1 ሄ በሳን ሺቅዳ ሻንጎት ኡባይ ደንድድ የሱሳ ጵላፆሳኮ ኤፍዶሶና። 2 “ሀ ኡራይ ኑ አሳ ባለꬅሽን፥ ካዋስ ጊራ ጊሮና መላ ድግሽንነ፥ ቃስ ‘ታኒ ክርስቶሳ ህንተ ካዋ’ ያግሽን ደምዳ” ያግድ ሞትዶሶና።

3 ጵላፆስ የሱሳ፥ “ኔኒ አይሁደታ ካዎ?” ያግድ ኦይችስ።

የሱሲ፥ “ኤ፥ ነ ግዳይሳ መላ” ያግስ።

4 ጵላፆስ ካህነ ሀላቃታኮነ አሳኮ፥ “ሀ ኡራ ቦላ ታኒ እስ ባላካ ደማብከ” ያግስ። 5 ሽን ኤንቲ፥ “ሀ ኡራይ ጋልላፐ ዶምድ ሀይሳ ጋካናዉ ይሁዳ ኩመꬃ ኢታባስ ደንꬄስ” ያግድ ምንꬅ ኦድዶሶና።

6 ጵላፆስ ሄሳ ስእዳ ዎደ የሱሲ ጋልላ አሴኮ ኤራናዉ ኮይድ እያ ኦይችስ። 7 የሱሲ ሄሮዲሳ ቢታፈ ይዳ አስ ግደይሳ ጵላፆስ ኤርዳ ዎደ ሄሮዲስ ሄ ዎደ የሩሳላመን ደእያ ግሾ እያኮ የድስ።

8 ሄሮዲስ የሱሳ በአናዉ ዳሮ ዎደፐ ኮይሸ ደእያ ግሾ፥ እያ በእዳ ዎደ ዳሮ ኡፋይትስ። አይስ ጊኮ፥ እያባ ስእዳ ግሾ ማላልስያባ ኦꬅን በአናዉ አሞትሸ ደኤስ። 9 ሄሮዲስ የሱሳ ዳሮ ኦይሾታ ኦይችስ፥ ሽን እ አይኮካ ዛርቤና። 10 ካህነታ ሀላቃትነ ህገ አስታማረት ያን ኤቅድ ምንꬅድ እያ ሞቶሶና። 11 ሄሮዲሳራነ እያ ዎታዳረታራ የሱሳ ካꬍዶሶናነ ለቅስዶሶና። ቦንቾ አፍላ ማይዝድ ጵላፆሳኮ ዛሪድ የድዶሶና። 12 ሄሮዲሳራነ ጵላፆሳራ ካሰ ሞርከሽን ሄ ጋላስ ዎላ ጊግዶሶና።

13 ጵላፆስ ካህነ ሀላቃታ፥ አሳ ሃረይሳታነ አሳ ፄግድ፥ 14 “ ‘ሀ ኡራይ አሳ ጌላተꬃስ ደንꬄስ’ ግድ ታኮ ኤህደታ። ታካ ህንተ ስንꬃን ፕልጋዳ ህንተ ሺሽዳ ሞቱዋስ አይብ ባላካ ደማብከ። 15 ሄሮዲስ፥ ሄሳꬆ አይብ ባላካ እያ ቦላ ደምቦና ግሾ ኑኮ የድስ። ቱማካ ሀ ኡራይ ሀይቆስ ጋꬅያ አይብ ባላካ ኦꬅቤና። 16 ሄሳ ግሾ፥ እያ ጋራፋዳ ብላ የዳና” ያግስ። 17 ሄሳ እ ግዳይ ፓስካ ባኣለ ዎደ እስ አስ ኤንታዉ ብላናይስ እያዉ አቶናባ ግድያ ግሾሳ።

18 ደረይ ኡባይ እስ ቦላ፥ “ሀ ኡራ ገደ ድጋ፥ ኑስ ባርባና ብላ” ያግድ ዋስዶሶና። 19 ባርባን ካታማ ግዶን አሳ ኢታባስ ደንꬅድ አሰ ዎꬍድ ቃሸትዳ አስ።

