1 ሄሳፈ ጉየ፥ የሱሲ ፅብራዶሳ ጌተትያ ጋልላ አባፈ ሄፍንꬅ ፕንስ። 2 እ ሀርጋንቾታ ፓሶን ኦꬅዳ ማላታ በእዳ ግሾ፥ ዳሮ አሳይ እያ ካልዶሶና። 3 የሱሲ ዙማ ቦላ ከይድ፥ ያን ባ ታማረታራ እስፈ ኡትስ። 4 አይሁደት ቦንችያ ፓስካ ባኣለ ጋላሳይ ጋክስ። 5 የሱሲ ዳሮ አሳይ ባኮ የይሳ በእድ ፍልጶሳኮ፥ “ሀ አሳ ኡባ ሙዛናዉ ግድያ ካꬅ አዉፐ ሻማኔ?” ያግስ። 6 እ ሄሳ ፍልጶሳ ፓጫናዉ ግስፐ አትሽን፥ እ ባ ሁጰን አይ ኦꬃነኮ ኤሬስ።

7 ፍልጶስ ዛሪድ የሱሳኮ፥ “ሀር አቶሽን፥ ሁጰን ሁጰን፥ እስ እስ ባርስ ጋꬃናዉ፥ ናምኡ ፄቱ ድናረን *ድናረ፦ እስ ድናረይ እስ አስ እስ ጋላስ ኦꬅ ፔእድ ኤክያ ሚሸ። ናምኡ ፄቱ ድናረይ እስ አስ ላይꬃ ባጋ ኦꬅድ ኤክያ ሚሸ ኬና። (ማቶ 20:2) ፄልተ። ኡይꬁ ሻምንካ ግደና” ያግስ።

8 ቃስ የሱሳ ታማረታፐ እሶይ፥ ስሞን ጰፅሮሳ እሻይ እንድርያስ፥ 9 “እቻሹ ባንጋ ኡይꬅነ ናምኡ ሞሎ ኦይክዳ እስ ናአይ ሀይሳን ደኤስ፥ ሽን ሀ አሳ ኡባስ ሄስ አይ ማዳኔ?” ያግስ።

10 የሱሲ ባ ታማረታኮ፥ “አሳ ኡትስተ” ያግስ። ሄ በሳን ዳሮ ማት ደኤስ፤ አሳ ኡባይ ኡትስ። አደ አሳ ታይቦይ እቻሹ ሙኩሉ ግዳና። 11 የሱሲ ኡይꬃ ኤክድ ፆሳ ጋላት ስሚድ ያን ኡትዳ አሳስ ግሽስ። ሞሉዋካ ኤክድ ሄሳዳ ኦꬅድ እምን፥ አሳይ ባ ኮይዳይሳ መላ ምስ። 12 ኤንቲ ኡባይ ካልዳፐ ጉየ፥ የሱሲ ባ ታማረታኮ፥ “እስባይካ ኢቶና መላ አትዳ ቲፍያ ሺሽተ” ያግስ። 13 ሄሳ ግሾ፥ ኤንቲ ኡባ ሺሽዶሶና። አሳይ ምን አትዳ ባንጋ ኡይꬃ ቲፍያ ሺሽድ ታማነ ናምኡ ጋይታ ኩንꬅዶሶና።

14 አሳይ የሱሲ ኦꬅዳ ማላታታ በእዳ ዎደ፥ “ሀይስ ቱማ ሀ አላምያ ያና ጌተትዳ ናብያ” ያግዶሶና። 15 የሱሲ ኤንቲ እያ ኦይክድ ዎልቃን ካዎ ኦꬃናዉ ሀነይሳ ኤርድ፥ ባርካ ዙማ ቦላ ዛሪድ ከይስ።

