1 ሄሳፈ ጉየ፥ አይሁደት የሱሳ ዎꬋናዉ ኮይያ ግሾ እ ይሁዳ አግድ ጋልላን ስመረቴስ። 2 አይሁደት ቦንችያ ሻቃራ ባለይ ቦንቸታናዉ ማትስ። ሌወ 23:34፤ ዛረ 16:13. 3 ሄሳ ግሾ፥ የሱሳ እሻት፥ “ነ ታማረት ኔኒ ኦꬅያ ማላታታ በአና መላ ሀይሳፈ ደንዳዳ ይሁዳ ቢታ ባ። 4 ባዉ ኤረታናዉ ኮያ አስ ኦንካ ባ ኦሱዋ ገንና። ኔኒ ሀይሳታ ኦꬃዳ ነባ አላምያ ኤርሳ” ያግዶሶና። 5 እያ እሻት ሄሳ ግዳይ እያን አማንቦና ግሾሳ።

6 የሱሲ ኤንታኮ፥ “ታዉ እንጀ ዎደይ ጋክቤና፥ ሽን ህንተዉ ኡባ ዎደይ እንጀቴስ። 7 አላመይ ህንተና እፃናዉ ዳንዳኤና፥ ሽን ታኒ አላምያ ኦሶይ ኢታ ግደይሳ ማርካትያ ግሾ ታና እፄስ። 8 ህንተ ባልያ ቢተ፤ ታ ዎደይ ጋክቦና ግሾ ታኒ ባልያ ቢከ” ያግስ። 9 እ ሄሳ ግድ ጋልላን አትስ። 10 እያ እሻት ባኣለ ቦንቻናዉ ብዳፐ ጉየ የሱሲ ኦናካ ኤርሶና ቆሳን ሄ በሳ ብስ። 11 አይሁደት ባኣለ ቦንችያ በሳን፥ “እ አዉን ደኢ?” ያግድ እያ ኮይዶሶና።

12 አሳይ ካልካሽድ እያባ ኦደቶሶና። ባጋይ፥ “እ ሎኦ አስ” ግያ ዎደ ሀራት ቃስ፥ “አካይ፥ እ አሳ ባለꬄስ” ያጎሶና። 13 ሽን አይሁደ ሀላቃታስ ያይዳ ግሾ ኦንካ እያባ ቆንጨን ኦደተና።

14 ባልያ ቦንችድ ግዶ ጋꬅያ ዎደ የሱሲ ፆሳ ኬꬅ ብድ ታማርሶ ኦይክስ። 15 አይሁደት፥ “ሀ አደይ ትምርተ ታማሮና ሀይሳ ኡባ ዋት ኤርዴ?” ያግድ ማላለትዶሶና።

16 የሱሲ ዛሪድ፥ “ታ ታማርስያ ትምርተይ ታና ኪትዳ ፆሳ ማታፐ ያ ትምርተፈ አትሽን፥ ታባ ግደና። 17 ፆሳ ሸንያ ኦꬃናዉ ኮይያ ኦንካ ሀ ትምርተይ ፆሳ ማታፐ ያኮነ ዎይኮ ታኒ ታፐ ኦድያኮ ኤራና። 18 ባባ ኦድያ ኦንካ ባ ሁጰ ቦንቾ ኮዬስ። ሽን ባና ኪትዳይሳ ቦንቹዋ ኮይያ ኦንካ እ ቱማንቾ፤ እያን ዎርዶይ ባዋ። 19 ሙሰይ ህንተዉ ህግያ እሚስ፥ ሽን ህንተፈ ኦንካ ህግያ ናግቤና። ያትን አይስ ታና ዎꬋናዉ ኮዬቲ?” ያግስ።

