1 ሄ ዎደ “ፓስካ” ግያ ኡይꬃ ባለይ ማትስ። ከሳ 12:1. 2 ካህነ ሀላቃትነ ህገ አስታማረት አሰ ያይያ ግሾ፥ ዋትድ የሱሳ ባንታ ግዶፈ ꬋይሳነኮ ኦገ ኮዮሶና። 3 ፃላሄይ ታማነ ናምአታፐ እሱዋ ግድዳ አስቆሮታ ይሁዳ ጌተተይሳ ግዶ ገልስ። 4 ይሁድ ካህነ ሀላቃታኮነ ፆሳ ኬꬃ ናገይሳታ ሀላቃታኮ ብድ የሱሳ ዋት አꬅድ እማነኮ ኤንታራ ማቀትስ። 5 ኤንትካ ሄሳን ኡፋይትድ ሚሸ እማናዉ እያራ ዞረትዶሶና። 6 እካ ዞረተꬃን ጊግስ። አꬅ ኤንታዉ እማናዉ አስ ባይና እንጀ ዎደ ናግሸ ደኤስ።

7 ሄሳፈ ጉየ፥ ፓስካ ዶርሳይ ሹከትያ ኡይꬃ ባለይ ጋክስ። 8 የሱሲ፥ “ፓስካ ካሁዋ ማና መላ ብድ ኑስ ጊግስተ” ያግድ ጰፅሮሳነ ዮሃንሳ ኪትስ። 9 ኤንቲ፥ “ኑ አዉን ጊግሳና መላ ነ ኮያይ” ያግድ ኦይችዶሶና። 10 እ ኤንታኮ፥ “ሄኮ ህንተ ካታማ ገልሽን ሃꬃ ኦቶ ቶክዳ አደይ ህንተራ ጋሄታና። እ ብድ ገልያ ኬꬃ እያ ካልድ ገልተ። 11 አስታማረይ ጎዳኮ፥ ‘ታ ታ ታማረታራ ዎላ ፓስካ ካሁዋ ማናዉ እማꬃ ኬꬅ አዉኔ? ያግስ’ ጊተ። 12 እ ፖቅያ ቦላ ሂፀትድ ጊግድ ደእያ ዳልጋ ክፍለ ህንተና በሳና፥ ያን ጊግስተ” ያግስ። 13 ኤንቲ ብድ የሱሲ ግዳይሳዳ ሀንን ደምዶሶና። ፓስካ ባኣለ ካሁዋ ያን ጊግስዶሶና።

14 ሳተይካ ጋክዳ ዎደ የሱሲ ሀዋረታራ ዎላ ካሁዋ ቦላ ኡትስ። 15 እ ኤንታኮ፥ “ታ ዋየ ኤካናፐ ስን ሀ ካሁዋ ህንተራ ማናዉ ዳሮ አሞታስ። 16 ህዛ፥ ስእተ! ፆሳ ካዎተꬃን ሀይሳስ ብርሸꬃይ ፖለታና ጋካናዉ ሀ ካሁዋ ዛራዳ ሚከ” ያግስ። 17 ኡሻ ኤክድ ጋላት ስሚድ፥ “ሄእተ ሀይሳ ህንተ ግዶን ሻከትተ። 18 ስእተ! ፆሳ ካዎተꬃይ ያና ጋካናዉ ሀችፈ ዶማዳ ሀ ዎይነ ኡሻፈ ዛራዳ ኡይከ” ያግስ።

19 ኡይꬃ ኤክድ፥ ጋላት ስሚድ፥ “ሀይስ ህንተዉ እመትያ ታ አሹዋ። ሀይሳ ኦꬅሸ ታና ቆፕተ” ያግድ መንꬅድ ኤንታዉ እሚስ።

20 ሄሳዳካ፥ ካሁዋፐ ጉየ፥ ኡሻ ኤክድ፥ “ሀ ኡሻይ ህንተዉ ጉክዳ ታ ሱꬃን ግድያ ኦራꬃ ጫቁዋ። ኤርም 31:31. 21 ግዶሽን፥ ታና አꬅድ እማና ኡራ ኩሸይ ታራ እስፈ ጋይታና። ማዝ 41:9. 22 አሳ ናአይ እያዉ ጌተቶይሳ መላ ሀይቃናዉ ደኤስ፥ ሽን እያ አꬅድ እምያ ኡራ አየ!” ያግስ። 23 ኤንቲ ባንታ ግዶን፥ “ሀይሳ ኦን ኦꬃኔ” ግድ ዎል ኦይችዶሶና።

24 ቃስ ኤንታ ግዶን ግታ ግዳናይ ኦነ ግያ ፓላም መትስ።ማቶ 18:1፤ ማር 9:34፤ ሉቃ 9:46. 25 የሱሲ ኤንታኮ፥ “ደርያ ካዎት ባንታ አሳ ዎልቃን ሃሮሶና፤ ባንታ ደርያ ቦላ ጎዳተይሳታስካ ባንታና፥ ‘ሎኦ ኦይሳታ’ ያግድ ፄጎሶና። ማቶ 20:25-27፤ ማር 10:42-44. 26 ሽን ህንተ ግዶን ሄሳ መላ ግዶፖ። ህንተ ግዶን ባይራተይ ካሎዳ ሀኖ፤ ማቶ 23:11፤ ማር 9:35. ካለይስ ካለይሳዳ ሀኖ። 27 ሀኖሽን፥ ሞከይሳፈነ ሞከተይሳፈ አዉስ አꬊ? ሞከተይሳ ግደነዬ? ሽን ታኒ ህንተ ግዶን ሞከይሳ መላ። ቆን 13:12.

