1 ሄሳፈ ጉየ፥ የሱሲ አይሁደት ቦንችያ ባልያ ቦንቻናዉ የሩሳላመ ብስ። 2 የሩሳላመን ዶርሳ ፐንግያ ማታን እብራወꬆ ዶናን ቤተሳይዳ ግያ ተቀትዳ ሃꬅ ደኤስ። ሄ ተቀት ኡትዳ ሃꬃ ማታን እቻሹ ሸምፕያ በሳት ደኦሶና። 3 [ሄሳን ሃꬃይ ቃፃናይሳ ናግያ] ዳሮ ሀርጋንቾት፥ ቆቀት፥ ዎበትነ ጉንዳት ዝንእዶሶና። 4 [አይስ ጊኮ፥ እስ እስ ቶሆ ጎዳ ኪታንቾይ ተቀትዳ ሃꬃን ዎꬍድ ሃꬃ ቃꬄስ። ሃꬃይ ቃፅያ ዎደ ኮይሮ ገልዳ ኡራይ ባና ኦይክዳ አይ ሀርገፈካ ፓፄስ።]*እስ እስ በን ማፃፋት ፓይዶ ሄꬓስ ኮይሮ ባጋነ ፓይዶ ኦይዳ ጉጆኮና። 5 ሄ በሳን ሀስታማነ ሆስፑን ላይꬅ ሀርገትዳ እስ አደይ ደኤስ። 6 የሱሲ ያን ዝንእዳ አድያ በእድ፥ ቃስ ዳሮ ዎደ ሀርገትዳይሳ ኤርድ አድያኮ፥ “ፓፃናዉ ኮያይ?” ያግስ።

7 ሀርጋንቾይ ዛሪድ፥ “ጎዳዉ፥ ሃꬃይ ቃፅያ ዎደ ታና ሃꬃን የግያ አስ ባዋ። ታኒ ገላና ሀንያ ዎደ ሀራይ ታፐ ስንꬃትድ ገል ክቼስ” ያግስ።

8 የሱሲ እያኮ፥ “ደንዳ ኤቃ፤ ነ አልጋ ቶካዳ ባ” ያግስ። 9 አደይ ኢራካ ፓፅስ፤ ባ አልጋ ቶክድ ብስ።

ሄስ ሳምባታ ጋላሳን ሀንስ። 10 ሄሳ ግሾ፥ አይሁደት ፓፅዳ አድያኮ፥ “ሀች ሳእ ሳምባታ፤ ኔኒ ነ አልጋ ቶከይስ ዎጋ ግደና” ያግዶሶና። ናህ 13:19፤ ኤርም 17:21.

11 ሽን አደይ፥ “ታና ፓꬅዳይስ፥ ነ አልጋ ቶካዳ ባ ግስ” ያግድ ዛርስ።

12 ኤንቲ እያኮ፥ “ነና፥ ነ አልጋ ቶካዳ ባ ግዳይ እ ኦኔ?” ያግድ ኦይችዶሶና።

13 ሽን የሱሲ ሄ በሳን ዳሮ አሳ ግዶራ ኤርሶና ካንꬅድ ብዳ ግሾ አደይ ባና ፓꬅዳይ ኦነኮ ኤረና። 14 የሱሲ ጉየፐ ሄ አድያ ፆሳ ኬꬃን ደምድ፥ “ሄኮ፥ ኔኒ ፓፃዳሳ፤ ሀይሳፈ ኢታባይ ነና ጋኮና መላ ዛራዳ ናጋራ ኦꬆፋ” ያግስ። 15 ሄሳፈ ጉየ፥ አደይ ብድ ባና ፓꬅዳይስ የሱሳ ግድዳይሳ አይሁደታስ ኦድስ።

16 የሱሲ ሄሳ ሳምባታ ጋላስ ኦꬅዳ ግሾ፥ አይሁደት የሱሳ ጎዳ ኦይክዶሶና። 17 የሱሲ ዛሪድ፥ “ታ አዋይ ኡባ ዎደ ኦꬄስ፤ ታካ ኦꬃናዉ በሴስ” ያግስ።

18 የሱሲ ሳምባታ ቦንቾና ግሾ ፃላላስ ግዶናሽን ፆሳይ ባ አዋ ግድ ባና ፆሳራ ጊግስዳ ግሾ፥ አይሁደት እያ ዎꬋናዉ ካሰፐ ምንꬅድ ኮይዶሶና።

19 የሱሲ ዛሪድ፥ “ታኒ ህንተዉ ቱማ ኦዳይስ፤ ናአይ ባርካ አይኮካ ኦꬃናዉ ዳንዳኤና። እ ባ አዋይ ኦꬅሽን በኦይሳ ፃላላ ኦꬄስ። አዋይ ኦይሳ ናአይካ ኦꬄስ። 20 አዋይ ባ ናኣ ዶስያ ግሾ እ ኦꬅያ ኦሶ ኡባ ባ ናኣ በሴስ። ህንተ ማላለታና መላ እ ሀይሳፈ አꬍያ ኦሶ ባ ናኣ በሳና። 21 አዋይ ሀይቅዳይሳታ ሀይቆፐ ደንꬅድ ኤንታዉ ደኦ እመይሳዳ ናአይካ ባ ኮየይሳታስ ደኦ እሜስ። 22 አዋይ ናኣስ ፕርዳ ማታ ኡባ እሚስፐ አትሽን፥ እ ኦናካ ፕርደና። 23 አሳ ኡባይ አዋ ቦንቸይሳዳ ናኣካ ቦንቻና። ናኣ ቦንቾና ኦንካ ናኣ ኪትዳ አዋካ ቦንቸና።