16 ሳአይ ኦማርስዳ ዎደ የሱሳ ታማረት አባኮ ዎꬍዶሶና። 17 ሳአይ ቃምዳ ግሾነ የሱሲ ቡሮ ኤንታኮ ይቦና ግሾ እያ ታማረት ዎጎሎን ገልድ አባ ፕንድ ቅፍርናሆማ ባናዉ ደንድዶሶና። 18 ዎልቃማ ጫርኮይ ጫርክዳ ግሾ አባይ ቃፄስ። 19 እቻሹ ዎይኮ ኡሱፑን ክሎ ምትረ ግደይሳ መላ ኤንቲ አባ ፕꬍድ ብዳፐ ጉየ፥ የሱሲ አባ ቦላራ ሄመትሸ የይሳ በእድ ያይዶሶና። 20 ሽን እ፥ “ባቦፍተ፥ ታና” ያግስ። 21 ኤንቲ ኡፋይትድ እያ ዎጎሉዋን ገልስዶሶና፤ ኢራካ ዎጎሎይ ኤንቲ ብያ አባ ጋፃ ጋክስ።

22 ዎንተꬃ ጋላስ አባፈ ሄፍንꬃን አትዳ ዳሮ አሳይ እስ ዎጎሎ ፃላል ደኤይሳ በእዶሶና። የሱሲ ባ ታማረታራ ዎጎሉዋን ገልድ፥ ኤንታራ ቦናይሳነ ኤንቲ ባንታርካ ብዳይሳ አኬክዶሶና። 23 ሽን ፅብራዶሳፐ ሀራ ዎጎሎት የሱሲ ፆሳ ጋላትን፥ አሳይ ኡይꬃ ምዳ በሳ ይዶሶና። 24 አሳይ የሱሲ ዎይኮ እያ ታማረት ያን ባይናይሳ በእድ፥ የሱሳ ኮያናዉ ዎጎሎታን ገልድ ቅፍርናሆማ ብዶሶና።

25 አሳይ የሱሳ አባፈ ሄፍንꬃን ደምዳ ዎደ፥ “አስታማርያዉ፥ ሃ አዉደ ያዲ?” ያግስ።

26 የሱሲ ዛሪድ፥ “ታኒ ህንተዉ ቱማ ኦዳይስ፤ ህንተ ታና ኮየይ ኡይꬅ ምድ ካልዳ ግሾሳፈ አትሽን፥ ማላታ በእዳ ግሾሳ ግደና። 27 ሳምያ ካꬃስ ኦꬆፍተ፥ ሽን መርና ደኦ እምያ ካꬃስ ኦꬅተ። ፆሳ አዋይ እ ኦꬃና መላ እያዉ ማታ እምዳ ግሾ ሄ ካꬃ አሳ ናአይ ህንተዉ እማና” ያግስ።

28 ያትን ኤንቲ፥ “ኑኒ ፆሳ ኦሱዋ ኦꬃናዉ አይ ኦꬃኔ?” ያግድ የሱሳ ኦይችዶሶና።

29 የሱሲ ዛሪድ፥ “ህንተ ኦꬃና መላ ፆሳይ ኮይያ ኦሶይ ሀይሳ፦ እ ኪትዳይሳ አማንተ” ያግስ።

30 ኤንቲ ዛሪድ፥ “ኑኒ በእድ፥ ነና አማናና መላ አይ ማላታ ነ በሳኔ? ነ አይ ኦꬃኔ? 31 ጌሻ ማፃፋን፥ ‘ኤንቲ ማና መላ ኡይꬁ ሳሎፐ እሚስ’ ጌተትድ ፃፈትዳይሳዳ ኑ አዋት መላ ቢታን ማና ምዶሶና” ያግዶሶና። ከሳ 6:4፥ 15፤ ማዝ 78:24.

32 የሱሲ፥ “ታኒ ህንተዉ ቱማ ኦዳይስ፤ ህንተዉ ሳሎፐ ቱማ ኡይꬃ እምዳይ ታ አዋፐ አትሽን፥ ሙሰ ግደና። 33 ህዛ፥ ፆሳይ እምያ ኡይꬃይ ሳሎፐ ዎꬍዳይስ አላምያስ ደኦ እመይሳ” ያግስ።