28 “ህንተካ ታ መቱዋን ታፐ ሻከቶና ታራ ምንድ ኤቅዳይሳታ። 29-30 ህንተ ታ ጋይታፐ ማና መላ፥ ኡያና መላነ አራታታ ቦላ ኡትድ ታማነ ናምኡ እስራኤለ ሼሻታ ቦላ ፕርዳና መላ ታ አዋይ ታና ሹምዳይሳዳ ታካ ህንተና ታ ካዎተꬃን ሹማና” ያግስ። ማቶ 19:28.

31 ካልድካ የሱሲ፥ “ስሞና፥ ስሞና፥ ፃላሄይ ህንተና ግስተዳ ሀርቃናዉ ዎስስ። 32 ሽን ታኒ ነ አማኖይ ꬋዮና መላ ነዉ ጋናታስ። ነካ ስምዳ ዎደ ነ እሻታ ምንꬃ” ያግስ።

33 ስሞን፥ “ጎዳዉ፥ ታኒ ኔራ ቃሸታናዉነ ሀይቃናዉ ጊገታስ” ያግስ።

34 የሱሲ ጰፅሮሳኮ፥ “ታ ነዉ ኦዳይስ፤ ሀች ኩቶይ ዋሳናፐ ስን ነ ታና ሄꬑ ቶሆ ካዳና” ያግስ። 35 ካልድካ፥ የሱሲ ኤንታኮ፥ “ታኒ ህንተና ኮሮጆይ፥ ካርፂትነ ጫም ባይና ኪትዳ ዎደ ህንተዉ ፓጭዳባይ ደኢ?” ያግድ ኦይችስ። ማቶ 10:9-10፤ ማር 6:8-9፤ ሉቃ 9:3.

ኤንቲ ዛሪድ፥ “አይኮይካ ፓጭቤና” ያግዶሶና።

36 እ ኤንታኮ፥ “ሀእ ኮሮጆይነ ካርፂት ደኤይ ኦይኮ፤ ማሽ ባይናይ ባ አፍላ ባይዝድ ማሻ ሻሞ። 37 ሃ ስእተ! ‘ጌላታራ ታይበትስ’ ጌተትድ ፃፈትዳይስ ታናን ፖለታናዉ በሴስ። ኤ፥ ታ ግሾ ፃፈትዳባይ ፖለተይስ ቱማትስ” ያግስ። እሳ 53:12.

38 እያ ታማረት፥ “ጎዳዉ ሀይሳን ናምኡ ማሻት ደኦሶና” ያግዶሶና።

እ፥ “ግዳና” ያግስ።

39 የሱሲ ካሰ ሜዘትዳይሳዳ ደንድድ ሻማሆ ዙማ ቦላ ከይስ። እያ ታማረት እያ ካልዶሶና። 40 ሄ በሳ ጋክዳ ዎደ፥ “ፓጨን ገሎና መላ ዎስተ” ያግስ። 41 ኤንታፈ ሹች ሆልን ጋክያ ሶ መላ ሃክድ ጉልባትድ ዎስስ። 42 “ታ አዋዉ፥ ነ ሸነ ግድኮ ሀ መቱዋ ታፐ አꬃ። ሽን ታ ሸነ ግዶፖ ነ ሸነይ ሀኖ” ያግድ ዎስስ። 43 ኪታንቾይ ሳሎፐ ቆንጭድ ምንꬅስ። 44 ዳሮ ኡንኤትድ ምንድ ዎሴስ። እያ ጫዋይካ ሱꬅ ፆክያዳ ሳአን ፆኬስ።

45 የሱሲ ዎሳ ዉርስድ ባ ታማረታኮ ይስ። ኤንቲ፥ አዛኖፐ ደንዶይሳን ዳቡርድ ꬍስክዳሽን ደምድ፥ 46 “አይስ ꬍስከቲ? ፓጨን ገሎና መላ ደንድድ ዎስተ” ያግስ።

47 እ ቡሮ ኦዳ ቦላ ደእሽን ዳሮ አሳት ይዶሶና። ታማነ ናምአታፐ እሶይ ይሁዳ ጌተተይስ ኤንታና ካለꬄስ። እ የሱሳ ዬራናዉ ማት ሺቅስ። 48 ሽን የሱሲ፥ “ይሁዳ፥ አሳ ናኣ ዬራዳ አꬃ እማኔ?” ያግስ።

49 የሱሳ ታማረት ሄ ሀኑዋ በእድ፥ “ጎዳዉ ማሻን ሾጭኖ?” ያግዶሶና። 50 ኤንታ ግዶፈ እሶይ ካህነ ሀላቃ ኦሳንቹዋ ሾጭድ ኡሻቻ ሀይꬃ ቃንፅድ የግስ።

