1 ሽን የሱሲ ሻማሆ ዙማ ቦላ ከይስ። 2 ቃስ ዎንተꬃ ጋላስ ጉራ ፆሳ ኬꬅ ስምስ። ዳሮ አሳይ እያኮ ይን ኡትድ ኤንታ ታማርስስ። 3 ህገ አስታማረትነ ፋርሳወት ላይማትሽን ኦይክዳ እስ ማጫስዉ እያኮ ኤህዶሶና። ኤንቲ አሳ ኡባ ስንꬃን እዮ ኤስድ፥ 4 “አስታማርያዉ፥ ሀ ማጫስያ ላይማትሽን ኑ ኦይክዳ። 5 ሙሰ ህገይ ሀን መላ ማጫስ ሹቻን ጫደታ ሀይቃና መላ ኪቴስ። ያትን፥ ኔኒ ዎይጋይ?” ያግዶሶና። ሌወ 20:10፤ ዛረ 22:22-24.

6 ኤንቲ ሄሳ ግዳይ የሱሳ ፓጭድ እያ ሞትያባ ደማናሳ። ሽን የሱሲ ሆክድ ባ ብራን ቢታ ቦላ ፃፍስ። 7 ኤንቲ እያ ዛር ዛር ኦይችድ አጎና እፅን፥ ፑደ ꬎቁ ግድ፥ “ህንተ ግዶን ናጋራ ኦꬅቦና አስ ኮይሮትድ እዮ ሹቻን ጫዶ” ያግስ። 8 ቃስካ ሆክድ ቢታ ቦላ ፃፍስ።

9 ኤንቲ ሄሳ ስእዳ ዎደ ጭማታፐ ዶምድ እሶይ እሶይ ከይሸ ዉርዶሶና። የሱሳ ፃላል ሄ በሳን ኤቅዳ ማጫሴራ አትስ። 10 እ ፑደ ꬎቁ ግድ ማጫሴኮ፥ “ማጫሰተ፥ አሳት አዉ ብዶና? ነ ቦላ ፕርድዳይ ኦንካ ባዌ?” ያግስ።

11 ማጫስያ፥ “ጎዳዉ፥ ኦንካ ባዋ” ያጋሱ።

የሱሲ ዛሪድ፥ “ታንካ ነ ቦላ ፕርድከ። ባ፤ ዛራዳ ናጋራ ኦꬆፋ” ያግስ።

12 ቃስካ የሱሲ አሳኮ፥ “ታኒ አላምያስ ፖኦ። ታና ካልያ ኦንካ ደኦ እምያ ፖኡዋ ኤካናፐ አትሽን፥ ꬉማን ስመረተና” ያግድ ኦድስ። ማቶ 5:14፤ ዮሀ 9:5.

13 ፋርሳወት፥ “ኔኒ ነባ ማርካታሳ፥ ሽን ነ ማርካተꬃይ ቱማ ግደና” ያግዶሶና። ዮሀ 5:31.

14 የሱሲ ዛሪድ፥ “ታኒ ታባ ማርካትኮካ ታ ማርካተꬃይ ቱማ። አይስ ጊኮ፥ ታኒ አዉፐ ይዳኮ ቃስ አዉ ብያኮ ኤራይስ፥ ሽን ህንተ ኤረከታ። 15 ህንተ አሳ ቆፋን ፕርደታ፤ ታኒ እስ አሳ ቦላካ ፕርድከ። 16 ታኒ ፕርድያባ ግድኮካ ታ ፕርዳይ ቱማ። አይስ ጊኮ፥ ታና ኪትዳ ታ አዋይ ታራ ደኤስፐ አትሽን፥ ታኒ ታርካ ደእከ። 17 ናምኡ አሳ ማርካተꬅ ቱማ ግደይስ ህንተ ህግያን ፃፈትስ። ዛረ 19:15. 18 ታኒ ታባ ታ ሁጰን ማርካታይስ፤ ቃስ ታና ኪትዳ ታ አዋይካ ታባ ማርካቴስ” ያግስ።

19 ኤንቲ፥ “ነ አዋይ አዉን ደኢ?” ያግድ እያ ኦይችዶሶና።

የሱሲ ዛሪድ፥ “ህንተ ታና ዎይኮ ታ አዋ ኤረከታ። ታና ኤርዳባ ግድያኮ፥ ህንተ ታ አዋካ ኤራናሽን” ያግስ።

20 የሱሲ ፆሳ ኬꬃን ሙፃታ ሚሽያ የግያ ሳፅነይ ደእያ በሳን ሄሳ ታማርስስ። እያ ቃማይ ቡሮ ጋክቦና ግሾ ኦንካ እያ ኦይክቤና።

21 ቃስካ የሱሲ ኤንታኮ፥ “ታኒ ባና፤ ህንተ ታና ኮያና፥ ሽን ህንተ አቶተꬅ ደሞና ህንተ ናጋራን ሀይቃና። ታኒ ብያ በሳ ህንተ ባናዉ ዳንዳኤከታ” ያግስ።