20 አሳይ ዛሪድ፥ “ነና ፃላሄይ ኦይክስ፤ ነና ዎꬋናዉ ኦኔ ኮየይ?” ያግዶሶና።

21 የሱሲ፥ “ታኒ እስ ማላታ ኦꬅን ህንተ ኡባይ ማላለትደታ። 22 ህንተ፥ ህንተ ናይታ ቃፃራና መላ ሙሰይ ኪትስ። ሽን ቃፃሮ ህንተ ማይዛት ዶምዶሶናፐ አትሽን፥ ሙሰ ግደና። ሄሳ ግሾ፥ ህንተ ሳምባታ ጋላስ አደ ናይታ ቃፃሬታ። ሌወ 12:3፤ መ 17:10. 23 ሙሰ ህገይ ኪትዳ ግሾ፥ ህንተ ሳምባታ ጋላስ ቃፃርያባ ግድኮ፥ ታኒ እስ አሳ ኩመꬃ አሳተꬃ ፓꬅዳ ግሾ፥ ታራ አይስ ካጬቲ?ዮሀ 5:9. 24 ቱማ ፕርዳ ፕርድተፐ አትሽን፥ አሳ ሶምኦ በእድ ፕርዶፍተ” ያግስ።

25 የሩሳላመ አሳፐ እሶት እሶት፥ “ኤንቲ ዎꬋናዉ ኮይያ ኡራይ ሀይሳ ግደኔ? 26 ሄኮ፥ እ ቆንጨን ኦዴስ፤ ኤንቲ እያ አይኮካ ጎኮና። እ ክርስቶሳ ግደይሳ አይሁደ ሀላቃት ቱማ ኤርዶናሻ? 27 ክርስቶስ ያ ዎደ እ አዉፐ ያኮ ኦንካ ኤረና፥ ሽን እ አዉፐ ይዳኮ ኑ ኤሮስ” ያግዶሶና።

28 የሱሲ ፆሳ ኬꬃን ታማርስሸ ባ ቃላ ꬎቁ ኦꬅድ፥ “ቱማ ህንተ ታኒ ኦነኮነ ታ አዉፐ ይዳኮ ኤሬቲ? ታኒ ታ ማታን ያቢከ፥ ሽን ታና ኪትዳይስ ቱማንቾ፤ ህንተ እያ ኤረከታ። 29 ሽን ታኒ እ ኪትን እያ ማታፐ ይዳ ግሾ እያ ኤራይስ” ያግስ።

30 ሄሳ ግሾ፥ ኤንቲ እያ ኦይካናዉ ኮይዶሶና። ሽን እያ ዎደይ ቡሮ ጋክቦና ግሾ ኦንካ እያ ቦላ ኩሸ ዎꬅቤና። 31 ሽን ዳሮ አሳይ የሱሳ አማንድ፥ “ክርስቶስ ያ ዎደ ሀ ኡራይ ኦꬅዳ ማላታታፐ ዳርያ ማላታ ኦꬃነዬ?” ያግዶሶና።

32 ፋርሳወት ዳሮ አሳይ የሱሳባ ካልካሸይሳ ስእዶሶና። ካህነ ሀላቃትነ ፋርሳወት እያ ኦይꬅድ ቃሽሳናዉ ፆሳ ኬꬅ ናገይሳታ ኪትዶሶና።

33 የሱሲ፥ “ታኒ ህንተራ ጉꬃ ዎደ ጋምአና፤ ሄሳፈ ጉየ ታና ኪትዳይሳኮ ባና። 34 ህንተ ታና ኮያና፥ ሽን ደመከታ። ታኒ ደእያሱዋ ህንተ ያናዉ ዳንዳኤከታ” ያግስ።

35 አይሁደት እሶይ እሱዋራ፥ “ሀይስ ኑኒ ደሞናሶ አዉ ባና ሀኒ? ግርከ ካታማን ደእያ አይሁደታኮ ብድ ግርከታ ታማርሳናዉ ሀንዬ? 36 ‘ህንተ ታና ኮያና፥ ሽን ደመከታ’ ቃስ፥ ‘ታኒ ደእያሱዋ ህንተ ያናዉ ዳንዳኤከታ’ ጉሳይ አይ ጉሴ?” ያግዶሶና።

