1 ዱረ አሳይ ፆሳ ኬꬃን ሙፃታ ሳፅንያን የግሽን የሱሲ ꬎቁ ግድ አሳ በእስ። 2 ቃስ እስ ማንቆ አምእያ ናምኡ ስክና የግሽን በእድ፥ 3 “ታ ህንተዉ ቱማ ኦዳይስ፤ ሀ ማንቆ አምእያ ኡባፈ አꬃዳ እማሱ። 4 አይስ ጊኮ፥ ሀ አሳ ኡባይ ባንታዉ ደእያባፐ እምዶሶና፥ ሽን እያ ባ ፓጫፐ፥ ባዉ ደእያ አቁዋ ኡባ እማሱ” ያግስ።

5 የሱሳ ታማረታፐ እሶት እሶት ፆሳ ኬꬃይ ዳሮ ሎእያ ሹቻንነ አሳይ ፆሳስ እምዳ እሞታን ሎእዳይሳ ኦደቶሶና። 6 ሽን የሱሲ፥ “ሀ ህንተ በእያባይ ኡባይ ላለቶና፥ ሹች ሹቻ ቦላ ግምበትዳ መላ አቶና ዎደይ ያና” ያግስ።

7 ኤንትካ፥ “አስታማርያዉ፥ ሀ ኡባይ ሀናናይ አዉዴ? ቃስ ሀይስ ሀናናይሳስ ማላታይ አይቤ?” ያግድ ኦይችዶሶና።

8 የሱሲ ያግድ ኤንታዉ ዛሮ እሚስ፦ “ባለቶና መላ ናገትተ። ዳሮት፥ ‘ታኒ ክርስቶሳ፥ ዎደይ ማታትስ’ ያግሸ ታ ሱንꬃን ያና፥ ሽን ህንተ ኤንታ ካሎፍተ። 9 ህንተ ኦላባነ አሳ ጌላተꬃ ስእያ ዎደ ዳጋሞፍተ። ሄስ ስንꬃትድ ሀናናይስ አቶናባ ግድያ ግሾ ዎድያ ዉርሰꬃይ ኤለስድ ዬና” ያግስ።

10 ካልድካ፥ “ደረይ ደርያ ቦላ፥ ካዎተꬃይ ካዎተꬃ ቦላ ደንዳና። 11 ግታ ቢታ ቃፆይ ሀናና፥ ኮሻይነ ጋዶይ ዱማ ዱማ በሳን ዳራና፥ ያሽያባይነ ግታ ማላታት ሳሎፐ ቆንጫና። 12 ሽን ሀ ኡባይ ሀናናፐ ስን ታ ሱንꬃ ግሾ ግድ አሳይ ህንተና ጎዳናነ ኦይካና። አይሁደ ዎሳ ኬꬃንነ ቃሾ ኬꬃን ህንተና የጋና። ካዎታ ስንነ ደርያ ሃረይሳታ ስን ህንተና ኤፋና። 13 ሄስካ ታባ ህንተ ኤንታዉ ማርካታናዉ ሎኦ ኦገ ግዳና። 14 ሄሳ ግሾ፥ ህንተ ኦይሸትያ ዎደ ዎይግድ ዛሮ እማነ ግድ ህንተ ዎዛናን ኡንኤቶና መላ አኬክተ። ሉቃ 12:11-12. 15 አይስ ጊኮ፥ ህንተ ሞርከት ህንተራ ኤቀታናዉነ ፓላማናዉ ዳንዳኦና ዶናነ ጭንጫተꬅ ታ ህንተዉ እማና። 16 ሀር አቶሽን፥ ህንተና የልዳይሳት፥ ህንተ እሻት፥ ህንተ ዳቦትነ ላገት ህንተና አꬅድ እማና። ህንተ ግዶፈ እሶታ እሶታ ዎꬋና። 17 ታ ሱንꬃ ግሾ አሳ ኡባ ስንꬃን ህንተ እፀትዳይሳታ ግዳና። 18 ሽን ሀር አቶሽን፥ ህንተ ብናናፐ እሶይካ ꬋየና። 19 ፖሎ ዳንዳአን ህንተ፥ ህንተ ሸምፑዋ አሻና።”