20 ጵላፆስ የሱሳ ብላናዉ ኮይድ አሳስ ዛር ኦድስ። 21 ግዶሽን፥ አሳይ፥ “ካቃ! ካቃ!” ያግድ ዋስዶሶና። 22 ጵላፆስ ሄꬓንꬆ፥ “ሀ ኡራይ ቆህዳባይ አይቤ? ዎꬎስ ጋꬅያ ባላ ታ ደማብከ። ሄሳ ግሾ፥ ጋራፋዳ የዳ አጋና” ያግስ።

23 ኤንቲ ባንታ ቃላ ꬎቁ ኦꬅድ፥ “ካቀታናዉ በሴስ” ግድ ምንꬅ ዋስዶሶና። ኤንታ ዋሶይካ ፆንስ። 24 ኤንታ ኦይሻ ግሾ፥ ግድ ጵላፆስ እያ ቦላ ፕርድስ። 25 አሰ ኢታባስ ደንꬅዳይሳነ አሰ ዎꬍድ ቃሸትዳይሳ ብላና መላ ዎስዳ ግሾ ሄ ኡራ ኤንታዉ ብልስ። ሽን የሱሳ ኤንቲ ኮይዳባ ኦꬃና መላ ኤንታዉ አꬅድ እሚስ።

26 የሱሳ ኦይክድ ኤፍሽን ስሞና ጌተትያ ቀሬና ቢታ አደይ ጋፃረፐ ይሽን፥ ደምድ ማስቃልያ ቶስድ የሱሳ ካልድ ባና መላ ኡንኤꬅዶሶና። 27 ዳሮ አሳይነ ባንታ ትራ እጭሸ ዬክያ ማጫሳት እያ ጉየራ ካሎሶና።

28 ሽን የሱሲ ኤንታኮ ጉየ ስሚድ፥ “ህንተኖ፥ የሩሳላመ ማጫሳቶ፥ ህንተ ሁጰስነ ህንተ ናይታስ ዬክተፐ አትሽን፥ ታዉ ዬኮፍተ። 29 ‘ሄኮ ማይንꬃት፥ የሎና ኡሎትነ ꬋንꬆና ꬋንꬃት አንጀትዶሶና’ ህንተ ያጋና ጋላሳይ ያና። 30 ሄ ዎደ ደረታ፥ ‘ኑ ቦላ ኩንድተ’፥ ዙማታካ፥ ‘ኑና ካምተ’ ያጋና። ሆሰ 10:8፤ ቆን 6:16. 31 ህዛ፥ ቃየ ምꬃ ሄሳꬆ ኦꬅኮ መላ ምꬃ ዋታንደሻ?” ያግስ።

32 እያራ ዎꬋናዉ ሀራ ናምኡ ዎራንꬖታ ኤፍዶሶና። 33 ቀራንዮ*ቀራንዮ፦ ቀራንዮ ገይስ ግርከ ዶና። አራምከ ዶናን “ጎልጎታ” ዎይኮ “ሁጰ ጉገ” ጉሱ። ቀራንዮ ጌተትያ ሱንꬃይ እመትዳይ የሱሲ ካቀትዳይ አሳ ሁጰ ጉገ ዳንያ በሳን ግድያ ግሾሳ። ሄ በሳይ ሮመ ካዎተꬃይ ዎራንꬖታ ካቅያ በሲ። (ማቶ 27:33፤ ማር 15:22፤ ዮሀ 19:17) ጌተትያ በሳ ጋꬅድ ካቅዶሶና። ዎራንꬖታፐ እሱዋ ኡሻቻ ባጋራ ሀንኩዋ ሀድርሳ ባጋራ ካቅዶሶና። 34 የሱሲ፥ “ታ አዋዉ፥ ኤንቲ አይ ኦꬅያኮ ኤሮና ግሾ፥ ኔኒ ኤንታዉ አቶ ያጋ” ያግስ። ማዝ 22:18.

ኤንቲ እያ አፍላ ቦላ ሳማ የግድ ሻከትድ ኤክዶሶና።

35 አሳይ ኤቅድ ፄሎሶና፥ ሽን ደርያ ሃረይሳት፥ “ሀራታ አሽስ፤ ፆሳይ ዶርዳ ክርስቶስ እያ ግድኮ አነ ባና አሾ” ያግድ ለቅስዶሶና። ማዝ 22:18፤ ማዝ 22:7. 36 ዎታዳረት እያኮ ሺቅድ፥ ጫላ ዎይነ ኡሻ እምዶሶና። ማዝ 69:21. 37 ያትድ፥ “ኔኒ አይሁደታ ካዎ ግድኮ ነ ሁጵያ አሻ” ያግድ ለቅስዶሶና።