22 አይሁደ ሀላቃት፥ “እ፥ ‘ታኒ ብያ በሳ ህንተ ባናዉ ዳንዳኤከታ’ ያጌስ። እ ባና ባርካ ዎꬋነዬ?” ያግዶሶና።

23 የሱሲ ዛሪድ፥ “ህንተ ጋርሳፈ፤ ታኒ ቦላፈ። ህንተ ሀ አላምያፐ፥ ታኒ ሀ አላምያፐ ግድከ። 24 ህንተ አቶተꬅ ደሞና ህንተ ናጋራን ሀይቃና ጋዳ ታኒ ህንተዉ ኦድዳይ ሄሳሳ። ‘ታኒ ታና ግደይሳ’ ህንተ አማኖና እፅኮ ህንተ አቶተꬅ ደሞና ህንተ ናጋራን ሀይቃና” ያግስ።

25 ኤንቲ፥ “ኔኒ ኦኔ?” ያግድ ኦይችዶሶና።

የሱሲ ዛሪድ፥ “ታኒ፥ ኮይሮፐ ህንተዉ ኦድዳ ታና። 26 ታኒ ህንተባ ኦዳዳ ፕርድያባይ ዳሮባይ ደኤስ። ሽን ታና ኪትዳይስ ቱማንቾ፤ ቃስ ታኒ እያፐ ስእዳይሳ ፃላላ አላምያስ ኦዳይስ” ያግስ።

27 የሱሲ ባ አዋባ ኦደይሳ ኤንቲ አኬክቦኮና። 28 ሄሳ ግሾ፥ የሱሲ ኤንታኮ፥ “ህንተ አሳ ናኣ ፑደ ꬎቁ ኦꬅያ ዎደ ታኒ ታና ግደይሳ ህንተ ኤራና። ቃስካ ታኒ ታ ማታን አይኮካ ኦꬆናይሳነ ታ አዋይ ታና ታማርስዳይሳ ኦደይሳ ህንተ ኤራና። 29 ታና ኪትዳይስ ታራ ደኤስ። ታኒ ኡባ ዎደ እያ ኡፋይስያባ ኦꬅያ ግሾ እ ታና ታ ፃላላ አግቤና” ያግስ።

30 የሱሲ ሄሳ ኦድሽን ስእዳ ዳሮ አሳይ እያ አማንዶሶና።

31 የሱሲ ባና አማንዳ አሳታኮ፥ “ህንተ ታ ትምርትያስ ኪተትኮ ቱማ ታና ካለይሳታ። 32 ህንተ ቱማ ኤራና፤ ቱማይካ ህንተና አይለተꬃፈ ከሳና” ያግስ።

33 ኤንቲ ዛሪድ፥ “ኑኒ አብራሃመ ሼሽ፤ ኑኒ ኦደስካ አይለትቦኮ። ኔኒ ዎይጋዳ፥ ‘ህንተ አይለተꬃፈ ከያና’ ጋይ?” ያግዶሶና። ማቶ 3:9፤ ሉቃ 3:8.

34 የሱሲ ዛሪድ፥ “ታኒ ህንተዉ ቱማ ኦዳይስ፤ ናጋራ ኦꬅያ ኦንካ ናጋራ አይለ። 35 አይለይ መርናዉ ሶ አሳራ ዴና፥ ሽን ናአይ መርናዉ ሶ አሳራ ደኤስ። 36 ናአይ ህንተና አይለተꬃፈ ከስኮ ህንተ አይለተꬃፈ ቱማ ከያና። 37 ህንተ አብራሃመ ሼሽ ግደይሳ ታኒ ኤራይስ። ሽን ታ ቃላይ ህንተ ዎዛናን ባይና ግሾ፥ ታና ዎꬋናዉ ኮዬታ። 38 ታኒ ታ አዋይ ታና በስዳይሳ ኦዳይስ፥ ሽን ህንተካ ህንተ አዋፐ ስእዳይሳ ኦꬄታ” ያግስ።

39 ኤንቲ ዛሪድ፥ “ኑ አዋይ አብራሃመ” ያግዶሶና።

የሱሲ ኤንታኮ፥ “ህንተ አብራሃመ ናይታ ግድያኮ እ ኦꬅዳይሳ ኦꬃና። 40 ሽን ፆሳፈ ስእዳ ቱማ ኦድዳ ታና ህንተ ዎꬋናዉ ኮዬታ። አብራሃመይ ሄሳዳ ኦꬅቤና። 41 ህንተ፥ ህንተ አዋይ ኦꬅዳይሳ ኦꬄታ” ያግስ።

