20
የሱሳ ማታይ ኦይሸተꬃ
(ማቶ 21:23-27፤ ማር 11:27-33)
1 እስ ጋላስ የሱሲ ፆሳ ኬꬃን አሳ ታማርስሽንነ ዎንገላ ማርካትሽን፥ ካህነ ሀላቃት፥ ህገ አስታማረትነ ደርያ ጭማት እስፈ እያኮ ይድ፥ 2 “ኔኒ ሀይሳታ አይብ ማታን ኦꬅያኮ ኑስ ኦዳ። ሀ ማታ ነዉ እምዳይ ኦኔ?” ያግድ ኦይችዶሶና።
3 እ ኤንታኮ፥ “ታካ ህንተና እስባ ኦይቻና፥ አነ ታዉ ዛርተ። 4 ፃማቅያ ዮሃንሳ ፅንቃተይ ፆሳፈየ አሳፔ?” ያግስ።
5 ኤንቲ ዎል ግዶን ያግድ ዞረትዶሶና፦ “ፆሳፈ ጊኮ ያትን፥ አይስ አማንበከቲ?” ያጋና።
6 “አሳፐ ጊኮ፥ አሳ ኡባይ ዮሃንስ ናበ ግደይሳ አማንያ ግሾ ኑና ሹቻን ጫዳና።”
7 ያንያ ግሾ፥ “አዉፐኮ ኑ ኤሮኮ” ያግድ ዛርዶሶና።
8 የሱሲ ዛሪድ፥ “ህዛ፥ ታካ አይ ማታን ሀይሳታ ኦꬅያኮ ህንተዉ ኦድከ” ያግስ።
ጎሻንቾታ ሌምሶ
(ማቶ 21:33-46፤ ማር 12:1-12)
9 ሄሳፈ ጉየ፥ የሱሲ ያግድ ሀ ሌምሱዋ አሳስ ኦድስ፦ “እስ አስ ዎይነ ቶክስ። ጎሻንቾታስ ከራ እምድ ዳሮ ዎደ ጋምእድ ያናዉ ሀራ ቢታ ብስ። እሳ 5:1. 10 ዎይነ አይፍያ ማፅያ ዎደይ ጋክን ዎይነ አይፍያፐ እያዉ የዳና መላ ጎሻንቾታኮ ባ አይልያ ኪትስ። ሽን ጎሻንቾት ሄ አይልያ ኦይክድ ዋꬍድ መላ ኩሸ የድዶሶና። 11 ካልድካ ሀራ አይልያ ኪትስ። ቃስ ጎሻንቾት እያ ዋꬍድ፥ ካዉሽድ መላ ኩሸ የድዶሶና። 12 ሀእካ ዛሪድ ሄꬓንꬆ አይልያ ኪትስ። ጎሻንቾት እያካ ማዱንፅስድ ዎይነ ጋድያ ግዶፈ ጋፃ ከስድ የግዶሶና።
13 “ዎይነ ጋድያ ጎዳይ፥ ‘ያትን ታ አይ ኦꬆ? አነ ቃስ ታ ዶስያ ታ ናአ የዳና፤ ኦን ኤር ኤንቲ እያ ቦንቾና አጎኮና’ ያግስ።
14 “ሽን ጎሻንቾት ኡራ ናአ በእዳ ዎደ፥ ‘ሀይስ እያ ላታናይሳ፥ ሃ ዪተ እያ ዎꬋና፥ ያትኮ ላታይ ኑስ ግዳና’ ያግድ ዞረትዶሶና። 15 ዎይነ ጋድያ ግዶፈ ጋፃ ከስድ ዎꬍዶሶና። ያትን፥ ዎይነ ጋድያ ጎዳይ ሄ አሳታ ዋታኔ? 16 ይድ ሄ ጎሻንቾታ ꬋይሳና፥ ዎይነ ጋድያ ሀራ አሳታስ እማና። አሳይ ሄሳ ስእዳ ዎደ ‘ሽንቻለ ሄሳ መላባ ጋꬆፎ’ ያግዶሶና።
17 “የሱሲ ኤንታ ጫድ ፄልድ፥
“ ‘ያትን፥ ግምበ ኬፅያ አሳት ቦርዳ ሹቻይ፥
ኬꬃስ ማላነ ምኖተꬅ እምያ ኡባፈ አꬍያ ሹች ግድስ’
ጌተትድ ፃፈትዳይሳ ብርሸꬃይ አይቤ?ማዝ 118:22. 18 ሄ ሹቻ ቦላ ኩንድያ ኡባይ ቆፀታና፥ ሹቻይ እያ ቦላ ዎꬍያ ኡባይ ሊቃና” ያግስ።
19 ህገ አስታማረትነ ካህነ ሀላቃት ሀ ሌምሶይ ኦደትዳይ ኤንታ ቦላ ግደይሳ ኤርድ ሄ ዎደ እያ ኦይካናዉ ኮይዶሶና፥ ሽን አሳስ ባብዶሶና።
ጊራባ
(ማቶ 22:15-22፤ ማር 12:13-17)
20 ሄሳ ግሾ፥ የሱሳ ደርያ ሃርያ ሮመ ካዋ ማታስ አꬅድ እማናዉ ኮይድ እያ ዶናፐ ባላ ቃላ ናጎሶና። ሄሳ ፖልሳናዉ ፅሎ ዳንድ ጭምያ አሳታ እያኮ ኪትዶሶና። 21 ኪተትድ ብዳ አሳት፥ “አስታማርያዉ፥ ኔኒ ኦደይስነ ታማርሰይስ ልከ ግደይሳ፥ ቃስ ፆሳ ኦግያ ቱማተꬃን ታማርሰይሳነ ኦናካ ሻኮናይሳ ኑ ኤሮስ። 22 ሀኖሽን፥ ሮመ ካዋስ ጊራ ጊራናዉ በሲ በሰኔ?” ያግድ እያ ኦይችዶሶና።