24 “ታኒ ህንተዉ ቱማ ኦዳይስ፤ ታ ቃላ ስኤይሳስነ ታና ኪትዳይሳ አማነይሳስ መርና ደኦይ ደኤስ። እ ሀይቆፐ ደኦን ፕንዳ ግሾ ፕርደተና። 25 ታኒ ህንተዉ ቱማ ኦዳይስ፤ ሀይቅዳ አሳይ ፆሳ ናኣ ቃላ ስእያ ዎደይ ያና፤ ሄስካ ሀእ። ሄ ቃላ ስኤይ ደኦን ዳና። 26 አዋይ ደኦስ ፑልቶ ግድዳይሳዳ ናኣካ ደኦስ ፑልቶ ኦꬅስ። 27 ናአይ አሳ ናአ ግድያ ግሾ አዋይ ናኣስ ፕርዳ ማታ እሚስ።

28 “ዱፎን ደኤይሳት እያ ቃላ ስእድ ደንድያ ዎደይ ያና ግሾ ሀይሳን ማላለቶፍተ። 29 ሎኦ ኦꬅዳይሳት ደኦን ዳናዉ ቃስ ኢታ ኦꬅዳይሳት ፕርዳ ኤካናዉ ዱፎፐ ደንዳና። ዳነ 12:2.

30 “ታኒ ታ ማታን አይብባካ ኦꬃናዉ ዳንዳእከ። ፆሳይ ታዉ ኦድዳይሳዳ ፕርዳይስ። ታኒ ታና ኪትዳይስ ኮያባ ኦꬃይስፐ አትሽን፥ ታ ኮያባ ኦꬆና ግሾ ታ ፕርዳይ ቱማ።

31 “ታኒ ታባ ማርካትኮ ታ ማርካተꬃይ ቱማ ግደና። 32 ታባ ማርካትያ ሀር ደኤስ፤ እ ታባ ማርካተይስ ቱማ ግደይሳ ታኒ ኤራይስ።

33 “ህንተ ዮሃንሳኮ አሰ ኪትን እ ቱማስ ማርካትስ። ዮሀ 1:19-27፤ 3:27-30. 34 ታኒ ሄሳ ህንተዉ ኦደይ፥ ህንተ አታና መላ ጋዳፐ አትሽን፥ አሳ ማርካተꬅ ታዉ ኮሽን ግደና። 35 ዮሃንስ ሙቃዳዳ ኤፅሸ ፖእስ። ህንተ ጉꬃ ዎደ እያ ፖኡዋን ኡፋይትደታ።

36 “ሽን ታዉ ዮሃንሳፐ አꬍያ ማርክ ደኤስ። ታኒ ኦꬃና መላ ታ አዋይ ታዉ እምዳ ኦሶት ታባ ማርካቶሶና፤ አዋይ ታና ኪትዳይሳ ቆንጭሶሶና።

37 “ቃስ ታና ኪትዳ አዋይካ ባ ሁጰን ታባ ማርካቴስ። ህንተ እያ ቃላ ኡባራካ ስእቤከታ ዎይኮ እያ ማላ በእቤከታ። ማቶ 3:17፤ ማር 1:11፤ ሉቃ 3:22. 38 እ ኪትዳይሳ ህንተ አማኖና ግሾ እያ ቃላይ ህንተ ዎዛናን ባዋ።

39 “ጌሻ ማፃፋታፐ መርና ደኦ ደማናባ ህንተዉ ዳንን ኤንታ ፕልጌታ፤ ኤንቲ ታባ ማርካቶሶና። 40 ሽን ህንተ ደኦ ደማናዉ ታኮ ያናዉ ኮየከታ።

41 “አሳፐ ታኒ ቦንቾ ኮይከ። 42 ሽን ታኒ ህንተ ዎዛናን ፆሳ ሲቆይ ባይናይሳ ኤራይስ። 43 ታኒ ታ አዋ ማታን ያስ፥ ሽን ታና ሞክበከታ። ሀራይ ባ ማታን ያ ዎደ እያ ሞኬታ። 44 ህንተ እሶይ እሱዋፈ ቦንቾ ኮየይሳት፥ እስ ፆሳፈ ያ ጋላታ ኤካናዉ ኮዮናይሳት፥ ዋንድ ታና አማናናዉ ዳንዳኤቲ?

45 “ታኒ ታ አዋ ስንꬃን ህንተና ሞትያባ ህንተዉ ዳኖፖ። ህንተና ሞታናይ ህንተ ኡፋይሳን ናግያ ሙሰ። 46 ህንተ ሙሰ አማንዳባ ግድያኮ እ ታባ ፃፍዳ ግሾ ታናካ አማናናሽን። 47 ሽን ህንተ እ ፃፍዳይሳ አማኖና እፅኮ ታ ቃላ ዋትድ አማናኔ?” ያግስ።