38 እያዉ ሁጰ ባጋራ፥ “ሀይስ አይሁደታ ካዎ” ግያ ፁፈይ ደኤስ። 39 ካቀትዳ ዎራንꬖታፐ እሶይ ጫሸ ሳአራ ጎችሸ፥ “አነ ኔኒ ክርስቶሳ ግድኮ፥ ነናካ ኑናካ አሻ” ያግስ።

40 ሽን ሀንኮ ዎራንꬖይ፥ “ኔኒ ሀይሳ መላ ፕርዳን ደአሸ ሀር አቶሽን፥ ፆሳስ ያይኪ? 41 ኑኒ ኑ ኦꬅዳ ናጋራ ግሾ በሲያ ፕርዳ ኤኮስ፥ ሽን ሀ ኡራይ እስ ኢታባ ኦꬅቤና” ያግድ ሀንቀትስ።

42 ቃስካ፥ “የሱሳ፥ ነ ነ ካዎተꬃራ ያ ዎደ ታና ቆፓ” ያግስ።

43 የሱሲ፥ “ታ ነዉ ቱማ ኦዳይስ፤ ሀች ኔኒ ታራ ጋናተን ግዳና” ያግስ።

44-45 ሄ ጋላስ ኡሱፑን ሳተፐ ብድ ኡዱፉን ሳተ ጋካናዉ አዋይ ፖኡዋ ድግዳ ግሾ፥ ቢታ ኡባ ቦላ ꬉማ ግድስ። ፆሳ ኬꬃ ማጋራጆይ ዳከትድ ናምአን ሻከትስ። ከሳ 26:31. 46 የሱሲ፥ ቃላ ꬎቁ ኦꬅድ፥ “ታ አዋዉ፥ ታ ታ ሸምፕዉ ነ ኩሸን ሼꬋይስ” ያግድ ሀይቅስ። ማዝ 31:5.

47 ማቶ ሀላቃይ፥ ሀንዳይሳ በእድ፥ “ሀይስ ኡራይ ቱማካ ፅሎ” ያግድ ፆሳ ጋላትስ። 48 ሀ ሀንያባ በአናዉ ሄ በሳ ሺቅዳ አሳ ኡባይ ሀንዳባ በእዳ ዎደ ባንታ ትራ እጭሸ ባንታ ሶ ስምዶሶና። 49 ግዶሽን፥ የሱሳ ማታን ኤርያ አሳ ኡባይ፥ ሄሳዳካ ጋልላፐ ካልድ ይዳ ማጫሳት ሄሳ በእሸ ሃሆን ኤቅዶሶና። ሉቃ 8:2.

50-51 አይሁደ ሻንጎታፐ እሶይ፥ ዮሰፋ ጌተትያ ኡራይ ደኤስ። እ አርማተ ጌተትያ ይሁዳ ካታማፐ ይስ። እ ሎኦነ ፅሎ አስ ግድያ ግሾ ፆሳ ካዎተꬃ ዩሳ ናጌስ። ሻንጎታፐ እሱዋ ግድሸ ኤንታ ዞረተꬃንነ ኦሱዋን ዴና። 52 ሄ ኡራይ ጵላፆሳኮ ብድ፥ የሱሳ አሀ ሞጋናዉ ታዉ እማ ግድ ዎስስ። 53 ጵላፆስ ኤካ ያግን፥ የሱሳ አሀ ዎꬍስድ አፍላራ ፃፅስ። ዛላፈ ዎጭድ ከስዳ ሀራ አስ ሞገቶና ኦራꬃ ዱፎን ዎꬅስ። 54 ሳምባት ገላና ሀንያ ግሾ፥ ሄ ጋላሳይ ጊገተꬃ ቃማ።

55 ጋልላፐ ደንድድ የሱሳ ካልድ ይዳ ማጫሳት ዮሰፋራ ብድ እያ አሀ ዋት ሞግያኮ ዱፉዋ አኬክድ በእዶሶና። 56 ያፐ ስሚድ ሽቶነ ቅባተ ጊግስዶሶና። ህገይ ኪተይሳ መላ ሳምባታ ጋላስ ሸምፕ ፔእዶሶና። ከሳ 20:10፤ ዛረ 5:14.