20 “የሩሳላመ ካታማይ ዎታዳረን ድረትድ ኡትዳሽን ህንተ በእኮ እያዉ ꬋዮይ ማታትዳይሳ ኤርተ። 21 ሄ ዎደ ይሁዳን ደእያ ኡባይ ደርያኮ ባቃቶ፥ ካታማን ደኤይሳት ያፐ ከዮ፥ ጋፃርያን ደኤይሳት ካታማ ገሎፖ። 22 አይስ ጊኮ፥ ሀ ፃፈትዳባይ ፖለታና መላ ሄስ ፆሳይ ኩሸ ዛርያ ዎደ። ሆሰ 9:7. 23 ሳአ ቦላ ግታ መቶይ ያና፥ ሄሳንካ አሳ ቦላ ፆሳ ሀንቆይ ያና። ሄሳ ግሾ፥ ቃንꬃትዳይሳታነ ꬋንይሳታ አየ! 24 ኤንቲ ማሻን ሀይቃና፥ አሳ ኡባይ አላጋ ቢታ ድኤታና። አይሁደ ግዶና አሳ ዎደይ ፖለታና ጋካናዉ የሩሳላመይ ኤንታናን የትዳይሳ ግዳና።

25 “አዋን፥ አጌናንነ፥ ፆልንቶታ ቦላ ማላታት ሀንድ በንታና። አባፈነ ዙልያ ደሹዋፐ ደንዶይሳን ቢታን ደእያ አሳይ ኡንኤታናነ ያርካና። እሳ 13:10፤ ህዝ 32:7፤ ኤርም 2:31፤ ቆን 6:12. 26 ሳሉዋ ዎልቃት ቡቀታና ግሾ አሳይ ያሻንነ ቢታ ቦላ አይብ ሀናንደሻ ግድ ናጎን ባንታና ባለታና። 27 ሄ ዎደ አሳ ናአይ ዎልቃንነ ግታ ቦንቾን ሻራራ ይሽን ኤንቲ በአና። ዳነ 7:13፤ ቆን 1:7. 28 ህንተ አቶተꬃይ ማታትዳ ግሾ ሀ ሀኖት ፖለተꬅ ኦይክያ ዎደ ጊገት ኤቅተ፥ ህንተ ሁጵያ ꬎቁ ኦꬅድ ፄልተ” ያግስ።

29 ካልድካ፥ ሀይሳዳ ግድ ሌምሶ ኦድስ፤ “ባላሰ ምꬅነ ሀራ ምꬃታ ኡባ በእተ። 30 ኤንቲ አጭያ ዎደ ቶርቸይ ማታትዳይሳ ህንተ ኤሬታ። 31 ሄሳዳ ሀ ሀኖት ፖለትሽን ህንተ በእኮ ፆሳ ካዎተꬃይ ማታትዳይሳ ኤርተ።

32 “ታ ህንተዉ ቱማ ኦዳይስ፤ ሀ ኡባይ ፖለታና ጋካናዉ ሀ የለተꬃይ አና። 33 ሳሎይነ ሳእ አꬋና፥ ሽን ታ ቃላይ አና።

34 “ህዛ፥ ꬋስ ባይና ደኦን፥ ኡሻ ዳሮንነ ዱሳባስ ኡንኤተꬃን ህንተ ዎዛናይ ኦይከቶና መላነ ሄ ቃማይ አኬኮና ፅሄዳ ህንተ ቦላ ጋኮና መላ ናገትተ። 35 ሄ ቃማይ ቢታ ኩመꬃን ደእያ ኡባ ቦላ ጋካና። 36 ሄሳ ግሾ፥ ያ ኢታፐ አታናዉነ አሳ ናአ ስንꬃን ኤቃናዉ ዳንዳአና መላ ኡባ ዎደ ምንድ ዎስተ” ያግስ።

37 ጋላስ ጋላስ የሱሲ ፆሳ ኬꬃን ታማርስሸ፥ ቃማ ቃማ ሻማሆ ዙማ ቦላ ከይድ አቄስ። ሉቃ 19:47. 38 አሳ ኡባይ እያ ስአናዉ ዎንታ ጉራ እያኮ ፆሳ ኬꬅ ዮሶና።