23 ሽን እ ኤንታ ዎዛና ኢታተꬃ ኤርዳ ግሾ፥ 24 “አነ ታና እስ ሳንትመ በስተ፥ እያ ቦላ ደእያ ምስለይነ ሱንꬃይ ኦደባዬ?” ያግስ።
ኤንቲ ዛሪድ፥ “ሮመ ካዋ ቄሳረይሳ” ያግዶሶና።
25 እ ዛሪድ፥ “ያትኮ፥ ቄሳረባ ቄሳረስ፥ ፆሳባ ፆሳስ እምተ” ያግስ።
26 ሄሳ ግሾ፥ እ ዛርዳ ዛሩዋን አሳ ስንꬃን ባላ ደማናዉ ዳንዳእቦኮና። እያ ዛሩዋን ማላለትድ ስእ ግዶሶና።
ሀይቆፐ ደንዶባ
(ማቶ 22:23-33፤ ማር 12:18-27)
27 ሀይቆፐ ደንዶይ ባዋ ግያ ሳዱቃወታፐ እሶት እሶት የሱሳኮ ይድ፥ ሀዋ 23:8. 28 “አስታማርያዉ፥ እስ አስ ማቾ ኤክድ ናአ የሎና ሀይቅኮ፥ እያ እሻይ ሄ ማጫስዉ ኤክድ ናይታ የልድ ባ እሻስ ኮቸ አሻና መላ ሙሰይ ፃፍስ። ዛረ 25:5. 29 ሄኮ ላፑን እሻት ደኦሶና። ኮይሮይስ ማቾ ኤክድ ናአ የሎና ሀይቅስ። 30 ናምአንꬆይ እዮ ኤክድ ናአ የሎና ሀይቅስ። 31 ሄꬓንꬆይካ ሄሳꬆ ሀንስ። ላፑናት ኡባይ ሄሳዳ ሀንድ እዮ ኤክዶሶና፥ ሽን ናአ የሎና ሀይቅዶሶና። 32 ዉርሰꬃን ማጫስያ ሀይቃሱ። 33 ህዛ፥ ላፑን አደይ እዮ ኤክዳ ግሾ ሀይቆፐ ደንድያ ዎደ እያ ኦደ ማቾ ግዳኔ?” ያግድ ኦይችዶሶና።
34 የሱሲ ዛሪድ፥ “አሳይ ሀ ዎድያን ኤኮሶናነ ገሎሶና። 35 ሽን ሀይቆፐ ደንድድ ያና አላምያን ዳናዉ በሰይሳት ኤኮኮናነ ገሎኮና። 36 ኤንቲ ኪታንቾ መላ ግድያ ግሾ ስንꬃፈ ሀይቆኮና። ሀይቆፐ ደንድዳ ግሾ ኤንቲ ፆሳ ናይታ። 37 ሙሰይ ጎዳ፥ ‘አብራሃመ ጎዳ፥ ይሳቃ ጎዳ፥ ያይቆባ ጎዳ’ ግድ ቱሽያ ግዶን ፁገትያ ታማ ታርክያ ፃፍዳይሳን ሀይቅዳ አሳይ ደንደይሳ በሴስ። ከሳ 3:6. 38 ኡባይ እያዉ ደኦን ደኤይሳታ ግድያ ግሾ እ ደኦን ደኤይሳታ ጎዳፐ አትሽን፥ ሀይቅዳይሳታ ጎዳ ግደና” ያግድ ዛርስ።
39 ህገ አስታማረታፐ እሶት እሶት፥ “አስታማርያዉ፥ ሎኦባ ኦዳዳሳ” ያግዶሶና። 40 ሄሳፈ ጉየ፥ ሀራ ኦይሾ ኦይቻናዉ ያይዶሶና።
ክርስቶስ ኦደ ናኤ?
(ማቶ 22:41-46፤ ማር 12:35-37)
41 እያፐ ካልድ የሱሲ ኤንታኮ፥ “አሳይ ክርስቶሳ ዋትድ ዳዊታ ናአ ያጎና? 42-43 አይስ ጊኮ፥ ዳዊቲ ባ ሁጰን ባ ማፃፋን፥
“ ‘ፆሳይ ታ ጎዳኮ “ታ ነ ሞርከታ
ነ ቶሆይ የꬍያሶ ኦꬃና ጋካናዉ
ታፐ ኡሻቻ ባጋን ኡታ” ግስ’ ያግስ። ማዝ 110:1.
44 “ህዛ፥ ዳዊቲ ክርስቶሳ፥ ‘ጎዳ ግድ ፄግሸ እያዉ ናአ ዋንድ ግዲ?’ ” ያግስ።
45 ደረይ ኡባይ ስእሽን ባ ታማረታኮ፥ 46 “አዱሳ ማኦ ማእድ ዩሸ ዶሰይሳታፐ፥ ግያን ቦንቾ ሳሮꬆ፥ አይሁደ ዎሳ ኬꬃን ቦንቾ ኦይደ፥ ሞከትያ ሶንካ ቦንቾ በሲ ኮይያ ህገ አስታማረታፐ ናገትተ። 47 ኤንቲ አምኤታ ኬꬃ ካሎዮሶና፥ ፅሎ አስ ዳንድ ዎሳ አዱሶሶና። ሄሳት ኡባፈ አꬍያ ኢታ ፕርዳ ኤካና” ያግስ።