37 ባልያ ቦንችያ ጋላሳታፐ ዎልቃማነ ዉርሰꬃ ጋላሳን የሱሲ ደንድድ፥ ባ ቃላ ꬎቁ ኦꬅድ፥ “ሳሞትዳ ኦንካ ታኮ ይድ ኡዮ። ሌወ 23:36. 38 ታና አማንያ ኦንካ ጌሻ ማፃፋይ ግዳይሳዳ ደኦ እምያ ፑልቶ ሃꬃይ እያፐ ጎጋና” ያግስ። ህዝ 47:1፤ ዛካ 14:8. 39 እ ሄሳ ግዳይ እያ አማንዳይሳት ኤካናዉ ደእያ ጌሻ አያናባ። የሱሲ ቡሮ ቦንቸትቦና ግሾ፥ ሄ ዎደ ጌሻ አያናይ እመትቤና።

40 ሄ አሳፐ ዳሮት እ ገይሳ ስእድ፥ “ቱማ ሀይስ ናብያ”*ናብያ፦ ሀ በሳን ናብያ ጌተትዳይ ያና ግድ ኤንቲ ናግያ ናብያ ቆንጭሴስ። (ዮሀ 1:21 ፄልተ።) ያግዶሶና።

41 ሀራት ቃስ፥ “ሀይስ ክርስቶሳ” ያግዶሶና።

ሽን ሀራት ቃስ፥ “ክርስቶስ ጋልላፐ ዋንድ ከዪ? 42 ጌሻ ማፃፋይ፥ ‘ክርስቶስ ዳዊታ ሼሻፐ ዳዊቲ ደእዳ ቤተለመ ካታማፐ ያና’ ያገነዬ?” ያግዶሶና። 2 ሳሜ 7:12፤ ምክ 5:2. 43 ሄሳ ግሾ፥ የሱሳ ጋሶን አሳይ ባንታ ግዶን ሻከትዶሶና። 44 ሄ አሳፐ እሶት እሶት እያ ኦይካናዉ ኮይዶሶና፥ ሽን ኦንካ እያ ቦላ ኩሸ ዎꬅቤና።

45 ፆሳ ኬꬃ ናገይሳት ካህነ ሀላቃታኮነ ፋርሳወታኮ ጉየ ስም ይን ኤንቲ፥ “አይስ እያ ኤህበከቲ?” ያግድ ኦይችዶሶና።

46 ፆሳ ኬꬃ ናገይሳት ኤንታኮ፥ “ሀ አደይ ኦደተይሳꬆ ኦንካ ኦደተና” ያግድ ዛርዶሶና።

47 ፋርሳወት ዛሪድ፥ “እ ህንተናካ ባለꬅዴ? 48 አይሁደ ሀላቃታፐ ዎይኮ ፋርሳወተፐ እያ አማንዳ አስ ደኢ? 49 ሙሰ ህግያ ኤሮና ሀ አሳይ ባደትዳሳታ” ያግዶሶና።

50 ፋርሳወታፐ እሶይ ቃማ የሱሳኮ ብዳ ንቆድሞስ ኤንታኮ፥ ዮሀ 3:1፥ 2. 51 “እስ አስ ግያባ ስኦና ዎይኮ እ አይ ኦꬅዳኮ ኤሮና ደእሸ ኮይሮትድ እያ ቦላ ፕርደይስ ኑ ህግያን ደኢ?” ያግስ።

52 ኤንቲ ዛሪድ፥ “ኔንካ ቃስ ጋልላ ቢታ አሴ? ጋልላ ቢታፈ ናበይ ከዮናይሳ ጌሻ ማፃፋፐ ፕልጋዳ ደማ” ያግዶሶና። 53 እሶይ እሶይ አግድ ባ ሶ ባ ሶ ብስ።