1 የሱሲ ዮሃንሳፐ ዳሮ ካልያ አሳ ባኮ ሺሸይሳነ ፃማቀይሳ ፋርሳወት ስእዶሶና። 2 ግድኮካ የሱሳ ታማረት ፃማቅዶሶናፐ አትሽን፥ የሱሲ ኦናካ ፃማቅቤና። 3 የሱሲ አሳይ እያባ ገይሳ ስእዳ ዎደ ይሁዳፐ ደንድድ ጋልላ ብስ። 4 እ፥ ጋልላ ብሸ ሳማረራ አꬋናይስ አቶናባ ግድስ።

5 ሄሳ ግሾ፥ ያይቆብ ባ ናኣ ዮሰፋስ እምዳ ጋድያ ማታን ደእያ ስካረ ጌተትያ ሳማረ ካታማ ብስ። መ 33:19፤ እያ 24:32. 6 ሄ በሳን ያይቆባ ሃꬃ ኦላይ ደኤስ። የሱሲ ሄመꬃን ዳቡርድ ሄ ሃꬃ ኦላ ማታን ኡትስ። ሄ ዎደ ሳእ ኡሱፑን ሳተ ሄራ።

7 እስ ሳማረ ካታማ ማጫስ ሄ ኦላፈ ሃ ትካናዉ ያሱ። የሱሲ ሄ ማጫሴኮ፥ “ታና ሃ ኡሻርክ” ያግስ። 8 ሄ ዎደ የሱሳ ታማረት ካꬅ ሻማናዉ ካታማ ብዶሶናሽን።

9 ሄ ማጫስያ ዛራዳ፥ “ኔኒ አይሁደ አሰ ግዳሸ፥ ሳማረ ማጫስ ግድያ ታና ዋናዳ ሃ ኡሻ ጋይ?” ያጋሱ። ሄሳ እያ ግዳይ አይሁደት ሳማረታራ ጋሄቶና ግሾሳ። እዝ 4:1-5፤ ናህ 4:1-2.

10 የሱሲ ዛሪድ፥ “ኔኒ ፆሳ እሞታነ ሃ ታና ኡሻ ገይስ ኦነኮ ኤርዳባ ግድያኮ እያ ነ ዎሳና፤ እካ ነዉ ደኦ እምያ ሃꬅ እማናሽን” ያግስ።

11 ማጫስያ ዛራዳ፥ “ጎዳዉ፥ ነዉ ዱቅያባይ ባዋ፤ ኦላይካ ዝቃ። ያትን፥ ደኦ እምያ ሃꬅ ነ አዉፐ ኤካኔ? 12 ኑስ ሀ ሃꬃ ኦላ እምዳ ኑ አዋ ያይቆባፐ ኔኒ አꬋይ? እ፥ እያ ናይትነ እያ መሄይ ሀ ኦላፈ ኡይዶሶና” ያጋሱ።

13 የሱሲ፥ “ሀ ሃꬃፈ ኡይዳ ኦንካ ዛር ሳሞታና። 14 ሽን ታኒ እማና ሃꬃ ኡያ ኦንካ ኡባካ ሳሞተና። ታኒ እሚያ ሃꬃይ እያ ግዶን መርና ደኦ እምያ ጎግያ ፑልቶ ግዳና” ያግስ።

15 ማጫስያ ዛራዳ፥ “ጎዳዉ፥ ታኒ ሳሞቶና መላነ ሃ ትካናዉ ሀ በሳ ዮና መላ ታዉ ሄ ሃꬃ እማ” ያጋሱ።

16 የሱሲ ኢኮ፥ “ባዳ ነ አዝና ፄጋዳ ያ” ያግስ።

17 ማጫስያ ዛራዳ፥ “ታዉ አዝን ባዋ” ያጋሱ።

የሱሲ ኢኮ፥ “ታዉ አዝን ባዋ ጋሸ ባላባካ። 18 ነዉ ካሰ እቻሹ አዝናት ደኦሶና። ሀእ ኔራ ደእያ አደይ ነ አዝና ግደና። ኔኒ ሀእ ቱማ ኦዳዳሳ” ያግስ።