34 ኤንቲ ዛሪድ፥ “ጎዳዉ፥ ኑስ ሄ ኡይꬃ ኡባ ዎደ እማ” ያግዶሶና።

35 የሱሲ፥ “ታኒ ደኦ እምያ ኡይꬃ፤ ታኮ ያ ኦንካ ኡባራካ ኮሻተና። ቃስ ታና አማንያ ኡራይ ኡባራካ ሳሞተና። 36 ሽን ታኒ ህንተዉ ኦዳስ፤ ህንተ ታና በእደታ፥ ሽን አማነከታ። 37 ታ አዋይ ታዉ እምያ ኡባይ ታኮ ያና፤ ቃስ ታኮ ያ ኦናካ ካረ የድከ። 38 ታኒ ታ ኮያባ ኦꬃናዉ ግዶናሽን ታና ኪትዳይስ ኮያባ ኦꬃናዉ ሳሎፐ ያስ። 39 ታና ኪትዳይስ ኮየይ ሀይሳ፦ ታኒ እ ታዉ እምዳ ኡባታካ ዉርሰꬃ ጋላስ ሀይቆፐ ደንꬃና መላፐ አትሽን፥ እሱዋካ ꬋይሳና መላ ኮየና። 40 ህዛ፥ ታ አዋይ ኮየይ ሄሳ፦ ናኣ በእድ አማንያ ኡባይ መርና ደኡዋ ኤካና፤ ታኒ ሄ ኡባ ዉርሰꬃ ጋላስ መርና ደኦስ ሀይቆፐ ደንꬃና” ያግስ።

41 የሱሲ፥ “ታኒ ሳሎፐ ዎꬍዳ ኡይꬃ” ግዳ ግሾ፥ አይሁደት እያ ቦላ ዙዙምዶሶና። 42 ኤንቲ፥ “ሀይስ ኑኒ እያ አዋነ እያ አይዉ ኤርያ ዮሰፋ ናኣ የሱሳ ግደኔ? ያትን፥ እ ዋንድ፥ ‘ታኒ ሳሎፐ ዎꬋስ’ ጋናዉ ዳንዳኢ?” ያግዶሶና።

43 የሱሲ ዛሪድ፥ “እሶይ እሱዋራ ዙዙንꬃ አግተ። 44 ታና ኪትዳ ታ አዋይ ታኮ ኤህያ አሳፐ አትሽን፥ ታኮ ያናዉ ዳንዳእያ ኦንካ ባዋ። ታኒ ዉርሰꬃ ጋላስ እያ መርና ደኦስ ሀይቆፐ ደንꬃና። 45 ናበት፥ ‘ፆሳይ አሳ ኡባ ታማርሳና’ ያግድ ፃፍዶሶና። አዋ ስኤይስነ እያፐ ታማርያ ኦንካ ታኮ ዬስ። እሳ 54:13. 46 ፆሳ ማታፐ ይዳይሳፈ አትሽን፥ አዋ በእዳይ ኦንካ ባዋ፤ እያ ፃላል አዋ በእስ።

47 “ታኒ ህንተዉ ቱማ ኦዳይስ፤ ታና አማንያ ኦደስካ መርና ደኦይ ደኤስ። 48 ታኒ ደኦ እምያ ኡይꬃ። 49 ህንተ አዋት መላ ቢታን ማና ምዶሶና፥ ሽን ሀይቅዶሶና። 50 ሳሎፐ ያ ኡይꬃይ ሀይሳ፤ ሄ ኡይꬃ ምያ ኦንካ ሀይቀና። 51 ሳሎፐ ይዳ ደኦ ኡይꬃይ ታና። ኦንካ ሀ ኡይꬃ ሚኮ መርናዉ ዳና። ቃስ ሀ አላመይ ደኦን ዳና መላ ታኒ ህንተዉ እማና ኡይꬃይ ታ አሹዋ” ያግስ።

