንድ ስእ ግድ ኤቅዶሶና። 18 ኤንታፈ እሶይ ቀልዮጰ ጌተተይስ፥ “ሀ ቃማታ ግዶን የሩሳላመን ሀንዳባ ኤሮናይስ፥ ነ ቢታስ እማዬ?” ያግስ።
19 እ ዛሪድ፥ “እ ሀንዳይስ አይቤ?” ያግድ ኦይችስ።
ኤንቲ፥ “ፆሳ ስንꬃንነ አሳ ስንꬃን ኦሶንነ ኦዳን ምኖ ናበ ግድዳ ናዝረተ የሱሳባ። 20 እያ ካህነ ሀላቃትነ ሃረይሳት ሀይቆ ፕርዳስ አꬅ እምድ፥ ካቅዶሶና። 21 ኑኒ እስራኤለ አሳ ዎዛንደ ግድ ኡፋይትድ ናግዳሽን ሀይስ ሀንን ሀች ሄꬓንꬆ ቃማ። 22 ቃስ ኑ ግዶፈ እስ እስ ማጫሳት ኑና ማላልስዶሶና። ኤንቲ ሀች ዎንታ ጉራ ዱፉዋ ብዶሶና። 23 እያ አሀ ꬋይዳ ዎደ ስም ይድ፥ ‘እ ፓፃ ደኤስ’ ግያ ኪታንቾት ቆንጭን በእዳ ያግድ ኦድዶሶና። 24 ኑ ግዶፈካ እሶት እሶት ዱፉዋ ብድ ማጫሳት ኦድዳይሳꬆ ሀንን በእዶሶና፥ ሽን እያ በእቦኮና” ያግስ።
25 እ ኤንታኮ፥ “ህንተኖ፥ አኬኮና አሳቶ፥ ህንተ ዎዛናይ ናበት ኦድዳባ ኡባ አማናናዉ ጋምኤይሳቶ፥ 26 ክርስቶስ ሀ መቱዋ ኤካናዉነ ባ ቦንቹዋን ገላናዉ በሰኔ?” ያግስ። 27 ሙሰፐነ ናበታ ኡባፈ ደንድድ ጌሻ ማፃፋን እያባይ ፃፈትዳይሳ ኡባ ኤንታዉ ቆንጭስስ።
28 ኤንቲ ብያ ጉታኮ ማታትዳ ዎደ የሱሲ አꬍድ ሃሆ ሶ ብያ ዳንን፥ 29 ኤንቲ፥ “ሳአይ ቃምዳ ግሾ ኑራ አቃ” ያግድ ምንꬅድ ዎስዶሶና። ሄሳ ግሾ፥ ኤንታራ አቃናዉ ገልስ።
30 ኤንታራ እስፈ ጋይታ ቦላ ኡትድ፥ ኡይꬃ ደንꬅድ፥ መንꬅድ፥ አንጅድ ኤንታዉ እሚስ። 31 ሄ ዎደ ኤንቲ ኤራና መላ ኤንታ አይፈይ ዶየትስ። ኤንትካ ኤርዶሶና። ሽን እ ኤንታፈ ጌምስ። 32 ኤንቲ፥ “ኑ ኦግያ ቦላ ደእሽን እ ኑስ ጌሻ ማፃፋ ብርሽሽንነ ኑና ኦድስሽን፥ ኑ ዎዛናይ ፁገትቤኔ?” ያግዶሶና። 33 ሄ ዎደ ደንድድ ጉየ የሩሳላመ ይዶሶና። ታማነ እሶትነ ሀራት እስ ቦላ ሺቅድ ደእሽን ደምዶሶና። 34 ኤንቲ፥ “ጎዳይ ቱማ ደንድስ፤ ስሞናስ ቆንጭስ” ያግዶሶና።
35 ሄ ናምኡ ታማረት ኤማሁሰ ኦግያ ቦላ ደእሽን ሀንዳይሳነ ኡይꬃ መንꬅዳ ዎደ ዋት እያ ኤርዳኮ ኤንታዉ ኦድዶሶና።
የሱሲ ባ ታማረታስ ቆንጭስ
(ማቶ 28:16-20፤ ማር 16:14-18፤ ዮሀ 20:19-23፤ ሀዋ 1:6-8)
36 ናምኡ ታማረት ሄሳ ኦዳ ቦላ ደእሽን፥ የሱሲ ኤንታ ግዶን ኤቅድ፥ “ሳሮይ ህንተዉ ግዶ” ያግስ።
37 ግዶሽን፥ ኤንቲ ዳጋምድ፥ ሞይትለ በእዳ ዳንን ያይዶሶና።
38 እ ኤንታኮ፥ “አይስ ባብደቲ? አይስ ስይ ህንተ ዎዛናን ገልዴ? 39 ታ ኩሽያነ ታ ቶሁዋ በእተ፤ ታኒ ታና። ቃስ ኦይክድ በእተ፤ ታናን ህንተ በኤይሳዳ፥ ሞይትለስ አሾይነ መቀꬅ ባዋ” ያግስ። 40 ያግድ፥ ባ ቶሁዋነ ባ ኩሽያ ኤንታ በስስ። 41 ኤንቲ ኡፋይሳፈ ደንዶይሳን አማኖና ማላለተꬃን ደእሽን፥ የሱሲ ኤንታኮ፥ “ሀይሳን ህንተዉ ምያባይ ደኢ?” ያግስ። 42 ኤንቲ እስ ጫጨትዳ ሞሎ እያዉ እምዶሶና። 43 እ ኤክድ ኤንታ ስንꬃን ምስ።
44 እ፥ “ታ ህንተራ ጋምእዳ ዎደ ኡባን ሙሰ ማፃፋታን፥ ናበታ ማፃፋታንነ ማዝሙረ ማፃፋታን፥ ታ ግሾ ፃፈትዳባይ ኡባይ ፖለታናዉ በሴስ ያጋዳ ታ ህንተዉ ኦድዳ ቃላይ ሀይሳ” ያግስ።
45 ሄ ዎደ ጌሻ ማፃፋታ አኬካና መላ ኤንታ ዎዛና ዶይስ። 46 ሄሳዳካ፥ “ክርስቶስ ዋየ ኤካና፥ ሄꬓንꬆ ቃማን ሀይቆፐ ደንዳና ያግድ ፃፈትስ። 47 የሩሳላመፐ ደንድድ አሳ ኡባስ ናጋራፐ ማሮተꬃይነ አቶተꬃይ እያ ሱንꬃን ማርካታና። 48 ህንተ ሄሳስ ማርካታ። 49 ሄኮ፥ ታካ ታ አዋይ እምዳ ኡፋይሳ ህንተዉ የዳና። ህንተ ሳሎፐ ዎልቃ ማአና ጋካናዉ የሩሳላመ ካታማን ጋምእተ” ያግስ። ሀዋ 1:4.
የሱሲ ፑደ ሳሎ ብስ
(ማር 16:19-20፤ ሀዋ 1:9-11)
50 ሄሳፈ ጉየ፥ ብታነ ካታማ ኤንታና ኤክድ ብስ። ባ ኩሽያ ደንꬅድ አንጅስ። ሀዋ 1:9-11. 51 ኤንታና አንጅሸ ኤንታፈ ሻከትድ ፑደ ሳሎ ኤከትስ። 52 ኤንቲ ዝግ ጎይንድ ዳሮ ኡፋይሳን የሩሳላመ ስምዶሶና። 53 ፆሳ ኡባ ዎደ ጋላትሸ ፆሳ ኬꬃን ጋምእዶሶና።