19 ማጫስያ ዛራዳ፥ “ጎዳዉ፥ ኔኒ ናበ ግደይሳ ታኒ ኤራስ። 20 ኑ አዋት ሀ ዙማ ቦላ ፆሳ ጎይንዶሶና። ሽን ህንተ አይሁደት አስ ፆሳስ ጎይናናዉ በሲያ በሳይ የሩሳላመና ጌታ” ያጋሱ።

21 የሱሲ፥ “ሀ ማጫሰተ ታና አማና፤ ሀ ዙማ ቦላ ዎይኮ የሩሳላመን አዋስ ህንተ ጎይኖና ዎደይ ያና። 22 ህንተ ሳማረት ኤሮናይሳ ጎይነታ። ሽን ኑኒ አቶተꬃይ አይሁደፐ ያ ግሾ ኑ ኤረይሳ ጎይኖስ። 23 ሽን አዋስ ቱማን ጎይነይሳት አያናንነ ቱማተꬃን ጎይናና ዎደይ ማታትስ፤ ሀእካ ጋክስ። ህዛ፥ አዋይ ኮየይ ሀይሳ መላ ኦግያን ጎይነይሳታ። 24 ፆሳይ አያና፤ እያዉ ጎይነይሳት አያናንነ ቱማተꬃን ጎይናናዉ በሴስ” ያግስ።

25 ማጫስያ ዛራዳ፥ “ክርስቶስ ያናይሳ ታኒ ኤራይስ። እ ያ ዎደ ኑስ ኡባባ ኦዳና” ያጋሱ።

26 የሱሲ፥ “ሀ ኔራ ኦደተይ ታኒ እያ” ያግስ።

27 ኤንቲ ኦደትሽን፥ የሱሳ ታማረት ብዳ በሳፈ ስምዶሶና። የሱሲ ማጫሳራ ኦደትሽን ኤንቲ በእድ ዳሮ ማላለትዶሶና። ሽን ማጫሴኮ፥ “አይ ኮያይ?” ዎይኮ የሱሳኮ፥ “ኢራ አይስ ኦደታይ?” ግዳይ ኦንካ ባዋ።

28 ሄሳፈ ጉየ፥ ማጫስያ ባ ሃꬃ ኦቱዋ አጋዳ ጉየ ካታማ ባዳ አሳኮ፥ 29 “ታኒ ኦꬅዳባ ኡባ ታዉ ኦድዳ አድያ በአናዉ የꬍተ። እ ክርስቶሳ ግዳንደሻ?” ያጋሱ። 30 አሳይ ካታማፐ ከይድ የሱሳኮ ብዶሶና።

31 ሄስ ሀንሽን፥ እያ ታማረት የሱሳኮ፥ “ጉꬃባ ማርክ” ያግድ ዎስዶሶና።

32 ሽን እ፥ “ታዉ ህንተ ኤሮና ካꬅ ታ መይስ ደኤስ” ያግስ።

33 ሄሳ ግሾ፥ እያ ታማረት ባንታ ግዶን፥ “እያዉ ምያባ አስ ኤሆና አገና” ያግዶሶና።

34 የሱሲ ኤንታኮ፥ “ታ ካꬃይ ታና ኪትዳይሳ ሸንያ ኦꬃናይሳነ እያ ኦሱዋ ፖላናይሳ። 35 ህንተ፥ ‘ኦይዱ አጌናፐ ጉየ ካꬃይ ጫከታና’ ጌከትዬ? ሽን ታኒ ህንተዉ ኦዳይስ፤ ካꬃይ ካፅድ ሺሾስ ጋክዳይሳ ሎይꬅ ፄልተ። 36 ዘረይስነ ጫከይስ እስፈ ኡፋይታና መላ ጫከይስ ዳሞዝያ ኤኬስ ቃስ ካꬃ መርና ደኦስ ሺሼስ። 37 ህዛ፥ ‘እሶይ ዘሬስ፤ ሀንኮይ ቃስ ጫኬስ’ ግያ ኦዳይ ቱማ። 38 ህንተ ዳቡርቦናይሳ ሺሻና መላ ታኒ ህንተና ኪታስ። ሀራት ኦꬅ ዳቡርዳሱዋን ገልድ ህንተ ኤንታ ዳቡራ አይፍያ ኤክደታ” ያግስ።