51 ሽን የሱሲ፥ “አጋ! ድጎፍተ”*አጋ! ድጎፍተ፦ የሱሲ ሀ በሳን አጋ ያግዳይ እያ አሻናዉ ግድ አሳት ኡራ ሀይꬃ ቃንፆይሳ አጋ ቃንፆፋ ግዳይሳነ፥ ሀራት እያ ኦይካናዉ ይዳይሳታ ድጎፍተ ሀእ ኤንታ ዎደ ያግዳይሳ ናምኡ ቆፋታ ዎል ጋꬅድ ኦይክስ። ያግስ። ኡራ ሀይꬃ ቦችድ ፓꬅስ።

52 ሄሳፈ ጉየ፥ የሱሲ ባና ኦይካናዉ ይዳ ካህነ ሀላቃታኮ፥ ፆሳ ኬꬃ ናገይሳታ ሹማታኮነ ጭማታኮ፥ “ፓኖ ኦይክያ አሳዳ ማሸነ ፃምአ ኦይክድ ይደቲ? 53 ኡባ ጋላስ ፆሳ ኬꬃን ታ ህንተራ ደእያ ዎደ ታ ቦላ ኩሸ ዎꬅቤከታ። ሽን ሀይስ ꬉማ ካዎተꬃይ ሃርዳ ዎደነ ህንተ ዎደ” ያግስ። ሉቃ 19:47፤ 21:37.

54 ሄሳፈ ጉየ፥ የሱሳ ኦይክድ ካህነ ሀላቃ ዛባ ኤፍዶሶና። ጰፅሮስ ሃሆን የሱሳ ካሌስ። 55 አሳት ካህነ ሀላቃ ዛባን ታማ ኤꬅድ ዎላ ኡትዳሽን ጰፅሮስ ኤንታራ እስፈ ኡትስ። 56 እስ ጋꬍንዲያ ጰፅሮስ ታማ ማታን ኡትዳይሳ ጫዳ ፄላዳ፥ “ሀ ኡራይ እያራ ደኤስ” ያጋሱ።

57 ሽን ጰፅሮስ፥ “ሀ ማጫሰተ ታ ሄ ኡራ ኤርከ” ያግድ ካድስ።

58 ጉꬃ ዎደፐ ጉየ እስ ሀራ አደይ እያ በእድ፥ “ነካ ኤንታፈ እሱዋ” ያግስ።

ሽን ጰፅሮስ፥ “ሀ አድያዉ ታና ግድከ” ያግስ።

59 እስ ሳተ መላ ጋምእዳፐ ጉየ እስ ሀራ አደይ ትልስድ፥ “ሀ ኡራይ ጋልላፐ ግድያ ግሾ ስይ ባይና እያራ ደኤስ” ያግስ።

60 ሽን ጰፅሮስ፥ “ሀ አድያዉ፥ ነ ገይሳ ታ ኤርከ” ያግስ። እ ሄ ኦዳ ኦንጎና ደእሽን ኩቶይ ዋስስ።

61 ጎዳይ ጉየ ስሚድ ጰፅሮሳ ፄልስ። ጰፅሮስ፥ “ሀች ኩቶይ ዋሳናፐ ስን ነ ታና ሄꬑ ቶሆ ካዳና” ያግድ፥ ጎዳይ ኦድዳ ቃላ አኬክስ። 62 ጰፅሮስ ካረ ከይድ ዳሮ ኮኮርድ ዬክስ።

63 የሱሳ ናግያ አሳት እያ ለቅሶነ ደሸꬅ ኦይክዶሶና። 64 እያ አይፍያ ጎዝድ “አነ ትንብተ ኦዳ፤ ነና ደችዳይ ኦኔ?” ያግድ ኦይቾሶና። 65 ሀራ ዳሮ ጫሸ ጫይድ ካዉሾሶና።

66 ሳእ ዎንትያ ዎደ አይሁደ ቢታ ጭማት፥ ካህነ ሀላቃትነ ህገ አስታማረት ሺቅድ፥ የሱሳ ባንታ ስን ሺሽዶሶና። 67 ኤንቲ፥ “ኔኒ ክርስቶሴ? አነ ኑስ ኦዳ?” ያግድ ኦይችዶሶና።

የሱሲ፥ “ታ ኦድያኮ አማነከታ። 68 ታ ኦይችያኮ ዛረከታ። 69 ሽን አሳ ናአይ ሀይሳፈ ገደ ባጋን ዎልቃማ ፆሳ ኡሻቻ ባጋን ኡታና” ያግስ።

70 ሄ ዎደ ኡባይ፥ “ያትን፥ ኔኒ ፆሳ ናኤ?” ያግዶሶና።

እ፥ “ታ ፆሳ ናአ ግደይሳ ህንተ ግደታ” ያግስ።

71 ኤንቲ፥ “ህዛ፥ ሀራ ማርካ አይ ኮሺ? እ ባ እንፃርሳን ኦድሽን ኑ ስእዳ” ያግዶሶና።