52 አይሁደት፥ “ሀ አደይ ባ አሹዋ ኑ ማና መላ ኑስ ዋትድ እማናዉ ዳንዳኢ?” ያግድ ባንታ ግዶን ፓላምዶሶና።

53 ሄሳ ግሾ፥ የሱሲ ኤንታኮ፥ “ታኒ ህንተዉ ቱማ ኦዳይስ፤ አሳ ናኣ አሹዋ፥ ህንተ ሞና እፅኮ፥ ቃስ እያ ሱꬃ ህንተ ኡዮና እፅኮ፥ ህንተዉ ደኦይ ባዋ። 54 ታ አሹዋ ምያ ኡራስነ ታ ሱꬃ ኡያ ኡራስ መርና ደኦይ ደኤስ። ታኒ ዉርሰꬃ ጋላስ እያ ሀይቆፐ ደንꬃና። 55 ታ አሾይ ቱማ ካꬅ፤ ታ ሱꬃይካ ቱማ ኡሹ። 56 ታ አሹዋ ምያ ኡራይነ ታ ሱꬃ ኡያ ኡራይ ታናን ደኤስ፤ ታካ እያን ደአይስ። 57 ደኦ አዋይ ታና ኪትን፥ ታኒ እያ ባጋራ ደኦን ደኤይሳዳ፥ ታና ምያ ኡራይካ ታ ጋሶን ደኦን ዳና። 58 ሳሎፐ ዎꬍዳ ኡይꬃይ ሀይሳ፦ ህንተ አዋት ምድ ሀይቅዳ ማና መላ ግደና፤ ሀ ኡይꬃ ምያ ኡራይ መርናዉ ዳና” ያግስ።

59 የሱሲ ቅፍርናሆማ ካታማን አይሁደ ዎሳ ኬꬃን ሀይሳ ታማርስስ።

60 የሱሳ ታማረታፐ ዳርያ ባጋይ ሄሳ ስእዳ ዎደ፥ “ሀይስ ገሎና ትምርተ፤ ሀይስ ኦደስ ገሊ?” ያግዶሶና።

61 የሱሲ ባ ታማረት ሄሳስ ዙዙምዳይሳ ኤርድ፥ “ሀይስ ህንተና ꬉቢ? 62 ያትን፥ አሳ ናአይ ካሰ ደእያሱዋ ፑደ ከይሽን ህንተ በእድ ዎይጋንደቲ? 63 ጌሻ አያናይ ደኦ እሜስ፤ አሳ ዎልቅ አይኮካ ማደና። ታ ህንተዉ ኦድያ ቃላይ ደኦ እምያ ጌሻ አያናፐ ዬስ። 64 ሽን ህንተ ግዶን አማኖናይሳት ደኦሶና” ያግስ። አማኖናይሳት ኦናንተኮ የሱሲ ኮይሮፐ ዶምድ ኤሬስ። ቃስ ባና አꬅድ እማናይ ኦነኮ ኤሬስ። 65 ቃስካ የሱሲ፥ “አዋይ ባ ጎና ኦንካ ታኮ ያናዉ ዳንዳኤና ጋዳ ታኒ ኦድዳይ ሄሳ ግሾሳ” ያግስ።

66 ሄሳ ጋሶን፥ የሱሳ ካለይሳታፐ ዳሮት እያ አግድ ጉየ ስምዶሶና፤ ዛር እያ ካልቦኮና። 67 የሱሲ ባ ታማነ ናምኡ ታማረታኮ፥ “ህንተካ አግድ ባናዉ ኮዬቲ?” ያግድ ኦይችስ።

68 ስሞን ጰፅሮስ ዛሪድ፥ “ጎዳዉ፥ ኑኒ ኦደኮ ባኔ? ነዉ መርና ደኦ እምያ ቃላይ ደኤስ። ማቶ 16:16፤ ማር 8:29፤ ሉቃ 9:20. 69 ኔኒ ፆሳ ጌሻ ግደይሳ ኑኒ አማኖስነ ኤሮስ” ያግስ።

70 የሱሲ ኤንታኮ፥ “ታኒ ህንተና ታማነ ናምአታ ዶራብክና? ሽን ህንተፈ እሶይ ፃላሄ” ያግስ። 71 የሱሲ ሄሳ ግዳይ ስሞና ናኣ አስቆሮታ ይሁዳሳ። ይሁድ የሱሳ አꬅድ እማናዉ ደእያ ታማነ ናምኡ ታማረታፐ እሱዋ።