39 ማጫስያ፥ “እ፥ ታኒ ኦꬅዳ ኡባባ ኦድስ” ጋዳ ማርካትዳ ግሾ ሄ ካታማን ደእያ ሳማረ አሳፐ ዳሮት የሱሳ አማንዶሶና። 40 ሳማረ አሳይ የሱሳኮ ይድ፥ ባንታ ማታን ጋምአና መላ የሱሳ ዎስን እ ያን ናምኡ ጋላስ ኡትስ።

41 እ ኦድያ ቃላ ግሾ ካሰይሳፈ ዳሮ አሳይ አማንዶሶና። 42 ቃስ ኤንቲ ማጫሴኮ፥ “ሀእ ኑ አማነይ ኑ ሁጰን እ ገይሳ ስእዳ ግሾሳፈ አትሽን፥ ኔኒ ማርካትዳ ግሾሳ ግደና። ቃስ እ ቱማ ሀ አላምያ አሸይሳ ግደይሳ ኑኒ ኤርዳ” ያግዶሶና።

43 ናምኡ ጋላሳፐ ጉየ፥ የሱሲ ያፐ ከይድ ጋልላ ቢታ ብስ። 44 የሱሲ ባ ሁጰን፥ “ናበይ ባ ቢታን ቦንቸተና” ያግድ ካሰትድ ኦድስ። ማቶ 13:57፤ ማር 6:4፤ ሉቃ 4:24. 45 የሱሲ ጋልላ ጋክዳ ዎደ ጋልላ አሳይ እያ ሞክዶሶና። አይስ ጊኮ፥ ፓስካ ባኣለ ቦንችያ ጋላስ ኤንቲ የሩሳላመን ደእያ ግሾ እ ኦꬅዳባ ኡባ በእዶሶና። ዮሀ 2:23.

46 የሱሲ ሃꬃ ዎይነ ኡሽ ላምዳ በሳ፥ ጋልላን ደእያ ቃና ካታማ ብስ። ቅፍርናሆማን ካዎ ኬꬃን ኦꬅያ እስ ሹማስ ናአይ ሀርገትስ። ዮሀ 2:1-11. 47 የሱሲ ይሁዳፐ ጋልላ ይዳይሳ ሄ ሹማይ ስእድ እያኮ ይስ። ሀይቃናዉ ማትዳ ባ ናኣ ብድ ፓꬃና መላ የሱሳ ዎስስ።

48 የሱሲ ሹማኮ፥ “ፆሳይ ኦꬅያ ማላታታነ ኦራꬃባታ በኦና ደእሸ ህንተ ኡባራካ አማነከታ” ያግስ።

49 ሹማይ ዛሪድ፥ “ጎዳዉ፥ ታ ናአይ ሀይቆና ደእሽን ታራ የꬋርክ” ያግስ።

50 የሱሲ፥ “ነ ሶ ባ፤ ነ ናአይ ፓፃና” ያግስ።

ሄ ሹማይ የሱሲ ግዳይሳ አማንድ ባ ሶ ብስ። 51 እ ባ ሶ ብሽን እያ አይለት እያኮ ይሸ እያራ ኦገን ጋሄትድ፥ “ነ ናአይ ፓፅስ” ግዶሶና።

52 እ ባ አይለታ ባ ናኣስ አይ ሳተን ሎእዳኮ ኦይችስ። ኤንቲ ዛሪድ፥ “ዝነ ላፑን ሳተን ምሻይ አግስ” ያግዶሶና። 53 ናኣ አዋይ የሱሲ ባኮ፥ “ነ ናአይ ፓፃና” ግዳይ ሄ ሳትያን ግደይሳ አኬክስ። ሄሳ ግሾ፥ እነ እያ ሶ አሳ ኡባይ አማንዶሶና።

54 ሄስ የሱሲ ይሁዳፐ ጋልላ ይድ ኦꬅዳ ናምአንꬆ ማላታ።