ኤንቲ ዛሪድ፥ “ኑኒ ቱማ ፆሳ ናይታ፤ ኑስ እስ አዋይ ፆሳ ፃላል ደኤስ” ያግዶሶና።

42 የሱሲ ኤንታኮ፥ “ፆሳይ ቱማ ህንተ አዋ ግድያኮ ህንተ ታና ዶሳና፤ አይስ ጊኮ፥ ታኒ ፆሳ ማታፐ ያዳ ሀይሳን ደአይስ። ታና እ ኪትስፐ አትሽን፥ ታኒ ታ ማታን ያቢከ። 43 ታኒ ገይሳ ህንተ ስአናዉ ኮዮና ግሾ ታ ግያባይ ህንተዉ ገለና። 44 ህንተ፥ ህንተ አዋ ፃላሄ ናይታ። ቃስ ህንተ፥ ህንተ አዋይ አሞትያባ ኦꬃናዉ ኮዬታ። እ ኮይሮፐ ዶምድ ሸምፖ ዎይሳ። ቱም እያን ባይና ግሾ እ ቱማ እፄስ። ዎርዶይ እያዉ መꬎ ግድዳ ግሾነ እ ዎርዶ አዋ ግድያ ግሾ ዎርዶ ኦደትሸ ባፐ ኦደቴስ። 45 ታኒ ቱማ ኦዳይስ፥ ሽን ህንተ ታና አማነከታ። 46 ህንተፈ፥ ‘ኔኒ ናጋራ ኦꬅሽን ታ በአስ’ ጋናዉ ዳንዳኤይ ኦኔ? ታኒ ቱማ ኦደትያባ ግድኮ ታና አይስ አማነከቲ? 47 ፆሳ አስ ፆሳይ ግያባ ስኤስ። ህንተ ፆሳ አስ ግዶና ግሾ ፆሳይ ግያባ ስኤከታ” ያግስ።

48 አይሁደት ዛሪድ፥ “ ‘ኔኒ ሳማረ አስ፤ ነናን ቱና አያናይ ደኤስ’ ግሸ ልከ ግዶኮ?” ያግዶሶና።

49 የሱሲ ኤንታኮ “ታ ቦላ ቱና አያን ባዋ። ታኒ ታ አዋ ቦንቻይስ፥ ሽን ህንተ ታና ካዉሸታ። 50 ታኒ ታ ሁጰ ቦንቾ ኮይከ፤ ታኒ ቦንቸታና መላ ኮየይስነ ታዉ ፕርደይስ ደኤስ። 51 ታኒ ህንተዉ ቱማ ኦዳይስ፤ ታ ቃላ ናግያ ኦንካ ሀይቀና” ያግስ።

52 አይሁደት ዛሪድ፥ “ነ ቦላ ቱና አያናይ ደኤይሳ ኑኒ ሀእ ኤርዳ። አብራሃመይ ሀይቅስ፤ ናበትካ ሀይቅዶሶና። ሽን ኔኒ፥ ‘ታ ቃላ ናግያ ኦንካ ሀይቀና’ ያጋሳ። 53 ኔኒ ሀይቅዳ ኑ አዋ አብራሃመፐ አꬋዬ? ናበትካ ቃስ ሀይቅዶሶና። ኔኒ ነና ኦና ጋዳ ቆፓይ?” ያግዶሶና።

54 የሱሲ፥ “ታኒ ታና ቦንችኮ ታ ቦንቾይ ሀዳ። ህንተ፥ ‘ኑ ፆሳ’ ግያ ታ አዋይ እ ታና ቦንቼስ። 55 ህንተ እያ ኤሮና እፅኮ ታኒ እያ ኤራይስ። ታኒ እያ ኤርከ ጊኮ ህንተ መላ ዎርዶታይስ። ሽን ታኒ እያ ኤራይስ፤ ቃስ እያ ቃላካ ናጋይስ። 56 ህንተ አዋይ አብራሃመይ ታ ዩሳ ጋላሳ በእድ ኡፋይታናዉ አሞትስ፤ በእድካ ኡፋይትስ” ያግስ።

57 አይሁደት ዛሪድ፥ “ሀር አቶሽን፥ ነዉ እሻታሙ ላይꬅ ኩምቤናሽን ዋናዳ አብራሃመ በአስ ጋይ?” ያግዶሶና።

58 የሱሲ ኤንታኮ፥ “ታኒ ህንተዉ ቱማ ኦዳይስ፤ አብራሃመይ የለታናፐ ካሰ፥ ‘ታኒ ታና’ ” ያግስ።

59 ሄሳ ግሾ፥ ኤንቲ የሱሳ ጫዳናዉ ሹች ኤክዶሶና። ሽን የሱሲ ኤንታፈ ጌምድ ፆሳ ኬꬃፈ ከይድ ብስ።